Display Style:
Column Style
मेयर बिद्यासुन्दर शाक्यं हेमोडाईलासिस सेवाया उलेज्या
सुरेन्द्रभक्त श्रेष्ठ | पोहेलागा त्रयोदशी ११४० (जनवरी २२ २०२०)
येँ महानगर व नेपाली सेना दथुइ सहकार्यय् बीरेन्द्र अस्पताल छाउनीइ जलास्येँ ल्वय् या हेमोडाईलासिस सेवा न्ह्यागु दुु ।
येँ वडाय् १५ च्वम्ह ६४ दँयाम्ह चन्द्रदेवी महर्जनया डाइलासिस यायेगु झ्वलय् महानगरया प्रमुख बिद्यासुन्दर शाक्यं उगु उपकरण सञ्चालन उलेज्या यानादिगु खः ।
अथेहे, मेयर शाक्यं डाइलोसिस यानाच्वम्ह महर्जनया उसाँय् नाप पारिवारिक अवस्थाया बारेय् जानकारी न कयादिगु खः । थुगु सेवा न्ह्याकेगु लागि वःगु पुष २ गते नेपाली सेना व महानगर दथुइ सहमति पत्रय् ल्हाःचिं तयेगु ज्या जुगु खः । उगु सम्झौताय् माःगु मेसिन, भौतिक पूर्वाधार व जनशक्ति व्यवस्थापनया लागि येँ महानगरं नेपाली सेनायात स्वगु करोड ध्यवा बिउगु खः।
महानगरं जनस्वास्थ्य नीति तथा योजना बिषय खँय् न्ववानादिसे प्रमुख शाक्यं थम्ह उपचारात्मक पद्धति नाप प्रवर्धनात्मक स्वास्थ्य ज्याझ्वः न्ह्यने यकागु खः धका धयादिगु खः । वयकलं अस्पतालय् गरीब व निमुखा जनतां तपिक सेवा कायेफयेमा धइगु कथं येँ महानगरपालिकां स्वास्थ्य सेवा न्ह्याका च्वंगु अस्पताल नाप सहकार्य याना वयाच्वनागु खँ कनादिगु खः ।
उगु ज्याझ्वलय् येँ मनपाया वडा १५ या अध्यक्ष नाप महानगरया प्रवक्ता ईश्वरमान डंगोल, सहरी योजना आयोगया सदस्यपिं गुजेश्वरी श्रेष्ठ व सजीब शाक्य, जनस्वास्थ्य महाशाखाया निर्देशक नरेन्द्रबिलास बज्राचार्य, सैनिक स्वास्थ्य महानिर्देशनालयया निर्देशक उपरथी सुनिल सिंह, अस्पतालया निमित्त कमाण्डान्ट नागेन्द्रबहादुर केसी, बीरेन्द्र अस्पताल छाउनीया महासेनानी अजयराज भण्डारीपिनिगु न सहभागी दुगु खः ।
शाक्यद्वय सांसदपाखें पत्रकार दबूयात भिन्तुना
लहनान्युज | पोहेलागा एकादशी ११४० (जनवरी २० २०२०)
बागमती प्रदेशया सांसदद्वय राजेश शाक्य व डा. अजयक्रान्ति शाक्यं नेवाः पत्रकार राष्ट्रिय दबूया न्हूगु ज्यासना पुचःयात भिंतुना देछानादीगु दु ।
येँय् छगू ज्याझ्वःया ग्वसाः ग्वयादिसें सांसद शाक्यद्वयं पत्रकार दबूया ज्यासना पुचःयात भिन्तुना देछानादीगु खः । ज्याझ्वलय् पत्रकार दबूया सकल पदाधिकारीलिसें दुजःपिन्त सांसद राजेश शाक्यं खादा क्वखाय्कादिलसा डा. अजयक्रान्ति शाक्यं मतिनाया चिं देछानादिल ।
