Display Style:
Column Style
पत्रकारपिन्त ग्वाहालि
सुरज, लहनान्युज | बछलागाः चतुर्थी ने.सं. ११४० (बैसाख २८ २०७७) आइतवाः
कोरोना भाइरस कोभिड १९ या माहामारीया थुगु इलय् लकडाउनपाखें प्रभावित पत्रकारपिन्त उपत्यका सरोकार मञ्च व उपत्यका व्यापि सडक विस्तार पीडित संघर्ष समितिं थीथी नसात्वँसा ज्वलं ग्वाहालि याःगु दु । मञ्च व समितिं जाकि, क्येँ, दालमोठ, बजि, लाखामरी, चिनी, आँटा, तरकारी थें जाःगु झिंगुता नसाज्वलं ग्वाहालि याःगु खः । उगु नसाज्वलं नेवाः पत्रकार राष्ट्रिय दबूया संयोजनय् समस्याय् लाःपिं पत्रकारपिन्त लःल्हायेगु ग्वसा दुगु खः ।
नायः सुमन सायमिया धापू https://youtu.be/6cydoXf5gUU
उपत्यका सरोकार मञ्च व उपत्यका व्यापि सडक विस्तार पीडित संघर्ष समितिया नायः सुमन साय्मि, न्वकू विद्या श्रेष्ठ, छ्याञ्जे रविन्द्रकुमार श्रेष्ठ व दुजः विकासबाबु श्रेष्ठं उगु नसाज्वलं लःल्हानादीगु खःसा पत्रकार राष्ट्रिय दबूया केन्द्रीय अध्यक्ष सुरजवीर बज्राचार्य, यल जिल्ला अध्यक्ष सागर महर्जननापं यल जिल्ला कार्यसमिति दुजःपिन्सं उगु ग्वाहालि लःल्हानाकयादीगु खःसा स्वनिगःया नेवाः पत्रकारतय्त लःल्हायेगु धाःगु दु ।
थुखे किर्तिपुर नगरपालिकां नं पत्रकारपिन्त नसाज्वलं ग्वाहालि याःगु दु । नगरपालिकां जाकि, क्ये थेंजाःगु न्हियान्हिथं माःगु ज्वलं ग्वाहालि याःगु खः । नगरपालिकापाखें मेयर रमेश महर्जन, उपमेयर सरस्वती खड्कां लःल्हानादीगु नसाज्वलं नेवाः पत्रकार राष्ट्रिय दबूपाखें वरिष्ठ उपाध्यक्ष नृपेन्द्रलाल श्रेष्ठ, महासचिव सुनील महर्जन व दाँभरी सुरेन्द्रभक्त श्रेष्ठ, मूदुजः नविन जाेशी व अनुप प्रधानपिन्सं ग्वाहालि ज्वल लःल्हानाकयादीगु खः ।
कपिलवस्तुइ मेपि १० म्ह कोरोना संक्रमण पुष्टि
लहनान्युज | बछलागा चतुर्थी ११४०, बेसाख २९ सोमवाः
कपिलवस्तुइ मेपि १० म्हसित कोरोना संक्रमण पुष्टि जुगु दु ।
थ्व नाप नेपालय् कोरोना संक्रमित जुपिनिगु ल्याः १२० म्ह थ्यःगु दु धका स्वास्थ्य तथा जनसंख्या मन्त्रालयं धाःगु दु ।
मन्त्रालयया कथं न्हुपि संक्रमित जुपिनिगु ल्याः कपिलवस्तुइ यशोधरा गाउँपालिका वडा नं. ५ व बुद्धभुमि नगरपालिका वडा नं. ७ व १० यापि खः ।
एम्बुलेन्सय् मनू ह्यःगुलि निम्हेसित कारबाही यात
लहनान्युज | बछलागा चतुर्थी ११४०, बेसाख २९ सोमवाः
बाराया विश्रामपुर गाउँपालिकाय् एम्बुलेन्सय् मनू ह्यःगुलि निम्हेसित कारबाही याःगु दु ।
एम्बुलेन्स चालक बाराया बिश्रामपुर गाँउपालिका २ च्वम्ह २४ दँया राजन पटेल व वडा नं.३ याम्ह २७ दँ याम्ह अनिल पटेल कारबाही याःगु दु ।
करोना संक्रमण नियन्त्रण व रोकथामया लागि देय् यकं लकडाउन जुयाच्वंगु इलय् एम्बुलेन्सय् तया मनूत ल्ह्ययेगु याना च्वंगुलि इपि निम्हसित सशस्त्र प्रहरीं नियन्त्रणय् काःगु खः ।
भारतीय मनू तयेत एम्बुलेन्सय् तया नेपाः दुत हया च्वंगु इलय् बोर्डर आउटपोष्ट बरैनियाया टोलीं इमित ज्वःगु खः ।
भारतया पटना च्वपिन्त येँ च्वम्ह ४५ दँयाम्ह अमृत कुमारं इमित बारा विश्रामपुर गाउँपालिका ३ य् मुसर्वा नाकापाखे नेपाः दुत हयेत्यःगु खः । एम्बुलेन्स नियन्त्रणय् कया सशस्त्र प्रहरीं प्रहरी चौकी बलिरामपुरय् जिम्मा बिःगु खः ।
सुकुम्वासी आयोगया खँय् हलिं नेवाः दबूया आपत्ती
विकाश | बछलागा तृतीया ११४०
हलिंन्यंक च्वनाच्वंपिं नेवाःतय् कुसा संगठन विश्व हलिं नेवाः दबुलिं नेपाल सरकारं सुकुम्वासीतयत ६ आना जग्गा बीगु धकाः याःगु निर्णय प्रति आपत्ती प्वंकूगु दु ।
