Display Style:
Column Style
थप ९०म्ह नाप संक्रमित ७७२म्ह थ्यन
लहनान्युज | तछलाथ्व चौथी ११४०,जेठ १३ मंगलवाः
थौं मंगलवाः छन्हु हे ९० म्हेसित कोरोना भाइरसया संक्रमण खनेदुगु दु । स्वास्थ्य तथा जनसंख्या मन्त्रालयं बिःगु जानकारी कथं येँया टेकूया जनस्वास्थ्य प्रयोगशाला, भेरी, सेती, पोखरा नापं सुर्खेतया प्रयोगशालाय् याःगु परीक्षणय् ९०म्हेसित संक्रमण जूगु पुष्टि जूगु धका धाःगु दु ।
मन्त्रालयं बिगु जानकारी कथं गुल्मीइ निम्ह, रूपन्देही छम्ह, कैलाली छम्ह, अछामयय् छम्ह महत्तरीइ निम्ह, बाराय् ज्या यानाच्वंपिं जुम्लाया निम्ह, सिरहाया न्याम्ह, धनुषाया छम्ह, बाँकेया च्याम्ह, कपिलवस्तुया नीम्ह, अर्घाखाँचीइ निम्ह, बाराय् स्वम्ह, रौतहटया २२म्ह,स्याङ्जाया निम्ह व सुर्खेतया १२म्हेसित कोरोना संक्रमण जूगु दु ।
थ्व आतक नापं नेपालय् संक्रमण ४६गु जिल्लाय् थ्यःगु दु सा संक्रमितपि ७७२ म्ह थ्यःगु दु ।
बाराय् सैनिक निम्ह नाप न्याम्हेसित कोरोना पुष्टि
लहनान्युज | तछलाथ्व चौथी ११४०,जेठ १३ मंगलवाः
बारा जिल्लाय् हाकन मेपि न्याम्हेसित कोरोना संक्रमित पुष्टि जुगु दु ।
थौं संक्रमित जुपि न्याम्हय् निम्ह नेपाली सेनाय् ज्या याइपि जुगु दु ।
पचरौता नगरपालिकाय् क्वारेन्टाइनय् च्वना च्वपि स्वम्ह व क्वारेन्टाइनया सुरक्षाय् खटे जुयाच्वपि सैनिक निम्हेसित कोरोना पुष्टि जुगु दु ।
थ्व नाप बाराय् संक्रमित जुपिनिगु ल्याः ४१म्ह थ्यःगु दु । आतक थुगु थासय् निम्ह उपचार लिपा छेँय् वःगु दु सा कोरोना संक्रमणया कारणं छम्ह सीगु दु ।
सुर्खेतय् १२ म्ह संक्रमित
लहनान्युज | तछलाथ्व चौथी ११४०,जेठ १३ मंगलवाः
कर्णालीए थौं मंगलवाः सुथय् हाकन थप १२ म्ह कोरोना संक्रमण पुष्टि जुगु दु । थौं पुष्टि जुपि दक्को हे सुर्खेतयापि जुगु दु ।
१० म्ह वीरेन्द्रनगर नगरपालिका व निम्ह सिम्ता गाउँपालिका च्वपि जुगु दु ।
कर्णाली प्रदेश सरकारं भारतं लिहा वइपि नेपाली तयेत सीमावती क्षेत्रय् हे परीक्षण याना क्वारेन्टाइनय् तयेगु व्यवस्था मिले यायेत नेपाल सरकार व केन्द्रीय विपद् व्यवस्थापन समितियात इनाप न याःगु दु ।
भारत सरकारं सीमा तक वयेकेत अपुकुगुलि अन करिब २५ द्धः ति कर्णालीबासीपि छेँय् वइगु अनुमान प्रदेश सरकारं याःगु दु ।
'पीसीआर परीक्षणय् होडबाजी मखु, सीमाया क्वारेन्टाइनय् बः बिइ नु'-मेयर शाक्य
नृपेन्द्रलाल श्रेष्ठ | २०७७ जेठ १२, तछलाथ्व तृतीया ११४०
