Display Style:
Column Style
जग्गा न्याःपिं स्थानीय मनूत पीडित
लहनान्युज | सिल्लाथ्व त्रयोदशी ११४०
ताः ई न्ह्यवंनिसें भ्रष्टाचारया तःधंगु काण्ड कथं चर्चाय् वयाच्वंगु वालुवाटारस्थित ललितानिवास जग्गा काण्डय् अख्तियार दुरुपयोग अनुसन्धान आयोगं आपालं तःधंपिं मनूतय् विरुद्ध समेत मुद्दा दायरयाःगु झ्वलय् अन जग्गा न्यानाः छेँ दंपिं ३६ म्ह जग्गाधनीत धाःसा तःधंगु मारय् लाःवंगु खँ सीदुगु दु ।
थुगु जग्गाया लागि ३६ म्ह मनूतय्सं वंगु वि.सं. २०६३÷६४ सालय् भाटभटेनीया थुवाः मीनबहादुर गुरुङयाके वालुवाटारया जग्गा न्याना काःगु खः । उमिसं अन जग्गा न्याःबलय् थुकियात छगू आवास योजना कथं विकास यानातःगु खः । उगु आवास योजनायात नेपाल सरकारया मालपोत कार्यालय, नापी विभाग व काठमाडौं उपत्यका नगर विकास योजनां तकं लिखित भ्वं हे दयेकाः स्वीकृत यानातःगु खः ।
सरकारया फुक्क हे निकायपाखें हे छाप तयाः स्वीकृत यानातःगु आवास क्षेत्र जूगुलिं उमिसं अन जग्गा न्याःगु खः । उकी मध्ये गुलिखेसिनं छेँ नं दनेधुंकूगु दु । आः छेँ दनाः च्वं वनेत्यंगु इलय् वयाः थ्व जग्गा ला सरकारी जग्गा खः, भूमाफियातय्सं हिनामिना याःगु धकाः जग्गा मिउपिं व न्याःपिंत तकं ठग करार यासें कारवाही यायेत्यंगु खँ न्यनाः अन जग्गा न्याःपिं थ्व ३६ म्हं जग्गाधनीत मर्माहत जूगु दु ।
वालुवाटार आवास धइगु नां तयाः अन जग्गा न्याःपिं थ्व ३६ म्ह मध्ये २९ म्ह येँया स्थानीय नेवाःत खः । थःपिंसं अन जग्गा न्यानाबलय् गुलिस्यां मेथाय् च्वंगु छेँ व बुँ मियागु, गुलिस्यां बैंकय् त्यासा कयागु खँ पीडिततय्सं धाःगु दु । अथे दुःख यानाः न्याना तयागु जग्गा आः वयाः अनियमित तरिकां न्याना काःगु धासें थःपिंत अनं उठिबास यानाः सुकुम्बासी दयेकेत्यंगु गुनासो नं उमिसं याःगु दु । गुलिखे जग्गाधनीत छेँ दने धुंकूसां नं च्वं वने ग्यानाच्वंगु खँ नं धाःगु दु ।
थःपिनि थ्व समस्या ज्वनाः थुपिं पीडितत थौंकन्हय् नेपाल सरकारया थीथी निकायय् वनाः दुःख प्वंकेगु यानाच्वंगु दु । थ्व झ्वलय् उमिसं येँ मनपाया मेयर लिसें थीथी सांसदपिंत नं नापलानाः समस्या कनेधुंकूगु दु ।
ललितानिवासया हे जग्गा न्याना काःगु कारणं सत्तारुढ दल नेकपाया महासचिव बिष्णु पौडेल नं विवादय् वःगु खः । तर अख्तियारं पौडेलयात धाःसा कारवाही मयाः । पौडेलं थम्हं न्याना तयागु जग्गा सरकारयात लित बिउगु कारणं वय्कःया विरुद्ध मुद्दा तयेम्वाःगु खँ अख्तियारं धाःगु खःसा थुकिं यानाः अख्तियार समेत विवादय् लाःगु खः ।
तर अन हे जग्गा न्याःपिं मेपिं सर्वसाधारणं धाःसा थःपिंसं जीवनभर कमे यानागु सम्पत्ति मुंकाः जग्गा न्याना तयागु जूगुलिं बिष्णु पौडेलं थें सुम्क सरकारयात लित बी फइगु अवस्था मदुगु खँ धाःगु दु ।
दीप्याखं आगंछेँया जग स्वन
लहनान्युज | सिल्लाथ्व अष्टमी ११४०
येँयाः जात्राय् छगू महत्वपूर्ण भुमिका दुगु दीप्याखंया थःगु हे आगंछेँया जग स्वनेगु ज्या जुगु दु ।
येँ महानगरपालिकाया मेयर विद्यासुन्दर शाक्यं छगु ज्याझ्वः दथुइ छेँया जग स्वने ज्या यानादिगु दु । उगु ज्याझुवलय् शहरी विकास राज्यमन्त्री रामवीर मानन्धर, संघिय सांसद कृष्णगोपाल श्रेष्ठ, उपमेयर हरिभा श्रेष्ठ खड्गी व दीप्याखंया नायः इन्द्र महर्जन नं पुजाया याना आगंछेँया जग स्वनादीगु खः ।
ज्याझ्वय् दीप्याखं प्रवद्र्धन तथा संरक्षण समितिया महासचिव मचाराजा महर्जनं आगंछेँया नमूना उलेज्या यानादिगु खः ।
