Display Style:
Column Style
प्रविधि हस्तारन्तरण ज्याझ्वः
बाबुकाजीश्रेष्ठ | चौलागा अष्टमी ११३९ (अप्रिल २७ २०१९)
ख्वपया घरेलु तथा सानाउद्योग कार्यालयं चि चि धःगु उद्योगयात प्रवद्र्धन यायेगु उद्देश्यें स्थानीय उद्योग व्यवसायीपिन्त उपकरण मेशिन हस्तान्तरण याःगु दु ।
कार्यालय प्रमुख सुबोधकुमार शाह कर्मयोगीया सभाधक्ष्यताय् जुगु उगु ज्याझ्वः मूपाँहा उद्योग, पर्यटन, वन तथा वातावण मन्त्री अरुणप्रसाद नेपालं उगु उपकरण मेशिन हस्तान्तरण यानादीगु खः ।
ख्वपया ४५ म्ह पुलापिं उद्योग व्यवसायीयात सिलाई मेशिन, विद्युतीय ओभन, जुकी मेशिन, इण्डोमोटर, स्क्रोल जीग्साव मेशिन, क्रिमसेपरेटर, काजावटन मेशिन, कम्प्रेसर, ब्लोयर मेशिन, पिको मेशिन, ग्राण्डर मेशिन, हष्कर मेशिन, कटिङ्ग मेशिन, ड्रयर मेशिन, विटर मेशिन, लक मेशिन व व्यूटीपालर सम्बन्धी थीथी उपकरण नाप यक्को हे मेशिनरी सामग्री वितरण याःगु खः ।
तुला राजभण्डारीं लसकुस यानादीगु उगु ज्याझ्वलय् पूर्व कार्यालय प्रमुख हृदयचन्द्र वैद्य व घरेलू तथा साना उद्योग कार्यलय ख्वपय् झीदँ तक निरन्तर सेवा यानादीगु वापत ना.सु. कमलप्रसाद निरौलायात सम्मान न यानादीगु खः ।
ज्याझ्वःया मूपाँहा पर्यटन, वन तथा वातावण मन्त्री अरुण प्रसाद नेपाल, प्रतिनिधि सभाया सांसद् नाप पूर्व उद्योग मन्त्री महेश बस्नेत, प्रमुख जिल्ला अधिकारी नारायणप्रसाद भट्ट लगायत पिन्स देश विकास यायेत स्थानीय उद्योगयात प्रोत्साहन बिया प्रवद्र्धन याना यंके माःगुलि बःबियादीगु खः ।
लुँति अजिमाया जःखः न्हुगु गुरुयोजना ज्याझ्वःया उलेज्या
लहनान्युज | चौलागा अष्टमी ११३९ (अप्रिल २७ २०१९)
येँया धल्को त्वालय् लुँति अजिमाया देगः जःखः जुइगु थी थी न्हुगु गुरुयोजना ज्याझ्वः थौं छगु ज्याझ्वः दथुइ सार्वजनिक याःगु दु ।
द्यः पाला गुथि १७ वडाया ग्वसालय् जुगु थुगु ज्याझ्वःया उलेज्या येँ महानगरपालिकाया मेयर बिद्यासुन्दर शाक्यं उलेज्या यानादीगु खः ।
उगु ज्याझ्वःया लागि येँ महानगरपालिकां छगु करोडया ग्वाहालि याःगु खः ।
खुल्लामञ्चय् दुने चायेकातःगु पसः थुन
नृपेन्द्रलाल श्रेष्ठ | चौलागा अष्टमी ११३९ (अप्रिल २७ २०१९)
येँया खुल्लामञ्चय् अनाधिकारिक रुपं दयेकुगु पसःक्वः थौं शनिवाः येँ महानगरपालिकां चिइकुगु दु ।
थौं हिनय् निसें प्रहरी पाः तया डोजर हयाः खुल्लामञ्चय् दुने चायेकातःगु दक्को पसःया सटर चिइकुगु खः ।