दबूया केन्द्रीय मुँज्याय् थुगु विषयस सहलह यासें हलिंन्यंक लिसें नेपालय् नं कोभिड १९ या संक्रमण न्यनाः सकलें लकडाउनय् च्वनाच्वंगु इलय् सुकुम्वासी आयोग हयेगु लिसें थुकथंया निर्णय यायेगु पायछि ज्या मखूगु धाःगु खः ।
स्वनिगःया रैथाने नेवाःतयत विस्थापित याइगु कथंया पलाः नेपाल सरकारपाखें ल्ह्वन धाःसा नेपाःया खलःपुचः सकललिसे जानाः दबूपाखें नेपाल सरकारयात अन्तर्राष्ट्रिय कानून कथं मुद्दा न्ह्याकेगु निर्णय जूगु दबूया नायः सिजन श्रेष्ठं जानकारी बियादिल ।
दबूया अनलाईन वैठकय् नेपाल लिसें अमेरिका, क्यानडा, लन्डन, इजरायल व थीथी यूरोपीय देशय् च्वनाच्वंपिं ज्यासना पुचःया दुजःतय् ब्वति दुगु खः ।
राहत मखसें रोजगार बीगु नीतिइ नगरपालिका फोरम
बिराजकाजी राजोपाध्याय | बछलागा तृतीया ११४०,बैसाख २८ गते
उपत्यका नगरपालिका फोरमं आः राहत बीगु मयासें दक्ष जनशक्तियात लजगाः बीगु निर्णय याःगु दु ।
संघीय सरकारं न्ह्याकातःगु लकडाउनयात पालना यासें सक्षम जनशक्तियात श्रम व लजगाःलिसें स्वानाः अर्थतन्त्रयात चलायमान दयेकेगु निर्णय नगरपालिका फोरमं याःगु खः ।
स्वनिगः दुनेया निगू महानगर व १६ नगरपालिकाया मेयर–उपमेयरतय् मंकाः संगठन उपत्यका नगरपालिका फोरमया बैठकं थथे निर्णय याःगु खः ।
‘संघीय सरकारं लकडाउन छुं छ्वासुकेगु निर्णय याःगु अवस्थाय् न्हापा थें राहत बीमाःगु अवस्था दइमखु’ कामपा प्रमुख शाक्यं धयादिल । ‘अथेसां भुथू हे मच्याइगु अवस्था दुसा जिपिं ग्वाहालि यायेत तयार दु ।
प्रमुख शाक्यं अत्यावश्यक उद्योगत न्ह्याकेत सहजीकरण यासें लकडाउन पालना यायेगु याकेगु निर्णय नं बैठकय् जूगु जानकारी बियादिल ।
आगमनयात व्यवस्थित यासें संक्रमण रोकथाम व नियन्त्रणया लागिं स्वनिगः दुहांवयेगु नाकाय् वयेधुंकाः जक पनेगु मयासें गनं वःगु खः अन हे वयेवने याकेमबीगु व्यवस्था ताःलाकेत संघीय सरकारयात इनाप यायेगु निर्णय नं वैठकय् जूगु दु ।
मजिमगाःगु ज्याया लागिं स्वनिगः दुहां वयेमाःगु बाध्यता हे खःसा अनुमति कयाः जक दुहां वयेदइगु व्यवस्था यायेत नं इनाप यायेगु निर्णय वैठकं याःगु दु ।
छुं दिं न्ह्यः तिनि नगरपालिका फोरमया पदाधिकारीं कोभिड–१९ सम्बन्धी उच्चस्तरीय समन्वय समितिया कजि तकं खःम्ह उपप्रधान अले रक्षामन्त्री ईश्वर पोखरेलयात नापलानाः स्वनिगलय् निर्वाध वयेवनेयात कडाई यानाः स्वनिगलय् लकडाउन छुं छ्वासुकेमाःगु माग याःगु खः ।
‘वयेवनेगुलिइ कडाई यायेगु व निश्चित क्षेत्र दुने सामाजिक दूरी तयाः आर्थिक ज्याखँ चलायमान यानातयेगु खःसा संक्रमणं नं तापायेफइ, भविष्यय् जुइफुगु आर्थिक संकटयात नं छुं हदतक्क क्वपालेफइ’ शाक्यया धापू खः ।
मध्यपुर ठिमी नगरपालिकाया प्रमुख अले नगरपालिका फोरमया सचिव मदनसुन्दर श्रेष्ठं बैठकय् संक्रमणया खँय् शंकास्पद मनूत तयेत क्वारेन्टाइनया व्यवस्थापन यायेत संघीय सरकारयात इनाप यायेगु निर्णय जूगु जानकारी बियादिल ।
‘वइगु दिनय् विदेशं तःधंगु ल्याखय् नेपाली नागरिकतयत उद्धार यानाः थन हयेमालेफु । अज्याःगु अवस्थाय् स्थानीय तगिमं थःथःगु पहलं क्वारेण्टाइन दयेकेबलय् आपाः खर्च जुइ’ श्रेष्ठं धयादिल । ‘स्वनिगलय् क्वारेण्टाइनया व्यवस्थापन संघीय सरकारं यायेगु व उकिया लागिं माःगु ग्वाहालि स्थानीय तगिमं यायेगु निर्णय बैठकं याःगु दु ।’
फोरमं थ्वयां न्ह्यः हे छगू प्रदेशं मेगु प्रदेश, छगू जिल्लां मेगु जिल्ला व छगू स्थानीय तगिमं मेगु स्थानीय तगिमय् निर्वाध रुपं वयेवने यायेबलय् संक्रमणया खतरा अप्वइगु धासें अथे मयायेत इनाप याःगु खः ।
