Display Style:
Column Style
ज्वेल्स् बचतया गुक्वःगु दँमुज्या
नृपेन्द्रलाल श्रेष्ठ | कछलाथ्व अष्टमी ११३८ (नोभेम्वर १७ २०१८)
ज्वेल्स् बचत तथा ऋण सहकारी संस्था लिमिटेडया गुक्वःगु साधारण सभा थौं जुगु दु ।
थौं जुगु उगु ज्याझ्वलय् मूपाँहा नेपाल बचत तथा ऋण केन्दिय सहकारी संघया बरिष्ठ उपाध्यक्ष पारितोष पौड्यालं उलेज्या यानादील ।
अथेहे थौंया ज्याझ्वलय् जेष्ठ नागरीक हने नाप बांलापि बचतकर्ता यात हने ज्या जुगु खः ।
संस्थाया नाप किरणभाई बज्राचार्यं प्रगति बिवरण व कोषाध्यक्ष प्रज्ञाराज शाक्यं आर्थिक प्रतिवेदन न्ह्यब्बयादीगु खः ।
थौया उगु मुँज्याय् प्रदेश ३ या सांसद शोभा शाक्य, अन्तर सहकारी कोषया अध्यक्ष नेमवीर शाक्य, नेपाल सुनचाँदी ब्यवसायी महासंघया बरिष्ठ उपाधक्ष्य माणिकरत्न शाक्य व ललितपुर उद्योग वाणिज्य संघया अधक्ष्य कृष्णलाल महर्जनपाखें न भिंतुना न्वचु बियादीगु खः ।
पोखराय् कन्हय बेलुनया उलेज्या
नृपेन्द्रलाल श्रेष्ठ | कछलाथ्व अष्टमी ११३८ (नोभेम्वर १६ २०१८)
बेलुन नेपाल प्रा.लि.या ग्वसालय् कन्ह्यनिसें पोखराया धम्पूस धइगु थासं बेलुनय् च्वनाः पोखराया दृश्यावलोकन याये फइगु जुगु दु । थौ छगु पत्रकार सम्मेलनयान थुगु खँया जानकारी बियादीगु खः ।
कन्ह्य छगु ज्याझ्वःया दथुइ ४नम्वर प्रदेशयन मुख्यान्त्री पृथ्वीसुब्वा गुरुङ्गं उलेज्या यानादीगु ज्याझ्वः दु ।
छगः बेलुनय् च्याम्ह जक च्वने फइगु अथेहे नेपाःमि छम्हेसिया लागि ११००० तका व विदेशी पर्यटकया नितिं १६० डलर शुल्क तयातगु धका प्रा.लिया सचिव प्रबिण महर्जनं प्रेस सम्मेलन पाखें जानकारी बियादीगु खः ।
छगः बेलुनय् च्याम्ह जक च्वने फइगु अथेहे नेपाःमि छम्हेसिया लागि झिंछसः तका व विदेशी पर्यटकया नितिं १६० डलर शुल्क तयातगु धका प्रा.लिया छ्याञ्ज्ये प्रबिण महर्जनं प्रेस सम्मेलनय् जानकारी ब्यूगु खः ।
नेपाल सरकार, पर्यटन मन्त्रालय, नेपाल उडड्यन प्राधिकरणलिसे इजाजत कयाः न्ह्याकूगु उगु हट बेलुन एडभेन्चरय् लिपा वनाः हट बेलुनं हे बन्जी जम्प यायेगु अले स्काई डाइभथें ज्याःगु रोमाञ्चकारी कासा नं यायेगु ग्वसाः दूगु खँया बेलुन नेपाल प्रा.लि.या विक्रम बाडें जानकारी बियादीगु दु ।
पद्मरत्न बिचाः मुज्या जुल
नृपेन्द्रलाल श्रेष्ठ | कछलाथ्व अष्टमी ११३८ (नोभेम्वर १६ २०१८)
पद्मरत्न विचाः हायेकाः ग्वसाः खलः न थौं शुक्रवाः येँया बसन्तपुरय् छगु ज्याझ्वः यासें मदुम्ह नेवाः न्ह्यलुवाः, नेपाल संवत आन्दोलनया प्रणेता, मानवअधिकार आन्दोलन न्ह्यलुवा पद्मरत्न तुलाधरया १३ न्हिया पूण्यतिथि लाका विचाः हायेका ज्याझ्वः जुगु दु ।
