Display Style:
Column Style
बुबहालय् मोहनि मेला न्ह्यात
लहनान्युज | कौलाथ्व तृतिया ११३९ (अक्टुवर १ २०१९)
राज्यया स्वंगुलिं तगिंया जनप्रतिनिधितसें यलया ऐतिहासिक बौद्ध विहार (बहाः बही)यात पर्यटकीय आकर्षक गन्तब्यकथं विकास याय्माःगु खँय् बः ब्यूगु दु ।
बुबहाल युवा समूहं यल महानगरपालिका–१६या विशेष ग्वाहालिइ यशोधरवर्ण महाविहार, बुबहालय् ग्वसाः ग्वःगु मोहनि मेला–२०७६ उलेज्या यानादिसें संघ, प्रदेश व स्थानीय तगिंया जनप्रतिनिधिपिन्सं उगु खँय् बः ब्यूगु खः ।
मेलाया उलेज्या यानादिसें यल क्षेत्र नं. २या संघीय सांसद कृष्णलाल महर्जनं बौद्ध विहारया संरक्षण यानाः पर्यटकपिनिगु नितिं आकर्षक गन्तब्यकथं विकास याय्माःगुलिइ बः बियादिल ।
लुम्बिनीइ वनेत नेपाः वइपिं हलिंया बौद्ध धर्मालम्बीतय्त थनया ऐतिहासिक बौद्ध विहारयात कयाः प्रचारप्रसार यानाः उमित यलय् दुत हय्फइगु आपालं क्वात्तुगु सम्भावना दुगु नं सांसद महर्जनं धयादिल ।
उगु ज्याझ्वलय् प्रदेश नं. ३या सांसद शोभा शाक्यं जिल्लाया लिच्छवीकालीन व मल्लकालीन बौद्ध विहार, बुद्ध दर्शन, संस्कृति व संस्कारया मू केन्द्र जूगु न्ह्यथसें थुकियात पर्यटकीय ‘रुट’य् दुथ्याकेत फुक्क जाय्माःगु धयादिल ।
न्ह्यःने वयाच्वंगु ‘भिजिट नेपाल – २०२०’य् नेपाः दुहां वइपिं पर्यटकपिन्त उपलब्धीमूलक दय्केत बौद्ध विहार चाःहिकेगु, अनया जीवन्त संस्कृतियात कयाः जानकारी बीकथं विशेष प्याकेज हय्फइगु नं वय्कःया धापू खः ।
सांसद शाक्यं धयादिल, “बौद्ध विहार धार्मिक दृष्टिं जक मखुसे प्रस्तर कला, काष्टकलाया ल्याखं नं तसकं महत्वपूर्ण जू । विहार जःखः होमस्टेया व्यवस्था याय्फपत धाःसा आयआर्जन याय्फइगु सम्भावना दु ।” वय्कलं बौद्ध विहारयात पर्यटकीय गन्तब्यकथं विकसित याय्गु नितिं उकिया संरक्षण, सम्बद्र्धन व माःकथंया पूर्वाधार दय्केमाःगु खँय् बः बियादिल ।
थ्व हे झ्वलय् प्रदेश नं. ३या सांसद ज्ञानेन्द्र शाक्यं यलयात साँस्कृतिक व पर्यटकीय नगरी घोषणा याय्माःगु बिचाः प्वंकादिल । थुकिया नितिं राज्यया स्वंगुलिं तगिं जानाः न्ह्याःवनेमाःगु खँय् सांसद शाक्यं बः बियादिल ।
समारोहस यल महानगरपालिका –१६या नायः निर्मलरत्न शाक्यं वडादुनेया संस्कृति, सम्पदा, बौद्ध विहार यक्व दुगुलिं उकियात ध्यानय् तयाः वडां संस्कृति, सम्पदाया संरक्षणयात न्हापांगु प्राथमिकताय् तयागु जानकारी बियादिल ।