थौं सोमबाः स्वनिगलय् हाकनं स्वम्ह संक्रमण पुष्टि जूगुलिसें येँ महानगरपालिकाया मेयर बिद्यासुन्दर शाक्यं थप सजग जुइमाःगु खँये बः बियादीगु दु ।
‘जिमिसं लकडाउन न्ह्यासांनिसें स्वनिगलय् वयेवनेगुलिइ कडाई यायेग व स्वनिगलय् सील यायेत संघीय सरकारयात इनाप याना वयाच्वनागु खः,’ उपत्यका नगरपालिका फोरमया नायः तकं खःम्ह मेयर शाक्यं धयादिल, ‘तर, इलय् सजगता नालेमफुगु व स्वनिगलय् वयेवनेगुलिइ पनेमफूगुलि समस्या वःगु खः । सरकारं इलय् लकडाउन यानाः बांलाःगु ज्या याःगु खः । थुकिगु पूर्ण रुपं कार्यान्वय मजूगुलिं व स्वनिगलय् दुहां वयेगुलि कडा मजूगुलिं शान्त पुखुलिइ चागःचा कयेके थें जुगु दु ।’
स्वनिगःया जनप्रतिनिधितयगु इनापयात नालाकासें गृह मन्त्रालयं छु दिं न्ह्यः जक स्वनिगलय् दुहां वयेगुलि कडा यायेगु परिपत्रया नं लसकुस यानादिल ।
‘स्वनिगलय् दुहां वयेगु दक्वं नाका अत्यावश्यक प्रयोजन बाहेक पूर्णरुपं सील यायेत गृहं परिपत्र जारी यानाः इनाप याःगु खः । स्वनिगलय् सुलाः सुलाः दुहां वयेगु पूर्ण रुपं रोके यायेत नं इनाप याःगु दु । व लसकुस यायेबहःजू’ शाक्यं धयादिल ।
अथेहे मेयर शाक्यं आरडीटी व पीसीआर परीक्षण यायेगु होडबाजी जुयाच्वंगु धासें थुकियात नियन्त्रण याये माःगुलिइ बः बियादिल । वयकलं छगु जिल्लां मेगु जिल्ला, छगु स्थानीय तगिमं मेगु स्थानीय तगिमय् वय्वनेगु न पूर्ण बन्द यायेमाःगु धयादिल ।
पीसीआर परीक्षणय् होडबाजी मखु, सीमाया क्वारेन्टाइनय् जोड
मेयर शाक्यं स्वनिगलय् दुहां वयेवने कडा यायेत इनाप यासें आरडीटी व पीसीआर परीक्षणय् जुइगु खर्चं सीमा–सीमाय् सुविधा सम्पन्न क्वारेन्टाइन दयेकेमाःगुलिइ ध्यान बीत सुझाव बियादीगु दु ।
‘आः सीमा–सीमाय् भारतं नेपालीत वयेगु अप्वःगु, क्वारेन्टाइनय् नयेगु च्वनेगु सुविधा मदुगु, क्वारेन्टाइनय् संक्रमित व मेपिं बिस्युं वनेगु बुखँ तकं वःगु दु’ शाक्यं धयादिल । ‘स्वनिगलयु जनघनत्व अप्वःगुलि स्वनिगः असुरक्षित जुलकि परीक्षणय् हे करोडौँ खर्च जुइफु । उकिं स्वनिगः सुरक्षित दयेकाः थन जुइगु परिक्षणया खर्चं सीमाय् व्यवस्थित क्वारेन्टाइन दयेकेज्यू ।’
अर्थतन्त्र चौपट
मेयर शाक्यं आः परीक्षण–परीक्षण धकाः अर्थतन्त्रया बारे ध्यान मब्यूगुलिं थप जटिलता वःगु बिचाः प्वंकादिल ।
‘पहुँचया आधारय् संक्रमणया दायरा दुने मलाःपिं मनूत तकं पीसीआर यायेगु होडबाजी जूगु दु । राज्यं सितिकं याइगु ला खःनि धकाः पहुँचया आधारय् परीक्षण यायेगु लँय् वनकि देयया अर्थतन्त्र नियन्त्रण स्वयां पिहा वनेफु ।’
