Display Style:
Column Style
कोरोना संक्रमित ल्याः ४१ म्ह थ्यन
लहनान्युज | चौलागा चतुर्दशी ११४०, बैसाख ९ मंगलवाः
उदयपुरय् मेपि १० म्ह संक्रमण पुष्टि जुगु दु । थ्व नाप नेपालय् कोरोना संक्रमित जुपिनिगु ल्याः आः ४१ म्ह थ्यःगु दु ।
उदयपुरया त्रियुगा नगरपालिका च्वपिन्त कोरोना संक्रमण जाँच यायेगु लागि येँया राष्ट्रिय जनस्वास्थ्य प्रयोगशालाय् निम्ह व धरानया बीपी कोइराला स्वास्थ्य विज्ञान प्रतिष्ठानय् च्याम्हसित
कोरोना संक्रमण पुष्टि जुगु स्वास्थ्य तथा जनसंख्या मन्त्रालयया प्रवक्ता डा. विकास देवकोटा जानकारी बियादिुगु दु ।
थ्व नाप नेपालय् कोरोना संक्रमितपि ४१ म्ह थ्यःगु दु ।
उदयपुरय् थप छम्हेसिके खनेदत कोरोना संक्रमण
विकाश | चौलागा चतुर्दशी ११४०
नेपालय् हाकनं मेम्ह छम्हेसिके कोरोना भाइरस कोभिड १९ या संक्रमण खनेदुगु दु । थौं राष्ट्रिय जनस्वास्थ्य प्रयोगशाला टेकुइ याःगु स्वाब परिक्षणय् थप छम्हेसिके संक्रमण खनेदुगु स्वास्थ्य तथा जनसंख्या मन्त्रलायं पुष्टि याःगु खः ।
उदयपुरया ३३दँया छम्ह मिजंयाखे संक्रमण खनेदुगु न्ह्यथंगु दु ।
थ्वयां न्ह्यः उदयपुरया त्रियुगा नगरपालिकाया छगू मस्जिदय् च्वनाच्वंपिं १३म्हेसिके कोरोना संक्रमण पुष्टि जूगु खः । उमिगु स्वापुतिइ वःपिं मनूतय् स्वाब मुंकाः परिक्षण यायेगु झ्वलय् परीक्षण याःबलय् छम्हेसिके कोरोना संक्रमण पुष्टि जूगु खः ।
मंगलबाः नेपाली सेनाया नेतृत्वय् वंगु टोलीं नमुना मुंकाः येँय् हःगु खः ।
नियमित प्रेस व्रिफिङय् नवासें स्वास्थय तथा जनसंख्या मन्त्रालयया प्रवक्ता डा. विकास देवकोटां उदयपुरं मुंकूगु छुं मनूना स्वाबया परीक्षण ल्यं दनिगु जानकारी बियादिल ।
धरानस्थित विपि कोइराला स्वास्थ्य विज्ञान प्रतिष्ठान व कोशी अस्पतालय् छुं नमूनाया परिक्षण जुयाच्वंगु वयकलं धयादिल ।
डा. देवकोटां कोभिड १९ रोकथाम व नियन्त्रणया लागिं देयन्यंक लकडाउन जुयाच्वंगु अवस्थाय् छुं नं धार्मिक मुना मयायेत नं इनाप यानादिल । थःथःगु आस्था कथंया पूजा प्रार्थना छेँय् हे च्वनाः यायेत वयकलं इनाप यानादिल ।
उगु हे प्रेस व्रिफिङय् नवासें आयूर्वेद तथा वैकल्पिक चिकित्सा विभागया महानिर्देशक डा. वासुदेव उपाध्यायं जडिबुटिं कोभिड १९ लनी धइगु भ्रामक प्रचारया ल्यू ल्यू मजुइत इनाप यानादिल ।
थीथी जडिबुटिपाखें कोभिड १९ लंके धइगु भ्रम न्यनाच्वंगु धासें आःया अवस्थाय् उकथंया भ्रम मन्यंकेत व अज्याःगु भ्रमय् मलायेत नं महानिर्देशक डा. उपाध्यायं धयादिल ।
जडिबुटिं ल्वयलिसे ल्वायेगु क्षमता थकाइगु तर कोभिड लंकीगु खँ भ्रम जक जूगु उपाध्यायया धापू खः ।
विश्व स्वास्थ्य संगठनं जारी याःगु नियमयात लिनाः जडिबुटिया सेवन धाःसा याये फइगु उपाध्यायया धापू खः ।
आयुर्वेद वा जडिबुटिं कोभिड १९ लंकीगु सुयां दावी खःसा आयुर्वेद विभागलिसे स्वापू तयाः उकियात अनुसन्धानय् यंकेत नं वयकलं इनाप यानादिल ।
