Display Style:
Column Style
कोरोनाबारे आधिकारिक सूचंयात जक विश्वास या
लहनान्युज | चौलाथ्व चतुर्थी ११४०
प्रधानसेनापति पूर्णचन्द्र थापां कोरोना भाइरसबारे आधिकारिक सूचंयात जक विश्वास यायेत नेपाली सेनाया सकलदर्जायात निर्देशन बियादिगु दु ।
कारोना (कोभिड–१९) रोकथामया लागि नियन्त्रणय् खटेजुपिं सैनिक अधिकृत तथा जवानपिन्त सम्बोधन यानादिसे थापां उगु खँ धयादिगु खः ।
प्रधानसेनापति थापां नागरिकया सेवाय् समर्पित जइगु इलय् थःगु सुख सुविस्ता लोमका सर्वोच्च सेवाभाव क्यने माः ।
सरकारं याउगु लकडाउन महामारी फैलै जुइपाखे रोके यायेगु राष्ट्रया हे लागि अवसर व चुनौति निगुलि खः ।
थुगु इलय् बहादुरी मखु, बुद्धि व विवेकयात छ्यले माः धका धयादिगु दु ।
दक्को नागरिकप्रति न्ह्यावले ग्वाहालिया भावना तयेमा सैनिक सेवाया मर्यादा व धर्म थःम्हसिया न थुइका थः सहकःमियात थुइके बिइमा धका न धयादिगु खः ।
लकडाउनया पूर्ण पालना यायेत येँ महानगरपालिका प्रमुखया इनाप
नृपेन्द्रलाल श्रेष्ठ | चौलाथ्व तृतीया ११४०
येँ महानगरपालिकाया मेयर विद्यासुन्दर शाक्यं लकडाउनया पूर्ण पालना यायेत सकल येँ महानगरवासीयात इनाप यानादीगु दु । नेपालय् नं प्यम्हेसिके कोरोना भाइरस कोभिड १९ या संक्रमण पुष्टि जुइधुंकूगु अवस्थाय् अझ सतर्क जुयाः सकलसित छेँय् हे च्वनेत प्रमुख शाक्यं इनाप यानादीगु खः ।
जनताया सुरक्षाया नितिं हे सरकारं लकडाउन याःगु जूगुलिं थुकिया कार्यान्वयन यायेगु ज्या सरकारया जक मखसें सर्वसाधारण नेपाःमिया नं खःगु वयकःया धापू खः ।
लहनान्यूजलिसे खँ ल्हासें प्रमुख शाक्यं कोरोना भाइरसं झीत लित्तुलिनाः छेँय् माःवइमखूगु धासें भाइरस कायेत झी थः हे पिहां वनेमाःगु अवस्थाय् सकलसित पिहांमवःसे छेँय् हे च्वनेत इनाप यानादिल ।
हुल ममुंसे, अलग अलग च्वन धाःसा रोग सरे जुइगु सम्भावना यक्व हे कम जूगुलिं सकलसित छेँय् हे च्वनेत वय्कलं इनाप यानादिल ।
लिसें वयकलं खाद्यान्न वा अत्यावश्यक वस्तु न्यायेत पिहां वनेमाःसा मास्क, पंजा न्ह्यायेत व स्यानिटाइजर छ्यलेत नं इनाप यानादिल ।
पसलय् वनाः नं तापाक्क च्वनाः न्यायेमाःगु न्यानाः पिने पुचः मुनाः गफ यानामच्वंसे छेँय् हे वनाछ्वयेत नं वयकलं इनाप यानादिल ।
पिहां वनावयाःलि साब्वं लखं ल्हाः सिलेगु, स्यानिटाइजरं सफा यायेगु ल्वःमंकामदीत नं वयकःया इनाप दु ।
फक्व म्हमस्यूपिं नाप हे मलायेगु, नाप हे लायेमाःसां मास्क छ्यलेगु यात धाःसा संक्रमणं आक्रमण याइगु सम्भावना कम जुइगु वयकःया धापू खः ।
समस्या पिने देशं वःपिंके खनेदुगु जूुगुलिं सुं नं पिनं वःपिं दःसा थः हे सतर्क जयाः सम्वन्धित वडा ज्याकू वा नापं च्वंगु प्रहरी कार्यालययात सुचं बियाः १४न्हु तक्क सेल्फ क्वारेन्टाइनय् च्वनेत नं वयकलं इनाप यानादिल ।
सकलसिनं जि थः नं सुरक्षित जुइ, मेपिन्त सुरक्षित याये धइगु भावनायात आत्मसात यानाः कोरोना भाइरसया विरुद्ध जायेत वयकलं सकलसित इनाप यानादिल ।