उगु ज्याझ्वलय् थःगु नुगः तयादीसें उपप्रधान नापं रक्षामन्त्री पोखरेलं पद्मरत्न तुलाधर भाषा आन्दोलन, नेपाल संवत आन्दोलन नाप नेपालय् जुगु दक्को राजनीतिक हिउपा हयेगु आन्दोलनय् क्रियाशील न्ह्यलुवाः खः धइगु विचाः तयादीगु खः । तुलाधरया नामय् प्रतिष्ठान स्वनेत जनस्तरं हे प्रतिष्ठान नीस्वनेमाःगु विचाः तयादीसे सरकारपाखें माःगु ग्वाहालि यायेत थःम्ह माःगु पलाछित तयार दु धका न धयादील ।
अथेहे जनकवि दुर्गालाल श्रेष्ठं पद्मरत्न सीइगु मदु, सी नं मखु धयादिसें पद्मरत्न झी नापं हे दु, पद्मरत्न गुबलें सीमखु, सिइत नं वःगु मखु धयादीगु दु । नाप मदुम्ह तुलाधरया सहकःमि दमननाथ ढुंगानां तुलाधरं शान्ति प्रक्रियाय् ज्वः मदुगुं योगदान यानादीइगु खँ न्ह्यथनादीसें नेपाःया राजनीतिक हिउपाःया वाहक खः धकाः विचाः तयादील ।
अथेहे नेवाः न्ह्यलुवाः मल्ल के सुन्दरं पद्मरत्न नेवाः समुदाय् नाप नेपाःया दक्को जनजाति तयेगु समान अधिकार सः तयादीम्ह नेता खः धयादीगु खः ।
उगु विचाः मुँज्याय् आदिवासी जनजाति राष्ट्रिय आन्दोलनया प्रवक्ता डा. ओम गुरुङ, आदिवासी जनजाति महासंघया न्वकू गोविन्द सत्याल, नागरिक न्ह्यलुवाः श्याम श्रेष्ठ, मानवअधिकारवादी नेता लिसें राष्ट्रपतिया सल्लाहकार सुशील प्याकुरेल, नेपाल संवत न्हूदँ राष्ट्रिय समारोह समिति ११३९ या नायः सत्यभामा माथेमापिन्सं नं पद्मरत्नयात कयाः थःथःगु नुगःखँ प्वंकूसें विचाः हायेकूगु खः ।
ज्याझ्वलय् मदुम्ह तुलाधर लुमंकाः छगू मिनेट मौनधारण यासें नेपाल परम्परागत बौद्ध संघया गुर्जुपिन्सं धारणी पाठ यायेधुंकाः तुलाधरया किपातय् स्वां देछानाः श्रद्धाञ्जलि प्वंकूगु खः ।नेपालभाषा कवयित्री प्रतिसरा साय्मिं न्ह्याकादीगु ज्याझ्वलय् ग्वसाः खलःया दुजः सुरेशकिरण मानन्धरं सुभाय् देछानादीगु खः ।
नेपाल सम्वतया लसताय् चिनाखँ मुँज्या
लहनान्युज | कछलाथ्व सप्तमी ११३८ (नोभेम्वर १४ २०१८)
क्याफे नेक्ससय् नेपालभाषाया चिनाखँ मुँज्या नेपाल सम्वत ११३९या लसताय् क्याफे नेक्ससया ग्वसालय् ४५ क्वःगु ओपन माइक नाइट नेपालभाषा चिनाखँ मुँज्या बखुण्डोलय् जूगु दु ।
शाक्य सुरेन व सुिधर ख्वबिं न्ह्याकादीगु उगु ज्याझ्वलय् भगत दास श्रेष्ठ, रामेश्वर श्रेष्ठ, विमल प्रभा बज्राचार्य, पुष्प तुलाधर, प्रतिसरा सायमि, वंशीधर बज्राचार्य, बसन्त नकःमि तेजकृष्ण श्रेष्ठ, रजनी मिला, राज अक्षोभ्य, रामेश्वर मिश्रण श्रेष्ठ, मोक्ष बहादुर अमात्य, भूषण प्रसाद श्रेष्ठ, हिरा रत्न शाक्य, नर्मदेश्वर प्रधान, सुनिल बज्राचार्य, डा. पुष्प राज राजकर्णिकर, कविन्द्र लाल श्रेष्ठ, दबल शाक्य, प्रगित पराजुली, दिवस श्रेष्ठ, जोन कुल राइपिसं चिनाखँ ब्वनाः न्यंकादीगु खः ।
