Display Style:
Column Style
येँ महानगरपालिकां राहत वितरण याइगु
नृपेन्द्रलाल श्रेष्ठ | चौलाथ्व षष्ठी ११४०,चैत्र १६ गते
येँ महानगरपालिकां कोरोना भाइरस (कोभिड–१९) सम्वन्धि राहत वितरण मापदण्ड–२०७६ पारित याःगु दु । येँ महानगरपालिकाया प्रमुख बिद्यासुन्दर शाक्यया अध्यक्षताय् च्वंगु ४३ क्वःगु नगर कार्यपालिकाया बैठकं थुगु मापदण्ड पारित याःगु खः ।
कोरोना भाइरसया संक्रमण फैलें मयायेत व थुकिया रोकथाम– नियन्त्रण यायेत सरकारं जारी याःगु लकडाउनया कारण अत्यावश्यक सेवा बाहेक मेगु बन्द याना तःगु दु, मनू तयेत छेँय् पिहा मवयेग् बन्द याना तःगु खः ।
थुगुया कारणं येँ महानगपालिका दुने च्वनाच्वपि असाहय, अतिविपन्न व न्हिया न्हिथ ज्या यायेमाःपि ज्यालदारी मनू तयेगु पहिचान याना इमित तत्काल राहत उपलब्ध याकेगु मापदण्ड पारित याःगु दु धका प्रमुख शाक्यं जानकारी बियादिगु खः ।
थौंया बैठकं पारित याःगु मापदण्डय् अभिभावक मदुपि, थःगु आयश्रोत मदुपि, मेपिनिगु ग्वाहालि व सहाराय् च्वनिपि अनाथ आश्रम, बृद्धाश्रम, संरक्षण गृह, देगः, गुम्बा, मस्जिदय् च्वनिपि मनूत खः ।
अथेहे,उगु मापदण्डय् अतिविपन्न, छु हे आन्दामीया स्थायी स्रोत मदुपि, न्हिया न्हिथं गुजार याये थाुकुपि व सम्वन्धित वडां अतिविपन्न धयातःपि प्रमाणित जुपि मनूत धका उल्लेख याना तःगु खः ।
संगठित संस्थाय् ज्या याइपि बाहेक येँ महानगरय् न्हापानिसे मजदुरी याना वयाच्वपि, छेँय् बुँ मदुपि भरिया लगायतया न्हि न्हि ज्यालादारी ज्या याइपि मनूत खः ।
अथेतु थौंया बैठकं विवरण संकलनया लागि छगु हे प्रकारया फारम ३२ गु हे वडायात वितरण दुगु खाद्य सामाग्री न समान रुपं वितरण याये त्यःगु खः ।
थौं च्वंगु बैठकं पशुपंक्षीइ तयेगु म्वायेगु अधिकार सुनिश्चित यायेत महानगरपालिकां ३२ गु वडाय् आहाराया व्यवस्था यायेगु निर्णय याःगु दु । ‘लकडाउनया कारण मनूत छेँय् न पिहा वये मफुगु कारण खिचा, माकः,बखुतयेत न ध्यानय् तया ३२ गु हे
वडाय् पहल यायेगु निर्णय जुगु दु धका प्रमुख शाक्यं धयादिगु दु ।
कोरोना रोकथामय् महालक्ष्मी नगरपालिकाया पलाः
नृपेन्द्रलाल श्रेष्ठ | चौलाथ्व षष्ठी ११४०,चैत्र १७ गते
देय्न्यंक कोरोना भाइरस कोभिड १९ नियन्त्रण व रोकथामया नितिं थीथी ज्याखँत जुयाच्वंगु दु । व हे झ्वलय् महालक्ष्मी नगरपालिका नं तयारी व व्यवस्थापनया ज्याय् सक्रिय जूगु दु ।
संक्रमण खनेदुसा वा आइसोलेसनय् तयेमालीगु अवस्थायात बिचाः यानाः नगरपालिका व किस्ट हस्पिटलया सहकार्यय् किस्ट हस्पिटलय् ६० वेडया आइसोलेसन वार्ड तयार यायेधुंकूगु दु ।
उकिया नापं अस्पतालयात पिपिइ व डिसइनफेक्सनया नस्प्रे, थर्मल गन नं नगरपालिकापाखें हे उपलब्ध याकागु महालक्ष्मी नगरपालिकाया मेयर रामेश्वर श्रेष्ठं जानकारी बियादिल ।
लहनान्यूजलिसेया खँल्हाबल्हाया झ्वलय् मेयर श्रेष्ठं वडा वडाय् वडाध्यक्षपिं लिसें विपद व्यवस्थापन समिति परिचालन यानाः विदेशं वःपिं मनूत ट्«याक यानाच्वनागु जानकारी नं बियादिल ।
