Display Style:
Column Style
कन्हय् असोज १ गते सुथसिया ५ताः ई जुयाः ३५गू मिनेटय् यःसिं क्वथलीगु
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
यँयाः अर्थात ईन्द्रजात्राया यःसिं क्वःथलाः जात्रा क्वचाय्केगु साइत मंगलवाः २९ताः जुयाः ३५गू मिनेटय् खः । अथे धइगु कन्हय् बुधवाः सुथसिया ५ताः ई जुयाः ३५गू मिनेटय् खः ।
ज्योतिषशास्त्रकथं माने याइगु दिं धाःसा थौंया सूर्योदयनिसें कन्हय् सूर्योदयतक जुइगु पञ्चांग समितिया सदस्य सचिव सूर्यप्रसाद ढुंगेलं धयादीगु दु ।
‘गुगु ई च्वयातःगु खः, व धइगु कन्हय् सूर्योदय जुइगु न्ह्यः स्वयां न्हापाया ई खः । उगु दिं क्वःछ्यूगु साइत स्वयां लिबाक्क सूद्र्यः लुइगु जुइगुलिं उकथंया समय तालिका वःगु खः ।’ सदस्य सचिव ढुंगेलं धयादिल ।
दँय्दसं यँयाःया नानिचाःया बहनिइ यःसिं क्वथइगु खः । थ्व धइगु येँया दुनेया वस्तिइ याः न्यायेकेगु दिं खःसा रथयात्राया लिपांगु दिं नं खः । च्यादँ न्ह्यःनिसें थुगु दिनस मिस्तसें रथ सालेगु चलन न्ह्याकूगु खः ।
नानीचा याःया इलय् यतखा, न्यत, किलाघः, भ्याचाद्यः, वंघः, मखं जूसें हनुमानध्वाखातक रथ सालेधुंकाः साइतकथं बहनी यःसिं क्वथइगु खः । क्वथःगु यःसिं हनुमानध्वाखानिसें साला हयाः येँया टेकू दोभानय् हइगुखः । बागमतिइ विसर्जन यायेवं विधिवतकथं यँयाः क्वचाइगु खः । गुकियात ‘ईन्द्रध्वजपतन’ नं धाइ ।
वंगु भाद्र २४ गते हनुमानध्वाखाय् साइतकथं ९ताः ई जुयाः १७गू मिनेटय् यःसिं थनेधुंकाः यँयाः शुरु जूगु खः ।
हेलिकप्टर बुँ बालिइ आकस्मिक अवतरण
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
मौसम बांमलाःगु हुनिं छक्वलं हे बागू दर्जन स्वयां अप्वः हेलिकप्टर छगू हे लागाय् आकस्मिक अवतरण याःगु दु ।
येँया विमानस्थलय् वयाच्वंगु अप्वः धइथें हेलिकप्टर काभ्रे, सिन्धुली जिल्लाया थीथी थासय् अवतरण याःगु खः ।
सिम्रिक एअरया २गः, मनाङ एअरया छगः व कैलाश एअरया छगः हेलिकप्टर काभ्रेया पाँचखाल नगरपालिकाय् च्वंगु वडा ल्याः २ स च्वंगु बुँ बालिइ आकस्मिक अवतरण याःगु खः ।
त्रिभुवन अन्तर्राष्ट्रिय विमानस्थलया प्रवक्ता प्रताप तिवारीकथं मौसम प्रतिकूल जुइवं छक्वलं हे आपालं हेलिकप्टर अनुकूल थासय् अवतरण याःगु खः । वय्कःया कथं हेलिकप्टर व यात्रुयात धाःसा छुं मजू ।
‘येँ वयाच्वंगु ८गः हेलिकप्टर थीथी थासय् अवतरण याःगु जिमित सूचं वःगु दु । थ्वपाखें छुं नं खति जूगु मदु । मौसम बांलाय्वं उगु हेलिकप्टर वइ ।’ तिवारीं धयादिल ।
