Display Style:
Column Style
नारायणी अस्पतालय् कन्ह्यनिसे अन्तरंग सेवा सुरु
लहनान्युज | तछलागा नवमी ११४०,जेठ ३२ आइतवाः
वीरगञ्जया नारायणी उपक्षेत्रीय अस्पतालय् कन्ह्य सोमवाः निसे अन्तरंग सेवा सुरु याये त्यःगु दु ।
कोरोना संक्रमणया जोखिमयात मध्यनजर यासे भौतिक दुरी कायम याना सीमित शय्याय् अन्तरंग सेवा सुरु याये त्यःग दु ।
स्वास्थ्य तथा जनसंख्या मन्त्रालय, आपतकालिन तथा विपद् व्यवस्थापन इकाई, स्वास्थ्य आपतकालीन कार्य सञ्चालन केन्द्रं ०७६ चैत ३० गते छगु पौं छ्वया नारायणीयात कोभिड अस्पताल घोषणा यासे सेवा बन्द यायेगु निर्देशन बिःगु खः ।
उगु पौंया आधारय् नारायणीं ०७७ वैशाख २ गते निसे सर्प न्याःसा, ज्वरो क्लिनिक बाहेक मेगु सेवा बन्द याःगु खः ।
स्वास्थ्य समन्वय महाशाखां वैशाख ३० गते मेगु पौं छ्वया उपचारार्थ कोभिड–१९ संक्रमित डिश्चार्ज जूगुलि बहिरंग लगायत मेगु नियमित सेवा सुरु यायेगु धाःगु खः । नारायणी अस्पतालं जेठ
१८ गते डायलासिस सेवा सुरु याःगु खःसा जेठ २० गते बहिरंग सेवा सुरु याःगु खः ।
कुवेत वःम्ह मिसायात कोरोना पुष्टि
लहनान्युज | तछलागा नवमी ११४०,जेठ ३२ आइतवाः
कुवेत वःगु २९ गते स्वदेश लिहा वःम्ह छम्ह मिसायात कोरोना भाइरस संक्रमण पुष्टि जूगु दु ।
कुवेत सरकारया जहाज चार्टर्ड याना छ्वया हःगु १०२म्ह नेपाली मध्ये छम्ह मिसयात आइतवाः कोरोना संक्रमण पुष्टि जूगु खः ।
उम्ह मिसायात जेठ २९ गते हे शुक्रराज ट्रपिकल तथा सरुवा रोग अस्पताल टेकु यकूगु खः ।
निजी प्रयोगशालाय् कोरोना संक्रमण परीक्षण याये दइगु
लहनान्युज | तछलागा नवमी ११४०,जेठ ३२ आइतवाः
सरकारं निजी प्रयोगशालाय् न कोरोना संक्रमण परीक्षण याये दइगु ब्यवस्था याये त्यःगु दु ।
स्वास्थ्य तथा जनसंख्या मन्त्रालयया कथं पीसीआर टेस्टया लागि संकलन जूगु नमुना आवश्यक प्रक्रिया पूरा याना निजी प्रयोगशालाय् न जाँच्चे याके त्यःगु दु ।
स्वास्थ्य तथा जनसंख्या मन्त्रालयया स्वीकृति कया पीसीआर टेस्टया नमुना आः आवश्यक प्रक्रिया पूरा याना प्राइभेट ल्याबय् न जाँच्चे याकेगु व्यवस्था यानागु दु धका मन्त्रालयया प्रवक्ता डा. जागेश्वर गौतम धाःगु दु ।
थज्याःगु जाँच याःगु खर्च सरकारं हे निअबइगु ब्यवस्था याःगु दु ।
सरकारं कोरोना परीक्षणया लागि देय् या २० गू स्वया अप्वो थासय् प्रयोगशालायो व्यवस्था याःगु दु । तर सरकारी मापदण्ड कथं कोरोना परीक्षण याये माःपि यक्को मनू दुगुलि प्रयोगशालाया क्षमता स्वया अप्वो नमुना संकलन जूग दु ।
