Display Style:
Column Style
फेसबुकय् फोटो तःगु विषयय् ल्वापुइ, न्ह्यःगु राउण्ड अश्रुग्यास प्रहार
लहनान्युज | ञंलागा १० ११४०,भाद्र २७ शनिवाः
फोटो तःगु बिषयय् जनकपुरधामय् निगु पक्ष दथुइ झडप जुगु दु ।
जनकपुरधाम वडा नम्बर २० रुपैठाय् शनिवाः जुगु झडपय् झण्डै छगु दर्जन मनूत घाःपाः जूगु दु । ल्वापू जुगु रोके यायेत प्रहरीं ७ राउण्ड अश्रु ग्यास प्रहार याःगु खः ।
निगु पक्षय् दथुइ ल्वापू जुगुलि नियन्त्रणय् कायेगु लागि अश्रु ग्यास प्रहार तक याये माःगु खः । उगु ल्वापू मोहर्रम पर्व माने यायेगु लागि दाहाया फोटो फेसबुकय् तःगु बिषयय् विवाद जूगु खः ।
आः या अबस्था सामान्य जुगु दु सा विवाद मिले यायेगु लागि निगु पक्ष दथुइ सहलह जुया च्वंगु दु धका जानकारी बिःगु दु । निगु पक्षयात जिल्ला प्रहरी कार्यालयय् सःता सहलह याका च्वंगु दु।
१२०१ म्ह कोरोना संक्रमण पुष्टि, ८५२म्ह डिस्चार्ज
शोभा श्रेष्ठ | ञंलागा १० ११४०,भाद्र २७ शनिवाः
वःगु २४ घण्टाय् जक १२०१म्ह कोरोना भाइरस (कोभिड(१९) या संक्रमण पुष्टि जूगु दु । देय् यकं प्रयोगशालाय् १० हजार १७६म्हेसिगु नमुना परीक्षण याःगुलि ४१६ मिसापि व ७८५ म्ह मिजंपिन्त संक्रमण पुष्टि जूगु दु ।
थ्व नाप संक्रमितपि ५३ हजार १२०म्ह थ्यःगु दु । उकि मध्ये ३३६म्ह सी धुकुगु दु । अथेहे ३७ हजार ५२४म्ह संक्रमणमुक्त जुइ धुकुगु दु ।
वःगु २४ घण्टाय् ८५२म्ह डिस्चार्ज जुगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया कथं स्वनिगः दुने ४३१म्हेसित संक्रमण पुष्टि जुगु दु, उकि मध्ये येँ ३७७म्ह, यलय् ३७म्ह व ख्वपय् १७म्हेसित सक्रमण पुष्टि जुगु दु ।
अथेहे मकवानपुरय् १०७म्ह, चितवनय् ९२म्ह, सर्लाहीय् ८३म्ह, रुपन्देहीइ ८१म्ह, मोरङय् ५८म्ह, नवलपुरय् ५१म्ह, कास्की ३५म्ह, बाँकय् ३२म्ह, दाङय् २४म्ह, कपिलवस्तु २२म्ह, बर्दिया व सुर्खेतय् १८म्ह व १८म्ह, बाराय् १५म्ह, सुनसरी १४म्ह, पर्सा व सप्तरी झींम्ह झींम्ह व पाल्पाय् गुम्हेसित संक्रमण खनेदुगु खः ।
महोत्तरी व रोल्पाय् च्याम्ह च्याम्ह, सिराहा, रामेछाप व स्याङ्जाय् न्ह्यम्ह न्ह्यम्ह, गोरखाय् खुम्ह, रौतहट, दैलेख व कैलालीइ प्यम्ह प्यम्ह, बाग्लुङ, अर्घाखाँची व नवलपरासीइ स्वम्ह स्वम्ह, काभ्रे, रुकुम पूर्व व डडेलधुराय् निम्ह निम्ह, इलाम, उदयपुर, ओखलढुंगा, झापा, धनुषा, दोलखा, नुवाकोट, सिन्धुपाल्चोक, सिन्धुली, तनहुँ, लमजुङ व प्युठानय् छम्ह छम्हेसित संक्रमण पुष्टि जुगु दु।
स्वनिगः दुने ४३१म्हेसित कोरोना पुष्टि
लहनान्युज | ञंलागा १० ११४०,भाद्र २७ शनीवाः
स्वनिगः दुने थौं शनिवाः ४३१म्हेसित कोरोना संक्रमित जुगु दु । स्वास्थ्य तथा जनसंख्या मन्त्रालय न थौं शनिवाः मिडिया ब्रिफिङय् येँ जक ३७७म्हेसित कोरोना संक्रमित जुगु धका धाःगु दु ।
अथेहे ख्वपय् १७ व यलय् ३७म्हेसित संक्रमण पुष्टि जुगु धका जानकारी बिःगु दु ।
