Display Style:
Column Style
न्हूगु नक्साया समर्थनय् स्थानीय ल्याय्म्हतय् प्रदर्शन
राजेश बज्राचार्य | तछलागा पञ्चमी ११४०
नेपालया तंगु भूभाग लिम्पियाधुरालिसेंया नेपालया न्हूगु नक्सा संशोधित संविधानय् चूलाःगु लसताय् यलया स्थानीय ल्याय्म्हतय्सं यल लायकुलिइ मत च्याकूगु दु ।
न्हूगु नक्सा जारी याःगु सरकारया पलाःया समर्थन यासें स्थानीय ल्याय्म्हतय्सं पाल्चां हे नेपालया न्हूगु नक्सा दयेकाः ब्वज्या याःगु खः ।
सरकारया पायछि पलाःयात लसकुस यायेत पासापिं दथुइ सहलह जुयाकथं स्वस्फुर्त रूपं तत्कालिक योजना ताःलाःगु स्थानीय पृथबिन्दु महर्जनं धयादिल ।
क्वत्यलातःगु भूमि दुथ्याकाः नक्सा जारी यायेगु सरकारया ऐतिहासिक पलाखय् थःपिनिगु समर्थन दुगु बिचाः ब्वतिमि ल्यायम्हतयसं प्वंकल ।
ल्यायम्हतय् लसतायात हःपाः बीत नेकपा यल जिल्ला सभापति हरिकृष्ण ब्यन्जनकारलिसें १२ वडाया अध्यक्ष नारायण लाल अवाले, १६ वडा सदस्य सुप्रभा शाक्य लिसेंया जनप्रतिनिधीं नं ज्याझ्वलय् ब्वति काःगु खः ।
पाल्चा च्याकेगु ज्या न्ह्याकुसें नेकपा जिल्ला सभापति ब्यन्जनकारं भारतीय बिस्तारवादं थःगु कब्जाय् तयेत स्वःगु नेपाली भूमियात नेपाली एकतां आधिकारिक नक्सा संसदया सर्वसम्मतिं पारित जूगु धासें उगु भूभागयात गुगु नं हालतय् कयां त्वःतेगु प्रण लिसा कयादिल ।
देय्या न्हूगु नक्सा कथं संविधानया अनूसूची अद्यावधिक यायेत सरकारं न्ह्यब्वःगु संविधान संशोधन विधेयकय् भारतीय बिस्तारवादीं क्वत्यःगु लिम्पियाधुरा, लिपुलेक व कालापानी दुथ्याकाः न्हूगु नक्सा जारी यायेधुंकाः सरकारं संविधानय् दुगु निसान छाप भिंकेत जेठ ९ गते विधेयक दर्ता याःगु खः ।
संशोधन विधेयकयात बिचाः यायेमाल धइगु प्रस्ताव मंगलबाःया प्रतिनिधिसभा बैठकं सर्वसम्मत स्वीकृत याःगु खः ।
विधेयकय् सैद्धान्तिक सहलहस ८४ सांसदं देयया स्वाधीनता, राष्ट्रियता व भौगोलिक अखण्डताया पक्षय् छधी जुयाः दनेगु धासें समर्थन क्यंगु खः ।
उमिसं भारतलिसे राजनीतिक व कूटनीतिक वार्ताया तयारी यायेत नं ध्यानाकर्षण याकूगु खः ।
ख्वपय् लखं चुइकाः ट्रक चालक वेपत्ता
रामगोपाल तमखु | तछलागा पञ्चमी ११४०
ख्वपय् थौं तसकं वा वयाः चुनदेवीइ लँय् बाः वःगु लखं एलपी ट्रकया चालक छम्ह चुइका यंकाः बेपत्ता जूगु दु ।
ख्वपय् थौं न्हिनय् करिव बाघौ ति तसकं वःगु वां उगु थाय्या लँ दक्वं लखं जायाः खुसिबाः वयेथें बाः वःगु खः ।
