Display Style:
Column Style
न्यागु स्यानिटाइजर उद्योगयात कारवाही यायेगु तयारी
लहनान्युज | ञंलागा १० ११४०,भाद्र २७ शनीवाः
मापदण्ड विपरीत स्यानिटाइजर उत्पादनयापि येँ प्यंगू व ख्वपय् छगू नाप न्यागु उद्योगयात औषधि व्यवस्था विभागं कारबाही याःगु दु ।
मापदण्ड विपरीत विषाक्त मिथानोल तया स्यानिटाइजर उत्पादन याःगुलि उगु उद्योगयात क्षतिपूर्ति नाप जरिवाना व बन्द यायेगु तयारी याना च्वनागु धका विभागया सूचना अधिकारीं धाःगु दु ।
हाइजिङ सोप एन्ड केमिकलं उत्पादन याःगु ’इन्सेटेन्ट ह्यान्ड सेनिटाइजर ओरिजिनल’, आधार केमिकल एन्ड फुड इन्डस्ट्रीं उत्पादन याःगु ’एड्भान्स ह्यान्ड स्यानिटाइजर, सर्च केम कम हर्बल प्रोडक्टं उत्पादन याःगु ’इन्सटेन्ट ह्यान्ड स्यानिटाइजर रिफ्रेरिसङ जेल’ व सूर्यमुखी हर्बल प्रोडक्टया ’सूर्यमुखी ह्यान्ड स्यानिटाइजर’ य् विषाक्त मिथानोल दुगुलि कारवाही याये त्यःगु खः । उगु स्यानिटाइजरय् छ्यले मते धका विभागं सर्वसधारणयात न सूचंपाखे इनाप याःगु दु ।
अथेहे, ख्वपयाःगु नेपाल कायाकल्प उद्योगं उत्पादन याःगु इन्सटेन्ट ह्यान्ड स्यानिटाइजरय् न विषाक्त मिथानोल प्रयोग जुगु धका धाःगु दु । थ्व कम्पनीयात विभागं थ्व स्वया न्ह्यः हे बन्द याके धुकुगु दु ।
विभागं छगु वाः दुने स्वनिगलया थीथी ब्रान्डया झीगु स्यानिटाइजर राष्ट्रिय औषधि प्रयोगशालाय् परीक्षण यःगु खः । परीक्षणया झ्वलय् विभागं तोके याःगु ’इन्सटेन्ट ह्यान्ड स्यानिटाइजर (अल्कोहल बेस्ड) सम्बन्धी स्तर २०७६’ विपरीत मिथानोल प्रयोग याःगु लुगु खः ।
विभागं तोके याःगु मापदण्डया स्यानिटाइजरय् इथानोल बाहेक मेगु रसायन छ्यले दइ मखु । क्षणिक नाफाया लागि उद्योगं मिथानोल छ्यला स्यानिटाइजरयात छ्यलिगु इलय् स्वास्थ्यय् थुकिया प्रतिकूल असर याये फइगु विभागं धाःगु दु ।
कारबाहीलय् लागु उद्योगपिन्स बजारय् हया तःगु स्यानिटाइजर जफत याना नष्ट यायेगु तयारी जुयाच्वंगु दु धक विभागं धाःगु दु । उगु उद्योगयात औषधि ऐन, उपभोक्ता हित संरक्षणा ऐन व जनस्वास्थ्य ऐनअन्तर्गत कारबाही यायेगु धका बिभागं धाःगु दु।
भाषिक परीक्षा सञ्चालन याये दइगु
लहनान्युज | ञंलागा ९ ११४०,भाद्र २६ शुक्रवाः
जिल्ला प्रशासन कार्यालय, काठमाडौं निषेधाज्ञाया दथुइ न छु भाषिक परीक्षा सञ्चालन याये त्यःगु दु । टोफल, आईईएलटीएस, जीएमटी, जीआरई, जीआरएफडब्ल्यू, अक्युपेसनल अंग्रेजी टेस्ट लगायतया परीक्षा सञ्चालन याये दइगु धका प्रशासकीय अधिकृतं थौं शुक्रवाः छगु सूचं जारी याःगु दु ।
परीक्षा सञ्चालन यायेगु इलय् शिक्षा, विज्ञान तथा प्रविधि मन्त्रालय न जारी परीक्षा सञ्चालन कार्यविधि व स्वास्थ्य तथा जनसंख्या मन्त्रालयपाखे निर्धारित स्वास्थ्य मापदण्ड
अनिवार्य पालना याये माःगु धका धाःगु दु ।
निषेधाज्ञा छ्वाकेगु निर्णय याःगु कन्ह्यः कुन्हु हे जिल्ला प्रशासन कार्यालय न परीक्षा सञ्चालन याके बिइगु निर्णय याःगु खः।
येँ १७ वडाय् आःतक ४७म्ह सक्रमित जुइ धुकल
लहनान्युज | ञंलागा ९ ११४०,भाद्र २६ शुक्रवाः
थौं येँ महानगरपालिका १७ वडाय् छम्ह कोरोना भाइरसया सक्रमित जुगु दु सा छम्ह डिस्चार्ज जूगु दु।