कला, संस्कृति, सम्पदा संरक्षण यानाः पर्यटकीय गन्तब्य दय्केत, स्थानीयया आर्थिक व मानवीय विकासया नितिं गबलें वडां हे मेला याय्गु व गबलें मेला याइपिन्त ग्वाहालि याय्गु नीति नालागु नं नायः शाक्यं धयादीगु दु ।
न्यान्हु तक मेला
स्थानीय मिसापिनिगु उद्यमशीलता विकास याय्गु तातुनां मेला ग्वसाः ग्वयागु समूहया नायः बाबुराजा बज्राचार्यं धयादिल । न्यान्हुतक न्ह्याइगु उगु मेलाया सहआयोजककथं यशोधर बचत तथा ऋण सहकारी संस्था लि. व संरक्षकय् यशोधर महाविहार सुधार समिति दुगु खः ।
मेलाय् स्थानीय मिसा समूह, सहकारपाखें उत्पादन याःगु न्हियांन्हिथं छ्यलाबुला याइगु हलंज्वलं, कापः, छाय्पीगु हलंज्वलंया स्टल दु । मेलाया आकर्षकथं न्हियांन्हिथं सनिलय् चर्याप्याखं, साँस्कृतिक ज्याझ्वःया नापनापं नेवाः नसाज्वलंत दु । मेलापाखें नेवाः नसाज्वलंया ब्राण्डिङ, स्थानीय कलाकारपिनिगु प्रबद्र्धन जुइगु ग्वसाः खलःया विश्वास दु ।
ज्यापु समाजया नीखु क्वःगु साधारणसभा
लहनान्युज | कौलाथ्व द्धितिया ११३९ (सेप्तेवर ३० २०१९)
ज्यापु समाज यलया नीखु क्वःगु साधारणसभाया उलेज्या मूपाहाँ प्रदेश न. ३ या समाजिक बिकास मन्त्री युवराज दुलालं यानादिल ।
ज्याझ्वलय् बिशेष पाहाँ कुलमान घिसिङ्ग, अथे हे पाहाँ कथं प्रदेश न. ३या सासदपिं ज्ञानेन्द्र शाक्य, राजकाजी महर्जन, शुशीला पुनः, मैना अछामी, शोभा शाक्य, यल महानगरपालिकाया प्रमुख चिरीबाबु महर्जन, उपप्रमुख गीता सत्याल, प्रमुख जिल्ला अधिकारी भगिरथ पाण्डे, ललितपुर प्रहरी प्रमुख वरिष्ठ प्रहरीउपरीक्षक टेकप्रसाद राईपिं झायादीगु खः ।
समाजया थकाली पुनमाया महर्जनयात दोसल्ला न्यय्काः हंगु खःसा समाजया चिं दुगु २५गः पाय्म्वः नं बिमोचन याःगु खः । ज्याझ्वलय् समाजं एसइइ, स्नातकोत्तर व विद्याावरिधीइ ताःलापिन्त न मोवाइल, ल्यापटप, नगद व हनापौ लःल्हाःगु खः ।
उगु ज्याझ्वलय् कासामि महेश्वर महर्जन व ननिता महर्जनयात न हंगु खः ।
पत्रकार सुनिल महर्जनयात सम्मान
लहनान्युज | कौलाथ्व द्धितिया ११३९ (सेप्तेवर ३० २०१९)
राष्ट्रिय जीवनय् विशिष्ट योगदान बियादीपिं ब्यक्तित्वपिंलिसें सञ्चार सेवा सम्मान–२०७६पाखें पत्रकार सुनील महर्जन सम्मानीत जुगु दु ।
पत्रकार महर्जनं १७ दँ निसे पत्रकारिताय् ख्यलय् सक्रिय जुया ज्या याना वयाच्वंगुलि छगू ज्याझ्वःया दथुइ नागरिक एकता समाजपाखें सम्मान याःगु खः।
