Display Style:
Column Style
यंगालय् शहिद धर्मभक्त माथेमा पार्क
लहनान्युज | पोहेलागा चौथी ११४० (जनवरी १३ २०२०)
जहानियाँ राणा शासन विरुद्धको क्रान्तिइ जीवन बलिदान यानादीम्ह शहीद धर्मभक्त माथेमा जन्म जूगु यंगाः त्वालय् वय्कःया हे नामं छगू न्हूगु कथंया पार्क दयेकूगु ज्या जुगु दु । येँ महानगरपालिकां दयेकूगु थुगु पार्क थ्वहे वइगु शहीद दिवस कुन्हु येँ मनपाया मेयर विद्यासुन्दर शाक्यं उलेज्या याइगु ग्वसाः दु ।
पार्कय् शहीद धर्मभक्त माथेमाया म्हं छम्हं दुगु छगू झ्वाता नं पलिस्था जुइ । पार्क दुने झ्वाता धस्वाके धुंकूगु दुसा आः शहीद दिवस कुन्हु उलेज्या जक जुइ ल्यं दनि ।
तर थ्व पार्क मेमेगु पार्क थें केवल झासु लनेगु पार्क जक धाःसा मखु । थ्व पार्कया क्वय् छगः तग्वःगु भूमिगत लः ट्यांकी नं दइ गुकियात उगु लागाय् गनं छेँ मिं नइगु थेंज्याःगु तःधंगु घटना जुल धाःसा प्रयोग याये फइ ।
२३ वडाया ओमबहाः, यंगाः त्वालय् आपालं चीधंगु गल्लि, चुक, बहाः, बहीत दु । मालीगु इलय् अन दमकल नं यंके फइ मखु । उकिं अज्याःगु थासय् गनं छेँ मिं नल धाःसा तुरुन्त हे मि स्यायेगु लागिं उगु ट्यांकीया लः छ्यलेगु ताः तयाः उगु ट्यांकी दयेकूगु खः ।
थ्व लः ट्यांकीइ ३० हजार लिटर लः न्ह्यं । २३ वडाया वडा अध्यक्ष मचाराजा महर्जनं कनादी कथं थुकी वाति लः मुंकाः जायेकेगु जुइ । थ्व ट्यांकीया पाइपय् मेथाय् यंके जिउ कथं मेगु पाइप स्वानातःगु दइ । थ्व पाइपया नापं वडापाखें छगः ल्ह्वनाः यंके जिउगु पम्पया नं व्यवस्था यानातःगु दु ।
थ्व पम्पं ९–१० तल्ला तक लः छ्वाके फइ । पार्कय् च्वंगु ट्यांकीइ लगातार १ घन्टा तक छ्वाके फइगु लः मुनाच्वंगु दइ । थुकिया नापनापं उगु लागाया थीथी चुक व बहालय् मेगु स्वंगः ति चिचीग्वःगु ट्यांकी नं दयेकेगु ग्वसाः दु । यदि पार्कया तग्वःगु ट्यांकीया लखं मगात धाःसा थ्व चिचीग्वःगु ट्यांकीया लः नं छ्यले फइगु खँ नं वडा अध्यक्ष महर्जनं कनादिल ।
विपद्या इलय् छ्यले फइगु लः ट्यांकी नापं दुगु थज्याःगु पार्क नेपाःया हे न्हापांगु खः ।
येँ महानगरपालिकां करिब ५० लाख तकाया लागतय् थ्व पार्क दयेकूगु खः । पार्कया डिजाइन यानादीम्ह इन्जिनीयर लिसें कामपा सहरी योजना आयोगया दुजः सजिव शाक्यया कथं पार्क दुने परम्परागत नेवाः शैलीया छगू सतः नं दइ गन मनूत याउँक झासु लने फइ । अन दुने छगू ई–ट्वाइलेट नं दइ । पार्क च्वंगु ट्वाइलेट, क्यब व मेमेगु यचुपिचुया ज्या यायेत वहे ट्यांकीया लः छ्यलेगु याइ । थ्वहे वइगु माघ १० गते उगु ट्यांकीया लः छ्यलाः मि स्यायेगु विधिया छगू परीक्षण ज्याझ्वः नं जुइत्यंगु दु ।
