Display Style:
Column Style
कोरोना पनेत फुक्क संयम जुयाः न्ह्यज्याये : सभापति देउवा
लहना न्यूज | ने.सं. ११४० चौलागा त्रयोदसि (२० अप्रिल २०२०), सोमवाः
कांग्रेस सभापति शेरबहादुर देउवां कोरोना भाइरस संक्रमण रोकथाम तथा नियन्त्रणया नितिं फुक्कं संयम जुयाः न्ह्यज्यायेमाःगु धयादिल ।
थौं सोमबार प्रेस विज्ञप्ति पिथनादिसें सभापति देउवां सुं नं मनूया निश्चित आस्था व समुदायया भावनाय् लिच्वः लाइकथं सरकार वा सुना नं छुं नं ज्या मयोत अपील यानादिल ।
देउवां विज्ञप्तिइ धयादीगु दु, ‘थौंया हाथ्यालंजाःगु इलय् थीथी समुदाय, धर्मालम्ब, फुक्क जाति, वर्ग व क्षेत्रयात संयम व थःथवय् एकताया नितिं हार्दिक अपील यानाच्वना । फुक्कसिगु ग्वाहालि व विश्वासं हे थौंया संकटपाखें तापायेफइगु यथार्थ लुमंकेत व थःम्हेस्यां नं लुमंकाच्वना ।’
अथे हे सभापति देउवां कोरोना भाइरस संक्रमणया जोखिम सामना यायेत परीक्षणया दायरा समुदाय स्तरय् तीब्र गतिं बिस्तार यायेत नं सरकारलिसे इनाप यानादीगु दु । माःकथंया स्वास्थ्य हलंज्वलं व राहतया बन्दोबस्त यानाः सरकारं परिस्थितियात अझ मछिनिगुपाखें बचय् यायेमाःगु नं सभापति देउवां धयादीगु दु ।
कोरोना संक्रमित कैलालीया ल्यायम्हयात नं ल्वय् लन
विकाश | चौलागा एकादशी ११४०,बैसाख ७ गते
धनगढीया सेती अस्पतालय् वासः याकाच्वंम्ह कोरोना संक्रमित कैलाली लम्कीचुहाया ल्यायम्ह नं वासः याकाः ल्वय् लनेधुंकाः छेँय् लिहांवंगु दु ।
कैलाली लम्कीचुहा नगरपालिका–९ प्रतापपुरया २१दँया ल्यायम्ह राज विकया निक्वःगु व स्वक्वःगु खुसिइ याःगु कोरोना संक्रमण परीक्षणया रिपोर्ट नेगेटिभ वयेधुंकाः वयकःयात अस्पतालं डिस्चार्ज याःगु खः ।
चैत्र २२ गते याःगु परिक्षणय् रिपोर्ट पोजेटिभ वयेधुंकाः अस्पताल भर्ना जूम्ह वयकःया निगूगु व स्वंगूगु रिपोर्ट नेगेटिभ वयेधुंकाः डिस्चार्ज यानागु सेती प्रादेशिक अस्पतालं न्ह्यथंगु दु ।
अस्पतालया हे गाडीं वयकःयात छेँय् तयेयंकूगु खः ।
न्हापांगु रिपोर्ट पोजेटिभ खनेदयेधुंकाः आइसोलेसनय् तःम्ह वयकःया शनिबार याःगु परिक्षणय् रिपोर्ट नेगेटिभ वःगु खः । उकिया २४घौ धुंकाः याःगु मेगु परीक्षणया रिपोर्ट नं नेगेटिभ वयेधुंकाः वयकःयात अस्पतालं डिस्चार्ज याःगु खः ।
अस्पतालं डिस्चार्ज जूगु इलय् थःत वासः यायेत ग्वाहालि याःपिं डाक्टरलिसेंया स्वास्थ्यकःमितयत सुभाय् देछासें राजं मेपिं संक्रमिततयत आत्मविश्वास बल्लाकातयेत सुझाव बियादिल ।
भारतं चैत ११ गते छेँय् लिहांवःम्ह वयकःया कैलालीया प्रतापपुर क्वारेन्टाइनय् ११न्हु च्वनेधुंकाः कोरोना पुष्टि जूगु खः । नगरपालिकां दयेकूगु क्वारेन्टाइनय् वयकः १३ गतेनिसें च्वंगु खः ।
११न्हु क्वारेन्टाइनय् व १३न्हु आइसोलेसनय् च्वंम्ह वयकः थौं हे छेँय् लिहांवंगु खः । ल्वय् लनेधुंकूसां राज मेगु १५न्हु होम क्वारेन्टाइनय् च्वनेमाःगु धाःगु दु ।
नेपालय् आःतक्क ३१ कोरोना संक्रमित खनेदुगु दु । वमध्ये प्यम्ह वासः यानाः ल्वय् लनेधुंकाः छेँय् लिहांवंगु दु ।