विदेशं वःपिं मनूत ट्र्याक यानाः सकसितं होम क्वारेन्टाइनय् तयेगुया नापं ज्वर, मुसु, सेखंया समस्या खनेदःसा तत्काल अस्पताल वा चिकित्सकयात स्वापू तयेत सुझाव बियागु नं वयकलं धयादिल ।
उकिया नापं नगरपालिका दुने स्वास्थ्यकःमिं छेँय् छेँय् वनाः स्वास्थ्य जाँच याकेगु व्यवस्था नं याःगु दु ।
महालक्ष्मी नगरपालिकाय् लकडाउन गथे जुयाच्वंगु दु धइगु न्ह्यसलय् वयकलं नगरवासीयात छेँय् नं पिहांमवयेत आव्हान यासें न्हियान्हिथं नगरपालिकालिसें प्रहरीपाखें माइकिङ यायेगु ज्या जुयाच्वंगु धयादिल ।
पेट्रोलियम ज्वलं, वासः, खाद्यान्न थुज्वःगु अत्यावश्यक ज्वलंया पसः चायेका बियाच्वनागु धासें वयकलं अत्यावश्यक सामान न्यायेत पिहां वयेबलय् नं मास्क, पन्जा छ्यलेत धायेगुया नापं सामाजिक दुरी कायम यायेत सकसितं सचेत याकाच्वनागु वयकःया धापू खः ।
बजार वना वयेधुंकाः नं साब्वं, लखं ल्हाः सिलाच्वनेगु लिसें स्यानिटाइजरं ल्हाः सफा यायेगु नितिं सकसितं सचेत याकाच्वनागु वयकलं धयादिल ।
उकिया नापं झाःझाः पिहां वयाच्वने म्वायक छकःया पालय् छवाःयात गाक्क न्यायेत नं सकसितं आव्हान यानागु श्रेष्ठं धयादिल ।
प्रेसर, सुगर थज्याःगु ल्वय्या वासः नमाःपिन्सं नं छकःया पालय् लच्छि निलायात गाक्क न्यायेत धयागु श्रेष्ठया धापू खः ।
बजारय् अत्यावश्यक सामानया अभाव, कालाबजारी जुइके मबीत व्यापारीयात सचेत याकाच्वनागु धासें आःतक्क थुकथंया छुं गुनासो नं मवःनिगु श्रेष्ठं धयादिल ।
न्हिं ज्यालादारि यानाः नयेमाःपिं नं द्यांलानाः च्वनेम्वाःलेमा धइगु ल्याखं अज्याःपिन्त नं ट्र्याक यानाः नां धलः मुंकाच्वनागु धासें अवस्था कथं अज्याःपिन्त वडाया संयोजनय् नगरपालिकापाखें आवश्यक सेवा बीगु नं जानकारी बियादिल ।
नगरपालिकाया न्हापा हे १ करोड तकाया विपद व्यवस्थापन कोष दुगु व आः कोभिड १९ या नितिं अलग्ग हे कोष ५० लख तकाया कोष दयेकागु वयकलं धयादिल । थुगु कोषय् व्यापारी, सर्वसाधारण सकसितं सहयोगया नितिं आव्हान यायेगु निर्णय जुइधुंकूगु व प्राविधिक समस्यां यानाः आव्हान मयानानिगु वयकलं जानकारी बियादिल ।
हरेक थासय् डिसइनफेक्सनया नितिं स्प्रे यायेगु ज्या नं जुयाच्वंगु वयकःया धापू खः ।
लकडाउनयात उल्लंघन यानाः छुं छुं मनूत म्वाःमदयक पिहांवयेगु यानाच्वंगु खँय् वयकलं दुःखः प्वंकादिल । न्ह्याक्व इनाप याःसां, थुइकूसां, सचेत याकेत स्वःसां छुं छुं मनूत म्वाःमदयक पिहां वयेगु धासें आःया अवस्थाय् सकलसित छेँय् छेँय् च्वनेत वयकलं इनाप यानादिल ।
येँ मनपा १७ वडा राहतया ज्या न्ह्याकल
नृपेन्द्रलाल श्रेष्ठ | चौलाथ्व षष्ठी ११४०, चैत्र १७ गते
येँ महानगरपालिका १७ वडा कार्यालयपाखे राहतया ब्यवस्था याइगु जुगु दु ।
सरकार याःगु लहडाउनया कारण न्हिया न्हिथं ज्या याना नयेमापिनिगु लागि राहतया ब्यवस्था यायेत्यःगु खः ।
१७ वडाय् च्वपि ज्यालादारी मजदुर लगायत निमुखापि जनताहरु भोकै नपरुन भनी लकडाउन द्या मलायमा धका राहतया ब्यवस्था याये त्यःगु खः ।
