Display Style:
Column Style
येँ महानगरं मानव सेवा आश्रमयात मोटर लःल्हात
नृपेन्द्रलाल श्रेष्ठ | गुंलागा औसी ११३९ (अगष्ट ३० २०१९)
येँ महानगरपालिकां छगु ज्याझ्वः यासे मानव सेवा आश्रमयात महानगरया मेयर विद्यासुन्दर शाक्यं आश्रमया अध्यक्ष रामजी अधिकारीयात छगः मोटरया ताःचाः व भ्वँ लःल्हागु दु ।
उगु ज्याझ्वलय् येँ मनपाया मेयर शाक्यं मानव सेवा आश्रमनाप महानगर यागु सम्झौतां वेसहारा मनू तयेत उद्धार, वासः यायेगु, नकेगु त्वकेगु व च्वनेगु थाय्या साझेदारितापाखे ५४५ म्हसित ग्वाहालि जुइगु धयादिसे शहर समृद्धिया लागि महानगरं न्ह्याबलय् ग्वाहालि यायेगु प्रतिवद्धता व्यक्त यानादिल ।
अथेहे ज्याझ्वलय् महानगरया उपप्रमुख हरिप्रभा खड्गी श्रेष्ठं मानव सेवा आश्रमनाप मिले जुया ज्या यायेगु आत्म सन्तुष्टि दु धयादिगु दु ।
महानगरनाप आश्रमं सहमति याये धुका उपलब्धीया बिषयया खँय् आश्रमया प्रमुख संरक्षक डा गोबिन्द टण्डनं २०८२ तक नेपालयात ग्वाहालिं सतकय् च्वनिपि मनू मदेयकेगु योजनाय् महानगरया थुगु ग्वाहालिं लक्ष्य याकन हे पूरा जुइगु संकेत दु धका धयादिगु खः ।
आश्रमया अध्यक्ष रामजी अधिकारीं बुढानिलकण्ठ नगरपालिकां उपलब्ध याना ब्युगु करीब ४२ रोपनी जग्गाय् महानगरं भवन निर्माण याना बिइगु धका धागुलि लक्ष्य पूरा यायेत यक्व हे ग्वाहालि जुगु धका धयादिगु खः ।
येँ जक तयेगु सम्भव मजुगुलि १५० म्हेसित येँपाखे स्थानान्तरण याना आश्रमं पोखरा, धनगढी, हेटौडा, बीरगञ्ज शाखा तयातगु खः । छँय् परिवार दुपिं तर जीवन अस्तव्यस्त जुपि आश्रमया सम्पर्कय् थ्यपि मध्ये ७७ म्ह बिस्यु वउगु दुसा ४४ म्ह अनहे मदुगु खः।
महानगरं २०७४ मंसिर १ गते मानव सेवा आश्रमनाप सतकय् वेसहारा जुया म्वाना च्वपिं पालन पोषणय् ग्वाहालि यायेगु उद्देश्यं थथे सम्झौता यागु खः । सहरया सतकय् वेसहारा जुया म्वाना च्वपि हरेक दँया मनू तयेत उद्धार यागु, आश्रमय् यकेगु, सम्भव दुपिन्त पारिवारिक पुनर्मिलन याकेग सहमति हे मू ज्या खः ।
थुकिइ पाखे महानगरं वइगु दिनय् आश्रमयात निखा छेँया बाः पुला वया च्वंगु खः । महानगरं बाः पुला च्वंगु वडा नं. २६ सामाखुशीइ ६७ द्धः व निसः व बुढानिलकण्ठ नगरपालिका वडा नं. १ य् नीलो पुलय् १ लाख याना कुल १ लाख ६७ द्धः व निस आश्रमया लागि निखा छेँया बाः पुलाच्वंगु खः ।
महानगरनाप साझेदारिता लिपा मानव सेवा आश्रमपाखे ५४५ म्हेसित उद्धार यागु दुसा आतक येँ दुने व पिने ११५ म्ह मनूत च्वना च्वंगु दु । अथेहे ५४५ म्ह मध्ये १५९ म्हेसित परिवारय् पुनर्मिलन यागु दु ।
मिडिया काउन्सिल विधेयक राष्ट्रियसभाय् न्ह्यब्वल
लहना न्यूज | ने.सं. ११३९ गुंलागा चःह्रे (२९ अगष्ट, २०१९), विहिवाः
सरकारं विवादित नेपाल मिडिया काउन्सिल विधेयक २०७५ राष्ट्रियसभाय् न्ह्यब्वःगु दु । नेपाल पत्रकार महासंघलिसेंया सञ्चार क्षेत्रया थीथी संघसंस्थां विरोध याना वयाच्वंगु मिडिया काउन्सिल विधेयक थौं विहिवाः राष्ट्रियसभा मुँज्याय् सञ्चारमन्त्री गोकुल बाँस्कोटां न्ह्यब्वयादीगु खः ।
