Display Style:
Column Style
मिसा खलःया बुदिं हन
लहनान्युज | गुंलागा सप्तमी ११३८ ( सेप्तेम्वर २ २०१८ )
नेपालभाषा मिसा खलःया ग्वसालय् थौं छगू ज्याझ्वः यासें २८क्वःगु बुदिं हःगु दु ।
ज्याझ्वलय् मूपाहाँ वाङमय शताब्दी पुरुष डा. सत्यमोहन जोशी व बिशेष पाहाँ प्रा. सुवर्ण शाक्यं मोतिलक्ष्मी उपासीकाया निगूगु बाखं “मोति बाखं पुचः” व “मोतिमाः” पितब्बज्या यानादीगु खः ।
थ्व हे झ्वलय् खलःया आजीवन दुजःपिं रेवती राजभण्डारी, माणिकलक्ष्मी तुलाधर व मैंया स्थापितयात हंगु खः ।
२५क्वःगु बुदिंया लसताय् “कृष्णदेवी तण्डुकार लुमन्ति सिरपाः” मांभाय् पुचः, यलयात, “लुमिन कमला नेपालभाषा हःपाः सिरपाः” अपर्णा प्रधानयात व “चम्पा टंक बिलास बिजु नेवाः हःपाः सिरपाः” केशरीमैंया प्रधानयात मूपाहाँ शताब्दी पुरुष डा. सत्यमोहन जोशी व बिशेष पाहाँ प्रा. सुवर्ण शाक्यं लःल्हानादीगु खः ।
मिसा खलःया नायः मंगला कारंजितया सभाध्यक्षताय् जूगु उगु ज्याझ्वः उर्मिला डंगोल न्ह्याकादीगु खः ।
बुखँ अमिरमैंया रंजित
किपा नेवाः सुचना केन्द्र
सक्वय् नृसिंह जात्रा
लहनान्युज | गुंलागा सप्तमी ११३८ ( सेप्तेम्वर २ २०१८ )
सक्वय् थुगुसि गुँपुन्हिया लसताय् खुन्हुया दिनस नृसिंह जात्रा याःगु दु । सक्वया माघं दँय्दसं धलं दंकेत नादी खुसिइ यंकेमाःम्ह माधबनारायण द्यःया पुजारी द्यःबाज्या हे “नृसिंह द्यः” जुया बिज्याइगु परम्पराकथं शुशिल राजोपाध्याय द्यःबाज्या ब्वति कया बिज्याःगु खः ।
न्ह्यःन्ह्यः प्रल्हादं नमस्कार यानाः सक्व देय्न्यंकं लिखितं पलाः छिनाः देँ चाःहिकेगु ज्याझ्वलय् देशवारं किभु छायाः नृसिंह, प्रल्हादपिन्त पूजा याइ । नृसिंहया जवंखवं लक्ष्मी व सरस्वती निम्ह नं पासा दइसा नृसिंहया ल्यूने हिरण्याक्ष व हिरण्यकश्यप दैत्य निम्ह नृसिंहया जँय् खिपतं हिनाः दैत्यपिन्त लुया यंकीगु लू स्वयदइगु खः ।
दैत्यपिन्त मस्तय्सं भागीयात धाःसा अरिं चाइगु, ग्याइगु व सिकं बीगु ल्वचं मुुक्त जुइगु धइगु बिश्वास दु ।
सक्वया भाजुमय्जुपिन्सं न्हिच्छि द्यांलानाः तुफिं बँ पुइगु, पुजा याइगु, धौ सगं ह्वलेगु यानाः झ्वःझ्वः छुना द्यःया न्ह्यःन्ह्यः वनीसा ल्यूने नारायण भजन मंडली म्ये हालावनीगु चलन दु ।
एसईई परीक्षाय् ताःलापिन्त हना ज्याझ्वः
नृपेन्द्रलाल श्रेष्ठ | गुंलागा षष्ठी ११३८ (सेप्तेम्वर १ २०१८ )
नेपाल कम्युनिष्ट पार्टी (नेकपा) येँ महानगरपालिका वडा नंबर १६ या वडा कमिटीया ग्वसालय् थौं २०७४ सालय् एसईई परीक्षाय् ताःलापिन्त हना ज्याझ्वः नयाँबजार मल्टीभेन्युय् जुगु दु ।
उगु ज्याझ्वलय् मूपाँहा नेपाल कम्युनिष्ट पाटी (नेकपा)या बरिष्ठ नेता नारायणकाजी श्रेष्ठं सच्छिं मल्याक एसईई परीक्षाय् ताःलापिन्त हनादीगु खः ।
