Display Style:
Column Style
लकडाउनया इलय् सरकारी गाडीं हे मलङ्गवां मनूत येँय् हल
विकाश | बछलाथ्व चतुर्दशी ११४०,बैसाख २२ गते
सरकारं स्वनिगः दुहांवयेगु नाकाय् कडाई यानागु धयाच्वंबलय् चांचां मलङ्गवां छगू परिवार सरकारी गाडीइ हे च्वनाः येँय् थ्यंकःवःगु दु ।
छम्ह मिसा थः म्ह्याय् व काय्लिसें सरकारी गाडीइ च्वनाः थौं सुथय् येँय् थ्यंकःवःगु खः ।
उपिं मलङ्गवानिसें हे सरकारी गाडीइ च्वनाः येँय् थ्यंकःवःगु खः । बा २ झ २४१३ ल्याःया सरकारी गाडीं उमित येँय् हःगु खः ।
मलङ्गवां येँय् वःपिं उपिं शुरुइ येँ महानगरपालिका २३ वडा ओमबहालय् वंगु खः । ओमबहालय् थःथितिया डेराय् च्वंवःपिं उमित अनया स्थानीयं च्वनेमबीगु धकाः विरोध यायेवं उपिं हाकनं २२ वडा वटुइ वंगु खः ।
वटुइ नं स्थानीय विरोधय् कुहांवयेधुंकाः तिनि उमित प्रहरीं टेकुस्थित राष्ट्रिय जनस्वास्थ्य प्रयोगशालाय् परिक्षणया लागिं यंकूगु खः ।
उमिगु आरडिटि परिक्षणय् रिपोर्ट नेगेटिभ वःगु कामपा २३ वडाध्यक्ष मचाराजा महर्जनं जानकारी बियादिल ।
पिसिआर विधिं याःगु परिक्षणया रिपोर्ट मवःनि ।
आरडिटि परिक्षणया रिपोर्ट नेगेटिभ वयेधुंकाः पिहां मवःसे पूवंक होम क्वारेन्टाइनय् च्वनेगु शर्तय् उमित वटुइ हे च्वनेब्यूगु दु ।
उखे जोखिम अप्वयावःगुलिं छम्ह थःथितियापाखें सरकारी गाडीइ च्वनाः येँय् वयागु उम्ह मिसां धाल ।
उपिं आः च्वनाच्वंगु थाय् कामपा २५ वडालिसे नं स्वानाच्वंगु दु ।
येँ महानगरपालिका २५ वडाध्यक्ष नीलकाजी शाक्यं लकडाउनया इलय् उकथं सरकारी गाडीं मनू ल्ह्ययाः येँय् हयेगु धइगु पद व सुविधाया दुरुपयोग जूगु धयादिल । थुकी आवश्यक अनुसन्धान यानाः कारवाही यायेमाःगु वडाध्यक्ष शाक्यं धयादिल ।
अथे हे छथासं मेथाय् वनेमज्यूगु अवस्थाय् सरकारी गाडिं हे मनू ल्ह्ययेगु आपत्तीजनक जूगु धयादिल । थ्व विषयस येँ महानगरपालिकाया प्रमुख विद्यासुन्दर शाक्ययात जानकारी याकेधुनागु व थुकी माःगु कारवाहि जुइमाःगु खँय् नं महर्जनं बः बियादिल ।
येँ महानगरपालिका २२ वडाया अध्यक्ष चिनिकाजी महर्जनं नं थज्याःगु इलय् राज्यं अभिभावकीय भूमिका म्हितेमाःगु धयादिल । सरकारी निकायपाखें लकडाउन उल्लंघन जूगु खँय् दोषियात कारवाही यायेमाःगु खँय् वयकलं नं बः बियादिल ।
वीरगंजय् १७म्हेसिके खनेदत कोरोना संक्रमण
शोभा श्रेष्ठ | वछलाथ्व चतुर्दशी ११४०
नेपालय् थप १७म्हेसिके कोरोना संक्रमण पुष्टि जूगु दु ।
वीरगंज पर्साया १७म्हेसिके कोरोना संक्रमण पोजेटिभ खनेदुगु स्वास्थ्य तथा जनसंख्या मन्त्रालयया प्रवक्ता डा. विकास देवकोटां जानकारी बियादिल ।
मन्त्रालयया नियमित प्रेस व्रिफिङय् प्रवक्ता देवकोटां थौं राष्ट्रिय जनस्वास्थ्य प्रयोगशाला टेकुइ याःगु परिक्षणय् वीरगंज पर्साया १७म्हेसिके कोरोना संक्रमण पोजेटिभ खनेदुगु धयादिल ।
१७म्ह संक्रमितय् १०म्ह मिजं व ७म्ह मिसात दु । थौं संक्रमण पुष्टि जूपिं १७म्ह मध्ये छम्ह निला दुम्ह मचा तकं दु ।
