Display Style:
Column Style
संस्कृति शिरोमणि जोशीया ‘अभिनव वेदादी कोष’ पितब्वज्या
लहनान्युज | कौलाथ्व पुन्हि ११३९ (अक्टुवर १३ २०१९)
संस्कृति शिरोमणि हरिराम जोशीं च्वयादीगु ‘अभिनव वेदादी कोष’ छगू ज्याझ्वःया दथुइ पितब्वज्या जुल ।
नेपाल सरकारया पूर्व मुख्य सचिव मधुसुदन गोर्खालीया सभाध्यक्षताय् जूगु उगु पितब्वज्या ज्याझ्वलय् संस्कृति शिरोमणि जोशीया थःहे दाजु ९५दँ दुम्ह केशवराम जोशी मूपाहाँकथं झायादीगु खःसा उगु सफू मूपाहाँ केशवराम जोशी, पूर्व मूख्य सचिव मधुसुदन गोर्खाली, डा. नयननाथ पौडेलं मंकाःकथं पितब्वज्या यानादगु खः ।
मदन पुरस्कार, दिल्ली रमण रेग्मी राष्ट्रिय शान्ति पुरस्कारलिसेंया विजेता संस्कृति शिरोमणि जोशीं थ्व स्वयां न्ह्यः स्वीगू स्वयां अप्वः सफू च्वयादीधुंकूगु दु ।
न्यय्च्याक्वःगु विराट सम्मेलन तःजिक हन
लहनान्युज | कौलाथ्व पुन्हि ११३९ (अक्टुवर १२ २०१९)
नेपालभाषा व साहित्य च्वन्ह्याकेगु तातुनां थौंस्वयां न्यय्च्यादँ न्ह्यः नीस्वनातःगु विराट नेपालभाषा साहित्य सम्मेलन गुथिं दँय्दसंथें थुगुसी द्वादशि कुन्हु ५८क्वःगु ऐतिहासिक बिराट नेपालभाषा साहित्य सम्मेलन बिहिवाः ख्वपय् क्वचाल ।
डा. योगेन्द्र प्रधान मूपाहाँकथं झायादीगु खःसा डा. पुष्पराज राजकर्णिकार, प्रदेश ३या सांसद डा. राजेन्द्रमान श्रेष्ठ, बरिष्ठ बाखंच्वमि मथुरा साय्मि, सिद्धिदास प्रतिष्ठानया नायः नरेन्द्रभक्त हाडा, नेपाल साहित्य मन्दिरया नायः तिलकप्रकाश कायस्थ, लक्ष्मी माली, नेपालभाषा मंकाः खलः यलया नायः ऋषिप्रसाद श्रेष्ठ, संगीत नाट्यकला प्रज्ञा प्रतिष्ठानया कुलपति रायन पाहाँकथं झायादीगु खः ।
बिराटया संस्थापक रत्नगोपाल सैंजुया लुमन्तिइ वय्कःया छेंजःपिंपाखें थुगुसिनिसें बिराट सुरत्न सिरपाः नेपालभाषा स्नातकोत्तर तगिमय् दकलय् अप्वः ल्याः हयादीम्ह राकेश महर्जनयात व नगद, एसईई परीक्षाय् नेपालभाषा विषयसं दकलय् अप्वः ल्याः हयादीम्ह सुकुन्दा श्रेष्ठयात नेपालभाषा पदक लःल्हाःगु खः ।
अथे हे, चिनाखँ धेंधेंबल्ला कासाय् रुपा शाही, सलिना महर्जन व मेरिट कोजु नापं खुम्हस्यां ब्वति कयादीगुलिइ सोना तचामो न्हाप, मिलन कुमार थेच्वमि ल्यू व सुयोग्य मानन्धर लियांल्यू लाःपिन्त दाता पुष्पलाल तिमिलां नगद व नायः महेन्द्र गोपाल कर्माचार्यं सिरपाः लःल्हानादीगु खः ।
अथेहे स्व. हरिदास श्रेष्ठया लुमन्तिइ वय्कःया तिरिमय्जु बसन्ती श्रेष्ठं न्यय्द्वः तकाया चेक बिराटया नायः कर्माचार्ययात लःल्हाःगु दु ।