थेहे उगु ज्याझ्वलय् जुजुकाजी रञ्जित, स्वयम्भु राज शाक्य, इन्द्र व्यन्जनकार, रिता महर्जन लगायत पिसं म्ये हानाः न्यंकादीगु खः ।
बुखँ नेवाः सुचना केन्द्र किपा राजेन्द्र रंजित
नेवाः एफएमपाखें ५२ गु नेवाः संचारगृहयात हनीगु
नृपेन्द्रलाल श्रेष्ठ | कछलाथ्व सप्तमी ११३८ (नोभेम्वर १४ २०१८)
नेवाः एफ एम १०६.६ पाखें आ वइगु शनिवाः मंसीर १ गते किपुलिइ छगू तःजिगु ज्याझ्वःयासें नेपालभाषं संचालन जुयाच्वंगु संचार माध्यम नाप नापं नेपालभाष यात थाय् बियातःगु नापं याना देय् न्यंकंया ५२ गू संचार माध्यमयात हनीगु जूगु दु ।
संवत ११३९ न्हूदँ व नेवाः एफ एम झिंनिदँ फुना झिंस्वदँ क्यंगु लसताय् वाडमय शताब्दी पुरुष सत्यमोहन जोशीया मूपाहांसुइ किपूया लाय्कुलिइ जुइगु ज्याझ्वलय् अथे संचार माध्यमयात हनेत्यंगु खः ।
समावेशी संचारया बहस जुयाच्वंगु इलय् भाषिक समावेशी नं संचार माध्यमय् यायेमाःगु खँयात बः बिइगु कथं अथे नेवाः भासं संचालन यानाच्वंगु व नेवाः भाय्यात थाय् बिया वयाच्वंगु संचारगृहयात हनेत्यनागु खः धकाः नेवाः एफ एमया प्रबन्ध निर्देशक श्रीकृष्ण महर्जनं लहनान्युजयात जानकारी बियादीगु दु ।
स्वनिगलं पिहां वयाच्वंगु व स्वनिगलय् संचालन जुयाच्वंगु संचार माध्यम जक मखु स्वनिगलं पिनें पिहां वयाच्वंगु पत्रपत्रिकालिसें स्वनिगलं पिने नं संचालन जुयाच्वंगु संचार माध्यमयात हनेत्यंगु खँ न्ह्यथसें वय्कलं बियादीगु जानकारी कथं थौंकन्हय् पिहां वयाच्वंगु नेपालभाषाया न्हिपौ, वाःपौ, बाछि पौ, लय्पौ, नेपालभाषं संचालन जुयाच्वंगु अनलाईन, टेलिभिजन, एफ एम नापं याना न्यय्गुलिं मल्याक संचार संस्थात हनेत्यंगु दु ।
नेपाल संवतया न्हूदँ नाप नेवाः एफ एमया बुदिंया लसताय् नेवाः संचार ख्यलं याना वयाच्वंगु ज्यायात च्वंगु संचार माध्यमयात लसतां हनेगु जुया थुगु लसता हना ज्याझ्वः याना अथे हनेत्यंगु खः । किपूया लाय्कूया दबुलिइ जुइगु उगु ज्याझ्वलय् नेवाः एफ एम न्यनापि पुचः तकं औपचारिक रुपं घोषणा यायेगु नाप नापं सास्कृतिक ब्वज्या नं जुइ धाःगु दु ।
थौंकन्हय् स्वनिगलं पिने पोखरा, हेटौंडा, काभ्रेपाखें नं पत्रिका पिथानाच्वंगु दुसा स्वनिगलं पिने नं थीथी एफ एमपाखें नेवाः भासं ज्याझ्वः प्रशारण जुयाच्वंगु दु । उकिं देय्न्यंकंया हे संचारगृहया प्रतिनिधियात सःताः हनेत्यंगु खः । नेपाःया संचार जगतय् थुलिमछि नेवाः संचार मध्यमयात हनेत्यंगु थ्व न्हापांखुसि जुइमाः ।
