Display Style:
Column Style
वाङमय शताब्दी पुरुष डा. जोशीया किपा दुगु वहःया पाँय्म्वः विमोचन
लहना न्यूज | ने.सं. ११३९ ञलांथ्व द्वादशि (१० सेप्टेम्बर, २०१९), मंगलवाः
वाङमय शताब्दी पुरूष नापं वरिष्ठ संस्कृतिविद् डा. सत्यमोहन जोशीया किपाः दुगु वहःया पाँय्म्वः विमोचन जूगु दु ।
थौं मंगलवाः यल महानगरपालिकाय् ग्वसाः ग्वःगु छगू ज्याझ्वःया दथुइ अर्थमन्त्री डा. युवराज खतिवडां उगु वहःया पाँय्म्वः विमोचन यानादीगु खः ।
नेपाल सरकारया स्वीकृतिइ नेपाल राष्ट्र बैंक, टक्सार महाशाखां नीन्यासः तकाया वहःया पाँय्म्वः, द्वःछि तकाया वहःया पाँय्म्वः व सच्छि तकाया डा. सत्यमोहन जोशीया किपा दुगु वहःया पाँय्म्वः पिथंगु खः ।
महानगरपालिकाया प्रमुख चिरीबाबु महर्जनं डा. जोशीया किपाः दुगु उगु पाँय्म्वः नीन्यासःतकाया २५द्वः गः, द्वःछि तकाया २५द्वः गः व सच्छि तकााय १०द्वः गः नेपाल राष्ट्र बैंक मुद्रा व्यवस्थापन विभाग टक्सार महाशाखापाखें पिथंगु जानकारी बियादिल ।
वाङमय शताब्दी पुरुष डा. जोशी जीवित इतिहास जूगुलिं वय्कःया किपाः दुगु पाँय्म्वःयात स्मारिकाकथं न्ह्याबलें कदर यानातयेगु प्रमुख महर्जनं जानकारी बियादिल । वय्कलं धयादिल, ‘उगु स्वंगू ताजिया पाँय्म्वःयात याकनं हे नेपाःन्यंक प्रचारप्रसार यायेगु तातुना महानगरपालिकाया दु ।’
ज्याझ्वलय् अर्थमन्त्री डा. युवराज खतिवडा, उप–प्रमुख गीता सत्याल, राष्ट्र बैंकया प्रवक्ता लक्ष्मी प्रपत्र निरौलालिसें सांसदपिनिगु ब्वति दुगु खः ।
लिपि गुथिया न्हूधाः, नायः निरञ्जन हे
उदेन न्हूसाय्मि | ने.सं. ११३९ ञलाथ्व नवमि (७ सेप्टेम्बर, २०१९), सञ्चरवाः
नेपाल लिपिया प्रचार प्रसार व प्रवद्र्धन यायेगु ल्याखं नीस्वनातःगु नेपाल लिपि गुथिया झिंन्हय्क्वःगु तःमुँज्या थौं शनिवाः जुल ।
गुथिया थःगु हे भवन साःननि, त्यःरय् जूगु दँमुँज्या गुथिया नायः निरञ्जन तबःया सभाध्यक्षताय् जूगु खः । उगु तःमुँज्याय् छ्याञ्जे पवित्र कसाः नं दच्छियंकं जूगु ज्याझ्वःया प्रगति प्रतिवेदन न्ह्यब्वयादीगु खःसा व दांभरिं उत्तम साय्मिं वंगु आर्थिक दंया द्याःत्याः ल्याः न्ह्यब्वयादीगु खः ।
न्हापांगु सत्र क्वचायेवं निगूगु सत्रं गुथिया न्हूगु ज्यासना पुचःया ल्यज्या याःगु खः । न्हूगु ज्यासना पुचः ल्ययेगु निंतिं अधिवक्ता किरण शाक्य संयोजक व गुथिया प्राज्ञपिं प्रज्ञामान शाक्य व राजेन्द्र शाक्य दुजः जुयादीगु निर्वाचन कमिटी नीस्वंगु खः ।
न्हूगु ज्यासना पुचःया पदाधिकारीइ पुलांगुयात हे कायम याःगु खः । थ्व ल्याखं वइगु निदँया कार्यकालया निंतिं न्हूगु ज्यासना पुचलय् निरञ्जन तबः नायः, अनिल स्थापित न्वकू, पवित्र कसाः छ्याञ्जे, उत्तम साय्मि दांभरिइ सर्वसम्मतिं ल्यःगु दुसा मू दुजलय् रमेशमान पिया, कमलतारा तुलाधर, विक्कि वज्राचार्य, लुमिन ताम्राकार, जगत पात्या, विमला मानन्धर व उदेन न्हूसाय्मियात सर्वसम्मतिं ल्यःगु खः ।
न्हापांगु सत्रय् लसकुस यासें गुथिया न्वकू अनिल स्थापितं गुथिं याना वयाच्वंगु थीथी ज्याझ्वः नापं वइगु दिनय् नेपाल लिपिया प्रचार प्रसार व प्रवद्र्धनया निंतिं न्ह्याकेगु ज्याझ्वःयात कयाः जानकारी बियादीगु खः ।
अथे हे न्हूगु ज्यासना पुचलय् निर्वाचित जुयादीम्ह नायः तबःनं याकनं गुथिया विधान यायेगु जानकारी बियादिसें वइगु कार्यकालय् नेपाल लिपिया प्रचार प्रसार व प्रवद्र्धनया अझ सशक्तकथं न्हू न्हूगु ज्याझ्वःत हयेगु नं जानकारी बियादिल ।
प्रधानमन्त्री ओली कन्हय् नेपाः लिहां झायादीगु
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
