Display Style:
Column Style
मेपि १३ म्हेसित कोरोना, संक्रमित जुपि १३४ म्ह थ्यन
लहनान्युज | बछलागा चतुर्थी ११४०, बेसाख २९ सोमवाः
नेपालय् मेपि १३म्ह कोरोना भाइरसया संक्रमण खनेदुगु दु ।
आ खने दुपि कपिलवस्तुइ ६ म्ह, रुपन्देहीइ ६ म्ह व लुम्बिनीइ १ म्ह यानाः १३ म्ह याना संक्रमण जुपिनिगु ल्याः १३४ म्ह थ्यःगु दु ।
सुथय् १० म्हसिबे कोरोना संक्रमण जुगु कपिलवस्तपुइ मेपि ६म्हेसिके कोरोना भाइरसया संक्रमणया पुष्टि जूगु दु । संक्रमण जुपि कपिलवस्तुया यशोधरा गाँउपालिका–८ व बुद्धभुमि नगरपालिका–७ य् च्वनीपि मिजं तयेत संक्रमण जूगु दु ।
नाप रुपन्देही समरीमाई गाँउपालिका–७ व लुम्बिनी सांस्कृतिक गाँउपालिका–६या मिजंतयेत संक्रमणया पुष्टि जूगु खः ।
अथेहे, ंबर्दिया राजापुर–५या ११दँया छम्ह मिसायात संक्रमण जूगु खँ स्वास्थ्य तथा जनसंख्या मन्त्रालयया सह–प्रवत्ता डा समिरकुमार अधिकारी जानकारी बियादीगु दु । बर्दियाय् कोरोना खनेदुगु थ्व न्हापांगु संक्रमण खः ।
इमिगु येँया राष्ट्रिय जनस्वास्थ्य प्रयोगशालाय् याःगु परीक्षणया झ्वलय् झिंस्वम्हेसियां रिपोर्ट पोजेटिभ वःगु खः ।
थ्व नापं आतक नेपालय् संक्रमित जुपिनिगु ल्याः १३४ म्ह थ्यंगु दु । थौं हे छन्हु २४म्हेसित संक्रमण जूगु दु ।
पत्रकारपिन्त ग्वाहालि
सुरज, लहनान्युज | बछलागाः चतुर्थी ने.सं. ११४० (बैसाख २८ २०७७) आइतवाः
कोरोना भाइरस कोभिड १९ या माहामारीया थुगु इलय् लकडाउनपाखें प्रभावित पत्रकारपिन्त उपत्यका सरोकार मञ्च व उपत्यका व्यापि सडक विस्तार पीडित संघर्ष समितिं थीथी नसात्वँसा ज्वलं ग्वाहालि याःगु दु । मञ्च व समितिं जाकि, क्येँ, दालमोठ, बजि, लाखामरी, चिनी, आँटा, तरकारी थें जाःगु झिंगुता नसाज्वलं ग्वाहालि याःगु खः । उगु नसाज्वलं नेवाः पत्रकार राष्ट्रिय दबूया संयोजनय् समस्याय् लाःपिं पत्रकारपिन्त लःल्हायेगु ग्वसा दुगु खः ।
नायः सुमन सायमिया धापू https://youtu.be/6cydoXf5gUU
उपत्यका सरोकार मञ्च व उपत्यका व्यापि सडक विस्तार पीडित संघर्ष समितिया नायः सुमन साय्मि, न्वकू विद्या श्रेष्ठ, छ्याञ्जे रविन्द्रकुमार श्रेष्ठ व दुजः विकासबाबु श्रेष्ठं उगु नसाज्वलं लःल्हानादीगु खःसा पत्रकार राष्ट्रिय दबूया केन्द्रीय अध्यक्ष सुरजवीर बज्राचार्य, यल जिल्ला अध्यक्ष सागर महर्जननापं यल जिल्ला कार्यसमिति दुजःपिन्सं उगु ग्वाहालि लःल्हानाकयादीगु खःसा स्वनिगःया नेवाः पत्रकारतय्त लःल्हायेगु धाःगु दु ।
