Display Style:
Column Style
नेपाःया बजारय् लुँ भाःया न्हुगु रिकर्ड
लहनान्युज | गुंलाथ्व तृतिया ११३९ (अगष्ट ४ २०१९)
नेपाःया बजारय् लुँ भाः आतक हे दकलय् अप्वोगु दु । नेपाल सुन चाँदी व्यवसायी संघं थौं आइतवाः लुँया भाः छापावाल लँ छगु तोलाया भाः ६६ द्धः व स्वसः कायम याःगु दु ।
अथेहे थौंया लागि तेजाबी लुँ छगु तोलाया ६६ द्धः तक कायम याःगु खः ।
नेपाल सुनचाँदी व्यवसायी संघं लुँया भाः नेपालय् दकलय् अप्वो धका धाःगु खः।
वःगु शुक्रवाः छगु तोला लुँ भाः ६५ द्धः च्यासः थ्यंगु खः ।
अमेरिकी केन्द्रीय बैंकं ०.३ प्रतिशतय् ब्याजदर घटे याःगु लिच्वः कथं थथे लुँया भाः खय् लाःगु खः ।
ब्यवसायी तयेत धम्की बिइम्ह गिरीयात ज्वन
गुंलाथ्व तृतिया ११३९ (अगष्ट ४ २०१९)
भारतया थी थी शहरय् च्वना च्वपि नेपाली व्यवसायी तयेत धम्क्ये याःगु आरोपय् छम्हेसित ज्वःगु दु ।
उम्ह मनू यलया ३० दँया उदय गिरी खः ।
महानगरीय अपराध अनुसन्धान महाशाखा, टेकुया एसपी केदार ढकालय कथं गिरीं थी थी थासय् फरक फरक मितिइ नेपाली व भारतीय मोबाइल नम्बर छ्यला व्यवसायीपिन्त अथे ख्याच्वः बिया वया च्वंगु खः ।
छायाँदेवी कम्पलेक्स विरुद्ध सभा
नृपेन्द्रलाल श्रेष्ठ | गुंलाग्व तृतिया ११३९ (अगष्ट ४ २०१९)
विवादित छायाँदेवी कम्पलेक्स विरुद्ध थौं आईतवाः सुथय् स्थानीय, सम्पदा अभियान्तापिन्स वंघलं छगु जुलुस पिकाःगु दु ।
उगु जुलुस वंघः मुना अभियन्तापिन्स नारावाजी यासे छायाँ सेन्टर भवन न्ह्यःने थ्यका छगु कोणससभा याःगु खः ।
उगु जुलुसय् छायाँ सेन्टर थुने माःगु, सम्पदाय् अतिक्रमण बन्द याः, सम्पदा न्ह्यंके मजुउ धका नारा थ्वयेका ठमेलय् छायाँदेवी सेन्टर न्ह्यःने कोणसभा यासे उगु विरोध ज्याझ्वः याःगु खः ।
अन जुगु सभाय् सम्पदा अभियान्ता भागवत प्रधान, कानुनी विज्ञ जुजुकाजी महर्जन, नेवाः राजनीतिक अभियानया रविन्द्र श्रेष्ठ, फास्ट ट्रयाक जनसरोकार समितिया नेपाल डंगोल पिन्स पुखू न्ह्यका दय कुगु छायाँदेवी सेन्टरयात थुने माःगु बिचाः तयादिगु खः ।
असन कोथुननि बचाउ अभियान समिति, सेभ नेपाः भ्याली, नेवाः ग्वाहाली पुचः, उपत्यकाव्यापी सडक विस्तार पीडित संघर्ष समिति नाप थीथः खल पुचः पिनगु ब्बति दुगु खः ।
सम्पदा अभियान्ता सुरेन्द्र महर्जनं न्ह्याकादिगु उगु ज्याझ्वलय् प्रेम सिलाकार लसकुस यानादिगु खः । ऐतिहासिक सम्पदा कमलपोखरी अतिक्रमण याना व्यापारिक कम्पलेक्स छायाँ सेन्टेर निर्माण जुगु इलय् निसे स्थानीय, सम्पदा अभिन्तापिन्स कडा विरोध याना वया च्व.गु खः ।
नेवाः सूचना केन्द्रया निक्वःगु दँमुँज्या
लहनान्युज | गुंलाथ्व चौथी ११३९ (अगष्ट ४ २०१९)
