Display Style:
Column Style
भक्तराज रञ्जितया आत्मबृतान्त पिहावल
अमिरमैंया रंजित | सिल्लागा पंचमी ११४०
साहित्यकार भक्तराज रञ्जितया आत्मबृतान्त सफू ‘उक्लिएको मान्छे’ छगु ज्याझ्वः दथुइ बरिष्ठ पत्रकारपि भैरब रिसाल, टंक पन्त, समाजसेवी रामकृष्ण कर्माचार्य, सिर्जना ढकाल, कुमार रञ्जित, अमिर मैया रञ्जित, दिपक रञ्जित, भीम कुमारी रञ्जित, कृतिकार भक्त राज रञ्जितपिसं मंकाः कथं पितब्वज्या यानादिगु दु ।
गोरखापत्र संस्थानयात लक्ष्मी व सरस्वतीया रुपं स्वयादीम्ह च्वमि भक्तराज रञ्जितं गोरखापत्र संस्थानयात आधुनिकीकरण यायेगु झ्वलय् संस्थानय् जुइगु चुहावटयात चुनौतीपूर्ण ढंगं कजय् कयागु अनुभव कनादिल ।
समाजय् जुयाच्वंगु थीथी हताः, बेजाति इहिपास जुइगु विभेद, अति धनी व अति गरिबीया दथुया फरक ज्यंकाः गरिबी निमूल यायेत यायेमाःगु कुतःया विषययात कःघानाः च्वयातःगु सफूयात च्वछासे मूपाहाँ रिसालं कृत्रिम कथंया च्वछायेगु ज्या जुइमज्यूगु खँ कनादिना दिगु खः ।
च्वमि रञ्जितया आत्म बृतान्त व थःगु न्ह्यःगुपुस्ता तक्कया रञ्जित परिवार वंशावली दुथ्याःगु उगु सफूया समालोचना व समीक्षा कुमार रञ्जित, सरस्वती लक्ष्मी तुलाधर व अमिर मैया रञ्जितं यानादीगु खः ।
किपाः राजेन्द्र रंजित
लुति अजिमाया सतः पुनर्निर्माण
लहनान्युज | चिल्लागा तृतिया ११४०
येँ महानगरपालिकाया मेयर विद्यासुन्दर शाक्यं येँ कामपा १७ वडास्थित लुति अजिमा देगः लागाय् च्वंगु ताः हाकःगु सतःया शिलान्यास यानादिगु दु ।
लुतिइ जूगु उगू ज्याझ्वलय् मेयर शाक्य नाप उपमेयर हरिप्रभा खड्गी श्रेष्ठं सतःया जग स्वनादीगु खः । द्यःपाःलाः गुथि मातहत इन्द्रायणी परिसर गुरुयोजना निर्माण सहयोग तथा अनुगमन उपसमितिया ग्वसालय् उगु ज्याझ्वः जूगु खः ।
ज्याझ्वलय् न्ववासें सम्पदा न्ह्यागु हे वडाय् च्वंगु जूसां व सकस्यां मंकाः सम्पत्ति जुइ, उकिं अज्याःगु मंकाः सम्पत्ति पुनर्निर्माण यायेगु ज्याय् मनपा सक्रिय जुयाच्वंगु दु धयादिल । मनपां यानाच्वंगु ज्यायात ग्वाहालि याःथाय् ज्या सम्पन्न जूगु व विरोध याइथाय् ज्या पनाच्वंगु खँ कँसें मेयर शाक्यं धयादिल, ‘थःपिंसं ज्या छुं मयासे केवल महानगरपालिकां यानाच्वंगु ज्यायात आलोचना जक याइपिं छथ्वः सम्पदाप्रेमित नं थौंकन्हय् सक्रिय जुयाच्वंगु दु । वय्कःपिंत विरोध यायेगु त्वःताः थःगु थासं छु यायेफु व यानाः क्यनेत इनाप याना ।’
लिसें मेयर शाक्यं सम्पदा निर्माण यायेगु ज्याय् मनपाय् मेयर, उपमेयर लिसें सकलें वडाध्यक्षत छप्पँ दुगु कारणं थुमित विभाजित यानाः म्हितेगु बिचाः सुनानं मयाःसां जिउ धकाः नं ख्याच्वः बियादिल ।
बागमती प्रदेशया सांसद बसन्त मानन्धरं बिष्णुमति खुसि सफा यायेगु खःसा फोहोरयात तप्यंक खुसिइ वांछ्वयेगु ज्या दिकेमाः धासें थुखेपाखे जनचेतना ब्वलने मगाःनिगु खँ कनादिल ।