थ्व नाप आःतक येँ महानगरपालिका १७ वडाय् कोरोना सक्रमितपि ४७म्ह थ्यःगु दु।
अथहे १७ वडाय् दुने सक्रमित जुपि १२म्ह डिस्चार्ज जुइ धुकुगु दु।
ख्वपय् भदौ मसान्त तक सार्वजनिक यातायात बन्द
लहनान्युज | ञंलागा ९ ११४०,भाद्र २६ शुक्रवाः
ख्वप नगरपालिका दुने भदौ मसान्त तक सार्वजनिक यातायात सञ्चालनय् रोक लगे याःगु दु। निषेधाज्ञा छ्वासुकुसा स्वनिगःया स्वगू जिल्ला प्रशासन कार्यालयं सार्वजनिक यातायात जोर–बिजोर प्रणाली लागू याना सञ्चालन यायेत अनुमति बिउगसा ख्वप नगरं थथे निर्णय याःगु खः ।
नगर दुने स्वनिगः दुने थीथी थासय् सञ्चालनय् जुया च्वंगु रुट नम्बर १, ७ व ९ य् चले जुइगु गाडी भदौ ३१ गते तकया लागि बन्द यायेगु निर्णय यानगु दु धका ख्वप नगरया मेयर सुनिल प्रजापति धाःगु दु ।
नगरपालिकां यातायात व्यवसायी नाप सहलह याना भदौ मसान्त तक सार्वजनिक यातायात बन्द यायेगु निर्णय यानागु धका धाःगु दु ।
अथेहे, नगरया मेयर प्रजापतिया अध्यक्षताय् भक्तपुर उद्योग वाणिज्य संघ व भक्तपुर घरेलु तथा साना उद्योग संघया प्रतिनिधिपि नाप च्वंगु बैठक सुरक्षाया उपाय अपने याना व्यवसाय सञ्चालन यायेत इनाप याःगु दु ।
व्यवसायीपिन्स मास्क, पञ्जा तया शारीरिक दूरी कायम याना स्वास्थ्य सुरक्षा नीति अपने याना जक व्यापार व्यवसाय यायेत इनाप याःगु खः।
छन्हुया दुने १४५४म्ह संक्रमित, ६७२म्ह संक्रमणमुक्त
लहनान्युज | ञंलागा ९ ११४०,भाद्र २६ शुक्रवाः
वःगु २४ घण्टाया दुने जक १४५४म्हेसित कोरोना भाइरस (कोभिड(१९) या संक्रमण पुष्टि जूगु दु । देय् यकंया प्रयोगशालाय् याःगु १०७०१म्हेसिगु नमुना परीक्षणय् ४६३ मिसा व ९९१म्ह मिजंपिन्त संक्रमण पुष्टि जूगु दु ।
थ्व नाप आःतक संक्रमितपि ५१ हजार ९१९ म्ह थ्यःगु दु । उकि मध्ये ३२२ म्ह सी धुकुगु दु सा आःतक ३६ हजार ६७२म्ह संक्रमणमुक्त जुइ धुकुगु दु । वःगु २४ घण्टाय् जक ९७२म्ह डिस्चार्ज जूगु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया कथं स्वनिगः दुने जक ६९६म्ह संक्रमित थपे जूगु दु । उकि मध्ये ६२०म्ह येँ च्वपि जक खः । यलय् व ख्वपय् ३८म्ह व ३८म्ह खः ।
अथेहे रुपन्देही १०२म्ह, कैलालीइ ६७म्ह, मकवानपुरय् ५४म्ह, मोरङय् ४७म्ह, सुनसरी ४४म्ह, सिराहाय् ४२म्ह, नवलपुरय् ३८म्ह, नवलपरासीइ ३५म्ह, कपिलवस्तुइ २८म्ह, सुर्खेतय् २६म्ह, गुल्मीइ २०म्ह, बाँकेय् १८म्ह, झापा व संखुवासभाय् १४म्ह,१४म्ह, प्युठानय् १३म्ह, पाल्पाय् १२म्ह, काभ्रे, कास्की व रुकुम पूर्वया ११म्ह, तनहुया ८म्ह व सर्लाहीय् न्ह्यम्ह कोरोना संक्रमण पुष्टि जूगु दु ।
दाङय् न्याम्ह, रौतहट, गोरखा, लमजुङ व डोटीइ खुम्ह खुम्ह, सप्तरी व स्याङ्जाय् प्यम्ह, प्यम्ह, पर्सा, नुवाकोट व रोल्पाय् स्वम्ह स्वम्ह, धनुषा, बारा, महोत्तरी, सिन्धुपाल्चोक, सिन्धुली, पर्वत व कञ्चनपुरय् निम्ह निम्ह व धादिङ, रामेछाप, बर्दिया व जुम्लाय् छम्ह छम्हेसित संक्रमण खने दुगु खः ।
थ्व नाप देय् यकं संक्रिय संक्रमितपि १४ हजार ९२५म्ह थ्यःगु दु । उकि मध्ये २५ म्ह भेल्टिलेटर व १७०म्ह आईसीयूलय् वासः याका च्वंगु दु । ६ हजार ६३४म्ह होम आइसोलेनसय् च्वना च्वंगु दु धका मन्त्रालयं धाःगु दु