उगु ज्याझ्वलय् थःगु नुँगः खँ तयादिसे येँ महानगरपालिकाया मेयर शाक्यं थःगु कार्यकालय् दुने हे आगंछेँ दयेके सिधयेकिगु जुइ धका धयादिगु खः ।
समितिया सहसंयोजक नातिकाजी महर्जनं लसकुस यानादिगु उगु ज्याझ्वलय् बद्री महर्जन, कौशी तोषाखानाया हेमन्त निरौला, सहकोषाध्यक्ष नरेन्द्र महर्जन, १८ वडाया अध्यक्ष न्हुछेकाजी महर्जनपिंसं नं थःथःगु नुगःखँ तयादीगु खः ।
थुगु आगंछेँ परम्परागत शैलीं करिब ७ करोड तकाया लागतं न्हूगु छेँ दनेत्यंगु खःसा येँ मनपां १ करोड तका विनियोजन याये धुंकूगु दु ।
‘सः छगू फरक अभिव्यक्ति’या विशेष ज्याझ्वः
लहनान्युज | सिल्लाथ्व सप्तमी ११४०
‘सः छगू फरक अभिव्यक्ति’पाखें नेपालभाषा साहित्यिक विकासया नितिं लय्पतिकं स्वम्ह साहित्यकारपिनिगु चिबाखं न्ह्यब्वयाः न्ह्याका वयाच्वंगु साहित्यिक ज्याझ्वः दच्छि दुगु लसताय् यलया इखालखुइ छगू विशेष ज्याझ्वः यात ।
सुनिल बज्राचार्यं न्ह्याकादीगु उगु ज्याझ्वलय् दच्छितक मदिक्क न्ह्याकेगु नितिं थीथीकथं ग्वाहालि याःगु थीथी संघ, संस्था व व्यक्तिपिन्त सुभाय् चिं लःल्हानाः हंगु खः ।
ज्याझ्वलय् बिशेष ग्वाहालि याःगुलिं लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्र भक्त श्रेष्ठ व लहना वाःपौया सम्पादक जुजुमान महर्जनयात ‘सः छगू फरक अभिव्यक्ति’पाखे सुधीर ‘ख्ववि’, नरेश अमात्य व सुनील बज्राचार्यं मंकाःकथं मतिनाया चिं लःल्हानादीगु खः ।
थ्व हे झ्वलय् समाजसेवी मोतिलाल शिल्पकार, मोतिशान्ति शाक्यपिन्त नं सुभाय् चिं लःल्हाय्गु ज्या जूगु खः ।
ज्याझ्वलय् कलाकारपिं सुरजवीर बज्राचार्य, सुरज व्यञ्जनकार, निर्मलरत्न शाक्यपिसं म्ये न्ह्यब्वयादीगु खः ।
जय किसान हित बहुमुखी सहकारीया झिंगुक्वःगु दँमुँज्या
लहनान्युज | सिल्लाथ्व सप्तमी ११४०
जय किसान हीत बहुमुखी सहकारी संस्थाया झिंगुक्वःगु दँ मुँज्या जुल । उगु मुँज्याया उलेज्या प्रतिनिधिसभाया दुजः कृष्णगोपाल श्रेष्ठं यानादीगु खः ।
संस्थाया नायः न्हुछे महर्जनं बार्षिक प्रतिवेदन, दांभरि सन्तकुमार महर्जनं आर्थिक प्रतिवेदन न्ह्यब्वयादीगु खःसा छ्याञ्जे रविन्द्र महर्जनं लसकुस यानादीगु खः । अथे हे संस्थाया लेखा समितिया संयोजक गोविन्द महर्जनं लेखा समितिया प्रतिवेदन न्ह्यब्वयादीगु खः ।
थ्व हे झ्वलय् जूगु बन्द सत्रपाखें न्हुछे महर्जनया अध्यक्षताय् न्हूगु ज्यासना पुचः नं ल्यःगु दु । उगु पुचलय् राजेश डंगोल न्वकू, रविन्द्र महर्जन छ्याञ्जे, सन्तकुमार महर्जन दांभरि, मनोजमान शाक्य ल्यू छ्याञ्जेकथं ल्यःगु दुसा दुजलय् नीरजकुमार महर्जन, माधव गौतम, तेजरत्न महर्जन व चमितमान डंगोलयात ल्यःगु दु ।
अथे हे लेखा समितिया संयोजकय् गोविन्द महर्जन व दुजलय् मोहनकृष्ण महर्जन व पृथु रिजालयात ल्यःगु दु ।
पाटन दरबार क्षेत्रय् ल्याय्म्हतय्गु मेला
नृपेन्द्रलाल श्रेष्ठ | सिल्लाथ्व सप्तमी ११४०
युवा उद्यमशीलता प्रर्वद्धनया नितिं पाटन दरबार क्षेत्रय् मेला याःगु दु । यल महानगरपालिका वडा ल्याः १६, मिखा कन्सल्टिङ प्रा.लि. व यल वयेर्सया मंकाः ग्वसालय् उगु मेला याःगु खः ।
लोकल मेड इन नेपाल नां बियाः याःगु उगु मेलाय् ल्याय्म्हतसें उत्पादन याःगु थीथी हलंज्वलंया स्वीगू स्टल तःगु खः ।
उगु मेलाय् ल्याय्म्हतसें सांगीतिक प्रतिभा नं न्ह्यब्वःगु खः ।
थ्व स्वयां न्ह्यः उगु वडां कला व संस्कृति महोत्सवस, स्थानीय महिला उद्यमशीलता प्रबद्र्धनया नितिं बुबहाल मेला व मोहनि मेलाय् नं भूमिका म्हितूगु खः ।