येँय् संक्रमण पुष्टि जूपि मध्ये १५०म्ह मिसा व २२७म्ह मिजंपि खः । अथेहे, ख्वपय् न्याम्ह मिसा व १२ म्ह मिजं संक्रमण खने दुगु दु । यलय् १६म्ह मिसाव २१म्ह मिजंपिन्त
संक्रमण खने दुगु खः ।
थ्व नाप येँ ९ हजार १०५म्ह, यलय् ११२८ व ख्वपय् ९०८म्हेसित कोरोना संक्रमण पुष्टि जुइ धुकुगु दु ।
म्हिगः शुक्रवाः स्वनिगलय् जक ६९६म्ह कोरोना संक्रमण पुष्टि जूगु खः ।
थ्व नाप नेपालय् कोरोना संक्रमितपि ५३ हजार १२०म्ह थ्यःगु दु । अथेहे संक्रमित मध्ये ७०.६ प्रतिशत डिस्चार्ज जुइ धुकुगु दु । नेपालय् कोरोनां आःतक ३३६ म्ह सी धुकुगु दु।
यलय् स्वम्ह कोरोना संक्रमित मन्त
लहनान्युज | ञंलागा १० ११४०,भाद्र २७ शनीवाः
यलया अस्पतालय् वासः याका वयाच्वम्ह स्वम्ह कोरोना संक्रमित मन्त । पाटन अस्पतालय् निम्ह व मेघा अस्पतालय् छम्ह कोरोना संक्रमित मदुगु खः ।
स्वास्थ्य कार्यालय ललितपुरया कथं सीपि निम्ह ख्वपयाम्ह व छम्ह येँयाम्ह खः ।
पाटन अस्पतालय् वासः याका वयाच्वपि येँया ५१ दँ दुम्ह थौं सुथय् मदुगु खः । वःगु भदौ १९ गते निसे वासः याका वयाच्वम्ह थौं सुथय् २ बजे मदुगु धका स्वास्थ्य कार्यालय ललितपुरं धाःगु दु ।
अथेहे यलया हे पाटन अस्पतालय् वासःयाका वयाच्वम्ह ख्वपया ७२ दँ दुम्ह म्हिगः ९ः४५ बजे मदुगु धका स्वास्थ्य कार्यालयं धाःगु दु । ७२ दँ दुम्ह मिजंम्ह वःगु भदौ १७ गते निसे पाटन अस्पतालय् वासः याका वयाच्वम्ह खः ।
अथेहे मेम्ह यलया मेघा अस्पतालय् वासः याका वयाच्वम्ह ख्वपयाम्ह ३८ दँ दुम्ह थौं सुथय् ७ः४० बजे मदुगु खः । उम्ह मनू भदौ २६ गते जक अस्पतालय् भर्ना जूगु खः।
येँ महानगर १८ वडां कोरोना सक्रमितपिन्त छेँ फलफुल व वासः बिउ वन
लहनान्युज | ञंलागा १० ११४०,भाद्र २७ शनीवाः
येँ महानगरपालिका १८ वडाय् आःतक २७म्हेसित कोरोना सक्रमण जुइ धुकुगु दु ।
उकि मध्ये न्याम्ह डिस्चार्ज जुइ धुकुगु दु । सक्रमितपि मध्ये १८ म्ह छेँय् च्वना वासः याका वयाच्वंगु दु ।
कोरोना सक्रमित जुपिन्त येँ महानगरपालिका १८ वडाया जनप्रतिनिधिपिन्स छेँय् छेँय् वना फलफुल नाप आर्युवेदिक वास बिउ वना च्वंगु दु धका १८ वडाया अध्यक्ष न्हुच्छेकाजी महर्जन लहनान्युजयात धयादिगु दु ।
स्वगू जिल्ला प्रशासन ज्याकूथीं वःगु भदौ २५ गते निसें स्वनिगःदुनेया निषेधाज्ञा छ्वासुकूगु दु । निषेधाज्ञा छ्वासुकेगु झ्वलय् जिल्ला प्रशासनं बँपसः व ठेलागाडा पसः नं चायेकेफइगु कथं निर्णय याःगु दु । उकिया येँ महानगरपालिका १८ वडां स्थानीय निकायन धाःसा जिल्ला प्रशासनया थुगु निर्णयया विरोध याःगु दु ।
थ्वहे झ्वलय् येँ महानगरपालिकाया वडा नं १८या वडा अध्यक्ष न्हूच्छेकाजि महर्जनं छगू विज्ञप्ति पिथनाः थःगु वडाय् फुटपाथ नापं ठेलागाडा पसः तःसा कारवाही यायेगु ख्याच्वः बियादीगु दु ।
वय्कलं येँ महानगरपालिकाया नीति नियमय् हे थज्याःगु ज्या यायेमदइगु धकाः स्पष्ट च्वयातःगुलिं सुयातं अज्याःगु ज्या मयायेत इनाप यानादीगु दु । नापं यदि अज्याःगु नीतियात पालना मयासा नियम कथं कारवाही यायेगु खँ धयादीगु दु।