नविन प्रकाश श्रेष्ठं न्ह्याकादीगु उगु ज्याझ्वलय् खुदँया सजगता मानन्धर, पुष्परत्न तुलाधर, गोविन्दमान श्रेष्ठ, स्नेह साय्मि, नरेश अमात्य, अमिर मैया रञ्जित, विमलप्रभा बज्राचार्य, सौरभ शाक्य, बसन्त नकःमि, नारद बज्राचार्य, नरेनमान महर्जन, श्याम आशा, लुमन्ति चित्रकार, समाश्री, श्रीराम श्रेष्ठ, ओमकृष्ण श्रेष्ठ, दिलकुमारी डंगोल, रामेश्वर श्रेष्ठ, कविन्द्र लाल प्रधानपिन्सं थःथः साहित्य वाचन यानादीगु खः । अथेहे, जनगायक लोकसंगीत अन्वेषक रामकृष्ण दुवाल, सत्यनारायण मानन्धर, वीरप्रसाद भन्सारी पिन्सं म्ये हालाः न्यंकादीगु खः ।
खुलामञ्चय् पिच यायेगु ज्याय् कांग्रेसया बिरोध
लहनान्युज | कौलाथ्व नवमी ११३९ (अक्टुवर ७ २०१९)
येँ महानगरपालिकां खुलामञ्चय् धुँ ब्बया व गाः ल्हाकेत्यःगु ज्याय् प्रमुख प्रतिपक्षी दल नेपाली काँगे्रसपाखे बिरोध याःगु दु ।
येँ महानगपालिकां गाः ल्हाकेगु व धुँ मब्बेकेगु ज्याया निरन्तर ज्या कथं नाप चिनियाँ राष्ट्रपति सी जिनपिङ नेपाः वये त्यःगु व नेपाल भ्रमण वर्ष २०२० यात लक्षित याना लँ पिच यायेगु नाप लँय् गाः ल्हाकेगु ज्या याना वयाच्वंगु दुु ।
थुगु हे ज्याया निरन्तर कथं खुल्लामञ्चय् अस्थायी वसपार्कय् वा वइगु इलय् ध्याचः जुइगु व निभाः त्वयेगु इलय् धुँ ब्बयेग् समस्या कारण येँ महानगरपालिकां पिच यायेगु ज्या न्ह्याकुगु खः । खुल्लामञ्च अस्थायी वसपार्कय् ढलान याउगु खँय् नेपाली काँग्रेसका नेता एवं संघीय सांसद भिमसेनदास प्रधान, येँ मनपाया उपमेयर हरिप्रभा खड्की व वडा नम्बर २८ या अध्यक्ष भाइराम खड्गीं बिरोध याना उगु ज्या बन्द जुगु दु ।
येँ महानगरपालिकाया मेयर विद्यासुन्दर शाक्य छु दिं न्ह्यनिसे डेङगुया कारण अस्पतालय् वास याकाच्वंगु दु । येँ मनपाया मेयर शाक्यं वास याकेगु झ्वलय् न चिनियाँ राष्ट्रपति सी नेपाः भ्रमणया तयारीया लागि येँ महानगरपालिकां याये माःगु ज्या जुया च्वंगु जानकारी कयाच्वंगु दु ।
चिनियाँ राष्ट्रपति सीया भ्रमणय् येँ महानगरपालिकां महानगरय् थीथी थासय् पिच यायेगु व सजावट यायेगु जिम्मेवारी वउगु खः । उगु कथं हे महानगरं अस्थायी रुपय् खुलामञ्चया वसपार्कय् कालापत्रेया ज्या न्ह्याकुगु खः ।
मेयर शाक्य उपमेयर हरिप्रभा खड्कीयात सःता तीनकुनेय् हरियाली प्रवद्र्धन यायेगु, बसपार्कय् पिच यायेगु ज्या यायेगु जिम्मेवारी बिउगु खः । मेयर शाक्ययात नाप लायेगु झ्वलय् छन्हु न्ह्यः उपमेयर हरिप्रभा खड्की अस्पतालय् झागुु खः । तर अस्पतालय् नाप लायेगु इलय् खुल्लामञ्चय् जुया च्वंगु पिचया बिरोध मयाउगु कन्ह्यः खुन्हु वना खुलामंच वना बिरोध याः वःगु खः ।
न्हूदँ समारोह समिति ११४० या नायः रमेश महर्जन