नाकाय् कडाई, अर्थतन्त्र चलायमान
देयया संघीय राजधानी येँइे उद्योग मन्ह्याइबलय् अर्थतन्त्रय् गम्भीर लिच्वः लायेफुगु बिचाः तसें शाक्यं थनया उद्योग–धन्दा लांलां ठप्प जुइबलय् देयया हे अर्थतन्त्रय् नकरात्मक सूचक खनेदइगु धयालिद ।
‘परीक्षणया नामय् खर्च अप्वयेकेगु अले आम्दानीया स्रोतत प्वाःतीगु खःसा झी निखें काइ व झन भयावह अवस्था वयेफु’ शाक्यं धयादिल ।
स्वनिगःयात पूर्णरुपं सील यानाः थन उपलब्ध जनशक्तियात हे परिचालन यानाः उद्योग, कलकारखाना व निर्माणया ज्या न्ह्यःने यंकेगु रणनीति दयेकेत वयकलं इनाप यानादिल ।
‘आः तत्काल उद्योग–व्यवसाय न्ह्याकेगु, ज्याकू चायेकेगु, निर्माणया ज्या न्ह्यःने यंकेगु नामय् म्वाःमदयक नागरिक स्वनिगलय् दुकातकि झन समस्या जुइ’ वयकलं धयादिल । ‘आः थन उपलब्ध जनशक्तियात हे सामाजिक दुरी कायम यायेगु, सुरक्षाया दक्वं उपाय नालेगु यानाः अर्थतन्त्रयात चलायमान दयेकेमाः ।’
हलिं नेवाः दबूपाखें हलिं नेवाः कोभिड १९ कोष दयेकीगु
सुरेन्द्रभक्त श्रेष्ठ | तछलाथ्व तृतीया ११४०
हलिंन्यंक न्यनाच्वंपिं नेवाःतय् कुसा संगठन हलिं नेवाः दबूपाखें हलिं नेवाः कोभिड १९ कोष दयेकीगु जूगु दु ।
दबूया केन्द्रीय वैठकय् थुगु विषयस सहलह यासें थुगु कोष दयेकेगु क्वःज्यूगु खः ।
हलिंन्यंक कोभिड १९ या संक्रमण न्यनाच्वंगु इलय् थुकिं समस्या जूपिं नेवाःतयत ग्वाहालि यायेगु नितिं कोष दयेकागु दबूया केन्द्रीय नायः सिजन श्रेष्ठं धयादिल ।
अथे हे, उगु हे वैठकं हलिं नेवाः मचा ट्यालेन्ट शो यायेगु नं क्वःछ्यूगु दु ।
‘नेवाः भाय्, तजिलजि न्हूगु पुस्ताय् ल्यंकातयेत थ्व मचातयत लःल्हायेमाल । उकिया हे नितिं हलिंन्यंक न्यनाच्वंपिं नेवाः मस्तय् दथुइ हलिं नेवाः मचा ट्यालेन्ट शो यायेगु निर्णय जूगु खः’ केन्द्रीय नायः श्रेष्ठं धयादिल ।
लिसें, वैठकं स्वनिगलय् पिनं वयाः च्वनाच्वंपिं सुकुम्वासीतयत स्वनिगःया जग्गा बी मज्यूगु खँय् बः ब्युसें आइएलओ १६९ कथं स्वनिगलय् च्वनाच्वंपिं मूलवासीपिनिगु छेँबुँ मदुसा उमित जग्गा बीमाःगु खँय् दबुलिं सरोकार क्यनेगु खँ नं क्वःछ्यूगु नायः श्रेष्ठं जानकारी बियादिल ।
थौं जूगु अनलाईन वैठकय् नेपाःया लिसें अमेरीका, क्यानाडा, बेलजियम, बेलायत, पोर्चुगल लिसें थीथी देशय् च्वनाच्वंपिं ज्यासना पुचःया दुजःपिनि ब्वति दुगु खः ।