उपमेयर हरिप्रभा खड्गी श्रेष्ठं लुति अजिमाया लागाय् थ्व फल्चा जीर्ण जूगुलिं अन अन्तिम संस्कारया लागिं वइपिं मनूतय्त तसकं सास्ति जुयाच्वंगु खँ कँसें थुकिं यानाः आः सहज जुइगु बिचाः तयादिल ।
कामपा कार्यपालिकाया दुजः प्रेम पुजारीया सभापतित्वय् जूगु उगु ज्याझ्वलय् १७ वडाया वडा अध्यक्ष नविन मानन्धर, छत्रपाटी निःशुल्क चिकित्सालय (अस्पताल) या उपाध्यक्ष कुमार मानन्धर आदिपिंसं नं न्ववानादीगु खः ।
१ करोड १७ लाख ४ हजार १७९ तकाया लागत खर्चं दयेकेत्यंगु थ्व सतः २०७७ सालया मंसिरं सिधयेकेगु ताः तयातःगु दु ।
सुबहाल मां पुचःया उद्घोषण तालिम क्वचाल
सुरज, लहनान्युज | चिल्लाथ्व दशमी ११४० (मार्च ५ २०२०)
ललितपुर महानगरपालिका, वडा नं. ८ सुबहालय् १५ न्हुया उद्घोषण तालिम क्वचाःगु दु । सुबहाल मां पुचःया ग्वसालय् थीथी ज्याझ्वः न्ह्याकेत व नुगःखँ तयेगु गुण विकासया नितिं थुगु तालिमया आयाोजना याःगु खः । ललितपुर महानगरपालिका वडा नं. ८ या ग्वाहालिइ जूगु थुगु तालिमय् ग्वसाः खलः सुबहाल मां पुचःनाप जयमनोहर महाविहार मिसा पुचः व सरस्वती मां पुचः, सःक्वया मयजुपिन्सं ब्वति कयादीगु खः । २५ म्हेसिनं ब्वति काःगु थुगु तालिमय् नेवाः पत्रकार राष्ट्रिय दबूया नायः, ज्याझ्वः न्ह्याकामिनापं संगीतकर्मी सुरजवीर बज्राचार्यं प्रशिक्षण बियादीगु खः ।
सुबहाल मां पुचःया नायः विजया महर्जनया नायःसुइ जूगु समापन ज्याझ्वःया मूपाहां लपुमनपा वडा नं. ८ या वडा अध्यक्ष हेम महर्जनं दसिपौ लःल्हासें थजाःगु तालिम व मेमेगु ज्याझ्वः निरन्तर यायेत इनाप यानादिल । तालिम व ज्याझ्वःया नितिं वडापाखें माःकथंंया ग्वाहालिया नितिं थः सदां तत्पर जुइ धयादिसें तालिमया उपलब्धिं थः उत्साहित जुयागु खँ मूपाहाँ वडा अध्यक्ष महर्जनं कनादिल । समापन समारोहय् विशेष पाहाँकथं सुबहालया आःजु दशलाल महर्जन झायादीगु खःसा पाहाँपिं महिला वडा सदस्य लक्ष्मी महर्जन, वडा सदस्य प्रकाश महर्जन, सुबहाल टोल विकास संख्याया वरिष्ठ उपाध्यक्ष बुद्धिमान महर्जन, सुबहाल युवा विकास परिवार संस्थाया उपाध्यक्ष दशराम महर्जन, जय मनोहर महाविहार मिसा पुचःया नायः पञ्चमाया शाक्य व प्रशिक्षक सुरजवीर बज्राचार्यं नं थःगु नुगःखँ तयादीगु खः ।
पुचःया छ्याञ्जे सुनीता महर्जनं न्ह्याकादीगु थुगु समापन समाराेहय् तालिम कयादीपिं केशरी महर्जन, निना महर्जन, सानुमैँया महर्जन, प्रनिता शाक्य, मिनु महर्जन, सरीता महर्जन, दुर्गा महर्जन, लक्ष्मी महर्जन, बेखामाया महर्जन, रत्नमाया महर्जनं थःथःगु अनुभव नुगःखँ तयादीगु खः । तालिमय् ब्वति कयादीम्ह सुबहाल मां पुचःया दांभरी निर्मला महर्जनं लसकुस यानादीगु थुगु ज्याझ्वलय् सुभाय् पुचःया निवर्तमान अध्यक्ष कुमारी महर्जनं बियादीगु खः । सुबहाल मां पुचःया नायः विजया महर्जनया नायःसुइ जूगु थुगु ज्याझ्वःपाखें थःपिं अतिकं उत्साहित जुयागु त्वाःया वासिन्दापिन्सं प्रतिक्रिया बियादीगु खः ।