अरनिको राजमार्ग अन्तर्गत ६ लेन सडक पाण्डुबजार चोक व सल्लाघारी चोकया दथुइ लाःगु चुनदेवी बस स्टपय् लाःगु धलय् बाःवःगु लखं ना ६ ख १६१६ ल्याःया एलपी ट्रकया चालकयात चुइकूगु खः ।
बेपत्ता ट्रक चालक सिन्धुली रानीचुरीयाम्ह थौंकन्हय् मकवानपुर हेटौँडा लामसुरे च्वनीम्ह ५७दँया नर बहादुर रावत खःगु महानगरीय प्रहरी परिसर ख्वपया सूचना अधिकृत दिपक गिरीं धयादिल ।
बेपत्ता चालकया मालेज्या जुयाच्वंगु नं सूचना अधिकृत गिरीं कनादिल ।
उगु थायया सर्भिस ट्र्याकया लँ दक्वं लखं जाःगु थासय् सल्लाघारीं सुर्यबिनायक पाखे वनाच्वंगु एल पी ट्रकया चालक गाडीं कुतुंवनाः लखय् दुनावंबलय् लखं पाईप दुने चुइकायंकूगु स्थानीय प्रत्यक्षदर्शीं धाःगु दु ।
सुदूरपश्चिमय् थप खुम्हेति संक्रमण
लहनान्युज | तछलागा पञ्चमी ११४०,जेठ २८ बुधवाः
सुदूरपश्चिमय् थौं बुधवाः थप खुम्हेसित कोरोना संक्रमण पुष्टि जूगु दु ।
धनगढी प्रयोगशालाय् याःगु परीक्षणय् कैलालीया न्याम्ह व कञ्चनपुरया छम्हेसित कोरोना पुष्टि जूगु धका सेती प्रादेशिक अस्पतालया सूचना अधिकारी दिलीपकुमार श्रेष्ठं धाःगु दु ।
थ्व नाप सुदूरपश्चिमय् संक्रमितपिं सच्छि व स्वीप्यम्ह थ्यःगु दु ।
आतक कैलालीइ ६०म्ह, कञ्चनपुरय् ३४म्ह, अछामय् १६म्ह, डडेल्धुराय् १५म्ह, दार्चुलाय् १२म्ह, डोटीइ १०म्ह, बझाङय् ७म्ह, बैतडीइ ६म्ह व बाजुराय् स्वम्हेसित कोरोना पुष्टि जुइ धुकुगु दु ।
गोरखाय् प्यम्ह कोरोना संक्रमण, संक्रमितपि १४ थ्यःन
लहनान्युज | तछलागा पञ्चमी ११४०,जेठ २८ बुधवाः
गोरखाय् थौं बुधवाः थप प्यम्हेसित कोरोना संक्रमण पुष्टी जूगु दु ।
संक्रमण पुष्टी जूपि भीमसेन थापा गाउँपालिकाय् स्वम्ह व छम्ह मिसाया खने दुगु खः ।
येँया राष्ट्रिय जनस्वास्थ्य प्रयोगशालाय् याःगु परीक्षणय् उपि कोरोना संक्रमण पुष्टी जूगु खः ।
संक्रमण खने दुपि स्वम्ह मिजंपि भारत वःगु खःसा मिसाम्ह चितवनया भरतपुर अस्पतालं वःगु खः ।
मास्क छ्यलेत सकाकारया इनाप
लहनान्युज | तछलागा पञ्चमी ११४०,जेठ २८ बुधवाः
सरकारं छेँय् न पिहा वनिगु इलय् मास्क तया वनेगु लागि इनाप याःगु दु ।
स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं हुलमुलय्, छेँय् न पिहा वनेगु इलय्, सार्वजनिक थासय् वनेगु इलय् व सार्वजनिक यातायातय् यात्रा याये इलय् मास्क छ्यलेत इनाप याःगु दु ।
मास्क छ्यलगु इलय् कोरोना भाइरस संक्रमणया जोखिम घटे जुइगु सरकार धाःगु दु ।
विश्व स्वास्थ्य संगठन (डब्लुएचओ) नं छेँय् न पिहा वनेगु इलय् मास्क छ्यलिगु इलय् थप सुरक्षित जूगु धका धाःगु खः ।
मास्क छुयलेत सकाकारया इनाप