पार्क दुने शहीद धर्मभक्त माथेमाया म्हं छम्हं दुगु शालीक छगू नं दइ । कलाकार मदन तुलाधरं उगु शालीक दयेकादीगु खः । माघ १६ गते शहीद दिवस कुन्हु उगु शालीकया नं उलेज्या जुइ । वि.सं. १९६६ आश्विन ९ गते ओमबहालया नःबहिली जन्म जुयादीम्ह धर्मभक्त माथेमायात ३१ दँया वैंशय् वि.सं. १९९७ माघ १३ गते येँया सिफलय् फाँसी बिउगु खः ।
वय्कलं जोरगणेशस्थित थः हे निनिया छेँय् भेला यासें वि.सं. १९९३ सालय् नेपाःया न्हापांगु राजनीतिक संगठन नेपाल प्रजापरिषद् गठन यानादीगु खः । वय्कलं तत्कालीन जुजु त्रिभुवनया व्यायाम प्रशिक्षक जुयाः जुजुयात नापं प्रजापरिषद्या दुजः दयेकुसें प्रजातन्त्र स्थापनाया लागिं प्रतिबद्ध यानादीगु खः ।
सरकारं मथुसा जनतां छाँया सेन्टर थुनिइ
नृपेन्द्रलाल श्रेष्ठ | पोहेलागा तृतिया ११४० (जनवरी १३ २०२०)
येँ महानगरपालिका १६ वडा दुने थँबही भगवान बहाः न्ह्यःने ऐतिहासिक पलेस्वां पूखु न्हंकाः दयेकुगु छायाँदेबि कम्लेक्सया बिरुद्ध थौं सोमवाः छगू पत्रकार सम्मेलन याःगु दु । उगु पत्रकार सम्मेलनपाखें ठमेलय् च्वंगु पुरातात्विक कमल पुखूयात पुर्नस्थापना याना अन न्हापा थे पुखू हे याये माःगु माग यासे थीथी प्रमाणत सार्वजनिक याःगु दु ।
उगु अभियानया कजि भागवत नरसिंह प्रधानं गुठी संस्थानय् दुगु २०४२ सालया नापी शाखाया फिल्ड बुक कथं हे पुखू उल्लेख दुगु व मोही उल्लेख मजुगु भ्वंत पित ब्यूगु खः ।
ठमेलय् पुरातात्विक कमलपोखरी पुनस्थापना अभियानया कजि भागवत नरसिंह प्रधानं छायाँदेवी कम्प्लेक्स निर्माण जुगु थाय् ऐतिहासिक कमलपोखरीया तथ्य न्ह्य ब्बया उगु भवन थुना हे त्वःतिगु धका धयादिगु खः ।
कजि प्रधानं १५ द्धः मनू तयेगु ल्हाःचिं दुगु प्रधानमन्त्री केपी शर्मा ओलीयात ध्यानकर्षण याकागु धका जानकारी बियादिसे सम्पदाय् याइगु थथे अतिक्रमण विरुद्ध कडा पलाः तयेगु लागिु लिमचिदिगु धका न धयादिगु खः ।
‘ऐतिहासिक पुरातात्विक कमलपूखूयात छायाँ कम्प्लेक्स दयेकेगु ज्या जुगु दु थुगु भवनयात सरकार मथुसा जनतां हे थुनु धका धयादिगु खः ।’ कजि प्रधानं छायाँ कम्प्लेक्सबारे अदालतं फैसला पियाच्वनागु खः न कनादिगु खः ।
उगु पत्रकार सम्मेलनय् पित ब्यूगु प्रेस विज्ञप्तिं ठमेल (थँबहि) या म्हसिका , कमलपोखरी व डिलया ऐतिहासिक व धार्मिक महत्व , केशर शमशेरया अनधिकृत ज्यात, राजगुठी कायम, धर्मलोप मुद्दाया व्यहोरा , अनधिकृत राजीनामा, गुठीया अनधिकृत कार्य, गुठी पाखें रैतानी बदर, मोही मलाइगुे कानूनी प्रावधानत , गुठियारत नाप मिलापत्र याःगु नाप थीथी बिबरण न्ह्यब्वःगु दु ।
पवित्र कसाःयात तीर्थ हिरा सिरपाः
लहनान्युज | पोहेलागा द्धितिया ११४० (जनवरी १२ २०२०)
थुगुसिया म्येहालामि, संगीतकःमि पवित्र कसाः ‘तीर्थ–हिरा सिरपाः’पाखें सम्मानित जुयादिल ।
