Display Style:
Column Style
येँ महानगरं पशुपतिइ स्वगः मेशिनसहित शवदाहगृह दय्किइगु
अनलागा १२ ११४०,असोज २८ बुधवाः | अनलागा १२ ११४०,असोज २८ बुधवाः
येँ महानगरपालिकाया आर्थिक ग्वाहालिं पशुपतिइ वागमती पारिइ (तिलगंगाय्) स्वगू विद्युतीय शवदाह मेशिन सहित शवदाह गृह निर्माण याये त्यःगु दु।
थौं येँ महानगरपालिका व पशुपति क्षेत्र विकास कोषया दथुइ सम्झौता पत्रय् ल्हाःचिं तःगु दु। येँ महानगरपालिकाया मेयर बिद्यासुन्दर शाक्य व प्रमुख प्रशासकीय अधिकृत एकनारायण अर्यालया उपस्थितिइ सह–सचिव राजेश्वर ज्ञवाली व पशुपति क्षेत्र विकास कोषया सदस्य सचिव डाक्टर प्रदीप ढकालं सम्झौता पत्रय् ल्हातिं तयादिगु खः।
सम्झौता कथं शवदाहगृह निर्माण यायेत कोषं सार्वजनिक सूचंपाखे बोलपत्र आव्ह्वान याये धुकुगु व उगु बोलपत्र आःतक मूल्याङ्कनया झ्वलय् उगु खरिद प्रक्रिया टुंगोय्थ्य किइगु व बोलपत्रदाता छनोट यायेगु, आसयया सूचना प्रकाशन यायेगु व छनोट जूगु बोलपत्रदाता नाप सम्झौता यायेगु व कार्यादेश कायेगु ज्या कोषं याइ। सम्झौता पत्रय् शवदाह गृहया न्ह्यने खनेदुगु शिलापत्रय् येँ महानगरपालिकां अनुदानय् दयेके त्यःगु शवदाह गृह धया च्वयातःगु धका धाःगु दु।
सम्झौता पत्रय् ल्हाचि तये धुका थःगु खँ तयेगु झ्वलय् मेयर शाक्यं कोष गुलि फु उलि याकन शिलान्यास याना खुलाया दुने उलेज्या याना सञ्चालनय् हयेत इनाप याःगु दु। ‘येँ महानगरपालिकां विगतय् जनसरोकारया विषय सम्वोधन यायेगु याना वयाच्वनागु दु धका धयादिगु खः। येँ महानगरपालिका थःपिन्स यायेगु ज्या गुलि न ज्या नाप ज्वलागु संघ–संस्था नाप सहकार्य याना वयाच्वनागु दु धका मेयर शाक्यं धयादिसे ‘पशुपति क्षेत्र् विद्युतीय शवदाह निर्माण यायेगु ज्याय् जिमिसं पशुपति क्षेत्र विकास कोष नाप सहकार्य याये त्यनागु खः।
शाक्यं आः दुगु निगु विद्युतीय शवदाह मेशिनं चाप फये मफुगुलि महानगरपालिकाया आर्थिक ग्वाहालिं निर्माण जुइ त्यःगु थप स्वगु मेशिनं छु अपुइगु धका मेयर शाक्य धयादिगु खः ।
असोज २० गते मेयर शाक्यया अध्यक्षताय् च्वगु येँ महानगरपालिकाया ५१ क्वःगु कार्यपालिका बैठकं पशुपतिइ शवदाह गृह निर्माणया लागि ज्या न्ह्याकेत खर्च अनुदान बिःगु निर्णय याःगु खः।
येँ महानगरपालिकाया आर्थिक वर्ष २०७७÷०७८ य् शवदाह गृह निर्माणया लागि १५ करोड बजेट छुटे याःगु धका धयादिसे भौतिक पूर्वाधार निर्माणया लागि आर्थिकय् छु च्युउता मकायेत इनाप यासे ज्या इलय् क्वचायेकेत सुझाव बियादिगु दु। शाक्यं येँ महानगरपालिकां १५ ग्वः एम्बुलेन्स न्यायेगु प्रक्रिया न्हयाकुगु जानकारी बिःगु दु।
न्हुगु मन्त्रिपरिषद विस्तार कृष्णगोपाल शहरी बिकास मन्त्री
लहानान्युज | अनलागा १२ ११४०,असोज २८ बुधवाः
प्रधानमन्त्री केपी शर्मा ओलीं मन्त्रिपरिषद विस्तार व छु सदस्यपिनिगु जिम्मेवारी हेरफेर याःगु दु।
प्रधानमन्त्री ओलीं उपप्रधानमन्त्री ईश्वर पोखरेलयात रक्षा मन्त्रालयया जिम्मेवारीपाखे चिइका प्रधानमन्त्री तथा मन्त्रिपरिषद कार्यालयया जिम्मेवारी बिःगु दु धाःसा रक्षा मन्त्रालय प्रधानमन्त्री ओलीं थःम्हेसिया हे तःगु दु।
अथेहे विष्णु पौडेलयात अर्थ मन्त्रालय, कृष्णगोपाल श्रेष्ठयात शहरी विकास मन्त्रालय व लीलानाथ श्रेष्ठयात महिला, बालबालिका तथा ज्येष्ठ नागरिक मन्त्रालयया जिम्मेवारी बिःगु दु। थ्व स्वया न्ह्यः महिला बालबालिका मन्त्री पार्वत गुरुङयात सञ्चार तथा सूचना प्रविधि मन्त्रालयया जिम्मेवारी बिःगु दु।
