Display Style:
Column Style
सांसदतपाखें चाबही–सक्व सतकखण्डया अवलोकन
लहना न्यूज | ने.सं. ११३९ गुंलागा अष्टमि (२३ अगष्ट, २०१९), शुक्रवाः
चाबही–सक्व सतकखण्डया अवस्था थुइकेत सांसदतसें थौं शुक्रवाः अवलोकन यानादीगु दु ।
प्रतिनिधिसभा, विकास तथा प्रविधि समितिया सभापति, दुजः व सतक आयोजनाया कर्मचारीलिसेया पुचलं चाबही, जोरपाटी जूसें सक्वतक थ्यनीगु सतकया अवलोकन यानादीगु खः ।
समितिया सभापति कल्याणीकुमारी खड्कां सतकया मर्मत नापं थुने ल्यंदनीगु छेँया अवलोकन यानादिसें ज्या याकनं क्वचायेकेत निर्देशन बियादिल । वय्कलं महानगरीय बृत्त बौद्धया भवन न्ह्यःनेया छुं छुं सरचना थुनेत तकं निर्देशन बियादिल ।
वि.सं. २०७२ सालय् निदँ दुने चाबही–सक्व सतकखण्ड विस्ताराय ज्या क्वचायेकेगुकथं सतक दयेकेगु ज्या न्ह्याकूगु खः । सतक दयेकेगु ई क्वचायेधुंकाः नं अझ तकं बच्छि ज्या हे क्वचाःगु मदुनि ।
सरकारं चाबहीनिसें सक्वतक २२गू मिटर ब्याः प्यंगू लेनया सतक दयेकेगु ग्वसाः ग्वःगु खः । काठमाण्डौं उपत्यका सतक विस्तार आयोजनां २०७२ जेठय् सतक दयेकेगु नितिं बोलपत्र आह्वान यानाः उगु हे सालय् असोजय् प्यंगू निर्माण व्यवसायीयात ठेक्क ब्यूगु खः ।
मुक्कं ११.४६ किलोमीटर दुगु उगु सतकखण्डय् प्यंगू कम्पनीं इलय् हे दयेके मफयेवं मेगु छगू कम्पनी यानाः न्यागू ठेकेदार कम्पनीं सतक विस्तार यानाच्वंगु दु ।
सक्व नृसिह जात्रा तःजिकः हन
लहनान्युज | गुंलागा सप्तमी ११३९ (अगष्ट २२ २०१९)
गुँपुन्हया लसताय् सक्वय् नृसिह जात्रा तःजिकः न्ह्याकगु दु । थुगु जात्रा साःखा त्वाया बलंपुलि सुरु जुगु खःसा सक्वया माघं धलं दंकिम्ह बाज्या हे नृसिह द्यःजुया बिज्याइकिगु तःजि लजि कथं सुधन राज उपाध्यायजु खः ।
न्ह्यःन्ह्यः प्रल्हादं ज्वःज्वःलपा याना (नमस्कार) सक्व देय् न्यंक लिखतं पला छिना देय् चाह्य खः । थुगु नृसिह द्यःसक्वया बलंपुलि नं पिहाबिज्याका साःखा त्वाः,चलाखु त्वाः शन्त्वाः, वःसिमा क्व ,ईपा त्वा,इल्ला त्वाः,पुखुछाछि, धुल्ला त्वाःजुया या बलंपुलि थ्यंका जात्रा क्वचाकिगु खः।
जात्रा या झ्वलय् देशवारं किपु छाना नृसिह व प्रल्हादयात पुजा याइगु खः । नृसिहया जवं खवं लक्ष्मी व सरस्वति निम्ह नं पासा दइसा नृसिहया ल्युने हिरण्या व हिरण्यकश्यप दैत्य निम्ह नृसिह या कम्मरे खिपतं हिना दैत्य पिन्त लुया यंकिगु लु स्वय दैगु खः।
गम्ह दैत्य पिन्त मस्तयत भागियात धाःसा अरिं चाइगु , ग्याइगु व सिकं बिगु ल्वचं मुक्त जुइ धैगु बिस्वास याइगु खः । सक्व च्वपिं न्हिच्छी ध्यालाना तुफिं बँ पुइगु पुजा यायेगु धौ सगं व्हलेगु याना झ्वःझ्वः छुना छाना नृसिह द्यःया न्ह्यः न्ह्यः वनिसा ल्युने नारायण भजन मण्दल म्ये हाला वनिगु चलन दु ।
लँय सकसितं द्यः या प्रसाद धका सगं इना बिगु चलन न दु । नापं देय् चाहिला क्वचाय् वं बलं पुलि प्रसाद इनेगु ज्याः याइगु खः
