थ्यंमथ्यं छगू शताब्दि न्ह्यः नेपालभाषा पत्रकारिता न्ह्याःगुयात थौं मातृभाषा पत्रकारिता ख्यलय् दकले न्हापांगु घटनाकथं कयातःगु दु । ने.सं. ११४० बछलाथ्व १४ (थुगुसी २०७७-०१-२४) खुन्हु सकलें मातृभाषी पत्रकारपिं उत्साहित जुयाः मातृभाषा पत्रकारिता दिवस हनेज्या स्थगित जूगु दु ।

थुगुसी धर्मादित्य धर्माचार्यया लुमन्तिइ ५ क्वःगु मातृभाषा पत्रकारिता दिवस हनेगु नितिं उत्साहित जुयाच्वंपिं सकलसिगु न्ह्यःने लूगु कोरोना संक्रमण जोखिम व उकिं सुरक्षित जुइगु नितिं लकडाउनया पालना यासें पत्रकार दबूपाखें नेतृत्व यानाः वयाच्वंगु ¥याली, धर्मादित्य धर्माचार्यया झ्वाताय् स्वां देछायेगु, सभा व मातृभाषा पत्रकारिता सम्मेलन स्थगित यानागु जुल । नापं पत्रकार राष्ट्रिय दबूया यल कचापाखें लःल्हाःगु धर्मादित्य पत्रकारिता सिरपा थुगुसी निरन्तरता बीगु तातुनाकथंया ज्याझ्वः मजुइगु नं थुगु विज्ञप्तिपाखें न्ह्यथनाच्वना ।  

नेपालभाषाया न्हापांम्ह पत्रकार धर्मादित्य धर्माचार्य (जगतमान वैद्य) या बुदिं लाकाः हनेगु ज्या न्ह्याःगु थुगु दिवस थीथी मातृभाषी पत्रकारतय्गु नितिं नं छगू समर्पण, छगू उर्जा जुयाः न्हापांम्ह मातृभाषी पत्रकार नालाः थुगु दिवस हनेगु ज्याया न्ह्यलुवाः नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबू खःसा थुकी एकमत आदिवासी जनजाति पत्रकार महासंघ आवद्ध सकल भाषाभाषी पत्रकारतय्गु संगठननाप मधेसी पत्रकार समाजं क्यंगु दु ।

थौंतक नं मांभाय्यात राज्यं बीमाःगु मानया नितिं संघर्ष न्ह्यानाच्वन तिनि । म्हिगःया व राणाकालीन इलय् नेपालभाषाया माध्यमं प्रकाशन गुलि कँथय् पलाः तयेथें जुइ कल्पना याये थाकु मजू । थजाःगु इलय् थःगु मांभूमिइ च्वनाः थःगु मांभासं च्वयेगु बाय् प्रकाशन यायेगु, प्रचार यायेगु, मां भाय् विकास व विस्तारया ज्या छगू अपराध नालीगु उगु ई ने.सं. १०४५ स्वांया पुन्हि खुनुनिसें भारतया कलकत्ताय् च्वनाः ‘बुद्ध धम्र्म’ नांया धार्मिक पत्रिका पिकयाः वया निदँ लिपा थुगु पत्रिकायात हे ‘बुद्ध–धम्र्म व नेपालभाषा’ धकाः धर्म व साहित्यया पत्रिका सम्पादन याःम्ह धर्मादित्य धर्माचार्य ने.सं. १०२२ बछलाथ्व चतुर्दशी खुन्हु सप्तपुर महाविहार, चिकंबही, यलय् जन्म जुयादीम्ह ब्यक्तित्व खः । अनन्त जीवन दुम्ह वय्कःया भौतिक शरीर थुगु भूमिं बिदा काःगु ने.सं. १०८३ दिल्लागा अमाई खुन्हु खः । वय्कलं खय्भासंं ‘हिमाली बौद्ध’, अंग्रेजीं ‘बुद्धिष्ट इण्डिया’ पत्रिका नं पिथनादीगु खः ।


वय्कःया योगदान आपालं ख्यलय् दुगु लुमंकेबलय् वय्कःयात देछानातःगु पदवी एम्. ए., हिन्दी साहित्य रत्न, बौद्ध साहित्य रत्न, एफ.आर. इकन (लण्डन), धर्म आदित्य, सद्धर्मरत्नाकर, एफ.बि.एम.(बर्मा), कविराज, भिषगरत्न, भिषगारत्न, डी.डी.(होमियो) नं लुमंकेमाःसा वय्कःयात नेपाःया बौद्ध जगतया न्हापांम्ह सुधारवादी ब्यक्तित्व, किन्दो विहारया जीर्णोद्धारया मुख्यम्ह आयोजक, नेपालय् स्वांया पुन्हि खुनु बुद्ध जयन्तीकथं हनेगु थिति हःम्ह, नेपाःगालय् बुद्धधर्म उद्धार संघ, बुद्धोपासक संघ, बुद्धोपासिका संघ दय्कूम्ह, कलकत्ताय् नेपाली बुद्धमार्गी संघ दय्कूम्ह, दार्जिलिंगय् छगू कन्या विद्यालय चाय्कूम्ह, कालिम्पोंगय् उपासक संघ दय्काः पुस्तकालय तःम्ह, कलकत्ता व पटनाया विश्वविद्यालयस नेपालभाषा दुकाय्त कुतः याःम्ह थें जाःगु आपालं ज्यानाप वय्कःया गुण थौं नं सकसिनं लुमंकेगु याः ।

थौं संचार ख्यःयात राज्यया प्यंगूगु अंगकथं मान्यता बियातःगु दुसा समाजं नं उत्तिकं हे मान ब्यू । नेपाः देसय् जक मखु संसारय् हे वःगु ततःधंगु ह्यूपालय् संचार ख्यः छगू शक्ति जुयाः उर्जा तनाबीगु थुइके थौं थाकु मजुइधुंकल । थौंया उपलब्धिया खँ न्ह्यथनेबलय् सदां नं न्हापांम्ह मातृभाषी पत्रकार धर्मादित्य धर्माचार्य व वय्कलं मातृभाषा पत्रकारिता ख्यलय् दयेकादीगु आधार “बुद्धधर्म व नेपालभाषा” लुमंकेमाः । वय्कःया कर्म व योगदानयात राज्य नं म्हसीकेमा । न्हापांम्ह मातृभाषी पत्रकारकथं वय्कःयात मान बीमा । वय्कलं थुइकादीगु मातृभाषा पत्रकारिताया महत्वयात आत्मसात् याये हे माः ।

स्थगित यानागु मातृभाषा पत्रकारिता सम्मेलन व धर्मादित्य पत्रकारिता सिरपा ई अनुकूल जुइवं ग्वसाः ग्वयेगु सुचं नं नेवाः पत्रकार राष्ट्रिय दबूपाखें पितब्यूगु विज्ञप्तिइ उल्लेख जूगु दु ।