वंगु छुं दिं न्ह्यःनिसें मौमस खराव जूगुलिं लुक्ला उडान प्रभावित जुया वयाच्वंगु दु । लुक्लाय् नियमित जहाज उडान मजुइवं हेलिकप्टरया चाप अप्वः खनेदुगु खः ।
थ्व हे झ्वलय् थौं येँया मौसम खराब जुइधुंकाः हेलिकप्टर आकस्मिक अवतरण याःगु विमानस्थलया अधिकारीतसें धाःगु दु ।
सहकार्ययानाःन्ह्याः वनेगु प्रतिबद्धता
लहनान्युज | ञंलागा द्धितिया ११३९ (सेप्तेवर १६ २०१९)
महानरीयप्रहरी परिसर ललितपुरया प्रमुखनापं प्रहरी वरिष्ठ उपरीक्षक टेकप्रसाद राईं अपराधन्यूनीकरण व शान्ति सुरक्षाया प्रत्याभूतियानितिं फुक्कलिसे जानाः न्ह्याः वनेगु धयादिल ।
जाह्वलाख्यल प्रहरी परिसरय् यलया उद्यमी व्यवसायीपिंलिसे नापलाय्गु झ्वलय् राईं उगु खँ धयादीगु खः । वय्कलं नखःचखःन्ह्यःने वयाच्वंगु इलय् सुरक्षायानितिं फुक्कसिगु ग्वाहालि व सदाशयता माःगु नं धयादिल ।
अपराध अनुसनधनय् ताः ई ज्या यानागु अनुभवयात फयांफक्व सदुपयोग याय्गु धयादिसें वरिष्ठ उपरीक्षक राईं प्रहरीयात कयाः जनविश्वास अप्वय्केत व्यवसायिक मूल्य व मान्यताय् च्वनाः ज्या याय्गु नं प्रतिबद्धता प्वंकादिल ।
थ्व हे झ्वलय् ललितपुर सुनचाँदी व्यवसायी संघया नायः किरणभाइ बज्राचार्यं लुँया भाः तसकं थहां वंगुयानाप नापं खुइगु, लुटे याइगु सम्भावना अप्वःगुलिं लुँवहःपसःदुगु थासय् निगरानी अप्वय्केत इनाप यानादिल ।
अथे हे ललितपुर उद्योग वाणिज्य संघया पुलांम्ह नायः नापं समाजसेवी अजरमान जोशीं प्रहरी प्रशासनं समन्वयात्मक व सहकार्य यानाः न्ह्यज्याःसा अपेक्षायाः कथं लिच्वःवःगु आपालं दसू दुगु धयादिल । व्यवसायीतसें नाफा काय्गु ज्याय् जक सीमित मजूसे समुदायया आवश्यकतायात थुइकाः प्रहरी व समुदायलिसे सहकार्य यानावया च्वनागु नं जोशीं धयादिल ।
संघया मूछ्याञ्जे सुविन बज्राचार्यं नं नुगः खँ तयादीगु उगु ज्याझ्वलय् प्रहरी उपरीक्षक दुर्गा सिंह, प्रहरी नायव उपरीक्षक सन्तोष तामाङ, देवेन्द्र पाण्डे, संघया निवर्तमान नायः रुपकुमार शाक्यलिसेंया उपस्थितिदुगु खः ।
लिपि च्वज्या कासा क्वचाल
लहनान्युज | ञंलागा द्धितिया ११३९ (सेप्तेवर १६ २०१९)
येँ महानगरपालिकापाखें संचालन जुयाच्वंगु मेट्रो एफ.एम. ९४.६ मेगाहर्जया २० क्वःगु बुन्हिया लसताय् जूगु रञ्जना लिपि च्वज्या धेंधें बल्ला कासा क्वचाल ।