राजोपाध्याय समाजपाखें महेश्वर जुजुयात सम्मान
विकाश | चिल्लाथ्व त्रयोदशी ११४०
राजोपाध्याय समाजं थःगु खुक्वःगु दँमुँज्याया झ्वलय् सँस्कृतिविद् महेश्वर जुजुयात हंगु दु । सनातन धर्म सँस्कृति, परम्पराया अध्ययन अनुसन्धानया ख्यलय् मदिक्क बियावःगु योगदानयात च्वछासें समाजं जुजुयात हंगु खः ।
व हे झ्वलय् कासाया माध्यमं राजोपाध्यायतय् नां देशय् लिसें विदेशय् तकं म्हसीकेत योगदान ब्यूगु धासें बास्केटबलया राष्ट्रिय कासामि सुब्रत राजोपाध्याययात नं हंगु खः ।
सम्मानित निम्हेसितं समाजया नायः अमरराज राजोपाध्यायं दोसल्लां न्ययेकादिल । नेवाः देय् दबूया नायः नरेश ताम्रकारं हनापौ लःल्हानादिल ।
नुगः खँ तयेगु झ्वलय् सँस्कृतिविद् जुजुं वैदिक सभ्यताया विकास जुइ स्वयां न्ह्यःयागु सभ्यता, सँस्कृतिया दुग्यंगु अध्ययन यायेमाःगु आवश्यकता न्ह्यथनादिल । पुलांगु धर्म, सँस्कृतिया अध्ययन व अनुसन्धान यानाः उकिया अभिलेखीकरण जुइमाःगु नं वयकलं धयादिल ।
अथे हे, मेम्ह सम्मानित बास्केटबल कासामि सुब्रत राजोपाध्यायं चायकं मचायकं थम्हं समाजया नां तयेगु नितिं छुं याना धइगु वाःचाःबलय् गर्व ताःगु धयादिल । ल्यायम्ह पुस्तायात कासा ख्यलय् न्ह्यःने यंकेत थम्हं फक्व ग्वाहालि यायेगु प्रतिवद्धता सुब्रतं प्वंकादिल ।
नेवाः देय् दबूया नायः नरेश ताम्रकारं सरकारं हाकनं गुठी विधेयक हयेगु तयारी न्हयाकेधुंकूगु धासें हाकनं थुकिया विरोधय् कुहांवयेगु नितिं तयार जुयाच्वनेत सकसितं आव्हान यानादिल ।
व हे ज्याझ्वलय् २०७५ सालया एसइइ परीक्षाय् ताःलाःपिं राजोपाध्याय विद्यार्थीतय्त नं सम्मानित याःगु खः ।
समाजया वार्षिक कार्य प्रगती प्रतिवेदन न्ह्यब्वसें समाजया मू छ्यान्जे बिराजकाजी राजोपाध्यायं समाजय् दुने सुलाच्वंपिं प्रतिभा मालेगु झ्वलय् थुगुसी गायन प्रतिभा मालेज्या न्ह्याःगु धयादिल । आकिवं हुलाप्याखंया प्रतिभा मालेगु उद्घोष मू छ्यान्जे राजोपाध्यायं यानादिल ।
दांभरिं जयन्ती शर्मा राजोपाध्यायं आर्थिक प्रतिवेदन न्ह्यब्वयादिल ।
समाजया निवर्तमान नायः वदन ज्वालानन्द राजोपाध्यायं वंगु फागुन १७ गते क्वचाःगु राजोपाध्याय गायन प्रतिभा मालेज्याया अडिसनय् ल्यज्याय् लाःपिनिगु नां नां सार्वजनिक यानादिल ।
समाजया नायः अमरराज राजोपाध्यायं समाजया वृहत्ततर विकासया लागिं न्ह्याबलें क्रियाशील जुयाच्वनेगु प्रतिवद्धता प्वंकादिल ।
