राष्ट्रिय

Display Style:

Column Style

मिडिया काउन्सिल विधेयक लित कायेत माग यासें ज्ञापनपौ लःल्हात

लहनान्युज | ने.सं. ११३९ बछलागा तृतिया (२१ मे, २०१९), मंगलवाः

लुम्बिनी प्रेस क्लब सिद्धार्थनगर, रुपन्देहीं मिडिया काउन्सिल विधेयक लित कायेत माग यासें प्रतिनिधिसभाया सभामुख व राष्ट्रियसभाया नायःयात ज्ञापनपौ लःल्हाःगु दु । क्लबं जिल्ला प्रशासन ज्याकू, रुपन्देहीया सहायक प्रमुख जिल्ला अधिकारी कल्पना घिमिरे नेपालपाखें ज्ञापन पौ लःल्हाःगु खः ।

ज्ञापनपौ लःल्हानादिसें क्लबया नायः दीपेश पछाईं सरकारं नकतिनि जक संघीय संसदय् दर्ता याःगु ‘नेपाल मिडिया काउन्सिल सम्बन्धि कानूनयात संशोधन व एकीकरण यायेत दयेकूगु विधेयक’ दर्ता याःगुयात कयाः आपत्ति प्वंकादिल । वय्कलं समग्र प्रेस जगतयात नियन्त्रण यायेगु व स्वतन्त्रकथं आलोचना यायेगु अधिकारपाखें बञ्चित यायेगु तातुनां हःगु उगु विधेयक प्रेस स्वतन्त्रता विरोधी जूगु धयादिल । विधेयकं संविधानं बियातःगु प्रदत्त अधिकारयात कुण्ठित याःगु व स्वतन्त्र पत्रकारितायात अंकुश तयेगु ज्या याःगु नं पछाईं धयादीगु दु ।

क्लबया निवर्तमान नायः माधव ढुंगानां श्रमजीवि पत्रकार ऐन व प्रेस काउन्सिल ऐन खारेज यायेगुकथं दर्ता याःगु विधेयकय् आः दुगु प्रेस काउन्सिलयात थप प्रभावकारी दयेकेगु धासें नियन्त्रणकारी प्रावधान तःगु लोकतान्त्रिक गणतन्त्रात्मक शासन व्यवस्थाया विरुद्धय् जूगु धयादिल ।

क्लबया न्ह्यलुवाय् पत्रकारतसें थौं मंगलवाः छघौतक जिल्ला प्रशासन ज्याकू परिसरय् धर्ना ब्यूगु खः।

प्रतिनिधिसभापाखें स्वंगू विधेयक स्वीकृत

लहनान्युज | ने.सं. ११३९ बछलागा तृतिया (२१ मे, २०१९), मंगलवाः

प्रतिनिधिसभापाखें थौं स्वंगू विधेयक स्वीकृत जूगु दु । प्रतिनिधिसभाया थौं च्वंगु मुँज्यां बन विधेयक, वातावरण संरक्षण विधेयक व भूमि सम्बन्धि च्याक्वःगु संशोधन विधेयक स्वीकृत जूगु खः । सरकारं म्हिगः सोमवाःया मुँज्याय् टेबल याःगु उगु विधेयकयात कयाः सैद्धान्तिक सहलह जूगु खः ।

वनयात व्यवस्थित यायेगु नितिं उगु विधेयक हःगु सरकारं न्ह्यथंगु दु । सहलहया झ्वलय् बनयात व्यवस्थित दयेकेमाःगु नापं बनपाखें देय् व जनतां फाइदा कायेफइकथं ऐन दयेकेमाःगु सांसदपिन्सं धाःगु दु । निजी वन दर्ता प्रकृया झन्झटं जाःगु धासें उमिसं उकियात सहज दयेकेत सुझाव बियादीगु दु ।

देशया ४४गू प्रतिशत भूभाग वनं जायाच्वंगु जूसां नं सोचय् ह्यूपाः मवःगुलिं व्यवस्थित दयेकेमफूगु सांसदपिनिगु धापू दु ।

विधेयकयात कयाः जूगु सैद्धान्तिक सहलहस सांसदपिन्सं न्यंगु न्ह्यसःया लिसः बियादिसें वन तथा वातावरण मन्त्री शक्ति बस्नेतं वनयात व्यवस्थित दयेकेत हे सरकारं विधेयक न्ह्यःने हयागु धयादिल । न्हूगु पुस्तां नं फाइदा काये फयेमा धकाः उपयोगितायात नं ध्यान बियागु मन्त्री बस्नेताया धापू खः ।

अथे हे ध्वनि, जल व वायु प्रदुषण म्हो यानाः वातावरण स्वच्छ दयेकेत वातावरण सम्बन्धि विधेयक हयागु नं मन्त्री बस्नेतं धयादिल ।