नमुना संकलन यक्को जूगुलि परीक्षणया लिच्वः वयेत छवाः ई लगे जूगु दु ।
अथेहे विदेश वनेत भिसा वा निरोगिता प्रमाणपत्रया लागि कोरोना परीक्षण यायेत स्वगू अस्पतालय् नमुना संकलन यायेगु डा. गौतमं धयादिगु दु ।
थौं कन्ह्य येँया वीर, त्रिवि शिक्षण अस्पताल व पाटन अस्पतालय् नमुना संकलन जूया च्वंगु दु ।
धादिङय् २४म्हेसित कोरोना भाइरस संक्रमण पुष्टि
लहनान्युज | तछलागा नवमी ११४०,जेठ ३२ आइतवाः
यापिड डायग्नोस्टिक किट (आडीटी) याना छेँ लिहा वःपि धादिङया २४म्हेसित कोरोना भाइरस (कोभिड–१९) या संक्रमण पुष्टि जूगु दु ।
नीलकण्ठ नगरपालिकाय् भारत लिहा वःपि १४ न्हु क्वारेन्टिनय् च्वपि आरडीटी परीक्षण लिपा छेँ लिहा वःपि खः ।
छेँ लिहा वःपिन्त स्वाब संकलन याना पीसीआर टेस्ट याःगुलि २४म्हेसित संक्रमण पुष्टि जूगु खः
येँ महानगरय् निशुल्क एम्बुलेन्स सेवा प्यद्धः स्वया अप्वोेसिया काल
लहनान्युज | तछलागा नवमी ११४०,जेठ ३२ आइतवाः
येँँ महानगरपालिकाया आर्थिक ग्वाहालि न्ह्याःगु निःशुल्क आकस्मिक एम्बुलेन्स सेवां लकडाउनया इलय् करीब प्यद्धः व न्यासःम्हसिया निशुल्क सेवा प्रदान याःगु दु ।
हृदयघात, मृगौला ल्वगि तयेत अस्पताल तक यंकेगु व हयेगुलि महानगरपालिकां सुरु याःगु निशुल्क एम्बुलेन्सं लकडाउनया इलय् एकतर्फी करीब द्धःछि व दुईतर्फी करीब प्यद्धः व
न्यासम्हसिया सेवा बियागु धका येँ महानगरपालिकाया प्रशासन विभाग प्रमुख नमराज ढकालं जानकारी बियादिगु दु ।
येँ महानगरपालिकाया मेयर बिद्यासुन्दर शाक्यं लकडाउनया इलय् हृदयघात, मृगौला ल्वगि तयेत नाप महानगरय् च्वपिन्त २४ हे घण्टा आकस्मिक निशुल्क एम्बुलेन्स सेवा बिइगु उदेश्यं थुगु सेवा सुरु यानागु धका जानकारी बियादिगु खः ।
थःगु छेँय् अस्पताल तक वनेगु वः, छगु अस्पतालं मेगु अस्पताल तक यंकेगु व अस्पतालं छेँय् हयेगु यंकेत निशुल्क एम्बुलेन्स सेवाया सुविधा उपलब्ध यानगु धका धयादिगु खः,’ मेयर शाक्यं महानगर दुने लकडाउनया इलय् महानगरय् दुने च्वपि विरामीपिन्त यातायातया सुविधा उपलब्ध मजुगु अवस्थाय् अस्पताल तक हयेगु व यंकेत समस्या जूपिन्त हटलाइन नम्वर ११८० य् स्वापू तयेत इनाप याना दिगु खः । उगु हटलाइनय् लकडाउनया इलय् खुद्धः स्वया अप्वोसिया स्वापू तःगु धका धयादिगु दु ।
एम्बुलेन्स चालक संघ, नेपाल (काठमाडौं जिल्ला कार्य समिति) आर्थिक ग्वाहालि याना येँ महानगरपालिकां लकडाउन इलय् निशुल्क एम्बुलेन्स सेवा सुरु याःगु खः ।