उदयपुरय् मेपि च्याम्ह कोरोना संक्रमणया आशंका
लहनान्युज | चौलागा चतुर्दशी ११४०, बैसाख ९ मंगलवाः
उदयपुरय् मेपि च्याम्ह कोरोना भाइरस (कोभिड(१९) या संक्रमण आशंका याःगु दु ।
विराटनगरया कोसी अस्पतालया प्रयोगशालाय् परीक्षणया लिच्वः भचा शंकास्पद वगुलि धरानया वीपी कोइराला स्वास्थ्य विज्ञान प्रतिष्ठानय् हाकन परीक्षण यायेत छ्वःगु दु ।
उदयपुरया त्रियुगा नगरपालिकाया मस्जिदय् झी छम्ह भारतीय व निम्ह नेपालीयात कोरोना संक्रमण पुष्टि जुगुलि इमिगु स्वापू दुपि ६८ म्ह मनू तयेगु स्वाब संकलन याना परीक्षण याःगु खः ।
उकि मध्ये, च्याम्हसित शंकास्पद लिच्वः वगुलि धरानय् हाकन परीक्षणया लागि छ्वगु खः । कोरोना संक्रमण खः वा मखु उगु परीक्षण लिपा जक सिइ दइ धका धाःगु दु ।
बृहस्पति विद्यासदनय् अनलाइनं ब्बकेगु सुरु यात
नृपेन्द्रलाल श्रेष्ठ | चौलागा चतुर्दशी ११४०, बैसाख ९ मंगवाः
कोरोना भाइरसया कारण देय् यकं लकडाउन जुया च्वःगुलि अनलाइनपाखे ब्बकेगु बृहस्पति विद्यासदन माध्यमिक विद्यालय नं याःगु दु ।
बैसाख ८ गतेनिसे न्हि निकः १ तगि निसे १० तगि तक ब्बकेगु सुरु जुगु दु । उगु क्लास सुथय् १० बजेनिसे ११ बजे तक व न्हिनेसिया ३ बजे निसे ४ तक न्हि निगु बिषयय् ब्बकेगु सुरु जुगु दु ।
उगु क्लास जुम एप्पसं भिडियो कल पाखे अनलाइन क्लासं ब्बकेगु सुरु जुगु खः ।
बृहस्पति विद्यासदनया शिक्षक सम्झौता शर्मा जिमिसं स्कूलय् ब्बकेगु इलय् मस्त नाप जक जुइ जिमिस गये याना ब्बका च्वन धका अभिभावकपिन्स सिइ मखु थुगु अनलाइन प्रबिधि ब्बकेगु
इलय् मस्त नाप अभिभावक न दइगु जुगुलि छगु न्हुगु अनुभव जुगु लहनान्युजयात धयादिगु दु ।
अथेहे अभिभावाक शोभा श्रेष्ठं थौं कन्ह्य लकडाउनया कारण मस्त छेँय् कार्टुन वा मोवाइल जक सका हायेक च्वंगु इलय् स्कूलं थौ न्हुगु प्रबिधि छ्यला मस्त ब्बकेगु सुरु याःगु तसक बालागु ज्या जुगु दु धयादिसे मचा स्कूलय् गयेयान ब्वनाच्वगु धका सिइके मफु । अनलाइन ब्बकेगु इलय् मचा गयेयाना ब्बकि धका सिइक फुगु धका लहनान्युज यात धयादिगु दु ।
बृहस्पति विद्यासदन निगु तगिया नुसला श्रेष्ठ लकडाउनया इलय् थः ब्बनेकुथिया पासापिनिगु ख्वाः स्वयेगु थाकुया च्वंगु भिडिया कलपाखे छेँय् च्वना हे ब्बने दया थः तसक लय्ता । न्हापा न्हि
न्हि कार्टुन जक स्वया न्हि वना च्वंगु आः सुथय् १० बजे व ३ बजे थः पासापि नाप छेँय् च्वना ब्बने दय् न्हिइपुसे च्वना च्वंगु दु धका लहनान्युजयात धयादिगु खः ।
बृहस्पति विद्यासदन स्कूलय् एप्पसपाखे लिच्वः न बैसाख ८ गते पिथने धुकुगु दु । लकडाउन ज्वःछि स्कूल मचातलय् अनलाइनपाखे हे ब्बकेगु याये त्यःगु खः ।
स्वनिगलय् २ लखं मल्याक्क परिवारयात राहत इन, सवारी प्रवेशय् सेनिटाइजर अनिवार्य
बिराजकाजी राजोपाध्याय | चौलागा चतुर्दशी ११४०,बैसाख ८ गते