च्वसापासाया न्हूगु ज्यासना भुषणप्रसाद श्रेष्ठ

लहनान्युज | बछलागा तृतिया ११३९ (मे २१ २०१९)

न्हापांगु भाषिक संस्था च्वसापासाया न्हूगु ज्यासना पुचलय् भुषण प्रसाद श्रेष्ठया नेतृत्वय् पुनर्गठन जूगु दु ।

उगु पुचलय् छ्यान्जे भरत साय्मिया दुजलय् प्रा.नरमदेश्वर प्रधान,डा. केशवमान शाक्य,रमेशकाजी स्थापित,डा.सर्वोत्तम श्रेष्ठ,डा.तेजरत्न कंसाकार,कवि पूर्ण वैद्य, सत्यभामा माथेमा व सुम्निमा तुलाधर प्रधानयात ल्यःगु दु ।

न्हूगुु कार्यसमिती भिंतुना देछा ज्याझ्वः जुगु दुु । उगु पुचःयात ईलोहं प्रकाशनं भिन्तुना देछा ज्याझ्लय् च्वसापासाया न्हूम्ह नायः श्रेष्ठं च्वसापासाया ग्वसालय् न्हापा बिया वया च्वंगु नेपालभाषा साहित्य ख्यःया प्रतिष्ठित सिरपा छुं ई न्ह्यःनिसें दिना च्वंगु खःसां आः थःगु नेतृत्वया कार्य समितीं निरन्तरता बिया यंकेगु प्रतिबद्धता प्वंकादिगु दु ।

उगु भिन्तुना देछागु ज्याझ्वलय् पाहाँ कथं झायादीपिं प्रा . डा. चन्द्र मान बज्राचार्य, शिक्षाविद् व साहित्यकार लक्ष्मण राजबंशी, नेपालभाषा केन्द्रिय विभागया लुमन्ति दबुया नायः किरण केन रञ्जितपिसं न्हूगु ज्यासना पुचःयात कार्यकाल सुथांलाक्क न्ह्यायेमा धकाः भिंतुना बिसें नुगःखँ तयादीगु खः । स्थापना कालंनिसे थौं तक्क च्वसापासां यानावयाच्वंगु गतिविधि नापं संस्थां फयावयाच्वंगु थथ्याक्वथ्याया विषयलय् च्वसापासाया न्हूगु ज्यासनापुचःया नायः भुषण प्रसाद श्रेष्ठं ब्याकादिल । च्वसापासायात थःगु कार्यकालय् फयांफछि सुथांलाक्क च्वन्ह्याकेगु नायः श्रेष्ठं बचं बियादिल ।

ललिता निवास जग्गा प्रकरणय् दोषीयात कारवाही यायेमाः : पूर्व गृहमन्त्री रावल

लहनान्युज | ने.सं. ११३९ बछलागा २ (२० मे, २०१९), सोमवाः

नेपाल कम्युनिष्ट पार्टी (नेकपा)या नेता भीम रावलं बालुवाटारया ललिता निवासया जग्गा सरकारं लित कायेगु जक मखु, दोषीयात कारवाही यायेमाःगु धयादीगु दु ।

रिपोर्टस् क्लबय् ग्वसाः ग्वःगु साक्षात्कार ज्याझ्वलय् थौं सोमबाः न्ववानादिसें नेता रावलं उगु खँ धयादीगु खः । पूर्व गृहमन्त्री तक जुयादीम्ह नेता रावलं जग्गा लित कायेगु क्वःछ्यूगुलिं सुभाय् बियादिसें दोषीयात कानूनी चाकलय् हयेत तकं माग यानादिल ।

माधवकुमार नेपाल प्रधानमन्त्री जुयादीगु इलय् गृहमन्त्री जुयादीम्ह नेता रावलं उगु इलय् मन्त्रीपरिषदया मुँज्याय् उगु जग्गायात कयाः छुं नं औपचारिक प्रस्ताव व सहलह मजूगु नं दावी यानादिल ।

नेता रावलं संविधानय् दुगु प्रेस स्वतन्त्रताया व्यवस्थायात मनन् यानादिसें मिडिया काउन्सिल सम्बन्धि विधेयकय् दुगु दण्ड सजाँय सम्बन्धि व्यवस्थायात कयाः गहन सहलह यायेमाःगु बिचाः प्वंकादिल । संविधान दयेकूगु इलय् हे सहलह यानाः प्रेस स्वतन्त्रताय पक्षय् यानातःगु व्यवस्थायात न्हुइ मज्यूगु नेता रावलया तर्क खः ।

सञ्चार तथा सूचना प्रविधि मन्त्री गोकुल बाँस्कोटां नं विधेयकय् दुगु असन्तुष्टिया विषययात कयाः सहलह यायेफइ धकाः धायेधुंकूगुलिं अप्वः तर्क यानाच्वनेगु आवश्यक मजूगु नं रावलं धयादीगु दु ।