Display Style:
Column Style
धर्मकीर्ति विहारय् प्रम ओली
लहनान्युज | दिल्लागा पारु ११३८ ( जुलाई २८ २०१८ )
धम्मावती गुरुमाया ८५ क्वःगु लसताय् धर्मकीर्ति विहार नघलय् अभिधर्म पाठ जुगु दु ।
अभिधर्म पाठया ज्याझ्वलय् प्रधानमन्त्री केपी शर्मा ओलीं धर्मकीर्ति विहार वया बौद्धविद्धान धम्मावती गुरुमाँयात ८५ क्वःगु बुदिंया लसताय् भिंतुना बिइ वःगु दु
उगु ज्याझ्वलय् प्रधानमन्त्री ओलीं धम्मावती गुरुमाँयात बुद्धया मुर्ति लः ल्हानादीगु खः ।
प्रधानमन्त्री ओलीं बौद्ध परियती शिक्षा १० ताःलापिं गुरुमाँ व उपासक उपासिकापिन्त सम्मान न यानादीगु खः ।
जहाँनिया राणाया कठोर शासनकालय् शिक्षा कायेत बुद्ध धर्म बारय् ज्ञान कायेगु उद्देश्यं विसं २००६ सालय् बर्माया राजधानी रंगुन वम्ह बौद्धविद्धान धम्मावती गुरुमाँ गुरु पुन्हि वलय् ८५ दँ थ्यंगु खः ।
येँ मनपां गुरूपिन्त २५ द्वः भत्ता बीइगु
नृपेन्द्रलाल श्रेष्ठ | दिल्लागा पारु ११३८ ( जुलाई २८ २०१८ )
येँ महानगरपालिकां येँया परम्परागत बाजा संरक्षण यायेगु ज्याय् मदिक्क योगदान बिया वयाच्वपिं गुरूपिन्त दँय् २५ द्वः तका गुरू भत्ता बीगु जूगु दु ।
गुरु पुन्हिया लसताय् ज्यापु संस्कृति विकास कोषं ग्वसाः ग्वःगु मंकाः गुरू हनेज्या व झिंन्याक्वःगु राष्ट्रिय ज्यापु दिवस पाः ब्बः लःल्हायेगु ज्याझ्वलय् येँ महानगरपालिकाया मेयर विद्या सुन्दर
शाक्यं थथे घोषणा यानादीगु खः ।
थ थे ज्यापु संस्कृति विकास कोषं दँय्दसं गुरूपुन्हीया दिं कुन्हु येँया परम्परागत ६३ त्वाःया गुरूपिन्त हनेगु ज्या नाप राष्ट्रिय ज्यापु दिवसया पाःब्बः लःल्हायेगु ज्याझ्वः याइगु खः ।
थुगुसि पाःब्व धर्मचक्र तःननि खलः त्वाः गुथियात लःल्हागु ख । पाःब्वकथं खलःयात दसिपौ व छगू लख तकाया चेक लःल्हाःगु खः ।
औपचारिक ज्याझ्वः स्वयां न्ह्यः येँया परम्परागत ६३ त्वाःया गुरूपिन्त नेवाः परम्पराकथं ख्यें सगं बियाः पुजा याःगु खः । नाप येँ मनपाया मेयर विद्या सुन्दर शाक्ययात न हने ज्या याःगु खः ।
ज्याझ्वलय् नुगः खँ तयेगु झ्वलय् ज्यापु महागुथि नेपाः केन्द्रीय तयारी समितिया नायः राजभाइ जकःमिं, संस्थापक संस्था मध्ये छगू नारायण परिवार क्लबया नायः प्रचण्डमान बज्राचार्यं, धर्मचक्र तःननि खलःया नायः तीर्थनारायण महर्जन, १४ क्वःगु राष्ट्रिय ज्यापु दिवस समारोह समितिया सहसंयोजक ज्ञानु काजी डंगोलपिन्स थःथःगु नुगः खँ तयादीगु खः ।
कोषया नायः मंगलकृष्ण सिंहया सभाध्यक्षय् जुगु उगु ज्याझ्वलय् लसकुस कोषया न्वकु सन्तकुमार महर्जन यानादीगु खः सा कोषया दुजः सत्यनारायण डगोल सुुभाय् देछानादीगु खः ।
नेपालभाषाय् ‘ए’ वर्ण सफू पितब्वज्या
लहनान्युज | दिल्लागा पारु ११३८ ( जुलाई २८ २०१८ )
नेपालभाषा केन्द्रीय विभाग लुमन्ति दबूया ग्वसालय् सह प्रा.डा. ओमकारेश्वर श्रेष्ठया नेपालभाषाय् ‘ए’ वर्ण सफू पितब्वज्या जूगु दु ।
लुमन्ति दबूया नायः किरण केन रञ्जितया नायःसुइ न्ह्याःगु उगु मुँज्याय् मूपाहाँ कथं पुलांम्ह विभागीय प्रमुख प्रा.डा. सुन्दरकृष्ण जोशी झायादीगु खः ।