२७म्ह संक्रमित थीथी अस्पतालय् वासः याकाच्वंगु दु । वासः याकाच्वंपिं सकसिगु उसाँय् अवस्था सामान्य हे दुगु धाःगु दु ।
‘एक घर एक रक्तदाता’ अभियानं स्वनिगलं पिने गति कयाच्वन
शोभा श्रेष्ठ | चौलागा एकादशी ११४०
लकडाउनया अवस्थाय् सुं नं विरामीयात हिया अभाव जुइके मबीत न्ह्याकूगु ‘एक घर एक रक्तदाता’ अभियान अन्तर्गत थानकोटय् हिदान जूगु दु ।
नेपाल रेडक्रस सोसाईटी महाबौद्ध उपशाखाया संयोजनय् चन्द्रागिरीइ च्वंम्ह रीतुकुमार श्रेष्ठया न्ह्यलुवाय् भक्तपुर रक्त संचार केन्द्र (ब्लड बैंक) मार्फत हिदान याःगु खः ।
थौं जूगु एक घर एक रक्तदाता अभियान अन्तर्गतया हिदानय् चन्द्रागिरी नगरपालिका वडा नं ३ अन्तर्गत थानकोट क्षेत्रया २०म्ह स्थानीयं हिदान याःगु दु ।
‘लकडाउनया इलय् हिया अभाव जूगु फेसबुकपाखें जानकारी वःगुलिं पासापिन्त हिदानया लागिं अपिल याना’ रितुकुमार श्रेष्ठया धापू खः, ‘छेँय् हे वयाः हि मुंकीगु जानकारी दयेधुंकाः थःगु हे छेँय् रेडक्रस सोसाइटीया सहकर्मीतयत सःताः थुगु हिदान यानागु खः ।’
थज्याःगु लकडाउनया ईयात हाथ्याया रुपं सामना यानाः हिदान ज्याझ्वः यानाबलय् व्यक्तिगत सुरक्षाया दक्वं साधन छ्यलाः सावधानि नालाः हिदान यानागु महाबौद्ध उपशाखाया सभापति योगेश कुमार शाहीं धयादिल ।
प्रत्येक छेँखां छम्हेसिया दरं नियमित हिदान यायेगु खःसा आःया अभाव सामान्य जुइगु सभापति शाहिया धापू दु ।
‘एक घर एक रक्तदाता’ अभियानं महामारीया अवस्थाय् नं व्यापकता काःगु खनेदु ।’ उपशाखाया छ्यान्जे प्रकाश अमात्यं धयादिल । ‘भौतिक दुरी कायम यानाः संक्रमणया सुरक्षा व्यवस्थापन कायम यानाः छेँखा छेँखाय् हे हि मुंकीगु जूगुलिं थुकिं हि मुंकेगु व संचारय् न्हूगु अभ्यास न्ह्याकी ।’
तर थुकियात निरन्तरता बी उलि हे हाथ्यां जाःगु न्ह्यथँसें प्रत्येक हिदातायात नं प्रत्येक स्वलाय् नियमित हिदान याकेत प्रोत्साहित यायेमाःगु आवश्यकता अमात्यं न्ह्यथनादिल ।
लिपांगु इलय् रक्तदाता छेँय् दुने हे लाःबलय् स्वास्थ्य क्षेत्रय् हिया अभाव खनेदुगु दु । अथेजुयाः नं रेडक्रसं छेँखा छेँखाय् हे वनाः हि मुंकेगु अभियानयात तच्वयेकूगु दु ।
कोरोना भाईरस (कोभिड १९)या हुनिं लकडाउनया अवस्थाय् हिया अभाव जुइके मबीत धासें नेपाल रेडक्रस सोसाईटी महाबौद्ध उपशाखा व येँ जिल्ला शाखां मंकाः रूपं न्ह्याकूगु ‘एक घर एक रक्तदाता’ अभियान प्यंगूगु वालय् थ्यंगु दु ।
निशुल्क एम्बुलेन्सपाखें आःतक्क सत्या स्वयां आपाःसिन सेवा काल
बिराजकाजी राजोपाध्याय | चौलागा एकादशी ११४०
येँ महानगरपालिकाया आर्थिक ग्वाहालिं न्ह्यानाच्वंगु निःशुल्क एम्बुलेन्स सेवां लकडाउनया इलय् नुगः ल्वय्, जँलास्ये ल्वगि लिसेंया विरामीयात प्रभावकारी सेवा बीधुंकूगु दु ।
एम्बुलेन्स चालक संघ, नेपाल (येँ जिल्ला कार्य समिति)या नायः गणेश सापकोटां सेवा न्ह्याकागु ६न्हुं हे सत्या स्वयां आपाःसित सेवा बीधुनागु जानकारी बियादिल ।