लकडाउनया थौंया (फोटो फिचर)
नृपेन्द्रलाल श्रेष्ठ | चौलाथ्व तृतिया ११४०
कोरोना भाइरस नेपालय् न दुहा वगुलि सरकारं देय् न्यक लकडाउनया घोषणा याःगु खः ।
लकडाउन जुगु थौं प्यन्हु दय् धुकुुगु दु । न्हापागु दिनय् छु भचा पालना मयासा । आ धाःसा पालना याःगु खनेदु ।
शहिदगेत
बसन्तपू
लुँमधी
नारायणहिति
|न्हुसतक
धनगढीइ छम्ह कोरोना संक्रमित लुत
लहनान्युज | चौलाथ्व तृतिया ११४०
नेपालय् हाकन मेम्ह छम्ह कोरोना भाइरस संक्रमण जुगु पुष्टि जुगु दु ।
उम्ह मनूयात प्रादेशिक अस्पताल धनगढीइ वासः याकेत तया तःगु धका स्वास्थ्य मन्त्रालय पाखे जानकारी बिउगु दु ।
संक्रमित मेपि न दये फइ धका विदेशं वःपि सकसित होम क्वारेन्टाइनय् च्वने इनाप याःगु दु । संक्रमण जुम्ह उम्ह मनू दुबईपाखे वःगु खः ।
वयात चैत ११ गते अस्पताल याउगु खः ।
संक्रमण जुम्ह ३४ दँया मिजंम्ह खः । वयागु अवस्था सामान्य दु ।
थ्व नाप आतक प्यम्ह कोरोना संक्रमण पुष्टि जुइ धुकुगु दु ।
येँ मनपा फागनु १८ लिपा विदेश लिहा वपिनिगु अभिलेख तइगु
लहनान्युज | चौलाथ्व तृतिया ११४०
येँ महानगरय् न्हिया न्हिथं जीवनयापनयात सहज दयेकेगु लागि येँ महानगरपालिकां ३२ गु वडाय् इनाप याःगु दु ।
कोरोना नियन्त्रण तथा रोकथामया लागि सरकारं लकडाउन याये धुका थनाया जनजिवन छु भचा असहज जुगुलि फयापतले सहज दयेकेगु लागि येँँ महानगरपालिकाया प्रमुख बिद्यासुन्दर शाक्यया निर्देशन अनुसार प्रशासन विभाग प्रमुख नमराज ढकालं ३२ गु वडाय् पौ च्वया अथे इनाप यानादिगु खः ।
प्रशासन विभाग प्रमुख ढकालया ल्हाःचिं तया ३२ गु हे वडाध्यक्षयात पौं च्वया वडापाखे सम्पादन जुया च्वंगु फहोर व्यवस्थापन ज्या प्रभावकारी ढंग यायेत अथे इनाप यानादिगु खः ।
अथहे, वडा दुगु खाद्यन्न पसः नियमित रुपं सञ्चालन यायेगु व याकेगु फया फतले छेँय् छेँय् हे सामान आपूर्ति याकेगु लागि प्रहरीया ग्वाहालि कया सहजिकरण यायेत धाःगु दु ।
‘थःगु वडा अन्तरर्गत न्हिया न्हिथं ज्यायाइपि ज्यालादारी, मजदुरी याइपि नाप सतकय् च्वनिपिन्त लक्षित यासे कोभिड–१९ रोकथाम व नियन्त्रणया लागि वडाय् जम्मा जुगु ध्यवा माःगु राहत ग्वाहालि यायेत,’ न धाःगु दु,
‘वडाय् अति विपन्न व खुलानिसे वडाय् बसोवास याना वयाच्वपि श्रमिक कामदारपिनगु विवरण संकलन याना कामपा प्रशासन विभागमा बुझे यायेत धाःगु खः ।’
अथेहे, मार्च १, २०२० (२०७६ फागुन १८) निसे विदेश भ्रमणयाना वडाय् वसोवास याना च्वपिनिगु नागरिक तयेगु अभिलेख तयार यायेत व इमिगु अवस्था गये च्व? विवरण सहित लगत तयार याना छ्वया हयेत वडाय् इनाप याःगु खः ।
येँ महानगरपालिकां कार्यपालिकाया वःगु चैत ६ गतेया विषेश बैठकं १० करोडया कोष स्थापना यासे कोभिड–१९ रोकथाम व नियन्त्रणया ज्या यायेत तत्काल खर्च याना चिधःगु व तधःगु वडा कार्यालययात २,३,व ४ लाख निकाशा याउगु खः