नेपाल–भारतया निन्हुयंकया मंकाः आयोगया न्याक्वःगु मुँज्या क्वचाल
लहना न्यूज | ने.सं. ११३९ गुंलागा सप्तमि (२२ अगष्ट, २०१९), विहिवाः
पारस्परिक साझेदारी व सहकार्ययात निरन्तरता बीगु सहमति प्वंकूसें नेपाल–भारत मंकाः आयोगया न्याक्वःगु मुँज्या क्वचाःगु दु ।
परराष्ट्रमन्त्री प्रदीपकुमार ज्ञवाली व भारतया विदेशमन्त्री सुब्रमण्यम जयशंकरया सहअध्यक्षताय् जूगु मुँज्याय् निगुलिं पक्षं नेपाल–भारत सम्बन्धया फुक्क पक्षया समीक्षा यायेगुलिसें सम्पर्क सञ्जाल विस्तार, आर्थिक साझेदारी, व्यापार व पारवहन, उर्जा जलश्रोतया नापनापं संस्कृति व शिक्षाय् केन्द्रित जुयाः सहलह जूगु खः ।
परराष्ट्र मन्त्रालयकथं मुँज्याय् सन् १९५० मैत्री व शान्ति सन्धीया पुनरावलोकन व नेपाल–भारत सम्बन्धय् प्रबुद्ध ब्यक्ति पुचः (इपिजी)या प्रतिवेदन लःल्हाना कायेगु खँय् सहलह जूगु खः । भारतीय पक्षं इपिजीया प्रतिवेदन आःतक लःल्हाना काःगु मदुनि ।
वंगु निदँय् निगुलिं देसपाखें जूगु उच्चस्तरीय भ्रमणलिपा नेपाल–भारत सम्बन्धय् फुक्क पक्षं गति काःगुलिं मंकाः आयोगं लसता प्वंकूगु दु ।
मुँज्याय् अन्तर्राष्ट्रिय, क्षेत्रीय व उपक्षेत्रीय मञ्चय् निगू देस दथुइ ग्वाहालि कालबिल यायेगु खँय् नं दुग्यंक सहलह जूगु खः ।
मोतिहारी–अम्लेखगञ्ज पेट्रोलियम पदार्थया पाइपलाइन, हुलाकी राजमार्गया प्यंगू खण्ड दयेकेगु ज्याय् जूगु प्रगति, भुखाय् लिपा नक्वाः व गोरखा जिल्लाया सर्वसाधारणया आवास दयेकेगु ज्या क्वचाःगुलिं आयोगया मुँज्याय् लसता प्वंकल ।
नापं मुँज्याय् जयनगर–जनकपुर, जोगवनी–विराटनगर, सीमा पार रेल परियोजना व विराटनगरय् एकीकृत जाँच चौकी दयेकेगु ज्या जूगु उपलब्धिया समीक्षा तकं जूगु खः ।
भारतया ग्वाहालिइ नेपालय् न्ह्यानाच्वंगु विकास निर्माणया परियोजनायात तीब्र गतिइ न्ह्यःने यंकेत निगुलिं देसं सहमति प्वंकूगु दु ।
प्रधानमन्त्री केपी शर्मा ओलीया सन् २०१८या भारत भ्रमणया इलय् रक्सौल–येँ विद्युतीय रेल लाइन, आन्तरिक जलमार्ग व कृषि ख्यलय् साझेदारी यायेगु खँय् जूगु न्हूगु सहमति व उकी जुयाच्वंगु प्रगतियात कयाः आयोगं सन्तुष्टि प्वंकूगु दु ।
निगुलिं देसं व्यापार पारवहन व रेल सेवा सम्बन्धी सन्धी सम्झौतायात याकनं निष्कर्षय् थ्यंकेत सहमति प्वंकूगु दु । निगुलिं देस दथुइ मू सीमा नाकाय् व्यापार व पारवहनयात अःपुकीगु भौतिक पूर्वाधारया भिंकेज्यालिसें स्तरोत्रति यायेत निगुलिं देस सहमत जूगु दु ।
सीमा क्षेत्रय् दुपिं जनताया नितिं डुबान छगू गम्भीर समस्याकथं जुयाच्वंगु स्वीकार यासें मंकाः आयोगं लःया प्राकृतिक बहाबय् पंगः व माःकथंया निकासया व्यवस्था मजूगुलिं डुबान समस्यायात सम्बोधन यायेमाःगु खँय् बः ब्यूगु दु । नेपाल–भारत सीमा क्षेत्रया डुबान प्रभावित भेगय् निगुलिं देसया मंकाः प्राविधिक पुचलं ब्यूगु सुझाव कार्यान्वयन यायेत निगुलिं देस सहमत जूगु दु ।
