Display Style:
Column Style
थौंया अक्षय तृतीया नं लकडाउनं प्रभावित
बिकाश | बछलाथ्व तृतीया ११४०
थौं बछलाथ्व तृतीया, अक्षय तृतीया । मुक्कं हलिं हे कोरोना भाइरस (कोभिड १९) या संक्रमणया मारय् लानाच्वंबलय् थौंया अक्षय तृतीया नं थुकिं प्रभावित जूगु दु ।
कोरोना संक्रमण रोकथाम व नियन्त्रणया लागिं नेपाल सरकारं देयन्यंक लकडाउन जारी यानातःगु अवस्थाय् थुगुसीया अक्षय तृतीया नं प्रभावित जूगु खः ।
लकडाउनया अवस्थाय् दान धर्म आदिया ज्या यायेत नं मछिंगु अवस्था दुसा बजार बन्द जुयाच्वंगु अवस्थाय् साखः ति त्वनेगु वा त्वंकेगु ज्या नं उलि जुयाच्वंगु खनेमदु ।
न्हापा न्हापा थौंया दिनय् त्वाःत्वालय् साखःति दयेकाः लँजुवाःतयत नं त्वंकेगु याइगु खः ।
थौं दिनय् म्वःल्हुयाः नीसी यानाः विशेष कथं छ्वया सत्तु व साखः ति दान यायेगुया नापं नयेगु व त्वनेगु याइगु खः ।
थौंया दिनय् याइगु स्नान व दानयात विशेष महत्वलिसें स्वयेगु याः ।
थौं याइगु स्नान, दान, ध्यान र जप लिसेंया पुण्य कर्मया फल गबलें नाश मजुइगु खँ थीथी पुराणय् न्ह्यथनातःगु दु ।
वैशाख शुक्ल तृतीया अर्थात थौंया दिनय् भच्चा जक दान याःसा यक्व फल चूलाइगु व थुगु फल अक्षय अर्थात् गबलें नाश मजुइगु जूगुलिं थुगु दिनयात अक्षय तृतीया धाःगु मान्यता दु ।
छ्वया सत्तु व साखः तिं शरीर स्वस्थ्य दयेकातयेत ग्वाहालि याइगु लिसें ल्वय् लिसे ल्वाइगु प्रतिरोधात्मक क्षमता नं बल्लाकीगु धयातःगु दु ।
तांन्वइगु इलय् सिचुकीगु नसा ज्वलंया रुपं नं सत्तु नयेगु व साखः ति त्वनेगु याइ ।
थौंया दिनयात महाःद्यः पार्वतीया इहिपा जूगु दिनकथं नं कयातःगु दु । महाःद्यः पार्वतीया इहिपाः जूगु दिं जुयाः हे थौं सुयां इहिपा याःसा साइत स्वयेम्वाःगु मान्यता समाजय् दु ।
नारायण द्यःया खुगूगु अवतारया रुपं कयातःम्ह परशुरामया जन्म नं थौंया हे दिनय् जूगु विश्वास यानातःगु दु ।
अक्षय तृतीया दिंया स्वापू महाभारतलिसे नं दयाच्वंगु खनेदु ।
पाण्डवत १२झँ वनवास च्वंबलय् छन्हु दुर्वासा ऋषि उमिगु भिखाचाय् वल । द्रौपदीं दुर्वासा दुथे फुथे सत्कार यानाः नकल । द्रोपदीया सत्कार खनाः लयताःम्ह दुर्वासां द्रौपदीयात छगः अक्षय थल बिल ।
उगु हे इलय् दुर्वासां द्रौपदीयात अक्षय तृतीयाया महत्व बारे नं कनावन । थुगु दिनय् पृथ्वीइ सुनां नं विष्णयात विधि पूवंकाः पूजा याःसा वा चना, सत्तु, मौसमी, कापः व लः जायेकातःगु घः दान याःसा वयागु छेँया धुकू गबलें मप्वनीगु जनविश्वास दु ।
थ्व व हे बाखंया लिधंसाय् नं अक्षय तृतीया दिंया महत्व थहांवंगु खः ।
वीरगञ्जय् निम्हेसिके कोरोना संक्रमण खनेदत
शोभा श्रेष्ठ | बछलाथ्व तृतीया ११४०, बैसाख १४ गते
वीरगञ्जय् थप निम्हेसिके कोरोना भाइरस (कोभिड–१९)या संक्रमण खनेदुगु दु ।
वीरगञ्ज महानगरपालिका ३ व १६ या मिजंतयके संक्रमण पुष्टि जूगु खः ।
थौं संक्रमण पुष्टि जूपिं निम्हे मध्ये छम्ह छपकैया महानगरया सरसफाइ शाखाय् ज्या याइम्ह कर्मचारी खः । कोरोना संक्रमित भारतीय जमातीतय् स्वापुतिइ दुपिनि परीक्षणया झ्वलय् वयकःयाके संक्रमण खनेदुगु खः ।
मेम्ह छम्ह संक्रमित धाःसा सिद्धार्थ माविया क्वारेन्टाइनय् च्वनाच्वंगु खः । संक्रमणका आशंकाय् वयकःयात क्वारेन्टाइनय् तयातःगु खः ।
आः निम्हेसितं नारायणी अस्पताल भर्ना याःगु दु ।
थौं निम्हेसिके संक्रमण पुष्टि जूगु लिसें नेपालय् कोरोना संक्रमितया ल्याः ५१ थ्यंगु दु । व मध्ये १६म्ह वासः यानाः लनेधुंकूगु दु ।
ल्यं दुपिं ३५ संक्रमित थीथी अस्पतालय् वासः याकाच्वंगु दु ।
