Display Style:
Column Style
ब्बनेकुथिइ क्षयरोग सम्बन्धी प्रशिक्षण
बाबुकाजी श्रेष्ठ | यंलागा नवमी ११३९ (सेप्तेवर २३ २०१९)
ब्बनेकुथिया अभिभावक व ब्बमिपिन्त लक्षित याना क्षयरोग सम्बन्धी छःगु प्रशिक्षण ज्याझ्वः जुगु दु ।
नेपाल क्षयरोग निवारण संस्था भक्तपुरया ग्वसालय् उगु प्रशिक्षण ज्याझ्वलय् क्षयरोग संस्थाया प्रशिक्षक हिरण्यप्रताप सांगामीं क्षयरोगया सम्बन्धी ख, क्षयरोगया लक्ष्यण, बच्चे जुइगु उपाय व रोकथाम बारे प्रशिक्षण बियादिगु खः ।
उगु ज्याझ्वलय् क्षयरोग संस्थाया निवर्तमान सभापति बाबुकाजी श्रेष्ठं नेपाल क्षयरोग निवारण संस्थां थुगु दँय्या लक्ष्य हे भक्तपुर जिल्लाय् सुला च्वंगु ल्वगित माला ल्वय् लःकिगु थुकिया लागि
सकस्युगु ग्वाहालि यायेत इनाप न यानादिगु खः
ब्बनेकुथिया शिक्षक योगी स्यःस्य न उगु ज्याझ्वः न्ह्याकादिगु खः । ज्याझ्वलय् अभिभावक व विद्यार्थीयाना ३० म्हेसिगु ब्बति दुगु खः ।
सुनचाँदी व्यवसायी संघया स्वक्वःगु तःमुँज्या
लहनान्युज | यंलागा नवमी ११३९ (सेप्तेवर २३ २०१९)
भक्तपुर सुनचाँदी व्यवसायी संघया स्वक्वःगु तःमुँज्या सूर्य बिनायक ख्वपय् क्वचाल ।
ज्याझ्वलय् नेपाल सुनचाँदी व्यवसायी संघया केन्द्रीय नायः मोहन कुमार सुनारं ‘लुँ स्वाँ’ पितब्वज्या यानादीगु खःसा रविना शाक्य व फोटोग्राफर उज्वल चन्द्र बज्राचार्ययात ‘भक्तपुर
सुनचाँदी प्रतिभा सम्मान’ लःल्हानादीगु खः ।
उगु मुँज्यां प्रदीप रत्न शाक्य नायः, बसन्त राज शाक्य व विजय रत्न शाक्य न्वकू, पद्मरत्न शाक्य छ्याञ्जे, अमररत्न शाक्य ल्यू छ्याञ्जे व मतिना शाक्य धाख्वाः दांभरि व हेम बज्राचार्य ल्यू दांभरिलिसें १३ म्हसिया न्हूगु ज्यासनापुचः ल्यःगु प्रमुख निर्वाचन अधिकृत सानु शाक्यं जानकारी बियादीगु दु ।
बुखँ नेवाः सुचना केन्द्र किपाः राजेन्द्र रंजित
मेट्रो एफ.एम.या नीक्वःगु बुदिं हन
लहनान्युज | यंलागा नवमी ११३९ (सेप्तेवर २३ २०१९)
येँ महानगरपालिकापाखें न्ह्याका वयाच्वंगु दक्षिण एसियाया हे स्थानीय तगिंपाखें सामुदायिक एफ.एम. रेडियोया रुपय् पलिस्था जूगु न्हापांगु एफ.एमं “मेट्रो एफ.एम.९४.६ मेगाहर्ज”या २० क्वःगु बुदिं असोज १ गते बुधवाः राष्ट्रिय सभागृहय् हन ।
मेट्रो एफ.एम.या नीक्वःगु बुदिंया लसताय् नेपाःया हे मौलिक लिपि रञ्जना लिपिया प्रचारप्रसारलिसें जनस्तरय् छ्यलाबुला याय्गु तातुनां जूगु ‘रञ्जना लिपि च्वज्या धेंधेंबल्ला कासा’ त्याकादीपिन्त मूपाहाँलिसें येँ महानगरपालिकाया मेयर विद्यासुन्दर शाक्य, महानगरपालिकाया प्रवक्तालिसें १५ वडाया वडाध्यक्ष ईश्वरमान डंगोलपिन्सं नगद सिरपाःलिसें दसिपौ लःल्हानादीगु खः।
स्वनिगःया येँ, यल, ख्वपलिसें बुंगः, खोना, थसि, थिमि, रामकोट, तोखा, फुसिंख्यः, थेच्व, नैकाप, सक्वपाखें मुक्कं ८७म्हेस्यां ब्वति काःगु उगु धेंधेंबल्लाय् चाबहीया सजिन डंगोल न्हाप, खोनाया राजन डंगोल ल्यू व थिमिया वीरकाजी (विक्की) बज्राचार्य लियांल्यू लाःगु खःसा वय्कःपिन्त छसिकथं नीन्याद्वः, झिंन्याद्वः व झिद्वःतका दां सिरपाः लःल्हाःगु खः । अथे हे, हःपाः सिरपाःकथं झिम्हेसित द्वःछि÷द्वःछितका दां लःल्हाःगु खः ।
