Display Style:
Column Style
फरक अभिव्यक्तिया १५क्वःगु चिबाखं मुँज्या
लहनान्युज | सिल्लागा अष्टमी ११४०
‘सः छगू फरक अभिव्यक्ति’या ग्वसालय् १५क्वःगु चिबाखं मुँज्या यलय् जुल ।
ज्याझ्वलय् नःलि बज्राचार्य, काशीराम विरस, रामगोपाल आशुतोष स्वम्हेसिनं म्हतिं न्यापु न्यापु यानाः मुक्कं १५पु बाखं ब्वनाः न्यंकादीगु खः ।
ज्याझ्वलय ब्वति काःपिं मध्ये छम्हसित गोलाप्रथां ल्यःम्ह रुणित बज्राचार्य व स्वम्ह च्वमिपिन्त मतिनाया चिं सुधीर ख्वविं लःल्हानादिल ।
अथे हे मोक्षबहादुर अमात्यं स्वम्हं च्वमिपिन्त खादां क्वखाय्काः दां नं लःल्हानादीगु खः ।
ज्याझ्वलय् ब्वनादीगु बाखंयात कयाः साहित्यकार डा. पु्ष्पराज राजकर्णिकारं कुलादीगु खः ।
ज्याझ्वः समाश्रीं न्ह्याकादीगु खः ।
आर्थिक बिट स्वइपिं पत्रकारतलिसे अन्तक्र्रिया
नृपेन्द्रलाल श्रेष्ठ | सिल्लागा अष्टमी ११४०
प्रेस काउन्सिल नेपालया ग्वसाः व नेपाल आर्थिक पत्रकार समाज (सेजन)या संयोजनय् छगू अन्तरक्रिया ज्याझ्वः जुल ।
ज्याझ्वलय् प्रेस काउन्सिल नेपालया दुजःलिसें वरिष्ठ पत्रकार गोपाल बुढाथोकीं मिडियाय् मालिक हस्तक्षे अप्वया वनाच्वंगु, सम्पादकीय स्वतन्त्रतायात कयाः प्रहार जूगु धासें वाइडबडी, सेनाया जहाज खरिद प्रकरणथें जाःगु ततःधंगु इस्यू पिहां वय् मफूगु धयादिल ।
अर्थविज्ञ डा. गोविन्द बहादुर थापां पत्रकारतसें करियर दय्केगु खःसा आग्रह÷पूर्वाग्रह मदुगु समाचार सम्प्रेषण याय्माःगु, संघसंस्था बीगु व्यक्तिगत सिरपाः काय्गु स्वयां संस्थागत उपयुक्त जुइगु न्ह्यथनादिसें अर्थसम्बन्धि ज्यापौ न्ह्यब्वयादिल ।
ज्याझ्वलय् सेजनका पूर्व नायः गोकर्ण अवस्थी, सेजनया नायः भीम गौतम, प्रेस काउन्सिल नेपालया प्रमुख प्रशासकीय अधिकृत झबिन्द्र भुसाल, पत्रकार नवराज चालिसे, पत्रकार अनुज ढुङ्गेल, प्रेस काउन्सिलया दुजः चेतनाथ धमला, पत्रकार विज्ञान अधिकारी, कुबेर चालिसें आर्थिक पत्रकारिताया प्रवृति, अवस्था व हाथ्याःयात कयाः थःथःगु बिचाः न्ह्यब्वयादीगु खः ।
सक्वय् ब्लड डोनर्सया शंखरापुर समिति
लहनान्युज | सिल्लागा अष्टमी ११४०
सक्वय् ब्लड डोनर्स एशोसियसन नेपाल येँ जिल्लाया शंखरापुरय् छगू समिति नीस्वन ।
ब्लड डोनर्स एशोसिएसन, येँ जिल्लाया पुलांम्ह दुजः गौरीनाथ श्रेष्ठया अध्यक्षताय् नीस्वंगु उगु समितिया न्वकुलिइ नवराज श्रेष्ठ, छ्याञ्जेय् सरोज कुँइकेल, दांभरिइ भिन्तुना मल्ल, ल्यू छ्याञ्जेय् सरोज श्रेष्ठ च्वनादीगु दुसा दुजःकथं रमेश कार्की, ईश्वर कार्की, जगदिशमान श्रेष्ठ, पवनलाल श्रेष्ठ, किचः सिं ज्यापु, रुपेशलाल श्रेष्ठ, सत्यनारायण श्रेष्ठ व अमृत श्रेष्ठपिं च्वनादीगु खः ।
ज्याझ्वलय् शंखरापुर नगरपालिका वडा ल्याः ७या वडाध्यक्ष बिष्णुप्रसाद श्रेष्ठ मूपाहाँकथं झायादीगु खःसा पाहाँकथं वडा ल्याः ६या वडाध्यक्ष राधाकृष्ण श्रेष्ठ, वडा ल्याः ८या हितमान तामाङ, ब्लड डोनर्स एशोसिएसन केन्द्रीय दुजः व येँ जिल्लाया इन्चार्ज किशोरराज वन्त, येँ जिल्ला केन्द्रीय दुजः बालकृष्ण श्रेष्ठ व येँ जिल्लाया ब्लड डोनर्स एशोसिएसनया जिल्ला सचिव अनिलरत्न तुलाधरपिं झायादीगु खः ।
थीथी ज्याझ्वः यानाः कण्डम दिवस हन
पुर्णिामा शाक्य | सिल्लागा पञ्चमी ११४०
फेब्रुअरी १३, अन्तराष्ट्रिय कण्डम दिवस नेपालय् नं थीथी ज्याझ्वः यानाः हंगु दु ।