ज्यझ्वलय् सांसद राजेश शाक्यं पत्रकार दबू व नेवाः संचार ख्यःयात धिसिलाका यंकेत थःम्हं फक्व ग्वाहालि याय्गु प्रतिबद्धता प्वंकादिल । अथे हे, पत्रकार दबूया वरिष्ठ न्वकू नृपेन्द्रलाल श्रेष्ठं थुगु कार्यकालय् पत्रकार दबूया थःगु हे भवन दय्केत कुतः याय्गु धयादिल ।
दबूया मू छ्याञ्जे सुनील महर्जनं नेवाः पत्रकारतय्सं वस्तुगत पत्रकारिता जक मयाःसे थःगु कार्य क्षमतायात फरक व सबल ढङ्गं विकास याय्माःगु आवश्यकता न्ह्यथनादिल । दबूया नायः सुरजबीर बज्राचार्यं न्हापांम्ह मातृभाषा पत्रकार धर्मादित्य धर्माचार्य व नेपाल पत्रकार महासंघया संस्थापक नायः सत्यनारायण बहादुर श्रेष्ठया मुद्दा स्थापित याय्गु दबूया आज्जुइ प्रदेश सांसदया ग्वाहालिया आशा प्वंकादिल ।
सांसद डा. अजयक्रान्ति शाक्यं थःपिन्सं नेपालमण्डलया माग स्थगन मयानानिगु व पार्टी दुने निरन्तर संघर्ष यानाच्वनेगु धयादिल ।
इतुम्बहालय् मंकाः इही
लहनान्युज | पोहेलागा एकादशी ११४० (जनवरी २० २०२०)
इतुम्बहाः मिसा पुचलं वंगु शुक्रवाः व सञ्चरवाः मंकाः इही ग्वसाः ग्वल ।
इतुम्बहालय् निन्हुतक न्ह्याःगु मंकाः इही ज्याझ्वलय् ६२म्ह मिसामस्तय्गु इही याःगु खः ।
इतुम्बहाः मिसा पुचलं मंका इही ज्याझ्वः पूवंकगु प्यदँ दय्धुंकल ।
मिसा पुचःया नायः भुवनहिरा शाक्यं मंकाः इही ज्याझ्वःया तातुना नेवाः संस्वृmतियात म्वाकातय्गु धयादिल । ‘इही नेवाःतय्गु पुलांगु व मेपिंके मदुगु संस्कृति खः ।
जिमिगु पुचः थजाःगु संस्कृति न्हना मवनेमा धइगु मनंतुना ज्या यानाच्वंगु दु ।’ नायः भुवनहिराया धापूकथं इतुम्बहाः मिसा पुचः विशेष यानाः धर्मकर्म व जात्रापर्वया ज्याय् सक्रिय जुयाच्वंगु दु ।
ल्वहंकःमि (शिल्पकार) सेवा समाजया झिंन्याक्वःगु दँमुँज्या
लहनान्युज | पोहेलागा एकादशी ११४० (जनवरी २० २०२०)
ल्वहंकःमि (शिल्पकार) सेवा समाजया झिंन्याक्वःगु दँमुँज्या ल्वहंकःमितय्गु दिगुद्यः मणिद्वःस झिंन्याक्वःगु दँमुँज्या जुल ।
समाजया नायः मोतिलाल शिल्पकारया सभाध्यक्षताय् जूगु उगु ज्याझ्वलय् पाहाँकथं बाराही समाजया नायः पुष्परत्न बाराही, सिकःमि समाजया नायः विष्णुलाल सिकःमि, ताम्रकार समाजया
नायः रविन्द्रराज ताम्रकार, मणिद्वं संरक्षण समितिया नायः राजेश तण्डुकार झायादीगु खः ।
ज्याझ्वलय् एसईई, दस प्लस दुई, स्नातक व स्नातकोत्तर उतीर्ण जुयादीपिं शिल्पकार ब्वँमिपिन्त हनापौ लःल्हाय्गु ज्या जूगु खः । प्यंगू तगिमय् हे दकलय् अप्वः ल्याः हयाः पास जुयादीपिं छम्ह छम्ह ब्वँमिपिन्त मोति सिरपाः कोषया दाता मोतिलाल शिल्पकारं ‘मोति शिक्षा सिरपाः’ व हनापौ लःल्हानादीगु खः । अथे हे समाजया ज्याजंक्व यानादीधुंकूपिन्त दोसल्लां न्यय्काः हनेगु ज्या जूगु खः ।