महासंघं उगु विधेयकया प्रावधानपाखें प्रेस स्वतन्त्रतायात कुण्ठित यायेत स्वःगु धासें चरणबद्ध आन्दोलन हे याःगु खः । बैशाख २७ गते हे राष्ट्रियसभाया सचिवालयस दर्ता जूगु उगु विधेयक महासंघया विरोधया हुनिं न्ह्यःने यंकेमफूगु खः । नेपाल कम्यूनिष्ट पार्टी (नेकपा)या नेतातसें विधेयकयात भिंकेगु प्रतिबद्धता प्वंकेधुंकाः महासंघं आन्दोलन स्थगित याःगु खः ।
फुक्क कथंया मिडियाया अनुगमन यायेगु अधिकार मिडिया काउन्सिलयात बीगु काउन्सिलया अधिकार व कारवाही यायेगु विषयलिसें मिडिया काउन्सिलयात अझ क्वातुकेगु विषयत विधेयकय् न्ह्यथनातःगु मन्त्री बाँस्कोटां धयादीगु दु ।
येँया प्रमुख शाक्यपाखें पञ्जरां कयादिल
लहनान्यूज | ने.सं. ११३९ गुंलागा त्रयोदशि (२८ अगष्ट, २०१९), बुधवाः
येँ महानगरपालिकाया प्रमुख विद्यासुन्दर शाक्यं थौं पञ्जरांय् ब्वति कयादिल ।
पञ्जरां हनेगु झ्वलय् प्रमुख विद्यासुन्दर शाक्य दान कयादीत थीथी विहारय् झायादीगु खः । प्रमुख शाक्यलिसें महानगरपालिकाया मेमेपिं शाक्य, बज्राचार्य वडाध्यक्षपिनिगु ब्वति दुगु खः ।
पञ्जरां दानलिसे सम्बन्धित नखः खः । पञ्जरांया दिनस परम्परागत विहारया शाक्य, बज्राचार्यपिन्त बुद्धया उपासककथं हनाबनालिसें लसकुस यानाः सत्कार यासें अत्र दान बीगु खः । प्रमुख शाक्यं नं दान कयादीत झायादीपिं मेमेपिं शाक्य, बज्राचार्यपिनिगु पुचःलिसें लाइनय् च्वनाः सर्वसाधारणपाखें दान ग्रहण यानादिल । अत्र धाय्बलय् छ्व, जाकि, चि, ग्वःमाय्, कःनि, कय्गू व खीर खः ।
लिपांगु पुस्तां थुगु नखःया महत्व व सन्देशयात ल्वःमंका वनाच्वंगु अवस्थायात बिचाः यानाः थुकियात पुनःजागरण यायेत थःम्हेस्यां ब्वति कयागु जानकारी बियादिल । ‘मेयर पद ला
अस्थायी खः । जनतालिसेया स्वापू धाःसा मेयर जूसां मजूसां माः । मेयर जुल धाय्वं थःगु भाषा, धर्म व संस्कृतियात ल्वःमंकेमज्यू धकाः ब्वति कयागु खः ।’ प्रमुख शाक्यं धयादिल ।
थुगु दिंयात ‘दान दिवस’कथं मान्यता बीमाःगु बहस जुयाच्वंगु इलय् येँ महानगरपालिकाया प्रमुख शाक्य थः हे ब्वति कयादीगुलिं थुगु बहसयात न्ह्यःने यंकेत तिबः दुगु नेपाल परम्परागत बौद्ध धर्म संघया बज्राचार्य गुरुजुपिन्सं धयादीगु दु ।
पञ्जरांया दिनस पृथ्वी बूगु अत्र व सिसाबुसा आदि न्याताजि बस्तु दान याइगु जूगुलिं ‘पञ्जरां’ धाःगु खः । पञ्जरायात खस भासं ‘पञ्चदान’ धाइ । थुगु नखः बुद्ध दर्शनया दान पारमितालिसें स्वापू दु । दान भावनां समाज सुधार, दुर्गतिया निवारण नापं शान्ति जुइगु जनविश्वास दु ।
नखः हनेगु झ्वलय् थीथी चुकय् दिपंकर बुद्ध, बसुन्धरा व करुणामयया मूर्तियात पूजा याइ । दँय्दसं गुंलागा त्रयोदशिया दिनस थुगु नखः येँ व ख्वपय् हनीगु खः । यलय् थुगु नखः गुंलाथ्व अष्टमि कुन्हु हनीगु खः । थीथी महाविहारया दिपंकरया थीथी वसः व तिसां छायेपियाः छन्हु न्ह्यः तयातइ । अथे हे, थ्व नखः स्वनिगःलिसें भ्वँत व धौख्यलय् नं हना वयाच्वंगु दु ।
पञ्जरांया झ्वलय् दान यायेगु परम्परा लिच्छवी जुजु बृषदेवया पालंनिसें हे दु धइगु थीथी अभिलेखय् न्ह्यथनातःगु दु । मानदेव, शिवदेव, अंशुबर्मालिसेंया लिच्छवी जुजुपिनिगु इलय् जक मखुसे मल्लकालय् नं थुगु परम्परायात थीथी गुथिया व्यवस्था यानाः थुगु नखःया व्यवस्थापन यानातःगु खः ।
