Display Style:
Column Style
सांसद श्रेष्ठपाखे निर्माण ज्याया निरिक्षण
लहनान्युज | तछलागा नवमी ११४०,जेठ ३२ आइतवाः
प्रतिनिधि सभा सदस्य माननीय सांसद जीवन राम श्रेष्ठं येँया क्षेत्र न. ८ स्थानीय पूर्वाधार विकास साझेदारी कार्यक्रम अन्र्तगत कामपा वडा नं. १५ य् थी थी निर्माण ज्याझ्वः न्ह्याकादिगु दु ।
स्थानीय पूर्वाधार विकास साझेदारी कार्यक्रम कथं जगतसुन्दर ब्बनेकुथि न्ह्यनो ताँ, मुख्य सतकय् आकाशे ताँ, चःमती पार्क नाप परम्परागत शैलीया जेष्ठ दिवा बिश्राम भबन, श्रीकृष्ण कुन्जय् तल्ला थपे यायेगु ज्या न्ह्याके त्यःगु खः ।
अथेहे, सांसद श्रेष्ठं कामपा वडा १९य् इन्द्र सभा सामुदायिक भवन निर्माण ज्याया न निरिक्षण यानादिगु दु ।
सांसद श्रेष्ठं स्थानीय जनताया सक्रियताय् जुया च्वंगु ज्याया प्रशंसा यानादिसे गुणस्तरय् ज्या जुइगुलि बिश्वास प्वकादिगु दु ।
एमसीसी छलफल यायेत नेकपा सचिवालय बैठक
लहनान्युज | तछलागा नवमी ११४०,जेठ ३२ आइतवाः
एमसीसी परियोजनाबारे छलफल यायेगु लागि नेकपा सचिवालयया बैठक थौं च्वने त्यःगु दु । बैठक थौं ४ बजे प्रधानमन्त्री निवास बालुवाटारय् च्वने त्यःगु खः ।
उगु बैठकय् एमसीसी कार्यदलया दुजःपि भिम रावल व प्रदीप ज्ञवालीया नाप अर्थमन्त्री डा. युवराज खतिवडायात न आमन्त्रित सदस्य कथं ब्बना तःगु दु ।
थ्व स्वया न्ह्यःया बैठकय् न रावल, ज्ञवाली व खतिवडायात सःता एमसीसीबारे नेकपां छलफल याये धुकुगु खः ।
थौंया छलफलं सम्भवतः एमसीसीबारे टुंगो लगे यायेगु नेकपां तयारी यानाच्वंगु दु ।
थुगु संसदया अधिवेशनं एमसीसी पारित यायेगु व मयागु धका नेकपायात दबाव दु ।
पार्टी दुने एमसीसी पारित याये मज्यु धका दवाव दु ।
पार्टीं गठन याःगु कार्यदलं एमसीसी गथे खः अथे पारित मयायेत सुझाव बिःगु खः ।
गुल्मीइ कोरोना संक्रमितम्ह सीत
लहनान्युज | तछलागा नवमी ११४०,जेठ ३२ आइतवाः
गुल्मीइ कोरोना संक्रमित बिरामी सीगु दु ।
रेसुङ्गा नगरपालिका वडा नम्बर–९ य् उपल्लो तम्घास आइसोलेसनय् उपचार याना च्वम्ह धुर्कोट गाउँपालिका वडा नम्बर ४ जैसिथोक च्वम्ह ३६ दँयाम्ह मिजंम्ह सीगु धका डा. कविराज भुसालं धाःगु दु ।
सीइम्हेसिगु शवयात चान्ह्य हे नेपाली सेनां व्यवस्थापन याःगु खः ।
सीम्ह मनू भारतं वया धुर्कोटया क्वारेन्टिनय् च्वःगु खःसा वयात वःगु जेठ १२ गते कोरोना संक्रमण पुष्टि जूगु खः । संक्रमण पुष्टि जूगु लिपा वयात जेठ १३ गते निसे तम्घासया आसोलेसनय् च्वना वासः याका वयाच्वंगु खः ।
उम्ह मनू वःगु निदँनिसे आन्द्राय् क्यान्सर जूया च्वम्ह खः । वयात स्वकः तक स्वाब परीक्षणय् रिपोर्ट पोजिटिभ वःगु खः ।
संसदं नेपाःया न्हूगु नक्सा संशोधन विधेयक पारित
लहनान्युज | तछलागा अष्टमी ११४०,जेठ ३१ सनिवाः
नेपाःया न्हुगु भू भाग लिम्पियाधुरा, कालापानी व लिपुलेक दुथ्याःगु न्हूगु राजनीतिक नक्सा सम्बन्धी संविधान संशोधन विधेयक थौं प्रतिनिधिसभां पारित याःगु दु ।
थौं शनिवाः संसदया बैठक न्हूगु नक्सा कथं निशान छाप ल्हिलेत हःगु संविधान संशोधन विधेयक दुई तिहाई स्वयां अप्व मतं पारित याःगु दु ।
उगु मुँज्याय् उपिस्थित २५८म्ह सांसदपि संशोधन विधेयकया पक्षय् मत तःगु खःसा विपक्षय् धाःसा सुयागु मत मवःगु खः ।
प्रतिनिधिसभा संसदय् कुल २७५म्ह दुजः दुगु खः ।
सरकारं न्हूगु नक्सा कथं संविधानया अनुसूची–३ संविधान संशोधनया निंतिं जेठ ९ गते संसद सचिवालयय् विधेयक दर्ता याकूगु खः ।
सरकारं न्हूगु नक्सा जेठ ७ गते जारि बियाःगु खः ।
थौं ४४८म्ह थप संक्रमित, कोरोना संक्रमितपि न्याद्धः थ्यन
लहनान्युज | तछलागा सप्तमी ११४०,जेठ ३० शुक्रवाः
नेपालय् कोराना भाइरसया संक्रमण जूपि न्याद्धः स्वया अप्व मनूत संक्रमित जूगु दु ।
थौं जक वंगु २४घण्टाया दुने ४४८म्ह मनूपि कोरोनाया संक्रमण जूग दु ।
स्वास्थ्य तथा जनसंख्या मन्त्रालयया प्रवक्ता डा.जागेश्वर गौतमया कथं ४२४म्ह मिजंपि व २४म्ह मिसापिन्त संक्रमण पुष्टि जूगु धका धाःगु दु ।
थौं तक संक्रमित जूपिनिगु ल्याः ५०६२म्ह थ्यंगु दु ।
उकी मध्ये ४७०९म्ह मिजंपि व ३५३म्ह मिसापि खः ।