नवआदर्श मा.वि., बसन्तपुलिइ जूगु लिपि च्वज्या कासाय् येँ, यल, ख्वप, तोखा, फुसिंख्यः, थसि, थेच्व, सक्व, थिमि, नैकाप, रामकोटलिसें थीथी थासं यानाः चय्न्हय्म्हेसिनं ब्वतिकाःगु खः ।
येँ महानगरपालिका सूचना प्रविधि विभागया प्रमुख राज्यप्रकाश प्रधानाङ्गं ‘रञ्जना लिपि च्वज्या कासा’ या उलेज्या यानादिसें येँ महानगरपालिकां न्ह्याना च्वंगु आर्थिक दँय् काःगु भाषा, कला, संस्कृति व सम्पदाया संरक्षण याय्गु नीतिकथं हे थुकथंया लिपि च्वज्या कासाया ग्वसाः ग्वयागु खः धयादिल । वय्कलं एफ.एम.या बुन्हिया लसताय् न्हापांखुसी नेपाःया म्हसीका जुयाच्वंगु लिपि च्वज्या कासायाय् खंगुलिं थःअतिकं लय्ताःगु नं धयादिल ।
उलेज्याझ्वलय् गुथिया न्वकू अनिल स्थापितं लिपिया महत्व व लिपि च्वय्बलय् ध्यान बीमाःगु पक्षयात कयाः ध्वाथुइकादीगु खः ।
गुथिया प्राज्ञपिं राजेन्द्र शाक्य, मदनमुनि वज्राचार्य व गुथिया न्वकू अनिल स्थापित लिपि च्वज्या कासाया निर्णायक मण्डलय् च्वनादीगु दु । कासाय् न्हाप जूम्हेसित नीन्याद्वः, ल्यूयात झिंन्याद्वः, लियांल्यूयात झिद्वः व झिम्हेसित हःपाः कथं म्हतिं द्वःछि द्वःछितका व दसिपौ लःल्हाइ । कासाय् उत्कृष्ट जूपिंत असोज १ गते मेट्रो एफ.एम.या बुन्हियालसताय् जुइगु ज्याझ्वलय् सिरपाःलःल्हाइ ।
यँयाः व्यवस्थापन व न्ह्याकेत स्थायी कोष नीस्वन
लहना न्यूज | ने.सं. ११३९ ञलांथ्व द्वादशि (१० सेप्टेम्बर, २०१९), मंगलवाः
सरकारं यँयाः व्यवस्थापन व न्ह्याकेत स्थायी कोष नीस्वंगु दु ।
मन्त्रीपरिषदया भाद्र २२ गतेया मुँज्यां ‘ईन्द्रजात्रा पर्व संरक्षण अक्षयकोष’ नीस्वनेगु क्वःछ्यूगु खः ।
कोषय् नेपाल सरकारं १गू करोड ५०गू लखतका तइगु जूगु दु । ३ नं. प्रदेश सरकारपाखें १गू करोडतका, येँ महानगरपालिकापाखें २गू करोडता व गुथि संस्थानपाखें ५०गू लखतका मुनीगु व्यवस्था यानातःगु दु । थुगु कोषय् मुनीगु मुक्कं ५गू करोडतकाया ब्याजपाखें दँय्दसं जात्रा खर्च यायेगु व्यवस्था मिले याःगु संस्कृति, पर्यटन तथा नागरिक उड्डयन मन्त्रालयया सह–सचिव घनश्याम उपाध्यायं जानकारी बियादीगु दु ।
कोष सञ्चालननापं व्यवस्थापन यायेत येँ महानगरपालिकाया प्रमुखया अध्यक्षताय् छगू समिति दइगु जूगु दु । समितिं दँय्दसं यँयाः नखलय् याइगु खर्चया बाँडफाँड याइ । उगु जात्रा इन्द्रजात्रा व्यवस्थापन समितिं न्ह्याकीगु नं मन्त्रालयं जानकारी ब्यूगु दु ।
यँयाः न्ह्याकेगु नितिं कार्यविधि दयेकीगु व थुकिया जिम्मेवारी येँ महानगरपालिकायात ब्यूगु दु ।
