Display Style:
Column Style
मनूया आत्महत्याया घटनायात कयाः गृहमन्त्रीलिसे लिसः फ्वन
लहना न्यूज | ने.सं. ११३९ दिल्लागा त्रयोदशि (३० जुलाइ, २०१९), मंगलवाः
सांसदतसें ललिता निवास जग्गा प्रकरणय् दुथ्याःम्ह मनूया आत्महत्याया घटनायात कयाः गृहमन्त्रीलिसे लिसः फ्वंगु दु ।
प्रतिनिधिसभा अन्तर्गत राज्य व्यवस्था तथा सुशासन समितिया थौं मंगलवाः च्वंगु मुँज्याय् नेपाल प्रहरी व प्रदेश प्रहरीया अधिकार सम्बन्धि सहलह जुयाच्वंगु इलय् समितिया दुजःपिन्सं थीथी घटनायात कयाः गृहमन्त्रीया लिसः फ्वंगु खः ।
नेपाली कांग्रेसया सांसद देवेन्द्रराज कँडेलं बालुवाटारया ललिता निवास जग्गा प्रकरणय् दुथ्याःम्ह पूर्व नायव सुब्बा युक्तप्रसाद श्रेष्ठया मृत्यु शंकास्पद जूगु धयादिसें घटनाया सत्यतथ्य पित हयेत माग यानादिल । वय्कलं गुंगू तल्ला च्वं कुतुंवःसां नं सीम्ह श्रेष्ठया म्हय् गनं नं हि खनेमदुगु व आत्महत्या धाःगुलिं ललिता निवास प्रकरण सुचुकेगु नितिं हत्या याःगु ला मखु ला ? धइगु शंका ब्वलंगु धयादीगु दु ।
नेपाल कम्युनिष्ट पार्टीया सांसद झपट रावलं धाःसा न्हियांन्हिथं १०म्ह भ्रष्टाचारीतसें आत्महत्या याःगु न्यने दयेमाः धयादिसें घटनाा सत्यतथ्य सीकेगु स्वयां नं आत्महत्या हे जूगु धइगु ल्याखं थःगु बिचाः तयादिल ।
सांसद डिला संग्रौलां निर्मला पन्त हत्या सम्बन्धय् गृहमन्त्री रामबहादुर थापां गैर जिम्मेवार अभिव्यक्ति बियादीगु द्वपं बियादिल ।
अथे हे सांसद प्रेम सुवालं लुँ काण्ड व निर्मला पन्त हत्या अपराधीयात अझ नं नियन्त्रणय् काये मफूगु धयादिसें अपराधीयात मृत्युदण्ड बीगु प्रावधान तयेगुकथं संविधान संशोधन यायेत सरकारयात निर्देशन बीमाःगु तर्क तयादिल ।
प्यम्ह न्यायाधीशयात छानवीन यायेत समिति नीस्वन
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
न्याय परिषदं उच्च व जिल्ला अदालतय् ज्या यानाच्वंपिं ४म्ह न्यायाधीशयात विस्तृत छानवीन यायेत समिति नीस्वंगु दु ।
प्रधानन्यायाधीश चोलेन्द्र शमशेर राणाया अध्यक्षताय् थौं सोमवाः च्वंगु परिषदया मुँज्यां उच्च अदालत पोखराया न्यायाधीश जीवनहरि अधिकारी, रामचन्द्र यादव व नरबहादुर शाहीयात छानवीन यायेत सर्वोच्चया न्यायाधीश सपना प्रधान मल्लया नेतृत्वय् समिति नीस्वंगु खः ।
क्षेत्राधिकार हे मदुगु छगू निजी कम्पनीया अन्तः शुल्क विवादय् स्वम्हेसितं काजय् परिषद झिके यायेगु क्वःछ्यूगु नं प्रवक्ता मानबहादुर कार्कीं जानकारी बियादीगु दु ।
अथे हे, जिल्ला अदालत येँया न्यायाधीश अर्जुन कोइरालायात छानवीन यायेत परिषदं सर्वोच्च अदालतया न्यायाधीश तेजबहादुर केसीया नेतृत्वय् समिति नीस्वंगु दु । कोइरालां यल जिल्ला अदालतय् दुगु इलय् छगू मुद्दायात कयाः याःगु निर्णय विवादय् लाःगु खः ।
परिषदया थौं सोमवाःया मुँज्यां उच्च अदालतया ३म्ह मुख्य न्यायाधीशयात सरुवा यायेगु नं क्वःछ्यूगु दु । पाटन उच्च अदालतया कुमार चुडालयात सुर्खेत, सुर्खेतया रमेश पोखरेलयात तुलसीपुर व तुलसीपुरया नहकुल सुवेदीयात पाटन सरुवा यायेगु क्वःछ्यूगु दु ।