हलिं नेवाःगुथिया साहित्य गोष्ठी
लहनान्युज | कौलाथ्व द्धितिया ११३९ (सेप्तेवर ३० २०१९)
‘झीगु गुथिझीगु सम्पदा’ नारा बियाःहलिं नेवाःगुथि, गःछेँ कचा, किपूया ग्वसालय् किपुलिइ न्हय्क्वःगु नेपालभाषा साहित्य गोष्ठी जुल ।
बुद्धिलाल ज्यापुया सभाध्यक्षताय् कमला महर्जनं लसकुस यानादीगु उगु ज्याझ्वलय् लोककवि राजभाइ जकःमि मूपाहाँ कथं झायादीगु खःसा विशेष पाहाँ कथं किपू नगरपालिकाया कार्यवाहक प्रमुख हर्ष महर्जन झायादीगु खः । ज्याझ्वःया समीक्षा प्रा.डा. चन्द्रमान बज्राचार्यं यानादीगु खः ।
ज्याझ्वलय् लुमन्ति चित्रकार, बसन्त नकःमि, तेजकृष्ण श्रेष्ठ, मोक्षबहादुर अमात्य, कविन्द्रलाल प्रधान, पि.के. श्रेष्ठ, रुपा शाही, विनिता खड्गी, शम्भुराम ‘मान्छे’, सुवर्ण महर्जनलिसें ३०म्ह च्वमिपिन्सं थःथःगु च्वसु ब्वनाः न्यंकादीगु खः ।
ज्याझ्वःया दथुइ इसासपाखें वीरप्रसाद भन्सारी, गुज्ये मालाकार, रत्नशोभा महर्जनपिन्सं म्ये हालादीगु खः ।
ज्याझ्वलय् ब्वंगु चिनाखँ, बाखं, हाइकु दक्वं हे बांलाःगु खँकनादिसे समीक्षकप्रा.डा. बज्राचार्यं चिनाखँ च्वय्बलय् म्हो खँग्वलं यक्वभाव बिइकथं जुल धाःसा स्तरीय जुइगु धयादिल । अथेहे, मूपाहाँ जकःमिं चिनाखँ धइगु च्वमिं थःगु नितिं स्वयां नं ब्वँमिपिनिगु नितिं अप्वः जुइगुलिं चिनाखँ च्वय् बलय् यक्व ब्वँमिपिन्सं थुइगु भासं च्वय् माःगु खँय् बः बियादिल ।
विशेष पाहाँहर्ष महर्जन, हलिं नेवाःगुथिया नायः जुजुमान श्रेष्ठ व चिनाखँ ब्वँमिपाखें नरसागर श्रेष्ठपिन्सं नुगःखँ तयादीगु खः ।
जयसिद्धि गणेशया झिक्वःगु साधारणसभा
लहनान्युज | कौलाथ्व द्धितिया ११३९ (सेप्तेवर ३० २०१९)
जयसिद्धि गणेश बचत तथा ऋण सहकारी संस्था लिमिटेडया झिक्वःगु साधारणसभाया उलेज्या मूपाहाँ ३ न.प्रदेशया सांसद बसन्त मानन्धरं त्वाःदेवा च्याकाः उलेज्या यानादिल ।
ज्याझ्वलय् पाहाँकथं लक्ष्मीरत्न तुलाधर, पुर्णभक्त तण्डुकार, राजेन्द्र भण्डारी व हेमराज शाक्य झायादीगु खः ।
संस्थाया नायः लक्ष्मण गमालं बार्षिक प्रतिवेदन न्ह्यब्बयादीगु उगु ज्याझ्वलय् लेखा समितिया संयोजक सुरज तण्डुकारं आर्थिक प्रतिवेदन न्ह्यब्बयादीगु खः ।
नायः लक्ष्मण गमालया सभाधक्ष्यताय् न्ह्याःगु ज्याझ्वलय् मूपाहाँ सांसद मानन्धरं ज्येष्ठ दुजः पंचलाल श्रेष्ठयात न्हय्द्वः तका लिसें हनापौ लल्हानादीगु खः ।
ज्याझ्वलय् महेशरत्न तुलाधरं लसकुस यानादीगु खः ।