३०म्ह विराटनगरया कोरोना अस्पताल, स्वम्ह वीरगन्जया नारायणी अस्पताल, भरतपुर अस्पताल, धनगढीया सेती प्रादेशिक अस्पतालय् छम्ह छम्हेसित वासः यानाच्वंगु दु ।
थौं २ बजे मन्त्रिपरिषदया बैठक
लहनान्युज | बछलाथ्व तृतिया ११४०, बैसाख १४ आइतवाः
लकडाउनयात निरन्तरता बियगु विषयया निर्णय यायेगु लागि मन्त्रिपरिषदया बैठक थौं आइतवाः च्वने त्यःगु दु ।
सरकारं घोषणा याना तःगु लकडाउनया ई थ्व हे सोमवाः क्वचाये त्यःगु दु ।
म्हिगः शनिवाः च्वःगु कोभिड(१९ सम्बन्धी उच्चस्तरीय समन्वय समितिया कार्यदलं लकडाउन छवाः या लागि थपे यायेगु सुझाव बिगु खः ।
लकडाउन प्रभावकारी जुगुलि हे कोरोना नियन्त्रणय् वःगु धका उगु कार्य दलं धाःगु दु ।
थौं न्हिनया २ ताः इलय् मन्त्रिपरिषदया बैठक प्रधानमन्त्री निवास बालुवाटारय् च्वने त्यःगु दु ।
येँ महानगरय् ४२५ म्हसिया निशुल्क एम्बुलेन्सय् ९० प्रतिशत जँलास्येँ ल्वगिपि
नृपेन्द्रलाल श्रेष्ठ | बछलाथ्व द्धितिया ११४०, बैसाख १३ शनिवाः
लकडाउन इलय् नुगः ल्वय्, जँलास्येँ ल्वगिपिन्त अस्पतालय् यंकिगु व हयेगु लागि येँं महानगरपालिकाया आर्थिक ग्वाहालि न्ह्याःगु निःशुल्क आकस्मिक एम्बुलेन्स सेवा याःगु खः ।
उगु सेवा सुरु जुसानिसे थौंतक ४२५ म्ह स्वया अप्वो स्वया मनू तयेस सेवा काये धुकुगु दु । ‘जिमिसं बैशाख २ गते निसे थुगु सेवा सुरु यानाःगु खः,’ एम्बुलेन्स चालक संघ, नेपाल (काठमाडौं जिल्ला कार्य समिति) या अध्यक्ष गणेश सापकोटां धयादिगु खः, ‘थौंतक ४२५ म्ह स्वया अप्वोयात निशुल्क सेवा बिइ धुन धका धयादिगु खः । मुख्य याना डाइलोसिस याये माःपि ल्वगि तयेत जिमिस छेँय् न निसे अस्पताल तक यंकिगु व हयेगु ब्यवस्था यानागु धका धयादिगु खः ।
डाइलोसि यायेमाःपि, मुटुरोगी, मचा बुइत्यःपिन्त प्राथमिकताय् तया सेवा बिइगु याना वयाच्वनागु दु धका धयादिगु खः । उकि मध्ये ९० प्रतिशत ल्वगि डाइलोसिस याये माःपि धका जानकारी बियादिगु खः ।
येँ महानगरपालिकाया मेयर बिद्यासुन्दर शाक्यं लकडाउनया इलय् हृदयघात, मृगौला ल्वगि तयेत महानगरबासीपिन्त सितिक आकस्मिक एम्बुलेन्स सेवा बिइगु उदेश्यं संयुक्त एम्बुलेन्स चालक संघ, नेपाल (काठमाडौं जिल्ला कार्य समिति) नाप सम्झौता याना लकडाउनया इलय् २४ हे घण्टा सेवा बिइगु व्यवस्था बिइगु जानकारी बियादिगु दु ।
मेयर शाक्यं आः न्यागः एम्वुलेन्सं ल्वगि तयेगु थःगु छेँय् यंकिगु व हयेगु लागि निशुल्क एम्बुलेन्स सेवाया सुविधा उपलब्ध यानागु दु धका जानकारी बियादिगु दु ।
लकडाउनया इलय् महानगरय् च्वपिनिगु लागि सार्वजनिक यातायात उपलब्ध मजुगु अवस्थाय् अस्पताल तक यंकिगु व हयेगु लागि येँ महानगरपालिकाया हटलाइन नम्वर ११८० य् स्वापू तयेत न इनाप याःगु दु ।
येँ महानगरपालिकां कोरोना संक्रमणया सम्भावना दुपि ल्वगि तयेगु लागि अस्पताल तक यंकिगु लागि नेपाल एम्बुलेन्स सेवा न उपलब्ध याःगु दु । उगु सेवाया लागि १०२ नं.य् स्वापू तये फइ ।
जेठ २ गते तक हवाई उडान बन्द
लहनान्युज | बछलाथ्व द्धितिया ११४०, बैसाख १३ शनिवाः
कोरोना भाइरस सम्बन्धी उच्चस्तरीय समन्व समितिं हवाई उडान थ्व हे जेठ २ गते तकया लागि बन्द यायेगु निर्णय याःगु दु ।
थौं शनिवाः च्वंगु उच्चस्तरीय समितिया बैठकय् अन्तर्राष्ट्रिय व आन्तरिक हवाई उडान जेठ २ गते तक यायेगु निर्णय याःगु दु ।
सरकारं वैशाख १८ गते तकया लागि हवाई उडान बन्द यायेगु निर्णय यानातःगु खः ।
थौंया बैठकय् आः तक याःगु लकडाउनया समिक्षा नं जूगु खः ।
लकडाउन थप यायेगु वा मयायेगु निर्णय धाःसा मन्त्रिपरिषदं जानकारी याइ ।