उगु ज्याझ्वलय् प्रतिनिधिया सांसद राधा ज्ञवाली, राष्ट्रिय सभाया सांसद उदया शर्मा, येँं क्षेत्र नंबर ७ या प्रदेशसभाया सांसद बसन्त मानन्धर नाप येँ महानगरपालिकाया मेयर बिद्यासुन्दर शाक्य पाँहा कथं झायादीगु खः ।
१६ नंबर वडा कमिटीया नायः लक्ष्मण गमालया सभाधक्ष्यताय् जुगु उगु ज्याझ्वलय् राजेन्द्र भण्दारीं न्ह्याकादीगु खः ।
हल्चोकय् अन्तरक्रिया जुल
नृपेन्द्रलाल श्रेष्ठ | गुंलागा षष्ठी ११३८ (सेप्तेम्वर १ २०१८ )
श्री हल्चोक आकाश भैरव गुथीया ग्वसालय् व श्री हल्चोक आकाश भैरव समन्वय समुहया ग्वाहालि थौं छगु अन्तरक्रिया ज्याझ्वः जुगु दु ।
थौं जुगु उगु ज्याझ्वलय् आः वयेत्यःगु इन्द्रजात्राय् श्री हल्चोक आकाश भैरव द्यःया बिषयया खँया त कया सहलह जुगु खः ।
गुथीया नायः सागर पुतुवारया सभाधक्ष्यय् जुगु उगु ज्याझ्वलय् समन्वय समुहया सल्लाहकार शरदकुमार डंगोल, सचिव सुरेन्द्रभक्त श्रेष्ठ, गुथी पाखें म्ये गुरु कपिल पुतुवार व जिवन पुतुवार खँ तयादीगु खः । ज्याझ्वः बिश्व शाक्यं न्ह्याकादीगु खः ।
पद्मरत्न तुलाधर कम्युनिष्ट क्रान्तिया प्रतीक खः
लहनान्युज | गुंलागा पंचमी ११३८ (अगष्ट ३१ २०१८ )
आदिवासी जनजाति आन्दोलनया अगुवा नाप मानव अधिकारवादी आन्दोलनया वरिष्ठ ‘अभियन्ता पद्मरत्न तुलाधरया ज्या जंक्कोया लसताय् जुगु शान्ति प्रक्रियाय् पद्मरत्न तुलाधरया भूमिका’ विषयक छगु गोष्ठीइ जुगु दु ।
उगु ज्याझ्वलय् थःगु नुँगः तयेगु झ्वलय् नेपाल कम्युनिष्ट पार्टीया नायः नाप पुलांम्ह प्रधानमन्त्री पुष्पकमल दाहाल ‘प्रचण्ड’ वामपन्थी नेता पद्मरत्न तुलाधर धइम्ह कम्युनिष्ट क्रान्तिया हे प्रतीक खः धइगु थःगु धारणा तयादीगु दु । यदि उगु इलय् पद्मरत्न तुलाधर व दमननाथ ढुङ्गानां नेकपा माओवादी यात शान्ति प्रक्रिया हयेत महत्वपूर्ण भूमिका मम्हितुगु खःसा थौंया थुगु ह्युपाः हयेत सम्भव जुइ फइ मखु धयादीगु दु ।
उगु ज्याझ्वलय् नेकपाया नेता नापं पूर्व उपप्रधानमन्त्री वामदेव गौतमं पद्मरत्न तुलाधरया नेपाःया शान्ति प्रक्रियाय् हयेगु निति महत्वपूर्ण भूमिका दुगु धका धयादीगु दु ।
अथेहे पूर्वसभामुख दमननाथ ढुङ्गानां पद्मरत्न तुलाधरं पंचायत निरंकुश शासनया विरुद्ध ल्वायेगु लिसें जनतायात उकिया विरुद्ध थनेगु ज्या यानादिगु धका बिचाः प्वंकादिगु खः ।
पद्मरत्न तुलाधर नागरिक अभिनन्दन समारोह समितिया नायः लक्ष्मीदास मानन्धरया सभाधक्ष्यय् जुगु उगु ज्याझ्वलय् पूर्व महान्यायधीवक्ता मुक्ति प्रधान व मल्ल के सुन्दरपिन्स नं थःथःगु नुँगः खँ तयादीगु खःसा उमेश स्थापितं न्हयाकादिगु खः ।
किपा लक्ष्मी श्रेष्ठ