संक्रमित जूपिंलय् निलाया मचानिसें ६६दँ तक्कयापिं दुगु देवकोटां जानकारी बियादिल ।
संक्रमित सकसिगु स्वास्थ्य अवस्था सामान्य दुगु प्रवक्ता देवकोटां धयादिल ।
वंगु आइतबाः वीरगञ्ज महानगरपालिका–३ छपकैयाया ३६दँया मिजंयात कोरोना भाइरस (कोभिड–१९) या संक्रमण पुष्टि जूगु खः ।
वया हे परिवारया दुजः व वया स्वापुतिइ वःपिनिगु परीक्षणया झ्वलय् वया हे परिवारया दक्वं दुजःया रिपोर्ट पोगेटिभ वःगु खः ।
उपिं सकसितं नारायणी अस्पतालय् भर्ना यानाः वासः याइगु धाःगु दु ।
थ्व लिसें नेपालय् कोरोना संक्रमितया ल्याः ९९ थ्यंगु दु । व मध्ये २२म्ह वासः यानाः लनेधुंकूगु दु ।
उकिया नापं वैसाख ११ गते ल्वय् लंकाः छेँय् लिहांवंम्ह येँया सनसिटियाम्ह ५८दँया मिजंया नमूना परिक्षण याःबलय् हाकनं संक्रमण पोजेटिभ खनेदुगु नं स्वास्थ्य मन्त्रालयं न्ह्यथंगु दु ।
वयात पाटन अस्पतालय् आइसोलेसनय् भर्ना याःगु दु ।
लिसें बैसाख १४ गते डिस्चार्ज जूम्ह रौतहटया १९दँया मिजं व पर्साया ४४दँया मिजंया नमूना परिक्षणया रिपोर्ट नं हाकनं पोजेटिभ वःगु दु ।
उमित नारायणी अस्पताल वीरगंजय् भर्ना याःगु दु ।
जैशिदेवल युथ क्लबपाखें कोरोना विरुद्ध जनचेतनामूलक ज्याझ्वः
सुरेन्द्रभक्त श्रेष्ठ | बछलाथ्व चतुर्दशी ११४०
कोरोना भाइरस (कोभिड–१९) हलिंन्यंक महामारीकथं न्यनावनाच्वंगु इलय् थुगु ल्वय्पाखें बचय् जुइगु नितिं येँया जैशिदेवल युथ क्लबपाखें जनचेतनामूलक ज्याझ्वः जुल ।
थुगु क्लबपाखें येँया मञ्जुश्री, यंगाः, ज्याःबहाल, दलाछि, न्हूघःबहाल, युतुननिलिसें थीथी त्वाः चुकय् वनाः स्थानीय मनूतय्त थुकथं चेतना थनेगु ज्या याःगु खः ।
विशेष यानाः देयन्यंक लकडाउन जुयाच्वंगु इलय् स्वनिगलय् सुरक्षित तायेकाः आपालं मनूत दुहांवयाच्वंगुलिं स्वनिगलय् नं थुगु कोरोना ल्वय्या महामारी न्यनावनेफूगु खँयात ध्यानय् तयाः चेतना थनेगु ज्या याःगु खः ।
क्लबपाखें पिनें वःपिं मनूत क्वारेन्टाइनय् तयाः ल्वय् दु वा मदु धइगु पहिचान याकेत नं सम्बन्धित निकाययात अपील याःगु दु ।
थुगु क्लबपाखें थीथी इलय् जनचेतनामूलक ज्या याना वयाच्वंगु खँ न्ह्यथनादिसें थ्व इलय् महामारीकथं जुयाच्वंगु कोरोना भाइरस विरुद्ध जनचेतनामूलक ज्याझ्वः यायेमाःगु वाः चायेकाः थुकथं ज्याझ्वः यानागु क्लबया नायः राजेश प्रजापतिं जानकारी बियादीगु दु ।
लकडाउनय् हिया अभाव जुइके मबीत हिदानयात तीव्रता बियाच्वन
बिकाश | बछलाथ्व त्रयोदशी ११४०,बैसाख २१ गते
ब्लड डोनर्स एशोसिएसन नेपाल (ब्लोदान) को आह्वानय् येँ महानगरपालिका २५ वडा उग्रतारा महिला तथा बालबिकास केन्द्रं हिदान ज्याझ्वः याःगु दु ।
येँया ध्वाखाबहालय् जूगु हिदानय् मुक्कं ५०म्हेसिनं हिदान याःगु खः ।
लकडाउनया हुनिं थन हिया अभाव जुइगु स्थिती मवयेमा धकाः हिदान ज्याझ्वः यानागु ज्याझ्वः कजि राजीव श्रेष्ठं जानकारी धयादिल ।
‘लकडाउनय् सकलें छेँय् छेँय् लानाच्वंगु दु, थन हिया अभाव जुइकेमबीगु न्हापांगु प्राथमिकता जुइमाः, व ल्याखं जिमिसं हिदानयात तच्वयेकागु दु’ ब्लोदानया केन्द्रीय दुजः लिसें येँ महानगरपालिका २४ वडा सदस्य विनोद तुलाधरं धयादिल ।