परिषदया बाखं गोष्ठी
लहनान्युज | गुंलागा एकादशी ११३९ (अगष्ट २६ २०१९)
नेपालभाषा परिषदंया ग्वसालय् यलया साताआकी भवनय् छगु ज्याझ्वः यासे बाखं गोष्ठी जूगु दु ।
उगु ज्याझ्वलय् बाखं च्वमि हितकर वीरसिंह कंसाकार मूपाहाँ कथं झायादीगु खः । ज्याझ्वलय् बाखंच्वमिपिं ज्ञानीराजा मानन्धर, मिना बज्राचार्य, राकेस भाजु, श्रीमिला सुवाल, बद्री बेदना, राजु राम मुनकःमि, रेणु श्रेष्ठ, नरेश अमात्य, दिपना शर्मा, माणिक उराय्पिन्स थःथःगु बाखं ब्वनाः न्यंकादीगु खः ।
परिषदया नायः प्राध्यापक सुवर्ण शाक्यया सभाध्यक्षताय् जुगु ज्याझ्वलय् बिमलप्रभा बज्राचार्य न्ह्याकादीगु खःसा ज्याझ्वलय् संस्थाया छ्याञ्जे साहित्यकार ध्रुव मधिकःमिं लसकुस न्वचू तयादीगु खः ।
मूपाँहा कसांकारं बाखं हलिमय् विषय मदुगु बाखंत नं तसकं बय्बय् जूगु दु । अथेजुया बाखं यइपुसे न्ह्यैपुसे च्वंकेत कला प्रयोग यानाः आकर्षक खँग्वत छ्यलाः शुरुइ सस्पेन्स तयाः अन्तय् जक सस्पेन्स खुलय् यात धाःसा बांलाइगु खँ कनादिल । अथेहे लोकंह्वाःम्ह चिबाखं च्वमि गोविन्द मान श्रेष्ठं न्ह्यब्वःगु बाखंत दक्वं हे बांलाःगु खँ कंसे बाखं च्वयेगु इलय् हथाये मचासे छसीकथं न्ह्याकाः दथुइ तःगू विषय बस्तुइ ततःमतः मक्यंसे क्वचायेकल धाःसा ब्वमिपिसं ययेकीगु खँ कनादिल ।
दक्व थासय् मेगु भाय् जक चले जुइधुंकल धैगु सोच वल धाःसा झीगु भाषाया गतिइ अवरोध वइ अथे जुयाः नेपाल भाषा म्वाका तयेत झीसं थःगु मांभाय् छ्यलाबुलाय् हयेगु त्वते मज्यूगु खँ प्राध्यापक सुवर्ण शाक्यं कनादिल ।
बुखँः नेवाः सूचना केन्द्र किपाः राजेन्द्र रञ्जित
तजिलजि च्वन्ह्याकेगु किपाःयात पुरस्कार
लहनान्युज | गुंलागा दशमी ११३९ (अगष्ट २५ २०१९)
नेवाः तजिलजि संरक्षण, संवद्र्धन व प्रवद्र्धन यायेगु तातुनाः फोटो पत्रकारया नेवाः तजिलजि किपाःयात पुरस्कृत यायेगु उद्देश्यं वरिष्ठ फोटो पत्रकार एवम् नेवाः पत्रकार राष्ट्र्यि दबू यें कचाया निवर्तमान नायः नातिकाजी महर्जनं अक्षय कोषया नितिं छगू लख व नीन्याव्द दाँ लःल्हाना दीगु दु ।
वरिष्ठ फोटो पत्रकार महर्जनं अक्षय कोषया नितिं उगु दाँ नकतिनि नीस्वंगु विष्णु नाति फोटो पत्रकारिता पुरस्कार कोषया नायः सञ्चारकर्मी दानदास श्रेष्ठयात नेवाः पत्रकार राष्ट्र्यि दबू यें कचाया शनिबार येंय् जूगु न्याकःगु साधारण सभा व स्वकःगू अधिवेशनया दथ्वी मूपाहाँ यें महानगरपालिकाया मेयर विद्यासुन्दर शाक्य, विशिष्ट पाहाँ नेपाल ललितकला प्रज्ञाप्रतिष्ठानया उपकुलपति वरिष्ठ फोटो पत्रकार गोपाल चित्रकार व नेवाः पत्रकार राष्ट्र्यि दबूया केन्द्रीय नायः श्रीकृष्ण महर्जनया उपस्थितिइ लःल्हानादीगु खः ।
वरिष्ठ फोटो पत्रकार नातिकाजी महर्जन नेवाः पत्रकार राष्ट्र्यि दबू यें कचाय् नायःया थःगु कार्यकाल सिधयेका शनिबाःनिसें निवर्तमान नायः जुयादीगु खः ।
झिंन्याव्दःदाँया उगु पुरस्कारं दय्ँदसँ बहिद्यः ब्वइगु न्हिकुनु न्हाप, न्हापल्यु, लियाँल्यु व सान्त्वना यानाः प्यम्ह फोटो पत्रकारयात हनीगु कोषया नायः दानदास श्रेष्ठं कनादिल ।