निगुलिं देसया परराष्ट्रमन्त्रीं सामाजिक व आर्थिक विकासया नितिं पर्यटनया महत्वय् बः ब्यूसें नेपाल भ्रमण वर्ष २०२०यात ताःलाकेत नापं पर्यटन ख्यलय् ग्वाहालिया स्तर अभिबृद्धि यायेत सहमति क्यंगु दु ।
नेपाःया इनापय् अतिरिक्त हवाई प्रवेश उपलब्ध याकेत भारतलिसे नेपाल सरकारं याःगु इनापकथं निगू देसया नागरिक उड्डयन प्राधिकरण दथुइ सहलह न्ह्यानाच्वंगुलिं उकिं बांलाःगु लिच्वः पिहांवइगु विश्वास निगुलिं देसं याःगु दु ।
वासः यायेत प्रधानमन्त्री हाकनं सिङ्गापुर वन
लहना न्यूज | ने.सं. ११३९ गुंलागा सप्तमि (२२ अगष्ट। २०१९), विहिवाः
प्रधानमन्त्री केपी शर्मा ओली सिंगापुरं लिहां वःगु छवाःत्या लिपा हाकनं थौं विहिवाः वासः यायेगु नितिं सिङ्गापुर झायादीगु दु । वय्कलं थःगु स्वास्थ्यय् यक्व समस्या मदु धयादीसां लच्छिया दुने निक्वःखुसी वय्कः वासः यायेगु नितिं सिङ्गापुर झायादीगु खः । वय्कः भदौ २० गते नेपाः लिहां वइगु धाःगु दु ।
झिंनिदँ न्ह्यः जलास्येँ प्रत्यारोपण यानादीम्ह प्रधानमन्त्री ओली वंगु साउन १८ गते सिङ्गापुर वनाः २७ गते लिहां झायादीगु खः । अन च्वनाच्वंगु इलय् छ्यलाच्वनादीगु वासःया मात्रा ह्यूगु व उकीयात कयाः फलोअपया नितिं उखे झायादीगु जानकारी ब्यूगु दु ।
प्रधानमन्त्री ओलीं म्हीगः मंगलवाः सर्वदलीय मुँज्याय् मेमेगु दलया शीर्ष नेतातय्त छगू वासःया डोज तनेगु वा मिले याय्माःगु जूगुलिं उखे वनेत्यनागु व्रिफिङ्ग यानादीगु खः ।
वय्कलं म्हिगः बुधवाः ग्वसाः ग्वःगु ज्याझ्वलय् संविधान दिवस न्ह्यः हे वयेगु धयादीगु खः । वय्कः भाद्र २० गते नेपाः लिहां वयेगु ज्याझ्वः दुगु जानकारी बियादीगु खः ।
मेलमिलाप आधारभूत क्वचाल
नृपेन्द्रलाल श्रेष्ठ | गुंलागा सप्तमी ११३९ (अगष्ट २२ २०१९)
येँ महानगरपालिकाया ग्वसालय् येँया राष्ट्रिय सभागृहया हलय् छगू मेलमिलाप आधारभूत प्रशिक्षणय् ज्याझ्वलय् तालिम काःपिन्त दसिपौ बिइगु ज्याझ्वः जुगु दु ।
उगु ज्याझ्वलय् महानगरपालिकाया येँया १ वडानिसें ३२ वडा तकया निम्ह निम्ह प्रतिनिधिपिं व येँ महानगरपालिकाया प्रतिनिधिपिं यानाः मुक्कं सच्छि व झिंस्वम्हेसिन उगु प्रशिक्षणय् ब्वति काःगु खः ।
ज्याझ्वलय् प्रशिक्षण काःपिन्त येँ महानगरपालिकाया मेयर विद्यासुन्दर शाक्यं सपथग्रहण याकादिगु खः ।
उगु ज्याझ्वलय् मूपाँहा कथं सर्वोच्च अदालतया न्यायाधीश व मेलमिलाप परिषदया नायः ईश्वरी प्रसाद खतिवडा झायादीगु खः। ज्याझ्वलय् बसन्त आचार्यं च्वयातःगु ‘मेलमिलाप’ नांया सफू
सार्वजनिक याःगु खः ।
महानगरपालिकाया मेयर विद्यासुन्दर शाक्य, उपमेयर हरिप्रभा खड्गी श्रेष्ठ, कानूनविद् व जनप्रतिनिधिपिं नं उपस्थित जूगु उगु ज्याझ्वलय् मेलमिलाप आधारभूत प्रशिक्षणय् प्रशिक्षण बियादीपिं प्रशिक्षकपिन्त सुभाय् पौ लःल्हानाः नं सम्मान याःगु खः ।