लहनान्युज | कौलाथ्व पंचमी ११३९ (अक्टुवर ३ २०१९)
नेपाल संवत न्हूदँ राष्ट्रिय समारोह समिति ११४० या नायःया नितिं उद्योगपति व्यवसायी नाप समाजसेवी रमेश महर्जनयात समितिया दुजः मुँज्यां सर्वसम्मतं ल्यःगु दु ।
थौं बिहिवाः सुथय् छगू ज्याझ्वःया दथुइ ने.सं. ११३९ समारोह समितिया नायः सत्यभामा माथेमां व समारोह समितिया सल्लाहाकार समितिया कजि लक्ष्मीदास मानन्धर लिसें दुजःपिन्सं वय्कः महर्जनयात खादा न्ययेकाः लसकुस यानाः न्हूदँ समारोह समिति ११४० या लसताय् जुइगु थीथी ज्याझ्वः सुथां लाक्क न्ह्याकेत भिंतुना देछाःगु खः ।
उगु ज्याझ्वलय् न्हूम्ह नायः महर्जनं नेपाल संवतयात सम्मान यायेगु कथंया ज्याझ्वः यायेगु बचं बियादिसें थुकिया नितिं थःपिन्सं सकल हनेबहःपिनिगु सल्लाह सुझाब कयाः ज्या न्ह्याकेगु विचाः प्वंकादीगु खः ।
अथेहे, थौं जुगु मुँज्यां न्हूदँ तःजिक हनेत थीथी उपसमिति नीस्वंगु दु । न्हूम्ह नायः महर्जनया सभाधक्ष्यताय् जूगु उगु मुँज्यां नेपालभाषा मंकाः खलःया नायःयात न्हूदँया लसताय् जुइगु थीथी ज्याझ्वलय् विशिष्ट पाहाँकथं ब्वनेगु निर्णय याःगु दु ।
उगु मुँज्या आर्थिक समिति, संचार समिति, प्रतिनिधिमण्डल समिति, मञ्च माइक व्यवस्थापन समिति, मिसा समन्वय समिति, न्हिल्याः पिथना समिति, नासः पूजा व प्रसाद ग्रहण ज्याझ्वः समिति, न्हूदँया नारा समिति, क्लब समन्वय समिति, विशिष्ट तुच्चा ज्याझ्वः समिति, सांस्कृतिक महोत्सव समन्वय समिति, स्वयंसेवक समिति, सांस्कृतिक बाजं समन्वय समिति, देय् न्यंकं न्हूदँ समारोह समन्वय समिति नीस्वंगु दु ।
अथेहे, गैर नेवाः प्रतिनिधि, खलः पुचः प्रतिनिधि नाप १५ म्ह दुजः दूगु व्यवस्थापन समिति नं नीस्वंगु दु । मोहनी धुंकाः व्यवस्थापन समितिया मुँज्या च्वनाः न्हूदँ तःजिक हनेगु नितिं मुँज्या च्वनीगु जूगु दु ।
बुबहालय् मोहनि मेला न्ह्यात
लहनान्युज | कौलाथ्व तृतिया ११३९ (अक्टुवर १ २०१९)
राज्यया स्वंगुलिं तगिंया जनप्रतिनिधितसें यलया ऐतिहासिक बौद्ध विहार (बहाः बही)यात पर्यटकीय आकर्षक गन्तब्यकथं विकास याय्माःगु खँय् बः ब्यूगु दु ।
बुबहाल युवा समूहं यल महानगरपालिका–१६या विशेष ग्वाहालिइ यशोधरवर्ण महाविहार, बुबहालय् ग्वसाः ग्वःगु मोहनि मेला–२०७६ उलेज्या यानादिसें संघ, प्रदेश व स्थानीय तगिंया जनप्रतिनिधिपिन्सं उगु खँय् बः ब्यूगु खः ।
मेलाया उलेज्या यानादिसें यल क्षेत्र नं. २या संघीय सांसद कृष्णलाल महर्जनं बौद्ध विहारया संरक्षण यानाः पर्यटकपिनिगु नितिं आकर्षक गन्तब्यकथं विकास याय्माःगुलिइ बः बियादिल ।