मंकाः धुकू बचत तथा ऋण सहकारी संस्था लिमिटेडं थुगुसिया तीर्थहिरा सिरपाः संगीतकःमि पवित्र कसाःयात लःल्हाःगु खः ।
संस्थाया दँ मुज्याय् जूगु उगु ज्याझ्वलय् येँ महानगरपालिकाया प्रमुख विद्यासुन्दर शाक्यं कसाःयात सिरपाः लःल्हानादिल ।
प्रमुख शाक्यं सम्मानित कसाःयात हनापौलिसें स्वीद्वः तका दां नं लःल्हानादीगु खः ।
ज्याझ्वलय् राजा शाक्यं सम्मानित जुयादीम्ह कसाःया म्हसीका न्ह्यब्वयादीगु खः ।
थुगु सिरपाः भाषासेवी भाइराजा तुलाधरं थः मां व अबुया नामय् नीस्वनातःगु खः ।
थुगु हे दँ मुँज्यां बालकृष्ण प्रजापतियात हे हाकनं संस्थाया न्हूम्ह नायः नं ल्यःगु दु ।
इजरायलय् पर्यटन वर्षया प्रचार अभियान
लहनान्युज | पोहेलागा द्धितिया ११४० (जनवरी १२ २०२०)
इजरायलय् नेपाल पर्यटन वर्ष २०२० अभियान न्ह्याःगु दु ।
इजरायलया पर्यटनमन्त्री यारिभ लेभिन व इजरायलया नितिं नेपाःया राजदूत अन्जान शाक्यं इजरायलय् नेपाल पर्यटन वर्ष २०२० अभियानया शुभारम्भ यानादीगु खः ।
थ्व हे झ्वलय् राजदूत अन्जान शाक्यं अभियानयात कयाः जानकारी बियादिसें नेपाः चाःहिलेत सकसितं इनाप यानादिल ।
शाक्यं साहसिक यात्रा याय्यःपिं लिसें परिवार चाःहिलेगु नितिं नं पर्यटकीय गन्तव्यकथं नेपाः तसकं बांलाःगु थाय् जूगु धयादिल ।
अथे हे, इजरायलया पर्यटनमन्त्री यारिभ लेभिनं नेपाल पर्यटन वर्ष २०२० अभियानयात च्वछायादिसें सफलताया कामना यानादिल ।
ज्याझ्वलय् हिब्रु भासं छगू जानकारीमूलक भिडियो व छगू खस नेपाली भासं प्रबद्र्धनात्मक भिडियो क्यनेगु ज्या जूगु खः ।
ज्याझ्वलय् मन्जुश्री, लाखे व थाली हुलाप्याखं नं न्ह्यब्वःगु खः ।
ख्वपय् सम्यक महादान तःजिक न्याय्कीगु
लहनान्युज | पोहेलागा द्धितिया ११४० (जनवरी १२ २०२०)
ख्वपय् दँय्दसं माघ १ गते न्याय्का वयाच्वंगु सम्यक महादान पर्व थुगुसी नं तःजिक न्याय्कीगु जूगु दु ।
सम्यक महादान व्यवस्थापन समिति व नेवाः पत्रकार राष्ट्रिय दबू, ख्वप कचां ग्वसाः ग्वःगु पत्रकारत नापलाय्गु ज्याझ्वलय् उकथंया जानकारी ब्यूगु खः ।
थ्व हे झ्वलय् समितिया छ्याञ्जे रविकिरण बज्राचार्यं माघे संक्रान्तिया दिनस हनीगु थुगु सम्यक महादान पर्वय् दान याःसा दुःख नाश जुयाः पूण्य दइगु व बोधिज्ञानया मार्गय् प्रतिष्ठित यासें निर्वाणतक थ्यंकीगु लिसें राग, द्वेष, लोभ आदि मदया वनीगु जनविश्वास दुगु धयादिल ।
नेपाल सम्बत् ७९४निसें न्ह्याना वयाच्वंगु थुगु सम्यक महादान पर्व ख्वपया थथुबहिलीइ च्वंगु जयकीर्ति महाविहारय् याइगु खःसा ख्वपया न्याम्ह दीपंकर बुद्धयात दँय्दसं जयकीर्ति महाविहारय् बिज्याकाः सम्यक महादान न्याय्कीगु चलन दु ।