येँ मनपा १७ या वडाअध्यक्ष नवीन मानन्धरं हलियंक महामारी जुयाच्वंगु कोरोना भाइरसया कारणं सरकार लकडाउन याःगु खः ।
थुगु इलय् थःगु वडाय् सुयात अप्ठयारो मजुइमा धका राहतया ब्यवस्था याये त्यनागु खः धका लहनान्युजयात धयादिगु खः ।
कोरोना भाइरसया कारण नेपालय् जनजीवन प्रभावित जुगु अवस्थाय् न्हिया न्हिथं ज्या याना नयेमापि मजदुरीपिन्त थुगु इलय् तसक थाकुया च्वंगु दु धयादिसे थःगु वडाय् सुन द्या मलायेमा धका लागत कायेगु ज्या जुयाच्वंगु धका लहनान्युजयात धयादिगु खः ।
लकडाउनया झ्वलय् थौं फोटो फिचर
लहनान्युज | चौलाथ्व षष्ठी ११४०, चैत्र १७ गते
लकडाउन जुगु थौं न्ह्यनु जुइ धुकल । थौंयाःगु फोटो फिचर
किपा ज्ञानकुमार महर्जन
राजदूत शाक्यं कोरोना नियन्त्रणया माःगु इजरायली सफ्टवेयर एप्लिकेसन हइगु
लहनान्युज | चौलाथ्व षष्ठी ११४०, चैत्र १७ गते
इजरायलया लागि नेपाली राजदूत अञ्जान शाक्यं कोरोना भाइरस (कोभिड–१९) या संक्रमणयात नियन्त्रण यायेत इजरायलयात छ्यलाच्वंगु सफ्टवेयर एप्लिकेसन ‘सेफ प्लेस’ यात नेपालय् न छ्यलेत गुलि सम्भव जुइ धका सहलह याःगु दु ।
कोरोनाया संक्रमणं हलियकं ग्यानापुसे च्वना वनाच्वंगु इलय् राजदूत शाक्यं उगु सफ्टवेयर एप्लिकेसन नेपालय् छ्यले फइ मफइ विषयय् इजरायलया केएलपी मामन कम्पनीया प्रतिनिधिपिं नाप व नेपाःया स्वास्थ्य तथा जनसंख्या मन्त्रालयया पदाधिकारीपि नाप भिडियो कन्फरेन्समार्फत सहलह याःगु खः ।
उगु कम्पनीया प्रतिनिधिपिन्स एप्लिकेसन कोरोना संक्रमणयात गये याना नियन्त्रण याये फइ धका भिडियो कन्फरेन्सपाखे न्ह्यब्बःगु खः ।
नेपाःया स्वास्थ्य तथा जनसंख्या मन्त्रालयपाखे प्रमुख विशेषज्ञ डा. दिपेन्द्र रमण सिंह नेतृत्वया पुचल उगु एप्लिकेसन नेपालय् उपयुक्त जुइ वा मजुइ बारेय् जानकारी बियादिगु खः ।
उगु सहलहय् एचइओसी प्रमुख, वरिष्ठ जनस्वास्थ्य प्रशासक सागर दाहाल, गुणस्तर मापन तथा नियमन महाशाखापाखे वरिष्ठ जनस्वास्थ्य अधिकृत लगायत पिनिगु न ब्बति कयादिगु खः ।
इजरायलय् उगु सफ्टवेयर एप्लिकेसन छुयःगुया कारणं लकडाउन हे मयासे कोरोना संक्रमणयात नियन्त्रण कायेत ताःलागु धका कम्पनीं जानकारी बिउगु खः ।
थुगु एप्लिकेसन इटाली, क्यानडा, दुबई तथा मेक्सि लगायत नाप मेगु देशय् न छ्यलिगु ज्या जुइ धुकुगु दु धका कम्पनिं जानकारी बिउगु खः ।
शाक्यं थ्व स्वया न्ह्य कोरोना भाइरसया बारेय् परराष्ट्रमन्त्री प्रदीपकुमार ज्ञवाली, श्रम, रोजगार तथा सामाजिक सुरक्षा मन्त्री रामेश्वर यादव तथा नेपाल सरकारया उच्चस्तरीय पदाधिकारीपिं नाप दुथ्याःगु भिडियो कन्फ्रेन्सय् ब्बति कया इजरायल व साइप्रसया कोरोना संक्रमणसम्बन्धी तथ्यांक, नेपाली तयेगु अवस्था, नेपाली तयेगु कोरोनाया कारण खने दइगु समस्या, नकारात्मक प्रभाव, वये फइगु समस्या, समस्या समाधानया उपायबारे सहलह जुगु खः ।
उगु सहलह ज्याझ्वलय् दक्षिण अफ्रिका, मलेसिया, जापान तथा दक्षिण कोरियाया नेपाली नियोगया राजदूतपिनिगु ब्बति दुगु खः