थ्व हे झ्वलय् समाजया आर्थिक प्रतिवेदन दांभरि सुरेन्द्र शिल्पकार व प्रगति विवरण मूछ्याञ्जे अनिल शिल्पकारं न्ह्यब्वयादीगु खः । थुगु दँमुँज्यापाखें धर्मरत्न शिल्पकारया अध्यक्षताय् न्हूगु ज्यासना पुचः नं ल्यय्गु ज्या जूगु खः ।
न्हूगु ज्यासना पुचलय् सुरेन्द्र शिल्पकार न्वकू, निलन शिल्पकार मूछ्याञ्जे, दिलमोहन शिल्पकार छ्याञ्जे व सानुराज शिल्पकार दांभरि जुयादीगु दु । अथे हे दुजलय् हिराशोभा शिल्पकार, तेजेन्द्र शिल्पकार, प्रेमबहादुर शिल्पकार, यस कुमार शिल्पकार, कपिल शिल्पकार, अनुजा शिल्पकार च्वनादीगु दु ।
उदाय् समाजया झिंन्हय्क्वःगु दँमुँज्या
लहनान्युज | पोहेलागा एकादशी ११४० (जनवरी २० २०२०)
उदाय् समाजया झिंन्हय्क्वःगु दँमुँज्या जुल । दँमुँज्याया उलेज्या उदाय् समाजया नायः डा. रुपज्योति कसाः नं त्वाःदेवा च्याका यानादीगु खः ।
समाजया न्वकु डा. प्रेमरत्न स्थापितं लसकुस यानादीगु उगु ज्याझ्वलय् समाजया मूछ्याञ्जे राजु कुमार कसाःजुं वार्षिक प्रगति प्रतिवेदन न्ह्यब्वयादीगु खः । थुकथं हे दँ मुँज्याय् समाजया दांभरिं प्रवीणरत्न तुलाधरं आर्थिक प्रतिवेदन न्ह्यब्वयादीगु खः । निगुलिं प्रतिवेदन सर्वसम्मतं पास जूगु खः ।
मुँज्याय् सच्छिदँ दय्धुंकूम्ह मोतिकृष्ण तुलाधरयात दोसल्ला न्ययका हनेज्या याःगु खः । अथे हे पुष्कर न्हूच्छेमाया जिथि हना, पुण्यलक्ष्मी जिथि हना, उदाय् ज्याथः हना, फरककथं जीवन हनाच्वंपिं अशक्त हःपाः, याकः मिसा हःपाः लःल्हानादीगु खः ।
थुकथं हे कुलरत्न तुलाधर इन्जिनियर हना, चिनिमाया तुलाधर डाक्टर हना, बुद्धिरत्न हेराशोभा सिरपाः, हर्षमान अष्टमाया सिरपाः, मणि ज्ञानु (सरोज) सिरपाः, भारत रत्न सिरपाः, अमर कमला सिरपाः, हर्षरत्न लक्ष्मी प्रभा सिरपाः, चैत्य हिरा सिरपाः, मैत्रीरत्न नेपालभाषा सिरपाः, भिक्षु हिरा ताम्राकार साहित्य सिरपाः लःल्हानादीगु खः । सिरपाः उदाय् समाजया नायः डा. रुपज्योति कसाःजुं लःल्हानादीगु खः ।
दँ मुज्याँ ज्याया झ्वलय् असंबाजं गुथि व न्यत तुलाधर गुंलाबाजं खलःपिन्सं गुंलाबाजंलिसें नेवाः म्ये हाय्का न्यंकेगु ज्या नं जूगु खः । ज्याझ्वलय् उदाय्तय्गु राष्ट्रिय म्येया रुपय् विकास याःगु उदाय् म्ये हालाः ज्याझ्वः शुरु याःगु खः ।