थुकथं हे च्वज्या कासाया प्रशिक्षकया लिसें सांस्कृतिक ब्वज्या यानादीपिं कलाकार व संस्थायात नं हनापौ लःल्हाःगु खः।
येँ महानगरपालिकाया सूचना सञ्चार समितिया कजि ईश्वरमान डंगोलया सभाध्यक्षताय् जूगु उगु ज्याझ्वलय् महानगरपालिकायाया मेयर विद्यासुन्दर शाक्य, येँमहानगरपालिकाया प्रशासकीय प्रमुख केदार पौडेल, सूचना प्रविधि विभागया प्रमुख राज्यप्रकाश प्रधानांगपिन्सं थःथःगु नुगः खँ प्वंकादीगु खः ।
‘सः छगू फरक अभिव्यक्ति’या झिगूगु ब्व
लहनान्युज | यंलागा नवमी ११३९ (सेप्तेवर २३ २०१९)
नेपालभाषा साहित्य ख्यः तब्याः यानायंकेगु तातुनां न्ह्याकूगु ‘सः छगू फरक अभिव्यक्ति’या झिगूगु ब्व क्वचाल ।
सुनील बज्राचार्य न्ह्याकादीगु उगु ज्याझ्वलय् नरेश अमात्यं चिबाखं च्वमि केदार श्रेष्ठ ‘सितु’, रासा, स्नेह साय्मिपिन्त लसकुस यानादीगु खः ।
च्वमि ‘सितु’या बाखनय् थौंकन्हय् थःगु देय् नेपाः त्वःताः न्ह्याथे यानाःसां विदेश वने हथाय्पिं मिजंतसें थः कलाः हे मेपिनि कला दय्काः छ्वइपिं मनूतय्गु अतिहे कलात्मक शैलिं समाजया
विकृतियात न्ह्यब्वयातःगु डा. पुष्पराज राजकर्णिकारं धयादिल । रासाया चिबाखं चिहाकः जुयाः नं यइपुस्सेच्वंगु व छुंनं वस्तु वा बिचारय् मनूतय्गु दृष्टिकोण फरकफरक जुइफु धइगु अभिव्यक्ति न्ह्यब्वयातःगु खँ कनादिल ।
अथेहे, च्वमि सायमिं प्रविधिया विकास नापनापं विदेशय् ब्वनावःपिं मस्त ल्यापटपय् व्यस्त जुयाः थः बुराबुरीपिं मांअबुपिनिगु सुसाःकुसाः याय् मफयाच्वंगु ब्यथां नुगलय् च्वास्स त्यूगु खँ कनादिल ।
ज्याझ्वलय् ब्वतिकयादीपिं मध्ये छम्हेसित बीगु मतिनाया चिं बाखं च्वमि दिब्या ताम्राकारलिसें बाखं ब्वनादीपिं स्वम्हेसितं लुमन्ति चिं सुधिर ‘ख्वविं’ लःल्हानादीगु खः । अथेहे, बाखं च्वमिपिन्त हःपाः बीकथं नेपालभाषा ह्यःमि मोक्षबहादुर अमात्यं खादा क्वखाय्काः हनाबनायासें दां नं लःल्हानादीगु खः ।
अप्वः काःगु ल्हापं लित बीत वा समायोजन यायेत सीएसी सहमत
लहना न्यूज | ने.सं. ११३९ ञलागा सप्तमि (२१ सेप्टेम्बर, २०१९), सञ्चरवाः
सरकारं क्वःछ्यूगु स्वयां अप्वः काःगु ल्हापं स्वीन्हुया दुने लित बीत वा समायोजन यायेत चितवन मेडिकल कलेज (सीएमसी) सहमत जूगु दु । थ्वया नापनापं स्ववाः न्ह्यःनिसें न्ह्याकाच्वंपिं विद्यार्थीपिन्सं नं आन्दोलन लितकाःगु दु ।
जिल्ला प्रशासन ज्याकू, चितवनय् थौं सञ्चरवाः आन्दोलन यानाच्वंपिं विद्यार्थी, चितवन मेडिकल कलेज व विद्यार्थी प्रतिनिधिपिनिगु स्वंगू पक्ष दथुइ सहलह जूगु खः ।
मुँज्यां ल्हापं सम्बन्धि अध्ययन यायेत जिल्ला प्रशासन ज्याकू व शिक्षा ज्याकूया छम्ह छम्ह प्रतिनिधि, चितवन मेडिकल कलेजया निम्ह प्रतिनिधि, आन्दोलन यानाच्वंपिं विद्यार्थीपाखें निम्ह प्रतिनिधि व अभिभावकपाखें छम्ह प्रतिनिधि दुथ्याःगु छगू कार्यदल नीस्वंगु दु ।
कार्यदलपाखें थप ल्हापं काःगु वा मकाःगु अध्ययन यानाः असोज १० गते दुने जिल्ला प्रशासन ज्याकुथिइ प्रतिवेदन लःल्हाइ ।
प्रतिवेदनकथं मेगु पलाः ल्ह्वनेगु सहमति जूगु चितवन मेडिकल कलेजया प्रमुख सञ्चालक हरिशचन्द्र न्यौपानें जानकारी बियादिल ।
थ्व हे झ्वलय् आन्दोलन यानाच्वंपिं विद्यार्थी न्ह्यलुवा प्रकाश चन्दं सहमति कार्यान्वयन मजूसा हाकनं आन्दोलन यायेगु धयादिल ।