लुम्बिनीइ वनेत नेपाः वइपिं हलिंया बौद्ध धर्मालम्बीतय्त थनया ऐतिहासिक बौद्ध विहारयात कयाः प्रचारप्रसार यानाः उमित यलय् दुत हय्फइगु आपालं क्वात्तुगु सम्भावना दुगु नं सांसद महर्जनं धयादिल ।
उगु ज्याझ्वलय् प्रदेश नं. ३या सांसद शोभा शाक्यं जिल्लाया लिच्छवीकालीन व मल्लकालीन बौद्ध विहार, बुद्ध दर्शन, संस्कृति व संस्कारया मू केन्द्र जूगु न्ह्यथसें थुकियात पर्यटकीय ‘रुट’य् दुथ्याकेत फुक्क जाय्माःगु धयादिल ।
न्ह्यःने वयाच्वंगु ‘भिजिट नेपाल – २०२०’य् नेपाः दुहां वइपिं पर्यटकपिन्त उपलब्धीमूलक दय्केत बौद्ध विहार चाःहिकेगु, अनया जीवन्त संस्कृतियात कयाः जानकारी बीकथं विशेष प्याकेज हय्फइगु नं वय्कःया धापू खः ।
सांसद शाक्यं धयादिल, “बौद्ध विहार धार्मिक दृष्टिं जक मखुसे प्रस्तर कला, काष्टकलाया ल्याखं नं तसकं महत्वपूर्ण जू । विहार जःखः होमस्टेया व्यवस्था याय्फपत धाःसा आयआर्जन याय्फइगु सम्भावना दु ।” वय्कलं बौद्ध विहारयात पर्यटकीय गन्तब्यकथं विकसित याय्गु नितिं उकिया संरक्षण, सम्बद्र्धन व माःकथंया पूर्वाधार दय्केमाःगु खँय् बः बियादिल ।
थ्व हे झ्वलय् प्रदेश नं. ३या सांसद ज्ञानेन्द्र शाक्यं यलयात साँस्कृतिक व पर्यटकीय नगरी घोषणा याय्माःगु बिचाः प्वंकादिल । थुकिया नितिं राज्यया स्वंगुलिं तगिं जानाः न्ह्याःवनेमाःगु खँय् सांसद शाक्यं बः बियादिल ।
समारोहस यल महानगरपालिका –१६या नायः निर्मलरत्न शाक्यं वडादुनेया संस्कृति, सम्पदा, बौद्ध विहार यक्व दुगुलिं उकियात ध्यानय् तयाः वडां संस्कृति, सम्पदाया संरक्षणयात न्हापांगु प्राथमिकताय् तयागु जानकारी बियादिल ।
कला, संस्कृति, सम्पदा संरक्षण यानाः पर्यटकीय गन्तब्य दय्केत, स्थानीयया आर्थिक व मानवीय विकासया नितिं गबलें वडां हे मेला याय्गु व गबलें मेला याइपिन्त ग्वाहालि याय्गु नीति नालागु नं नायः शाक्यं धयादीगु दु ।
न्यान्हु तक मेला
स्थानीय मिसापिनिगु उद्यमशीलता विकास याय्गु तातुनां मेला ग्वसाः ग्वयागु समूहया नायः बाबुराजा बज्राचार्यं धयादिल । न्यान्हुतक न्ह्याइगु उगु मेलाया सहआयोजककथं यशोधर बचत तथा ऋण सहकारी संस्था लि. व संरक्षकय् यशोधर महाविहार सुधार समिति दुगु खः ।
मेलाय् स्थानीय मिसा समूह, सहकारपाखें उत्पादन याःगु न्हियांन्हिथं छ्यलाबुला याइगु हलंज्वलं, कापः, छाय्पीगु हलंज्वलंया स्टल दु । मेलाया आकर्षकथं न्हियांन्हिथं सनिलय् चर्याप्याखं, साँस्कृतिक ज्याझ्वःया नापनापं नेवाः नसाज्वलंत दु । मेलापाखें नेवाः नसाज्वलंया ब्राण्डिङ, स्थानीय कलाकारपिनिगु प्रबद्र्धन जुइगु ग्वसाः खलःया विश्वास दु ।