‘मुख्य यानाः डायलोसिस यायेमाःपिं विरामी, नुगः ल्वगि, मचा बुइत व्यथा जूपिं लिसेंया विरामीयात प्राथमिकताय् तयाः न्यागः एम्बुलेन्सं थौं तक्क स्वसःक्वः स्वयां अप्वः सेवा बीधुन,’ सापकोटां धयादिल ‘मनू ल्याःखायेबलय् सत्या स्वयां आपाःसित सेवा बिया । वय्कःपिन्त छेँ वा डेरां अस्पताल व वासः यायेधुंकाः अस्पतालं हाकनं छेँय् वा डेराय् थ्यंकाबीगु याना ।’
मेगु दिनय् स्वयां शनिबाः सेवा काइपिनि ल्याः म्ह्वः दुगु धासें मेगु दिनय धाःसा न्हियान्हिथं सेवा काइपिं अप्वयाच्वंगु जानकारी बियादिल ।
सापकोटां सम्झौता कथं कार्यक्षेत्र महानगरपालिका दुने जक जूसां महानगरपालिका क्षेत्र पिने व स्वनिगः पिनं नं विरामीतय्सं स्वापू तयाच्वंगु दुगु धासें अज्याःगु फोन न्हिं ५० स्वयां आपाःया ल्याखय् वयेगु याःगु जानकारी बियादिल ।
महानगरपालिकाया आर्थिक ग्वाहालिइ न्ह्यानाच्वंगु न्यागः एम्बुलेन्सं मुख्य यानाः महानगरपालिका क्षेत्र दुनेया विरामीयात आपाः प्राथमिकता बीगु याः । चक्रपथ पिने निगू किलोमिटरतक्कया विरामीयात तकं वीर अस्पताल, टिचिङ अस्पताल, बालाजुया डायलोसिस सेन्टर लिसेंया थासय् तक्क यंकाबीगु व छेँय् वा कोथाये तयाबीगु यानाच्वनागु वय्कःया धापू दु ।
येँ महानगरपालिका प्रमुख बिद्यासुन्दर शाक्यं लकडाउनया इलय् हृदयघात, जँलास्येँ ल्वगि लिसेंयापिं महानगरबासीतयत निशुल्क एम्बुलेन्स सेवा बीगु आज्जुं लकडाउन ई ज्वःछि २४घौ हे सेवा बीगु व्यवस्था ताःलाकागु जानकारी बियादिल ।
‘थःगु निवासं अस्पतालतक्क, छगू अस्पतालनिसें मेगु अस्पतालतक्क वा अस्पतालं बिरामीया छेँ वा कोथातक्क यंकेत निःशुल्क एम्बुलेन्स सेवाया सुविधा उपलब्ध दु’ प्रमुख शाक्यं धयादिल, ‘लकडाउनया इलय् सार्वजनिक यातायात नं उपलब्ध मदुगु अवस्थाय् महानगरय् च्वनाच्वंपिं विरामीयात अस्पतालतक्क यंकेत हयेत समस्या जूसा येँ महानगरपालिकां हटलाइन नम्वर ११८०इ स्वापू तयेत इनाप यानाच्वना ।’
आः न्यागः एम्बुलेन्सं चाबही, बौद्ध, बालाजु, स्वयम्भू, लाजिम्पाट, अन्तराष्ट्रिय विमानस्थल, कोटेश्वर लिसेंया थासं एम्बुलेन्सं सेवा बियाच्वंगु दु ।
येँ महानगरपालिकां कोरोना संक्रमणया सम्भावना दुपिं विरामी अस्पतालतक्क यंकेत समस्या जूसा उमित सेवा बीत धासें येँ महानगरपालिकाया हे सहकार्यय् न्ह्यानाच्वंगु नेपाल एम्बुलेन्स सेवायात थ्वयां न्ह्यः हे तयारी अवस्थातय् तःगु दु । उगु सेवा कायेत १०२ स स्वापू तयेफइगु नं प्रमुख शाक्यं जानकारी बियादिल ।
मध्यपुर थिमि नपाया ४ नं वडाय् राहत इन
लहनान्युज | चौलागा एकादशी ११४०, बैसाख ६ शञ्चवाः
थौं मध्यपुर थिमि नपाया ४ नं वडाय् राहत बिइगु दु ।
४ न. वडाध्यक्ष कुमार श्रेष्ठं थौंया राहात इनेगु लागि मानवीय आस्था नेपाल, सूर्यदर्शन साकोस, बाबा साकोस, नेपाल उद्योग बाणिज्य महासंघ, टिभि प्वाइन्ट, राधेराधे लगायत थीथी संघसंस्थाया ग्वाहालिं ३५२ म्हसित राहत बियागु धका धयादिगु दु ।
लकडाउनया इलय् न्हिया न्हि ज्या याइपि, विपन्न परिवारयात राहत इनेगु खः धका वडा सदस्य रामकेशरी श्रेष्ठ धयादिगु दु ।
थौंया राहत इनेगु लागि नेपाल प्रहरी, शस्त्र प्रहरी, नेपाली सेना, नेपाल रेडक्रस सोसाइटी मध्यपुर थिमि उपशाखा, मध्यपुर सञ्चार समाज लगायत स्वयंसेवकपिन्स ग्वाहालि याःगु खः ।
