Display Style:
Column Style
येँ महानगरं ३१ द्धः १८४ म्हसित राहत बिल
नृपेन्द्रलाल श्रेष्ठ | चौलागा तृतिया ११४०, चैत्र २८
येँ महानगरपालिकां चैत २६ गते तक ३१ द्धः व १८४ म्हसित राहत बिगु दु । राहत वितरण लगायतया विषयय् समिक्षा नगर कार्यपालिकाया ४४क्वःगु बैठक याःगु दु ।
उगु बैठकं कोरोना भाइरस (कोभिड–१९) सम्वन्धि राहतवितरण मापदण्ड–२०७६ याःगु खः । थ्व नाप येँ महानगपालिका दुने च्वना च्वपि असाहय, अतिविपन्न व न्हिया न्हिथं ज्यायाइपि मनूतयेगु पहिचान याना इपित महानगरं राहत बिगु खः ।
अथेहे राहत इनेगु लागि १ मार्च २०२० (२०७६ फागुन १८) लिपा विदेश भ्रमण याना महानगरपालिका दुने च्वना च्वपिनिगु विवरण संकलन महानगरपालिकां न्ह्याकुगु दु । उगु बैठकय् चैत २६ गते तक येँ महानगरपालिकाय् १३४ म्ह बिदेश लिहा वया च्वपि दुगु जानकारी बिगु खः ।
बुधबार तकया तथ्याङ्क अनुसार वडा–३१ य् दकदय् अप्वो ३ द्धः व च्यासःयात राहत बिगु खः । अथेहे वडा–७ य् २ द्धः व ३९६ म्हसित राहत बिगु खः । वडा–१० य् २०२० म्हसित, वडा–१६ य् १७१९ म्ह नाप वडा–१५ य् १५२० व वडा–६ य् १४७६ म्हसित राहत बिगु दु ।
येँ महानगरपालिकाया मेयर बिद्यासुन्दर शाक्यं आतकया राहत वितरण लगायतया विषयया समिक्षा बैठक च्वनागु जानकारी बियादिगु खः । ‘आतकया राहत इनेगु झ्वलय् जुगु कमी–कमजोरी, राहत इनेगुलि समस्या लगायतका विषयय् सहलह यायेत बैठक सःतागु धका,’ मेयर शाक्यले धयादिगु खः, ‘राहत इनगुलि अझ प्रभावकारी यायेत छु याये मालि धइगु विषयय् सहलह जुगु खः । महानगरपालिका वइगु दिनय् कोरोना संक्रमण फैले मयायेत अझ प्रभावकारी ढंग न्ह्या वनेगु जुइ धका धयादिगु खः ।’
लिपागु तथ्याङ्क अनुसार येँ महानगरपालिकां ३७ द्धः व ७९० म्हसिगु राहत वितरण यायेगु पहिचान याःग दु । २४ द्धः व ३१९ म्हसित थःगु हे स्रोतपाखे राहत वितरण यायेग अथेहे, थीथी स्रोतपाखे ६ द्धः व ८६५ म्हसित वितरण याइ ।
येँ महानगरपालिकां राहत वितरणय् एकद्वार प्रणालीपाखे यायेगु निर्णय यागुलि थीथी संघ–संस्थां न गन वडाय् राहत इनेगु खः अनया हे जनप्रतिनिधि नाप समन्वय याना वितरण यायेगु महानगपालिकां जानकारी बिगु खः ।
वडा वडाय् राहत वितरण यायेगु ज्याझ्वलय् संघीय सांसद जीवनराम श्रेष्ठ, प्रदेश सांसद राजेश शाक्य लगायत पिनिगु न दुगु खः ।
राहत वितरण व्यवस्थापनबारे सिकेत प्रमुख शाक्य, उपप्रमुख हरिप्रभा खड्गी (श्रेष्ठ), महानगर पालिकाया प्रमुख प्रशासकीय अधिकृत एकनारायण अर्याल, काठमाडौंया प्रमुख जिल्ला अधिकारी जनकराज दाहाललगायत पिन थ्यःगु खः ।
बुंगद्यःया न्हवं क्वचाल
लहनान्युज | चौलागा तृतिया ११४०, चैत्र २८
लकडाउनया दथुइ बुंगद्यःया न्हवं क्वचाःगु दु । लगंख्यः दथुइ च्वंगु दबुली बुंगद्यःया मां यक्षयारनी मायदेवी देगः नापसं तयाः बुंगद्यःया न्हवं याःगु खः ।
लकडाउनया कारणं ंबुंगद्यःया न्हयवं स्वयेगु लागि मनूत धासा खनेमदु ।
वर्षा व सहकालया द्यः धका बुंगद्यःयात दँय्दसं चैतकृष्ण पारु कुन्हु लगंख्यलय् न्हवं याकेगु याइ खः ।
न्हवं याकेगु इलय् मनोहरा तीर्थ, सिलु तीर्थ, गंगा तीर्थ, विष्णुमति तीर्थ व सपन तीर्थया लः हया न्हवं याकेमाःगु चलन दु ।