थ्व हे झ्वलय् वीर अस्पतालया ए.आर.टी. सेन्टरपाखें नं ज्याझ्वः याःगु दु । ए.एच.एफ. नेपालया ग्वाहालि जूगु ऊगु ज्याझ्वलय्, डा. सुशील कुमार शाक्यं कण्डम बिषयस प्रस्तुतिकरण न्ह्यब्वयादिल ।
उगु हे ज्याझ्वलय् कण्डम पुईगु धें धें बल्लाः कासा नं जूगु खः । धें धें बल्लाः कासाय् मिसापिं सहभागिपिंपाखें छसिंकथं बिनिता तामाङ्ग, आस्ना तण्डुकार व अशनी डंगोल न्हाप, ल्यू व लियांल्यू लाःगु खः ।
व हे कथं, मिजं सहभागिपिंपाखें कालु सिं ठकुरी न्हाप, डा. बिकल लामिछाने ल्यू व डा. सर्जन श्रेष्ठ लियांल्यू ल्यू लाःगु खः।
त्याकामिपिन्त वीर अस्पतालया निर्देशक डा. केदार प्रशाद सेञ्चुरीं लुमन्ति चिं व सिरपाः लःल्हानादिल । अथे हे सहभागिपिन्त व पाहाँपिन्त ए.एच.एफ. नेपालया मेडिकल एड्भाईजर डा. उन्नत श्रेष्ठं मतिनाया चिं लःल्हानादीगु खः।
वीर अस्पतालया निर्देशक डा. केदार सेञचुरी, प्रमुख नर्सिङ् प्रशासक प्रा. गोमादेबि श्रेष्ठ, राष्ट्रिय ट्रमा सेन्टरया मेडिकल सुपरिटेण्डेण्ट डा. प्रमोद कुमार यादब व नर्सिङ् प्रशाशक सोचना सापकोटाया उपस्थिती दुगु ज्याझ्वः पूर्णिमा शाक्यं न्ह्याकूगु खः।
येँ महानगर दुने बहन्हि सार्वजनिक यातायात सञ्चालन याइगु
नृपेन्द्रलाल श्रेष्ठ | सिल्लागा तृतिया ११४० (फ्रेअवरी १२ २०२०)
येँ महानगरपालिका दुने आ बहन्हि यातायात सञ्चालन जुइगु दु । सहरी यातायात सेवायात थप प्रभावकारी दयेकेत व नेपाल भ्रमण दँ २०२० या लसताय् नेपाः चाःह्यु वइपि विदेशी पाहापिन्त तक अपुइकेगु कथं येँ महानगरपालिका दुने बहन्हिया सार्वजनिक यातायात सञ्चालन यायेत्यःगु खः ।
थौं येँ महानगरपालिकाया मेयर विद्यासुन्दर शाक्यं थीथी सरोकारवाला निकाय नाप सहलय याःगु खः । वःगु २०६९ साल भदौ १ गतेनिसे येँ महानगरपालिकां आर्थिक अनुदानपाखे बहन्हिया
सार्वजनिक यातायात सञ्चालन याउगु खःसा करीब १८ महिना सञ्चालन लिपा महासंघं सेवा बन्द याउगु खः।
मेयर शाक्यं स्थानीय तहय् जनप्रतिनिधि वये धुका बहन्हि सेवायात थप सहज यायेत दीर्घकालिन रुपं सार्वजनिक यातायात सञ्चालन यायेगु विषयय् सरोकारवाला नाप छलफल याउगु धका जानकारी बियादिगु खः ।
मेयर शाक्यं थ्व हे वइगु चैत्र १ गतेनिसे वा बैसाखनिसे न्हापागु चरणय् बहनि ८ ताः इलय् निसे ११ ताः इलय् सेवा सुरु जुइगु छगु कार्यदलया गठन याना न्ह्यने वनेगु प्रतिवद्धता प्वकादिगु दु ।
‘महानगरपालिकां थ्व स्वया न्ह्यः नमूनाया रुपं टुँनिख्यलय् ‘पिक एण्ड ड्रप’ सुरु याउगु खः । सुरुइ भचा जुसा आलोचना जुसा आः वया थुकेगु प्रभाव सकारात्मकय् वःगु दु धका’ मेयर शाक्यं धयादिगु दु
मेयर शाक्यं सुरुइ व्यवस्थापनया लागि माःगु दक्को पूरा यायेत महानगरपालिका तयार दु धयादिसे दीर्घकालिन सेवा बिइगु लागि योजना दयेका हयेत नेपाल यातायात व्यवसायी राष्ट्रिय महासंघयात आग्रह यानादिगु दु । ‘न्हापा थे छु ई न्ह्याका बन्द मयासे दीर्घकालिन सेवा न्ह्याकेगु योजना दयका हःगु अवस्थाय् महानगर ग्वाहालि यायेत तयार दु’ धका धयादिगु खः ।
मेयर शाक्यं रत्नपार्कयात केन्द्रित याना जःलाखः नगरपालिका व यल, ख्वप तक सेवा यायेगु कथं १५ गु रुट दयेका सेवा बिइगु धयादिसे सुरुइ ६० गः वस न्हिया न्हिथ सञ्चालन यायेु धका न धयादिगु खः ।