म्हिगः नं येँया खुसिुबुँइ हिदान जूगु खःसा थौं नं ध्वाखाबहालय् आकस्मिक हिदान ज्याझ्वः तःगु खः ।
ज्याझ्वलय् ब्लोदानया केन्द्रिय नायः सानुबाबु प्रजापतिु, छ्यान्जे उज्वल केसी, दांभरिं मचाकाजी महर्जन, कामपा २५ वडाका मिसा दुजः लिसें कार्यपालिका दुजः रमिता स्थापित लिसें ब्लोदान केन्द्रीय लिसें थीथी जिल्ला पदाधिकारी दुजः, स्थानीय संघसंस्थाया प्रतिनिधिपिनिगु नं उपस्थिती दुगु खः ।
'स्वनिगःयात संक्रमणं बचे यायेत स्वनिगःया नाका कडाइ यायेमाल'
बिराजकाजी राजोपाध्याय | बछलाथ्व त्रयोदशी ११४०
नेपालय् तराईपाखे कोरोना संक्रमितया ल्याः अप्वया वनेवं उखें नं धमाधम येँय् दुहांवयेगु अप्वःगु खः । छुं दिं न्ह्यः येँय् संक्रमित खनेदयेवं येँ त्वःतावंपिं हाकनं उखें नं येँय् वयेगु न्हिथं अप्वयावःगु दु । थज्याःगु परिस्थितीं देशय् संक्रमण न्यनीगु अवस्था वयेफुगु धासें थनया स्थानीय निकायया प्रमुखतयसं स्वनिगलय दुहां वइपिन्त कडाइ यायेत माग याःगु दु ।
मंगलवाः उपत्यका नगरपालिका फोरमं उपप्रधानमन्त्री लिसें कोभिड–१९ उच्चस्तरीय समन्वय समितिया संयोजक ईश्वर पोखरेलयात नापलाना थथे इनाप याःगु खः ।
स्वनिगलं विद्यार्थी व मजदुरतय्त पिने छ्वयेगु व पिनेया जिल्लां थुखे मनूत छ्वयाहयेगु होडबाजीं कोरोनाया संक्रमण झन् तच्वइगु खँ न्ह्यथंसें फोरमं तत्काल स्वनिगः दुहांवइपिंत कडाई यायेत इनाप यानादीगु खः । नापं स्वनिगः दुने अत्यावश्यक गाडीत बाहेक मेगू सवारी साधन दुकायेगुलिइ कडाई यायेत नं सुझाव बिउगु खः ।
व हे झ्वलय् येँ महानगरपालिकाया मेयर नापं फोरमया अध्यक्ष विद्यासुन्दर शाक्यं स्वनिगः दुहांवइपिंत कडाई मयायेगु खःसा थन थप समस्या वयेफुगु धासें चिन्ता प्वंकादीगु खः ।
संघीय राजधानी समेत जुयाः ७७गुलिं जिल्लाया मनूत मुनाच्वंगु थाय् जूगुलिं स्वनिगःया खँय् संघीय सरकारं हे ध्यान तयेमाःगु खँ न्ह्यथँसें कामपा प्रमुख शाक्यं थुकी सकलसिनं दलीय भावनां थहांवनाः मंकाः कुतः न्ह्याकेमाःगु नं धयादिल । ।
‘थन संक्रमण अप्वयावन धाःसा नियन्त्रण यायेत हे थाकुइफु । अथेजुयाः थन नाकाय् कडाई यायेगु, स्वनिगःबासीया जीविकायात सहज दयेकेगु लिसेंया खँय् दक्वं राजनीतिक दल व जनप्रतिनिधिया सामूहिक प्रतिवद्धता आवश्यक दु’ कामपा प्रमुख शाक्यं धयादिल ।
वय्कलं स्वनिगः वयेगु नाकाया सुरक्षा व्यवस्था कडा यानाः स्वनिगः दुने लकडाउन छ्वासुकेमाःगु सुझाव नं बियादीगु खः ।
उगु इलय् समन्वय समितिया कजि पोखरेलं नगरपालिका फोरमं बिउगु सुझावयात मन्त्रीपरिषद मुँज्याय् यंकेगु व अन सहलह यानाः आवश्यक निर्णय यायेगु धयादिल ।
खँल्हाबल्हाया इलय् कामपया मेयर शाक्य नापं यल महानगरपालिकाया मेयर चिरिबाबु महर्जन, थिमि नगरपालिकाया मेयर मदनसुन्दर श्रेष्ठ नापं येँया सांसदत कृष्णगोपाल श्रेष्ठ व जीवनराम श्रेष्ठया तकं उपस्थिती दुगु खः ।