‘थःथः सहलह ब्याके नेवाः ज्याझ्व फयां फछि मल्वाके’ धैगु नारा ज्वना न्ह्यावःगु नेवाः सूचना केन्द्रया निक्वःगु दँमुँज्या क्वचाःगु दु । उगु ज्याझ्वलय् मदुम्ह बाखं च्वमि अष्टमुनि गुभाजुया ‘मनू–नुगः’ सफू न पितब्वज्या प्रतिभा समाज, सातोआकि भवनया हलय् जूगु खः ।
राजेन्द्र रञ्जितया सभाधक्ष्यताय् जुगु उगु ज्याझ्वलय् भाषासेवी नाप समाजसेवी हितकरवीर सिंह कंसाकार मुपाहाँ कथं झायादीगु खः । ज्याझ्वलय् सरस्वती तुलाधरं लसकुस न्वचू तयादीगु खःसा रमिता बज्राचार्यं ज्याझ्वः न्ह्याकादीगु खः ।
मदुम्ह अष्टमुनि गुभाजुया बाखंमुना सफू ‘मनू–नुगः’ मूपाहाँ कंसाकार व वरिष्ठ बाखं च्वमि, भाषासेवी राजा शाक्यं मंकाः कथं पितब्वज्या यानादीगु खः ।
ज्याझ्वलय् नेवाः देय् दबूया नायः नरेश ताम्राकार, डा. पुष्प राज राजकर्णिकारं नेवाः सूचना केन्द्र नीस्वंगु तातुना व आवश्यक्ता बारे ध्वाथुइकादिगु खः । सफूया प्रकाशक सरस्वती बज्राचार्यं मदुम्ह अष्टमुनि यानावयाच्वंगु भाषा सेवां प्रभावित जूगु व वय्कलं नेपालभासं च्वयातःगु सफू प्रकाशित यायेगु खँय् थः आकर्षित जुयाः थम्हं फुगुचाःगु ग्वाहालि यानागु खँ कनादिल ।
मदुम्ह अष्टमुनिया बारे समालोचक पूर्ण ताम्राकारं चर्चा यानादिसे पितब्वज्या जूगु सफुतिइ सामाजिक नापं मार्मिक १४ पु बाखं दुथ्याःगु व अतिकं सान्दर्भिक जूगुलि सकसिनं थुगु सफू छक्वः स्वयेहे माःगु खँय् बःबियादिल ।
नेवाः सूचना केन्द्रं मुंकूगु बुखँ संम्प्रेषण यानाः ग्वाहालि यानावया च्वंगु मिडियात नेवाः अनलाइनन्युज, लहनान्युज डट् कम, झीगु डट कम, तिकिझ्याः वाःपौ व नेपालभाषा टाइम्सयात मूपाहाँ कंसाकारं सुभाय् पौ लःल्हानादीगु खः ।
अथेहे उगु दँमुज्यां न्हूम्ह नायः नरेन्द्र श्रेष्ठयात सर्वसम्मतिं ल्यःगु दु ।
टङ्कप्रसाद–रमादेवी पाठक पत्रकारिता पुरस्कार लल्हात
लहनान्युज | गुंलाथ्व तृतिया ११३९ (अगष्ट ४ २०१९)
टङ्कप्रसाद–रमादेवी पाठक पत्रकारिता पुरस्कार–२०७५ पाखे नेपाल पत्रकार महासङ्घया पूर्वअध्यक्ष शिव गाउँलेयात लल्हाःगु दु ।
टङ्क–सरिता फाउण्डेशनं येँ छगु ज्याझ्वः दथुइ नेपाल कम्युनिष्ट पार्टी (नेकपा) या वरिष्ठ नेता माधवकुमार नेपालं गाउँलेयात उगु सिरपा लःहाःगु खः ।
गाउँलेयात भ्रष्टाचार विरुद्ध बुखँ च्वंयादिगुनि निद्धः अमेरिकी डलर राशि पुरस्कार लल्हाःगु खः ।
अथेहे टङ्कप्रसाद–रमादेवी पाठक पत्रकारिता प्रोत्साहन पुरस्कार–२०७५ वरिष्ठ पत्रकार चन्द्र भण्डारी व देवीका घर्तीमगरयात लल्हाःगु खः ।
थुगु सिरपा ५०० डलर नगद नाप हनापौ न लल्हाःगु खः । अथेहे द्धःछि डलर राशि दुगु ‘हेम–सरिता पाठक अन्तर्राष्ट्रिय सङ्गीत पुरस्कार–२०७५’ पाखे वरिष्ठ जनवादी गायक जेवी टुहुरेयात लल्हाःगु खः ।
