Display Style:
Column Style
वीरगञ्जय् निम्ह कोरोना संक्रमित बिस्यू वन
लहनान्युज | ञंलाथ्व ५ ११४०,भाद्र ७ आइतवाः
वीरगञ्जय् निम्ह कोरोना संक्रमित वीरगञ्ज हेल्थ केयर कोरोना विशेष अस्पतालं बिस्यू वःगु दु ।
चान्ह्यः २ बजे राउण्डय् वःपि स्वास्थ्यकःमिपिन्स संक्रमितपि मखने वः प्रहरीयात खबर याःगु खः ।
डिलक्स क्याबिनय् च्वना वया च्वपि गये याना बिस्यू वन धइगुलि प्रहरीं अनुसन्धान न्ह्याके धुकुगु दु ।
अस्पतालं ल्यूनें तिन्हुया बिस्यू वःगु धइगु प्रहरी आशंका याःगु दु ।
उमित माला च्वनागु दु धका जिल्ला प्रहरी कार्यालय पर्सां जानकारी बिःगु दु ।
प्रसुति गृहया च्याम्ह स्वास्थ्यकःमि कोरोना संक्रमण
लहनान्युज | ञंलाथ्व ५ ११४०,भाद्र ७ आइतवाः
थापाथलीया प्रसुती गृहय् ज्यायाइपि स्वम्ह आवासीय चिकित्सक नाप च्याम्हेसित कोरोना भाइरसया संक्रमण खने दुगु दु ।
संक्रमित जूपि नर्स, फार्मेसीइ ज्या याइपि, प्राविधिक व सुरक्षा गार्ड नाप अस्पतालय् च्वंगु बैंकया कर्मचारीपि खः ।
अस्पतालया बिरामीपिन्त धाःसा संक्रमण खने दुगु मदुनि ।
संक्रमित मध्ये निम्ह अस्पतालया आइसोलेसनय् च्वना च्वंगु दु सा बाँकी होम आइसोलेसनय् च्वना च्वंगु दु धका अस्पतालया मेडिकल सुपरिटेण्डेन्टं जानकारी बिःगु दु ।
पर्सा व बाराय् १५६म्ह कोरोना संक्रमण पुष्टि
लहनान्युज | ञंलाथ्व ५ ११४०,भाद्र ७ आइतवाः
पर्सा व बाराय् १५६ म्हेसित कोरोना संक्रमण पुष्टि जूगु दु । नारायणी अस्पतालय् पीसीआर ल्याबय् ३२० म्हेसिगु स्वाब नमूना परीक्षण याःगु इलय् ३४ म्ह मिसा नाप १५६ म्हेसित कोरोना पुष्टि जूगु दु ।
पर्साया १४५ म्ह व बाराय् ११ म्ह संक्रमण खने दुगु खः ।
नेशनल मेडिकल कलेज, भवानी व तराई हस्पिटलया न्याम्ह डाक्टर, जिल्ला प्रहरी कार्यालयया कर्मचारी, नारायणी एफएमया कर्मचारी व जीतपुर आर्मी ब्यारेकया नेपाली सेनाय् तक
संक्रमण खने दुगु खः ।
थ्व स्वया न्ह्यः पर्साय् ३८७ म्ह मिसानाप याना १ हजार ७९० म्हेसित कोरोना संक्रमण पुष्टि जूग दु । उकि मध्ये २२ म्ह भारतीय नागरिक, १२० म्ह स्वास्थ्यकःमि, ८६ सुरक्षाकःमि, च्याम्ह पत्रकार, ८९म्ह कैदी थुनुवा, ४८म्ह अस्पताल सफाइकःमि, गार्ड व कार्यालय सहयोगी तक संक्रमित जूगु खः । उकि मध्ये ७४ म्ह मिसा नाप ३५६ म्ह कोरोना मुक्त जुया छेँ लिहा वने धुकुगु दु ।
पर्साय् आःतक कोभिड–१९ या संक्रमणपाखे २८म्ह सी धुकुगु दु । २८म्ह मध्ये छम्ह बेवारिसे शवया पहिचान खुले जूगु मदुनि ।
वीरगञ्जय् कोरोना संक्रमणं छम्ह मन्त
लहनान्युज | ञंलाथ्व ५ ११४०,भाद्र ७ आइतवाः
वीरगञ्ज महानगरपालिका–११ य् च्वम्ह ५६ दँया मिसाम्ह कोरोना संक्रमणं छम्ह मदुगु दु ।
नारायणी अस्थायी कोभिड अस्पताल वीरगञ्ज हेल्थ केयरय् वासः यायेगु झ्वलय् शनिवाः बहनि मदुगु धका जिल्ला प्रशासन कार्यालय पर्सां धाःगु खः ।
उम्ह मनू वःगु साउन २२ गते स्वाब संकलन याना पीसीआर परीक्षण याःगुलि साउन २४ गते वयागु रिपोर्ट पोजेटिभ वःगु खः ।
थाइराइडया ल्वगि उम्ह मनू ज्वरो, मूसू वयेगु नाप सासः ल्ह्यायेगु समस्या वया साउन २४ गते निसे आईसीयूलय् च्वना वासः याका वयाच्वंगु खः ।
थ्व नाप वीरगञ्जय् कोरोना संक्रममणपि ३७म्ह थ्यःगु दु ।
थौं गन गन वइ मखु मत
लहनान्युज | ञंलाथ्व ५ ११४०,भाद्र ७ आइतवाः
न्हुगु फिडर लाइन तयेगु ज्या याये माःगुलि नेपाल विद्युत् प्राधिकरणं थौं आइतवाः सुथय ११ बजे निसे न्हिनय् ३ बजे तक येँया छु छु थासय् मत वइ मखुगु जुगु दु ।
प्राधिकरणया सूचं कथं पुच्वः वितरण केन्द्रं टेकु फिडरपाखे बियावया च्वंगु ११ केभी लाइनया न्हुगु फिडर ताने याइगु जूगुलि मत छु ई वइ मखु धका धाःगु दु ।
प्राधिकरणं बागडोल जःखः, सनराइज टावर जःखः सानेपा चक्रपथ क्षेत्र, खाद्य गोदाम लगायतया थासय् मत वइ मखुगु जुगु दु ।
प्राधिकरणं उगु थासय् छु ई मत मवइगुलि ग्राहकपिन्त क्षमायाचना यासे ज्या क्वचायेवः हे मत वइ धका प्राधिकरणं धाःगु दु ।