प्रधानमन्त्री केपी शर्मा ओली निवाः ताःहाकः स्वास्थ्य उपचारलिपा कन्हय् शुक्रवाः न्हिनय् नेपाः लिहां झायादीगु जूगु दु ।
प्लाज्मा फेरेसि प्रकृयापाखें म्हय् दुगु एण्टीबडीया उपचारलिपा प्रधानमन्त्री ओली स्वस्थ जूगु वय्कःया सचिवालयं न्ह्यथंगु दु ।
न्हय्गूगु चरणया उपचार प्रकृया म्हिगः बुधवाः क्वचायेधुंकाः प्रधानमन्त्री छन्हु आराम यानाः कन्हय् शुक्रवाः लिहां झायादीत्यंगु खः । प्रधानमन्त्रीलिसें सिंगापुर झायादीपिं मूख्य सल्लाहकार विष्णु रिमाल व निजी चिकित्सक दिव्या सिंह शाह येँय् लिहां झायादीधुंकूगु दु ।
प्रधानमन्त्री ओलीयात नापलायेत सिंगापुर थ्यंकादीम्ह नेपाल कम्यूनिष्ट पार्टीया उपाध्यक्ष बामदेव गौतम व महासचिव विष्णु पौडेल नं कन्हय् शुक्रवाः हे येँय् लिहां झायादी ।
प्रधानमन्त्रीया उसाँय्यात कयाः जानकारी काय्त झायादीपिं नेतातलिसे पार्टीया आन्तरिक विषयस ओलीं ताउत हे सहलह यानादीगु धाःगु दु ।
कृषि मन्त्री खनालयात डेंगु ल्वय् जुल
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
कृषि तथा पशुपंक्षी विकासमन्त्री चक्रपाणी खनालयात डेंगु ल्वचं कयाः अस्पताल भर्ना जुयादीगु दु ।
मन्त्री खनालयात म्हिगः बुधबार न्हिनय् निसें धापासीइ च्वंगु ग्राण्डी अस्पतालय् भर्ना याःगु वय्कःया प्रेस संयोजक बोमलाल गिरीं धयादीगु दु ।
मन्त्री खनालयात वंगु मंगलवाः ज्वरो वयेधुंकाः निदान अस्पतालय् वासः यायेगु नितिं थ्यंकादीगु खः । अन डेंगुया शंका यायेवं म्हिगः बुधवाः टेकूइ च्वंगु शुक्रराज ट्रपिकल तथा सरुवा रोग अस्पताल छ्वःगु खः । गिरीं धयादिल, ‘अस्पतालं नं डेंगु हे धाःगु दु । तर आत्ते चायेमाःगु अवस्था धाःसा मदु ।’
अस्पतालया उच्च स्रोतकथं मन्त्री खनालयात डेंगु हे ल्वचं कःगु खनेदुगु खः । ग्राण्डी अस्पताल स्रोतकथं खनालया शारीरिक परीक्षण यायेधुंकाः वःगु रिपोर्टय् डेंगु हे जूगु लूगु खः ।
जम्मु कस्मिरया घटना भारतया आन्तरिक मामिला : परराष्ट्रमन्त्री ज्ञवाली
लहना न्यूज | ने.सं. ११३९ ञलाथ्व षष्ठि (४ सेप्टेम्बर, २०१९), बुधवाः
परराष्ट्र मन्त्री प्रदीप ज्ञवालीं भारत सरकारं जम्मु कस्मिरयात विशेष मान्यता खारेज यायेगु खँ भारतया आन्तरिक मामिला जूगु धयादीगु दु ।
इण्डियन ओशन कन्फ्रेन्सय् ब्वति कायेत माल्दिभ्स थ्यंकादीम्ह मन्त्री ज्ञवालीं भारतीय सञ्चार माध्यम एएनआईलिसे खँल्हाबँल्हा यायेगु झ्वलय् मन्त्री ज्ञवाली उगु खँ धयादीगु खः । वय्कलं जम्मु व कस्मिर भारतया आन्तरिक मामिला जूगुलिं उकियात कयाः छुं नं न्ववायेगु पाय्छि मजूगु धयादिल । मन्त्री ज्ञवालीं कस्मिरय् दुपिं नेपाःमिपिनिगु सुरक्षायात कयाः चिन्ता नं प्वंकादिल ।
ज्ञवालीं दक्षिण एशियाली क्षेत्रीय सहयोग संगठन (सार्क)या प्रमुखया ल्याखं भारत व पाकिस्तानय् जुयाच्वंगु तनावयात सहलहपाखें ज्यंकेत तकं सुझाव बियादिल ।
भारतं वंगु अगष्ट ५य् जम्मु कस्मिरयात विशेष मान्यता बियाच्वंगु संविधानया धारा ३७० खारेज याःगु खः । व लिपा निगू आणविक शक्ति देय् भारत व पाकिस्तान दथुइ तनाव ब्वलंगु खः । थ्व हे झ्वलय् निगुलिं देसं नेपाःयात थःथःगु पक्षय् न्ववायेत इनाप याःगु खः ।
नेपाल भ्रमणय् झायादीम्ह भारतीय विदेशमन्त्री एस. जयशंकरं कस्मिर मामिलायात कयाः नेपाःया राजनीतिक नेतृत्वयात जानकारी बियादीगु खः । अथे हे, पाकिस्तानी विदेशमन्त्री मोहम्मद कुरेसीं नं ज्ञवालीयात टेलिफोन यानाः कस्मिरयात कयाः जानकारी याकादीगु खः । नेपालं धाःसा थ्व स्वयां न्ह्यः कस्मिर मामिलायात लिक्कं स्वयाच्वनागु धाःगु खः ।