थ्व हे दथुइ परिषदं सैनिक विशेष अदालतया अध्यक्षय् उच्च अदालत पाटनया न्यायाधीश तेजबहादुर कार्कीयात सिफारिस याःगु दु । न्याय परिषदया सिफारिसय् सरकारं उच्च अदालतया न्यायाधीशयात सैनिक विशेष अदालतया अध्यक्षय् नियुक्त यायेगु व्यवस्था दु ।
सेनाया मुद्दा स्वयेत अलग्ग हे अदालत नीस्वनेगु कानूनी व्यवस्था दु । कोर्ट मार्सलया मुद्दा उगु अदालतपाखें क्वःछीधुंकाः चित्त बुझे मजूसा जक सर्बोच्च अदालततक वये दइगु खः ।
वीर अस्पताल १३० दँ थ्यन
पूर्णिमा शाक्य | दिल्लागा द्धादशी ११३९ (जुलाई २९ २०१९)
दकले ज्येष्ठगु अस्पता वीर अस्पतालं थःगु १३०कःगू बुदिं हन।
चिकित्सा बिज्ञान राष्ट्रिय प्रतिस्थानया रजिस्ट्रार प्रमिला देवानया संयोजकत्वय् जूगु उगु बुदिं हना ज्याझ्वलय् उप-प्रधान, स्वास्थ्य व जनसंख्यामन्त्रि उपेन्द्र यादब मूपाहाँ कथं झायादीगु खः।
थी थी मनोरञ्जनात्मक खेलकूद कार्यक्रमत छवाः न्ह्यनिसे याना न्ह्याकाः हंगु खःसा ज्याझ्वलय् वंगु दछिदुने निभ्रित्त भरण कापिं व सेवा अवधि २५दँ क्यंपिं राष्ट्रसेवक कर्मचारीपिन्त हंगु खः।
येँ मनापाया मेयर छवाःया लागि चीन झायादिल
लहनान्युज | दिल्लागा द्धादशी ११३९ (जुलाई २९ २०१९)
येँं महानगरपालिकाया मेयर विद्यासुन्दर शाक्य छवाःया लागि चीन झायादिगु दु ।
चीनया ल्हासा शहरया ब्बनाय् झायादिम्ह मेयर शाक्य तिब्बतया पोटाला दरबार, जोखाङ् मन्दिर, सेरा मोनाष्ट्री लगायतया थाय्या अवलोकन यानादि ।
उगु पुचलं ल्हासास्थित ४,७१८ मिटर उचाइया स्थानीय पर्यटकीय गन्तव्य नाम्को तालय् वना पर्यटकीय व्यवस्थापनया अवलोकन यायेगु ज्याझः न दु ।
उगु पुचलय् वडा १ या अध्यक्ष भरतलाल श्रेष्ठ, वडा २८ या अध्यक्ष भाइराम खड्गी, कार्यपालिया सदस्यपिं हीरादेवी पोख्रेल, रश्मी खड्का, प्रशासन महाशाखा प्रमुख गणेशप्रसाद थपलिया, अन्तरराष्ट्रिय सम्बन्ध सचिवालयया शाखा अधिकृत यम बसेलसपि उखे झायादिगु खः।
मेयर शाक्य नाप उगु पुचः थ्वहे वइगस साउन २१ गते मंगलवाः लिहा झायादिं । मेयर शाक्य निगू नगर दथुइ वाणिज्य सम्बन्ध, पर्यटन, शिक्षा व संस्कृति आदानप्रदान यायेगु मू उद्देश्य जुगु खँ धाःगु दु ।
मेयर शाक्य थःगु चीन भ्रमणया झ्वलय् कार्यबाहक प्रमुखया जिम्मेवारी उपप्रमुख हरिप्रभा खड्गीयात लः ल्हाःगु दु ।
निःशुल्क स्वास्थ्य उपचार शिविर
नृपेन्द्रलाल श्रेष्ठ | दिल्लागा द्धादशी ११३९ (जुलाई २९ २०१९)
यल महानगरपालिका वडा ल्याः १६या ग्वसालय् निःशुल्क स्वास्थ्य उपचार शिविर जुल ।
उगु ज्याझ्वः रचना आयुर्वेद व हाडजोर्नी नशा उपचार केन्द्रया सह आयोजनाय् जूगु उगु शिविरय् थीथी ल्वय्यालिसें चिनील्वय्, रक्तचापया जाँच व फिजियोथेरापी नं निःशुल्क याःगु खः ।
ज्याझ्वःया कजि वडा ल्याः १६या वडाध्यक्ष निर्मलरत्न शाक्यं थःगु वडाय् थुकथं नियमितकथं स्वास्थ्य शिविर तयाः वडाबासीपिनिगु उसाँय् बांलाकेगु ज्याय् थः सदां न्ह्यानाच्वनेगु प्रतिबद्धता प्वंकादिसे १६ वडां थेरापी शिविरया नितिं १०गू लखतकाफ्यानागु नंजानकारी बियादिल ।
उगु आयुर्वेद स्वास्थ्य शिविरय् १७० म्हेस्यां थःपिनिगु स्वास्थ्य परीक्षण याःगु खः ।
