Display Style:
Column Style
हुलमुल मयासे विधिपूर्वक सापारु हनेत महानगरपालिकाया इनाप
लहनान्युज | गुंलाथ्व १५ ११४०,साउन १९ सोमवाः
येँ महानरपालिकां सापारुलिसेंया नखःचखः विधिपूर्वक हःसां नं म्वःम्वः मयाय्त इनाप याःगु दु ।
येँ महानगरपालिकाया न्यय्क्वःगु नगरपालिकाया मुँज्यां थुकथं इनाप याःगु खः ।
थःथितिपिं मदुगुया लुमन्तिइ हनीगु सापारुयात थुगुसी विधि पूवंकाः थःथःगु छेँय् हनेत नं इनाप यात ।
येँ महानगरपालिकालिसें स्वनिगलय् हे लिपांगु इलय् कोरोना संक्रमणया जोखिम अप्वया वनाच्वंगु इलय् महानगरपालिकां महानगरबासीपिन्त सतर्कता नालेत मुँज्यायात सम्बोधन यानादिसें महानगर प्रमुख बिद्यासुन्दर शाक्यं अपील यानादीगु खः ।
थौं २४६म्हेसित कोरोना संक्रमण पुष्टि
लहनान्युज | गुंलाथ्व १४ ११४०,साउन १८ आइतवाः
थौं आइतवाः नेपालय् २४६म्हेसित कोरोना संक्रमण पुष्टि जूगु दु । देय् यकं प्रयोगशालाय् याःगु परिक्षणय् ८ द्धः व ८३१म्हेसिगु स्वाब परीक्षणय् २४६ म्ह संक्रमित पिहा वःगु दु ।
स्वास्थ्य तथा जनसंख्या मन्त्रालयया कथं कुल संक्रमितपि २० द्धः व ३३२म्ह थ्यःगु दु ।
थौं आइतवाः कोरोना संक्रमण निको १११ म्ह डिस्चार्ज जूगु दु । आः तक डिस्चार्ज जूपि १४ द्धः व ६०३म्ह थ्यःगु दु । कोरोना संक्रमणया कारण आइतवाः तक ५७ म्ह थ्यःगु दु ।
स्वास्थ्य तथा जनसंख्या मन्त्रालयया कथं दकलय् अप्व पसाय् ८१ म्ह संक्रमण पुष्टि जूगु खः । धनुषाय म्ह, येँ २२म्ह, मोरङय् १६म्ह, सुनसरीइ १२म्ह, डोटीइ ११म्ह, कैलाली व बर्दियाय् झीम्ह
झीम्ह, यल व स्याङ्जाय् च्याम्ह च्याम्ह व महोत्तरी व कास्कीइ न्याम्ह न्याम्हेसित कोरोना संक्रमण पुष्टि जूगु दु ।
अथेहे नवलपुर व लम्जुङय् स्वम्ह स्वम्ह, सर्लाही, रौतहट व तनहुँय् निम्ह निम्ह नाप ख्वप, चितवन, सिन्धुली, गोरखा, बाग्लुङ, डोटी व दार्चुलाय् छम्ह छम्हेसित संक्रमण पुष्टि जूगु दु ।
येँ टेम्पो चालकयात कोरोना संक्रमण
लहनान्युज | गुंलाथ्व १४ ११४०,साउन १८ आइतवाः
स्वनिगलय् सफा टेम्पो चालकयात न कोरोना भाइरस (कोभिड–१९) या संक्रमण पुष्टि जूगु दु ।
उम्ह मनू प्यन्हु जक सुदूरपश्चिमपाखे येँ वःगु खः ।
वयाःगु नाकांपाखे स्वाब संकलन याना येँ दुहावःगु खः ।
येँ वया स्वहु यकं शंमखुल रुटय् टेम्पो चले याना वयाच्वंगु खः ।
शनिवाः वयात कोरोना संक्रमण पुष्टि जूगु खः । संक्रमण पुष्टि जूगु खबर वःगु इलय् ट्याम्पो चार्जिङ स्टेशनय् खः ।
प्रहरी व सुरक्षाकर्मीया टोलीं अन हे वयात आइसोलेसन सेन्टर यकूगु खः ।
२४६ न्हूपिं संक्रमितय् ३१म्ह स्वनिगलय्
बिकाश | गुंलाथ्व चतुर्दशी ११४० (२०७७ श्रावण १८) आइतबाः
थौं देयया २७ कोभिड प्रयोगशालाय् मुक्कं ८द्वः ८सः व ६१ नमूना परिक्षण याःगुलिइ २सः व ४६म्हेसिके कोरोना भाईरस (कोभिड १९) या संक्रमण पुष्टि जूगु दु ।
देयया २५ जिल्लापाखें २ सय ४६म्ह न्हूपिं संक्रमित लूगुलिइ स्वनिगलय् ३१ लाःगु दु ।
लिपांगु २४ घौ दुनेया परिक्षणय् येँय् मुक्कं २२म्हेसिके संक्रमण खनेदुगु दुसा यलय् ८म्ह व ख्वपय् छम्हेसिके संक्रमण पुष्टि जूगु दु ।
लिपांगु छुं दिं न्ह्यःनिसें स्वनिगः दुने मदिक्क न्हूपिं संक्रमितत खने दयाच्वंगु दु ।
लकडाउन छ्वासूगु लिसें पिनं मनूत वयेगु अप्वःगु व थन हे नं सामाजिक दुरी, मास्क लगायतया सावधानी अप्वःसिनं ल्यूगु खनेमदुगु अवस्थाय् थन संक्रमण न्हियान्हिथं न्यना वनाच्वंगु खनेदु ।
स्वनिगःया स्थिती भयावह हे जुइफुगु चेतावनी विज्ञपिन्सं बियावःगु दु ।
विज्ञपिन्सं थन समुदायस्तरय् हे संक्रमण न्यनेधुंकूगु संकेत खनेदुगु धयाच्वंगु इलय् सरकारं धाःसा समुदाय स्तरय् संक्रमण न्यंगु मदुगु धया वयावःगु दु ।
परिक्षणयात अप्वयेकेमाःगु आःया इलय् परिक्षण हे क्वकयाः संक्रमितया ल्याः म्ह्वः क्यनाच्वंगु द्वपं सरकारयात लानावःगु दु ।
प्रा. प्रेमशान्ति तुलाधरया जहान मन्त
शोभा श्रेष्ठ | गुंलाथ्व चतुर्दशी ११४० (२०७७ श्रावण १८) आइतबाः
नेपालभाषा ख्यःया नांजाःम्ह व्यक्तित्व प्रा. प्रेमशान्ति तुलाधरया जहान अकलमान तुलाधर मन्त ।
७६ दँ दुम्ह वय्कः आइतबाः सुथय् ११ः३०ताः इलय् आकाझाकां मदुगु खः ।
वय्कःयात अल्जाइमर ल्वय् नं दुगु खःसा छुं ई न्ह्यःनिसें छ्यंया ल्वचं नं कयाच्वंगु खः ।
आइतवाः हे वय्कःया येँया कर्ण दीपय् अन्तिम संस्कार याःगु दु ।
वय्कःया निम्ह काय्पिं प्रशन्न तुलाधर व सौरभ तुलाधर अले म्ह्याय् पल्पसा तुलाधर दी ।
काय्पिं प्रशन्न व सौरभ जर्मनीइ च्वंनाच्वंगु खःसा म्हिगः तिनि हे नेपाः थ्यंकःवःगु खः ।
