Display Style:
Column Style
पर्साय् थौं ४३म्ह डिस्चार्ज जुल
लहनान्युज | तछलाथ्व तृतीया ११४०,जेठ १२ सोमवाः
वीरगञ्जया नारायणी अस्पतालय् कोरोनाया वासः याका ४३ म्ह थौं सोमवाः डिस्चार्ज जुगु दु ।
निम्ह पत्रकार नाप ४३ म्ह कोरोना वासः याका डिस्चार्ज जुगु दु ।
इमित मेगु निगु पीसीआर परीक्षणया रिपोर्ट नेगेटिभ वःगुलि डिस्चार्ज याःगु खः ।
थौं ४३ म्हेसित डिस्चार्ज यासे आः नारायणी अस्पतालया आइसोलेसनय् सु हे संक्रमित मदेय धुकुगु दु ।
कोरोना परीक्षण याना मजदुर तयेत उद्योगय् ज्यायाके बिइगु
लहनान्युज | तछलाथ्व तृतीया ११४०,जेठ १२ सोमवाः
सरकारं लकडाउन खुकुलो याना उद्योग व विकास निर्माणया आयोजना सञ्चालन यायेगु सङ्केत बिःगु दु ।
थौं राष्ट्रया नामय् सम्बोधन यासे प्रधानमन्त्री केपी शर्मा ओलीं अर्थतन्त्र चलायमान यायेत व आपूर्ति प्रणालीइ सहजता हयेत उद्योग चायेके अनुमति बिइगु धका धाःगु दु ।
थःगु उद्योगया कामदारपिन्त समुदाय नाप छ्यासमिस मयासे व जिल्ला जिल्लापाखे उद्योग तक वयेत मजदुरपिनिगु कोरोना परीक्षण यायेगु प्रधानमन्त्री ओलीं धयादिगु दु ।
सम्बन्धित उद्यमीं थःगु व्यवसायय् ज्या याःपि श्रमिकपिन्त मापदण्ड पालना याका व उकिगु जानकारी नियमित रुपं प्रशासनयात सूचं बिइगु शर्त तया ज्या याके बिइगु धका प्रधानमन्त्री ओलीं धयादिगु दु ।
थुकिगु प्रभावकारिताया आधारय् मेगु व्यवसाय न सञ्चालनया प्रक्रिया न्ह्याके बिइगु प्रधानमन्त्री ओलीं धयादिगु दु ।
याक मिसापिनिगु भत्ता दइ कथं कानुन संशोधन यायेत निर्देशन
लहनान्युज | तछलाथ्व तृतीया ११४०,जेठ १२ सोमवाः
प्रतिनिधिसभा कानुन न्याय तथा मावअधिकार समितिं सामाजिक सुरक्षा भत्ता सम्बन्धी सामाजिक सुरक्षा ऐन २०७५ यात संशोधन यायेत विधेयक संसदं थुगु हे अधिवेशनय् हयेत सरकारया ध्यानाकर्षण याःगु दु ।
उगु समितिं थौं सोमवाः च्वंगु बैठकं असहाय एकल तथा विधवा मिसा व अपांगता जुपिं मनू तयेनदँत बिया वयाच्वंगु सामाजिक सुरक्षा भत्तायात निरन्तरता बिइगु लागि ऐन संशोधन यायेत विधेयक चालु अधिवेशनय् पेश यायेत गृह मन्त्रालयया ध्यानाकर्षण याःगु दु ।
निदँ न्ह्यः संसदपाखे पारित याःगु ऐनय् एकल मिसा भत्ता ६० दँय लिपा जक काये दइगु व्यवस्था याःगु खःसा उगु ऐन कार्यन्वयन यायेत सरकारं पत्राचार याःगु खः । उगु परिपत्रया विरोध लिपा सरकारं ऐन संशोधन यायेगु तयारी याःगु खः ।
सामाजिक सुरक्षा ऐन २ निदँ न्ह्यः पारित जुगु खःसा संसदया राज्य व्यवस्था समितिं कमजोरी याःगु धका सांसदपिन्स धाःगु खः । उगु कमजोरीया कारण आ सरकार विवादय् वःगुलि ऐन भिंकाः प्रक्रिया न्ह्याके त्यःगु खः ।
कोरोना भाइरसं सीपि प्यम्ह थ्यन
लहनान्युज | तछलाथ्व तृतीया ११४०,जेठ १२ सोमवाः
कोरोना भाइरसया कारणं नेपालय् सीपि प्यम्ह थ्यःगु दु ।
उम्ह मनू वीगञ्जया नेसनल मेडिकल कलेजय् वासः याका च्वम्ह जेठ ४ गते सीगु खः ।
स्वास्थ्य तथा जनसंख्या मन्त्रालयं उम्ह मनू कोरोनाया संक्रमणया कारणं सीगु धका थौं जक पुष्टि याःगु खः ।
सीम्ह संक्रमित बाराया करैयामाई गाँउपालिका–७या उम्जनया ७०दँया मिजं खः ।
त्रिवि शिक्षण अस्पतालय् पीसीआर जाँच याइगु
लहनान्युज | तछलाथ्व तृतीया ११४०,जेठ १२ सोमवाः
त्रिवि शिक्षण अस्पतालय् थौं न निसे आरटी–पीसीआर विधिपाखे कोरोना परीक्षण सुरु याये त्यःगु दु ।
शिक्षण अस्पताल च्वंगु पीसीआर मेसिन तन्हु निसे स्यना च्वंगुया कारण सेवा सुरु मजुगु खः।
कीर्तिपुरय् च्वंगु माइक्रोबायोलोजी विभागया ट्रफल रिसर्च प्रोगामय् च्वंगु पीसीआर मेसिन महाराजगञ्जय् सारे याना थुगु सेवा सुरु याये त्यःगु खः ।
कीर्तिपुरया हे टोलीपिन्स च्यान्हु बिका थुगु ल्याब तयार याःगु खः ।
मेसिन स्थानान्तरण लिपा प्राविधिक कमिटी गठन याना परीक्षण सुरु यायेत राष्ट्रिय जनस्वास्थ्य प्रयोगशाला तक अनुमति बिइ धुकुगु दु ।
उगु ल्याबय् छकल हे ९६ नमूनाया परीक्षण याये फइगु थुगु मेसिनय् कम्ती न २४ गु नमूना जम्मा जुलकि परीक्षण यायेगु नियम दयेका तःगु दु ।