राष्ट्रपति कार्यालयं विज्ञप्ति पिकया प्रधानमन्त्रीया सिफारिसय् राष्ट्रपति विद्यादेवी भण्डारीं मन्त्रीपिन्त नियुक्ति, हेरफेर व कार्यविभाजन याःगु दु धका उल्लेख याःगु दु।
२,६३८ म्हेसित कोरोना सक्रमण पुष्टि
लहानान्युज | अनलागा १२ ११४०,असोज २८ बुधवाः
थौं देय् यंकं २,६३८ म्हेसित कोरोना सक्रमण पुष्टि जूगु दु।
स्वास्थ्य मन्त्रालयया थौं नियमित पत्रकार सम्मेलनय् १३,९४७ म्हेसिगु पीसीआर परीक्षणय् याःगुलि २,६३८ म्हेसिगु रिपोर्ट पोजेटिभ वःगु धका जानकारी बिःगु दु।
अथेहे, थौंया २४ घण्टाया दुने २,१७४ म्ह कोरोना संक्रमणमुक्त जुयाः छेँय् लिहाँ वंगु दु धका मन्त्रालय धाःगु दु। थ्व नाप आःतक सक्रमणमुक्त जुपि ८०,९५४ म्ह थ्यंगु दु।
थ्व ल्याखं आःतक देय् यंकं कोरोना संक्रमित जूपि १,१७,९९६ म्ह थ्यंगु दु।
येँ ९९६म्ह नाप स्वनिगः दुने १,४०३म्ह कोरोना संक्रमण पुष्टि
लहानान्युज | अनलागा १२ ११४०,असोज २८ बुधवाः
स्वनिगः दुने थौं बुधवाः छन्हुं हे १,४०३ म्हेसित कोरोना संक्रमित पुष्टि जूगु दु।
थौं स्वनिगलय् दुनें येँय् जक ९,९६ म्हेसित कोरोन सक्रमण जूगु दु
अथेहे यलय् ३०५ म्ह व ख्वपय् १०२ म्हेसित कोरोना सक्रमण जूगु खः।
कार्तिक ७ गते तक विदेशी च्यानल क्लिन फिड जुइमाः
लहानान्युज | अनलागा १२ ११४०,असोज २८ बुधवाः
सरकारं वइगु कार्तिक ७ गते तक विदेशी च्यानल क्लिन फिड (विज्ञापनमुक्त) जुइमाः धका धाःगु दु। विज्ञापन नियमन यायेगु सम्बन्धय् व्यवस्था यायेगु लागि दय्कुगु ऐन २०७६ विदेशी टेलिभिजन च्यानलयात कार्तिक ७ गतेतक क्लिन फिड जुइमाःगु दु।
सूचना तथा सञ्चार प्रविधि मन्त्रालयं छगु सूचं जारी यासे भारतीय ब्राडकाष्टर्स फोरम, डिस्कभरी नेटवर्क्स, बीबीसी न्युज, नेपाल केबल टेलिभिजन महासंघ थे जाःगु संघसंस्थापाखे क्लिन फिड प्रसारणया म्याद थपे यायेगु ध्यानाकर्षण याःगु दु।
मन्त्रालयं ऐनया मर्म व भावना कथं हे क्लिफिडसहितया च्यानल प्रसारण यायेत इनाप याःगु दु। अथे मजूसा कानून बमोजिम जुइ धका मन्त्रालयं धाःगु दु।
कात्तिक ७ गते लिपा नेपालय् प्रसारण जुइगु विदेशी च्यानलय् विज्ञापन क्यने दइ मखु। थुुकि अटेरी जूसा अज्यागु च्यानल बन्द यायेगु कानुनी व्यवस्था दु।
सूचना प्रविधि तथा सञ्चार मन्त्रालयं क्वछिगु इलय् तक क्लिन फिड लागू जुइ धका धाःगु दु। २०७५ कात्तिक ८ गते राजपत्रय् प्रकाशित ऐनं क्लिन फिडय् वनेगु सेवा प्रदायकपिन्त दच्छिया ई
बिःगु खः। उगु ऐनय् धाःगु दु ऐन लागु जुसानिसे विदेशी च्यानलनाप डाउनलिङ्क याना प्रसारण यायेगु सम्झौता याये धुकुगु संस्था तयेस ऐन प्रारम्भ जूगु दच्छिया दुने विज्ञापनरहित प्रसारण यायेमाः।
भारतीय प्रसारकं नेपालय् हे क्लिन फिड याइगु जुगुलि विज्ञापन क्यनेगु इल्य् स्क्रिन खाली जुइ उगु इलय् नेपालया हे विज्ञापन तये दये माःर्गु माग नेपाली टेलिभिजन सेवा प्रदायकपिन्स याःगु खः। तर संसदया विकास तथा प्रविधि समितिं नेपाली टेलिभिजनयात प्रवर्द्धन याये माःगु धाःसे क्लिन फिड याःगु विदेशी च्यानलय् नेपालया विज्ञापन क्यने दइ मखु कथं निर्देशन बिःगु दु।
क्लिन फिड लागू जुलकि नेपालय् प्रसारण जुइगु विदेशी च्यानल घटे जुइ। डाउनलिङ्क अनुमति कया जथाभावी च्यानल प्रसारण याना च्वंगुलि आः क्लिन फिड मयागु च्यानल स्वतः रोक याये त्यःगु दु। अप्वो भारतीय च्यानलपिन्स नेपालय् क्लिन फिडय् खर्च याये इच्छुक मदु।