नेपाल संवत् ४३३ निसें जुजु रिपु मल्लं बुंगद्यःया न्हवं याकेगु चलन न्ह्याकूगु धाइ ।
महादेव मखन क्लबया ग्वसालय् हिंदान ज्याझ्वःः
नृपेन्द्रलाल श्रेष्ठ | चौलागा पारु ११४०, चैत्र २७
महादेव मखन क्लबया ग्वसालय् थौं बिहिवाः हिदान ज्याझ्वः जुगु दुु । हनुमानध्वाखाया महाद्यःया देगः न्ह्यःने जूगु हिदान ज्याझ्वलय् २८ म्हेसिया अन हिदान याःगु दु ।
थौंकन्ह्य कोरोना भाइरस संक्रमणया खतरायात ध्यानय् तयाः सरकारं लकडाउन जारी याःगु खः ।
लकडाउनया कारण हे स्वनिगलय् हिया अभाव खने दयाच्वंगु दु । थ्व हे अभाव पूर्ति यायेगु लागि ब्लड डोनर्स एशोसियसनपाखें डोर टु डोर हिदान ज्याझ्वः न्ह्याका वयाच्वंगु खः ।
थ्व हे कारण हे मखनय् २८ क्वःगु डोर टु डोर हिदान ज्याझ्वलय् एशोसियसन काठमाडौं जिल्लाया सचिव व डोर टु डोरया संयोजक अनिल रत्न तुलाधरं कनादिगु खः । आतक डोर टु डोर पाखें १४ सय पिन्ट हि मुंकेधुनागु खँ नं वय्कलं धयादिगु खः ।
उगु ज्याझ्वलय् ब्लोडानया अध्यक्ष सानुबाबु प्रजापति, कोषाध्यक्ष मचाकाजी महर्जन, महादेव मखन क्लबया नायः नाप २४ वडा सदस्य विनोद तुलाधर, सचिव इन्द्रमणी कपाली, कोषाध्यक्ष सम्झना जोशी, सहसचिव अनुप श्रेष्ठ लिसें क्लबया दुजःपिंसं हिदानया निंतिं सहजीकरण यानादीगु खः ।
स्वनिगःपाखे लित छ्वयेगु निर्णयपाखे लिचिल
लहनान्युज | चौलागा पारु ११४०, चैत्र २७
येँ लकडाउनया कारण अलपत्र जुयाच्वपिन्त स्वनिगः पिने छेँय् छ्वय्गु निर्णय नं सरकार लिचिगु दु ।
थुगु निर्णयलय् प्रदेश सरकार लिचिगु कारणं संघीय सरकार याःगु थःगु निर्णयय् या डेढ घण्टा लिपा हे लिचिगु दु ।
कोरोना भाइरस (कोभिड(१९)या सक्रमण फैले मजुइमा धका सरकारं वःगु ११ चैत निसे लकडाउन याना तःगु खः ।
सरकार याःगु लकडाउन वैशाख ३ तक याना तःगु दु ।
थुकिया कारणं येँ च्वपि मनूत नयेगु समस्या जुया न्यासि वना तक छेँय् लिहा वःगु दु ।
थुकिया कारण स्वनिगलय् अलपत्र जुया च्वपिन्त छेँय् लित छ्वयगु निर्णय याःगु खः ।
उपप्रधान तथा रक्षामन्त्री ईश्वर पोखरेलं सरोकारबाला मन्त्रीपिन्त सःता स्वनिगलय् च्वपिन्त कन्ह्य व कसं छेँय् लितः छ्वयेगु निर्देशन बिःगु खः ।
तर, प्रदेश सरकारपिन्स विरोध याःगु खः ।
बजारय् वासःया अभाव मदु
शोभा श्रेष्ठ | चौलागा पारु ११४०
बजारय् वासःया अभाव मदुग वासः व्यवसायीतयसं धाःगु दु ।
बजारय् वासः न्यायेगु मदु धकाः वयाच्वंगु खँ दक्वं हल्ला जक जूगु व दक्वं वासः बजारय् दुगु व्यवसायीतयसं धाःगु खः ।
छुं दिं न्ह्यः जक बजारय् सिटामोल तकं न्यायेगु मदु धकाः हल्ला जूगु खः । थुगु खँया खण्डन यासें वासः व्यवसायी अनुपरत्न बज्राचार्य सिटामोल जक मखु, सुगर, प्रेसर लगायतया दक्वं वासः माःगु ल्याखय् दुगु स्पष्ट यानादिल ।
वासः मदइ धइगु ल्याखं मनूतयसं वासः अप्वः न्यानाः छेँय् स्टक तयेगु याःगुलिं जक छुं दिं बजारय् वासःया अभाव थें खनेदुगु बज्राचार्यया धापू खः ।
उत्पादन व वितरण न्हापा सामान्य अवस्थाय् थें हे जुयाच्वंगु दुगु व गुगु नं कथंया अभाव मदुगु वयकलं धयादिल ।
‘थःत माःगु ल्याखय् जक वासः न्यायेगु यानादिसँ, वासः मदइ धकाः ग्यायेमाःगु अवस्था मदु । वासः अप्वः न्यानाः स्टक तलकि जक समस्या खनेदयेफु’ शाक्यं सकसितं इनाप यानादिल ।