ज्याझ्वलय् वैदिक प्रतिष्ठानया नायः उपेन्द्रभक्त सुवेदी, ज्यापु समाजया छ्यान्जे सरिता महर्जन, राजकर्णिकार समाजया नायः सुवर्णराज राजकर्णिकार, नेवाः पत्रकार राष्ट्रिय दबूया नायः सुरजबीर बज्राचार्य लिसें जातीय लिसें मेमेगु सामाजिक संघसंस्था व थीथी तगिंया सरकार दथुइया सहकार्यं समाजया विकास जुइफइगुलिइ बः ब्यूगु खः ।
स्वनिगःया द्यःब्रम्हू राजोपाध्यायतय्गु कुसा संगठनया रुपं राजोपाध्याय समाजया गठन २०६४ सालय् जूगु खः । समाजं दँय्दसं समाजयात थीथी कथं योगदान ब्यूपिं व्यक्तित्वयात हनावःगु दु ।
येँ महानगरं कोरोना भाइरस सम्वन्धि जनचेतना अभियान न्ह्याकल
सुरेन्द्रभक्त श्रेष्ठ | सिल्लाथ्व त्रयोदशी ११४०
चीनं सुरु जुगु कोरोना भाइरस (कोभिड–१९) या ल्वय् हलियकं महामारी जुयाच्वंगुलि नेपालय् न थुकिइगु भय् जुयावया च्वंगु दु ।
उगु भाइरसयात कया सामाजिक सञ्जालय् न थीथीमा कथं गलत सूचना प्रवाहित जुगुलि थुकेयाना अप्वो भय् मजुकेत येँ महानगरपालिकां छगु बृहत जनचेतना ज्याझ्वः याउगु दु ।
राष्ट्रियसभा गृहय् छगु ज्याझ्वः यासें येँ महानगरपालिकां कोरोना व डेंगे ल्वय्या महामारी संवन्धि बृहत जनचेतना ज्याझ्वलय् येँ महानगरपालिकाया मेयर विद्यासुन्दर शाक्यं ३२ गु वडाय् जनचेतना सम्वन्धि ज्याझ्वः न्ह्याकेगु जुइ धका धयादिगु खः । ‘कोरोना भाइरसया महामारीपाखे ग्यायेगु स्वया थुकियात गये याना व्यवस्थापन यायेगु ध्यान बिइ माः धका धयादिगु खः ।,’
मेयर शाक्यं, ‘सामाजिक सञ्जाल व छु छु मिडियाय् म्वाःगु हल्लाया याना मनूत ग्याना च्वंगु दु । सहि सूचना प्रवाह मजुलि आम नागरिकमय् ग्याचिकु जुयाच्वंगु दु धका धयादिगु खः ।’
मेयर शाक्यं महानगरपालिका दुने ३२ गु वडाय् आः जनचेतना ज्याझ्वः अभियान न्ह्याकेगु ज्या न्ह्याइ धका जानकारी बियादिसे थज्याःगु महामारीपाखे गयेयान बच्चे जुइगु व व्यवस्थापन गुकथं यायेमा ज्याझ्वः न्ह्याकेगु धका धयादिगु खः । ‘बनया बाघ मखू आः मनया बाघं नइला धका अप्वो समस्या वया च्वंगु धका न धयादिगु खः ।,’
उगु ज्याझुवलय् मेयर शाक्यं ३२ गु वडाया जनप्रतिनिधि व स्वयसेविकायात छेँय् छेँय् वना जनचेतना मुलुक ज्याझ्वः यायेत निर्देशन न बियादिगु खः । दक्को नागरिकयात ग्याना मखु आरामं च्वनेत व थज्याःगु महामारीपाखे गुकथं बच्चे जुइगु उपायबारे जानकार जुइत न आग्रह यानादिगु खः । येँ महानगरपालिकां सहरी स्वास्थ्य महाशाखापाखे थज्यागु जनचेतना मुलुक ज्याझ्वः वडा १५ पाखे जुइ धुकुगु न जानकारी बियादिगु खः ।
कोरोना भाइरस सम्वन्धि जनचेतना अभियान उगु ज्याझ्वलय् येँँ महानगरपालिकाया निमित्त प्रमुख प्रशासकीय अधिकृत राजेश्वर ज्ञवाली, स्वास्थ्य सेवा विभागया महानिर्देशक महेन्द्रप्रसाद श्रेष्ठ, इपिडेमियोलोजि तथा रोग नियन्त्रण महाशाखाया प्रमुख डाक्टर बासुदेव पाण्डे व डाक्टर प्रकाश शाह सचेतना सम्वन्धि थ थःगु खँ तयादिगु खः ।