थुखे किर्तिपुर नगरपालिकां नं पत्रकारपिन्त नसाज्वलं ग्वाहालि याःगु दु । नगरपालिकां जाकि, क्ये थेंजाःगु न्हियान्हिथं माःगु ज्वलं ग्वाहालि याःगु खः । नगरपालिकापाखें मेयर रमेश महर्जन, उपमेयर सरस्वती खड्कां लःल्हानादीगु नसाज्वलं नेवाः पत्रकार राष्ट्रिय दबूपाखें वरिष्ठ उपाध्यक्ष नृपेन्द्रलाल श्रेष्ठ, महासचिव सुनील महर्जन व दाँभरी सुरेन्द्रभक्त श्रेष्ठ, मूदुजः नविन जाेशी व अनुप प्रधानपिन्सं ग्वाहालि ज्वल लःल्हानाकयादीगु खः ।
कपिलवस्तुइ मेपि १० म्ह कोरोना संक्रमण पुष्टि
लहनान्युज | बछलागा चतुर्थी ११४०, बेसाख २९ सोमवाः
कपिलवस्तुइ मेपि १० म्हसित कोरोना संक्रमण पुष्टि जुगु दु ।
थ्व नाप नेपालय् कोरोना संक्रमित जुपिनिगु ल्याः १२० म्ह थ्यःगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया कथं न्हुपि संक्रमित जुपिनिगु ल्याः कपिलवस्तुइ यशोधरा गाउँपालिका वडा नं. ५ व बुद्धभुमि नगरपालिका वडा नं. ७ व १० यापि खः ।
एम्बुलेन्सय् मनू ह्यःगुलि निम्हेसित कारबाही यात
लहनान्युज | बछलागा चतुर्थी ११४०, बेसाख २९ सोमवाः
बाराया विश्रामपुर गाउँपालिकाय् एम्बुलेन्सय् मनू ह्यःगुलि निम्हेसित कारबाही याःगु दु ।
एम्बुलेन्स चालक बाराया बिश्रामपुर गाँउपालिका २ च्वम्ह २४ दँया राजन पटेल व वडा नं.३ याम्ह २७ दँ याम्ह अनिल पटेल कारबाही याःगु दु ।
करोना संक्रमण नियन्त्रण व रोकथामया लागि देय् यकं लकडाउन जुयाच्वंगु इलय् एम्बुलेन्सय् तया मनूत ल्ह्ययेगु याना च्वंगुलि इपि निम्हसित सशस्त्र प्रहरीं नियन्त्रणय् काःगु खः ।
भारतीय मनू तयेत एम्बुलेन्सय् तया नेपाः दुत हया च्वंगु इलय् बोर्डर आउटपोष्ट बरैनियाया टोलीं इमित ज्वःगु खः ।
भारतया पटना च्वपिन्त येँ च्वम्ह ४५ दँयाम्ह अमृत कुमारं इमित बारा विश्रामपुर गाउँपालिका ३ य् मुसर्वा नाकापाखे नेपाः दुत हयेत्यःगु खः । एम्बुलेन्स नियन्त्रणय् कया सशस्त्र प्रहरीं प्रहरी चौकी बलिरामपुरय् जिम्मा बिःगु खः ।
सुकुम्वासी आयोगया खँय् हलिं नेवाः दबूया आपत्ती
विकाश | बछलागा तृतीया ११४०
हलिंन्यंक च्वनाच्वंपिं नेवाःतय् कुसा संगठन विश्व हलिं नेवाः दबुलिं नेपाल सरकारं सुकुम्वासीतयत ६ आना जग्गा बीगु धकाः याःगु निर्णय प्रति आपत्ती प्वंकूगु दु ।
दबूया केन्द्रीय मुँज्याय् थुगु विषयस सहलह यासें हलिंन्यंक लिसें नेपालय् नं कोभिड १९ या संक्रमण न्यनाः सकलें लकडाउनय् च्वनाच्वंगु इलय् सुकुम्वासी आयोग हयेगु लिसें थुकथंया निर्णय यायेगु पायछि ज्या मखूगु धाःगु खः ।
स्वनिगःया रैथाने नेवाःतयत विस्थापित याइगु कथंया पलाः नेपाल सरकारपाखें ल्ह्वन धाःसा नेपाःया खलःपुचः सकललिसे जानाः दबूपाखें नेपाल सरकारयात अन्तर्राष्ट्रिय कानून कथं मुद्दा न्ह्याकेगु निर्णय जूगु दबूया नायः सिजन श्रेष्ठं जानकारी बियादिल ।
दबूया अनलाईन वैठकय् नेपाल लिसें अमेरिका, क्यानडा, लन्डन, इजरायल व थीथी यूरोपीय देशय् च्वनाच्वंपिं ज्यासना पुचःया दुजःतय् ब्वति दुगु खः ।