उगु संरचना हटे यायेत येँ महानगरया मेयर बिद्यासुन्दर शाक्य नाप येँ जिल्ला अधिकारी प्रमुख रामप्रसाद आचार्य न न्हयने दुगु खः ।
आः उगु थासय् सार्वजनिक चःबि, टिकट काउन्टर व छगु खाजा घर जक बाँकी दनि ।
छु दिं न्ह्यः जक उगु संरचना हटे यायेगु लागिु धर्ना ज्याझ्वः याःगु खः ।
शंखधर उपन्यास उलेज्या
लहनान्युज | चौलागा सप्तमी ११३९ (अप्रिल २६ २०१९)
राष्ट्रिय विभूत शंखधर साख्वाः प्रतिस्थानया ग्वसालय् मल्ल के सुन्दरं च्वया अगिब बनेपाली अनुवाद याःगु खस भाषाया शंखघर नांया ऐतिहासिक आख्यानात्मक परिकल्पना याना तयार यानातःगु उपन्यास थौं छगु ज्याझ्वः दथुइ प्रज्ञा प्रतिस्थानय् उलेज्या जूगु दु ।
उगु ज्याझ्वःया मूपाँहा शताव्दी पुरुष सत्यमोहन जोशी, नेपाल प्रज्ञा प्रतिस्थानया कुलपति गंगाप्रसाद उप्रेति, नेपालभाषा एकेडेमीया चान्सलर चित्तरञ्जन नेपालीं मंकाः कथं सफू पितब्बज्या यानादीगु दु ।
जनकवि दुर्गालाल श्रेष्ठ, मध्यपुर थिमि नगरपालिकाया मेयर मदन सुन्दर श्रेष्ठ, माननीय सांसद भीमसेन दास प्रधान, नेपालभाषा एकेडेमीया चान्सलर चित्तरञ्जन नेपाली, नेपाल प्रज्ञा प्रतिस्थानया कुलपति गंगा प्रसाद उप्रेति, मूपाहाँ शताब्दी पुरुष सत्यमोहन जोशी अगिव बनेपाली, प्रा. डा. अभि सुवेदीं सफूयात कयाः थःगु खँ तयादीगु खः ।
प्रतिस्थानया नायः चन्दन कृष्ण श्रेष्ठया सभाधक्ष्यताय् जुगु थुगु ज्याझ्वलय् च्वमि मल्ल के सुन्दर सुभाय् देछानादीगु खः ।
मनमोहन अस्पतालया ब्लड बैंक उलेज्या
नृपेन्द्रलाल श्रेष्ठ | चौलागा सप्तमी ११३९ (अप्रिल २६ २०१९)
मनमोहन मेमोरियल शिक्षण अस्पतालय् थौं पुलाम्ह मनमोहन अधिकारीया २० क्वःगु स्मृति दिवसया झ्वलय् ब्लड बैंक उलेज्या नाप हिदान ज्याझ्वः जुगु दु ।
थौं छगु ज्याझ्वःया दथुइ स्वास्थ्य राज्यमन्त्री डा.सुरेन्द्रकुमार यादवं ब्लड बैंक उलेज्या यानादीगु दु ।
उगु ज्याझ्वःया शिक्षण अस्पतालया नायः राजेन्द्र पाण्डेया सभाधक्ष्यताय् जुगु उगु ज्याझ्वलय् स्वास्थ्य राज्यमन्त्री डा यादव, डा.बंशिधर मिश्रं नुँगः खँ तयादीगु खः ।
थौं मनमोहन मेमोरियल शिक्षण अस्पतालय् जुगु हिदान ज्याझ्वलय् स्वास्थ्य राज्यमन्त्री डा.सुरेन्द्रकुमार यादव न हिदान यानादीगु खः ।
मन्त्री यादव लगायत १८० म्ह मल्याक स्वास्थ्यकःमि पिन्स न हिदान यानादीगु खः ।