स्वनिगःया निगू महानगर व १६ नगरपालिकां लकडाउन ज्वःछि २ लख ११द्वःत्या व २३ परिवारयात राहत इनागु न्ह्यथंगु दु । न्हिं सलंसः नागरिकत न्यासि वनाः हे गामय् लिहां वनाच्वंगु समाचार थीथी सञ्चारमाध्ययमय् वयाच्वंगु इलय् उपत्यका नगरपालिका फोरमं २ लख ११द्वः स्वयां आपाः परिवारयात राहत उपलब्ध याकागु जानकारी ब्यूगु खः ।
स्वनिगःया १८ मध्ये १४ नगरपालिकाया प्रमुखतय् उपस्थितीइ येँया राष्ट्रिय सभागृहस च्वंगु उपत्यका नगरपालिका फोरमया बैठकं थुगु जानकारी ब्यूगु खः ।
‘आःया अवस्थाय् छगू प्रदेशं मेगु प्रदेश, छगू जिल्लां मेगु जिल्ला व छगू स्थानीय तगिमं मेगु स्थानीय तगिमय् वयेवने यायेबलय् संक्रमणया खतरा अप्वइ’ नगरपालिका फोरमया नायः तकं खःम्ह येँ महानगरपालिकाया प्रमुख बिद्यासुन्दर शाक्यं धयादिल, ‘जिमिसं स्वनिगलय् दुपिं अतिविपन्न, असहाय व दैनिक ज्यालादारी यानाः नयेमाःपिं मजदुर लकडाउनया इलय् द्यांलानाः च्वनेम्वाःलेमा धकाः मंकाः पहल यानाच्वनागु दु ।’
सुं नं द्यांलाना च्वनेमाःगु जानकारी वःसा स्वनिगःया जनप्रतिनिधि वा टोल फ्री न. ११८० व ११३१स जानकारी बीत शाक्यं अपील यानादिल ।
प्रमुख शाक्यं लकडाउन इलय् अतिविपन्न, असहाय र दैनिक ज्यालादारीइ ज्या याइपिं मजदुरयात आःतक्क येँ महानगरपाखें जक हे ५०द्वः स्वयां आपाःसित राहत व न्याद्वः स्वयां आपाः प्लेट जा नकेधुनागु जानकारी नं बियादिल ।
स्वगिनःया १८ मध्ये १४ पालिकाया प्रमुखतय् उपस्थिति दुगु बैठकय् मध्यपुर थिमि नगरया प्रमुख लिसें फोरमया सचिव मदनसुन्दर श्रेष्ठं थीथी जिल्लापाखें उपत्यकायात ट्रान्जिट दयेकूगु हुनिं भचा अप्वः समस्या खनेदुगु जुइफुगु विषयस सहलह जूगु जानकारी बियादिल ।
‘१४ पालिकां १ लख ९९द्वःत्या व २३ परिवारयात राहत इनेधुंकूगु खनेदत । थप प्यंगू पालिकां १२द्वः परिवारयात इनागु धाःगु दु’ श्रेष्ठं जानकारी बियादिल ।
मनूया ल्याखं स्वयेबलय् स्वनिगलय् जक हे करीब १० लखयात राहत इनेधुंगु जुइफुगु श्रेष्ठं धयादिल ।
‘थुलि जुलं नं राहतया अभावय् गामय् लिहांवनीपिं अप्वयाच्वंगु धइगु समाचार वयाच्वंगु दु’ वयकलं धयादिल, ‘थ्व धयागु स्वनिगःया हे बासिन्दा स्वयां स्वनिगःयात ट्रान्जिट दयेकूपिनिगु हुनिं ला थथे जूगु मखुला धइगु विषयस जिमिसं गम्भीर जुयाः सहलह यानागु दु । थथे खःसा उकिया समाधानय् नं जिपिं छधी जुयाः जाये ।’
स्वनिगलय् दुपिं असहाय, अतिविपन्न व बेरोजगारं नयेगु अभावय् च्वनेम्वाःलेमा धकाः राहत वितरणयात निरन्तरता बीगु, स्वनिगः दुनेया क्वारेन्टाइन सरकारया मापदण्ड दुने च्वनाः न्ह्याकेगु, माःसा मंकाः पहलय् क्वारेन्टाइन तनेगु लिसेंया विषयस नं बैठकय् सहलह जूगु खः ।
सचिव श्रेष्ठं स्वनिगःया दक्वं नाकां वयेवने जुइगु सवारीयात अनिवार्य सेनिटाइज यायेगु प्रवन्ध यायेगु विषयस नं सहलह जूगु जानकारी बियादिल । साँगा लिसेंया छुं नाकां थ्व ज्या न्ह्यायेधुंकूगु व मेगु नाकां नं याकनं न्ह्याकेगु तयारी दुगु श्रेष्ठं धयादिल ।
