Display Style:
Column Style
लुँया भाः ७८ द्धः थ्यन
लहनान्युज | सिल्लागा त्रयोदशी ११४०
नेपाःया बजारय् लुँया भाः आतक हे दकदलय् अप्वो थ्यःगु दु ।
थौं नेपाल सुन चाँदी व्यवसायी महासंघं पितबिगु भाः कथं छापावल लुँया छगु तोला ७८ द्धः व सच्छि, तेजावी लुँ ७७ द्धःच्यासः तक थ्यःगु दु ।
अथेहे, वहः छगु तोला गुसः व झीन्यातका थ्यःगु दु धका महासंघं धाःगु दु ।
लुँया भाः बिहीवाःया तुलनाय् तोलाय् न्यासः तका थहा वःगु दु ।
खोकना महोत्सव शुरु (फोटो फिचर)
नृपेन्द्रलाल श्रेष्ठ | सिल्लागा त्रयोदशी ११४०
खोकनाय् आन्तरिक व बाह्य पर्यटक सालिगु कथं थौं निसे खोकना पर्यटन महोत्सव २०७६ शुरु जुगु दु ।
थौं छगु ज्याझ्वः दथुइ गुहमन्त्रि रामबहाद्र थापा बादलं ज्याझ्वःया औपचारिक कथं उलेज्या यानादिगु दु । थुगु महोत्सव स्वन्हु यकं थौ ९ गते निसे ११ गते तक न्ह्याइ ।
असनय् अन्तर्राष्ट्रिय मातृभाषा दिवस हनिइगु
नृपेन्द्रलाल श्रेष्ठ | सिल्लागा दशमी ११४०
वइगु फ्रेअवरी २१ (फागुन ९ गते) अन्तर्राष्ट्रिय मातृभाषा दिवसया दिं येँया असनय् थीथी ज्याझ्वः यानाः मातृभाषा दिवस तःजिक हनेत्यःगु दु ।
अन्तर्राष्ट्रिय मातृभाषा दिवस जनस्तरीय अभियानया ग्वसालय् जुइगु थुगु ज्याझ्वलय् मातृभाषाया अधिकारयात कयाः थीथी माग जनस्तरीय अभियानं न्ह्यःने हःगु खः ।
उगु अभियानया लागिु छगु मुँज्यां नेपालभाषा लिसेलिसें दक्व मातृभाषां राष्ट्रिय म्ये हालेदयेमाःगु, खस नेपाली भाषा ब्वनेथाय् जनजातिया मातृभाषा नं ब्वनेदये माःगु, अथेहे, अनिवार्य मातृभाषा शिक्षाया व्यवस्था यायेमाःगु माग न्ह्यब्वःगु दु ।
असनय् फागुन ९ गते सुथय् जुइगु ज्याझ्वलय् मातृभाषा अधिकारयात कयाः ल्हाःचिं मुंकेगु, मातृभाषा संरक्षणया विषयस न्वचू, अथहे, नेपालभाषा व माृतभाषा शिक्षा आन्दोलनया न्ह्यलुवाःपिनिगु किपाः ब्वज्या जुइगु जूगु दु ।
मातृभाषा शिक्षा आन्दोलनया अभियन्ता देवदास मानन्धरं बियादीगु जानकारी कथं उगु हे दिं अनिवार्य मातृभाषा शिक्षायात कयाः शिक्षामन्त्रीयात ज्ञापनपौ लःल्हायेगु जानकारी नं बियादीगु दु ।
अथेहे, भाजु मानन्धरं उगु दिं असनय् मातृभाषा अधिकारयात कयाः चेतना ब्वलंकेगु नितिं व सरकारयात झीगु माग थ्यंकेगु नितिं थीथी नारा लिसेंया ब्यानरत ब्वज्या यायेगु जानकारी नं बियादीगु दु ।
ग्वसाः खलकं थुगु ज्याझ्वलय् थीथी संघसंस्थापाखें ऐक्यबद्धता प्वंकेगु कथं ब्यानर प्रदर्शन यायेत नं इनाप याःगु दु ।
उगु हे दिं थीथी संघसंस्थापाखें विस्कं विस्कं कथं ब्यागलं मातृभाषा सम्बन्धी ज्याझ्वःत नं तयातःगु दु ।
फरक अभिव्यक्तिया १५क्वःगु चिबाखं मुँज्या
लहनान्युज | सिल्लागा अष्टमी ११४०
‘सः छगू फरक अभिव्यक्ति’या ग्वसालय् १५क्वःगु चिबाखं मुँज्या यलय् जुल ।
ज्याझ्वलय् नःलि बज्राचार्य, काशीराम विरस, रामगोपाल आशुतोष स्वम्हेसिनं म्हतिं न्यापु न्यापु यानाः मुक्कं १५पु बाखं ब्वनाः न्यंकादीगु खः ।
ज्याझ्वलय ब्वति काःपिं मध्ये छम्हसित गोलाप्रथां ल्यःम्ह रुणित बज्राचार्य व स्वम्ह च्वमिपिन्त मतिनाया चिं सुधीर ख्वविं लःल्हानादिल ।
अथे हे मोक्षबहादुर अमात्यं स्वम्हं च्वमिपिन्त खादां क्वखाय्काः दां नं लःल्हानादीगु खः ।
ज्याझ्वलय् ब्वनादीगु बाखंयात कयाः साहित्यकार डा. पु्ष्पराज राजकर्णिकारं कुलादीगु खः ।
ज्याझ्वः समाश्रीं न्ह्याकादीगु खः ।
आर्थिक बिट स्वइपिं पत्रकारतलिसे अन्तक्र्रिया
नृपेन्द्रलाल श्रेष्ठ | सिल्लागा अष्टमी ११४०
प्रेस काउन्सिल नेपालया ग्वसाः व नेपाल आर्थिक पत्रकार समाज (सेजन)या संयोजनय् छगू अन्तरक्रिया ज्याझ्वः जुल ।
ज्याझ्वलय् प्रेस काउन्सिल नेपालया दुजःलिसें वरिष्ठ पत्रकार गोपाल बुढाथोकीं मिडियाय् मालिक हस्तक्षे अप्वया वनाच्वंगु, सम्पादकीय स्वतन्त्रतायात कयाः प्रहार जूगु धासें वाइडबडी, सेनाया जहाज खरिद प्रकरणथें जाःगु ततःधंगु इस्यू पिहां वय् मफूगु धयादिल ।
अर्थविज्ञ डा. गोविन्द बहादुर थापां पत्रकारतसें करियर दय्केगु खःसा आग्रह÷पूर्वाग्रह मदुगु समाचार सम्प्रेषण याय्माःगु, संघसंस्था बीगु व्यक्तिगत सिरपाः काय्गु स्वयां संस्थागत उपयुक्त जुइगु न्ह्यथनादिसें अर्थसम्बन्धि ज्यापौ न्ह्यब्वयादिल ।
ज्याझ्वलय् सेजनका पूर्व नायः गोकर्ण अवस्थी, सेजनया नायः भीम गौतम, प्रेस काउन्सिल नेपालया प्रमुख प्रशासकीय अधिकृत झबिन्द्र भुसाल, पत्रकार नवराज चालिसे, पत्रकार अनुज ढुङ्गेल, प्रेस काउन्सिलया दुजः चेतनाथ धमला, पत्रकार विज्ञान अधिकारी, कुबेर चालिसें आर्थिक पत्रकारिताया प्रवृति, अवस्था व हाथ्याःयात कयाः थःथःगु बिचाः न्ह्यब्वयादीगु खः ।