अमृत ताम्राकारं न्ह्याकादीगु उगु ज्याझ्वलय् पाहाँ कथं पुलांम्ह विभागीय प्रमुख सह प्रा. तुलसीलाल सिंह, ईश्वरीमैंया श्रेष्ठ, निर्मला श्रेष्ठ, शरद कसाः लसता सिं, राजित बहादुर श्रेष्ठ, जीवन महर्जन, काशीनाथ तमोट, भरत महर्जन, सुनिता राजभण्डारी, दिपा महर्जनपिन्सं ब्वतिकयादीगु खः ।
न्वचूया झ्वलय् राजनलाल जोशीं गुरुपुन्हि अतिकं महत्वं जाःगु खोज पूर्ण खँग्वः खः । गुरुपिसं अन्धकारयात चिइकाबी माः । अन्धकार चिइकाबी मफुम्ह गुरु, गुरु हे जुइफइमखु धयादिल ।
लुमन्ति दबूया ग्वसालय् गुरुपुन्हिया लसताय् गुरुपिन्त हना ज्याझ्वः तःजिक हंगु खः ।
बुखँ नेवाः सूचना केन्द्र
किपा राजेन्द्र रञ्जित
‘नेपालभाषा व बुद्धधर्म च्वन्ह्याकेत नेवाः तय्सं छ्यूगु पलाः’ पितब्वज्या
लहनान्युज | दिल्लागा पारु ११३८ ( जुलाई २८ २०१८ )
डा. फ्रेडरिक मोरोन्भालं च्वयादीगु द मिशन अफ द नेवार्स अपहो ल्डिंग नेपालभाषा एण्ड बुद्ध धर्म सफू यात विष्णु चित्रकार व सिचु चित्रकारपिसं भाय् हिलाः ‘नेपालभाषा व बुद्धधर्म च्वन्ह्याकेत नेवाः तय्सं छ्यूगु पलाः’ तःजिक ज्याझ्वः दथुइ पितब्वज्या जूगु दु ।
उगु ज्याझ्वलय् मूपाहाँ शताब्दी पुरूष सत्यमोहन जोशी व जनकवि दुर्गालाल श्रेष्ठं मंकाः कथं सफू पितब्वज्या यानादीगु खःसा विशेषपाहाँ कथं फ्रान्सया काउन्सिलर आर्नो सम्पि झायादीगु खः ।
ज्याझ्वलय् मूज्या नायः दुर्गालाल श्रेष्ठं उगु सफुतिइ दुथ्यागु चिनाखँ ब्वनाः न्यंकादीगु खः । उपकुलपति डा. नरेशमान बज्राचार्यं न्हापा न्हापा गुर्जुपिसं कनेमत्यः धकाः थथे अध्ययन अनुसन्धान याःवइपिन्त पूवंक ध्वाथुइक स्यनेकने यानाच्वंगु खने मदु ।
यदि नेवाः तय्गु भाषा, धर्म, संस्कृति हलिं न्यंक च्वंपिं मनूतय्सं सिइके बिइगु खःसा ताकंताकं मखु थम्हं बांलाक्क स्यूगुखँ ध्वाथुइक पूवंक स्यनेकने यानाविइमागु खँ कनादिल । ‘जि नेवाः भाय् मसः । अय्सांं जिगु भाय् नेवाः भाय् खः ।’ धइगु छम्ह नेवाः भाय्या आन्दोलनय् ब्वति कयाच्वंम्ह ल्याय्म्हया धापुतिं प्रभावित जुयाः नेवाःतय्गु भाय् धर्म व संस्कृतिया स्थिति दुग्यंक अध्ययन यायेत प्यदँ तक स्वनिगलय् च्वनाः थःगु हे मिखां स्वयाः सिइकाः एजम यानादिल ।
उगु हे सोधपत्रया लिधंसाय् च्वःगु थुगु सफूतिइ थौंया नेवाःतय्गु स्थितिया न्हाय्कं जुयाच्वंगु दु धयागु खँ सफूया भाय् ह्यूम्ह विष्णु चित्रकारं धयादिल नापं थौंया नेवातय्गु भविष्य नेवाःतय्गु थःगु हे ल्हाःतिइ लानाच्वंगु दु धइगु खँ नं कनादिल ।
ज्याझ्वः डा. फ्रेडरिकया ब्वनाय् बिद्या चित्रकारं न्ह्याकादीगु ज्याझ्वलय् नुगः खँ तयेगु झ्वलय् नेवाः न्ह्यलुवा मल्ल के सुन्दरं नेपाल भाषा आन्दोलनया खँ उगु सफुतिइ दुमथ्याःगु खँ कनादिल ।
बुखँ नेवाः सूचना केन्द्र
किपा राजेन्द्र रञ्जित
अन्तर्राष्ट्रिय ध्यान केन्द्र दय्केज्या न्ह्यानाच्वन
नृपेन्द्रलाल श्रेष्ठ | दिल्लाथ्व एकादशी ११३८ (जुलाई २३ २०१८ )
यलया नख्खुइ च्वंगु मंगलमार्ग अन्तर्राष्ट्रिय बौद्ध ध्यान केन्द्रय् न्यागू फिट तःजाःगु फाइबरया बुद्ध मूर्ति प्रतिस्थापन यात ।
अखिल नेपाल भिक्षु महासंघया नायः भिक्षु मैत्री महास्थविरं बुद्ध बचन पाठ याना बिज्यासें उगु मूर्तिया छगू ज्याझ्वःया दथुइ अनावरण याना बिज्यात । नापं भिक्षु मैत्रीं ध्यान केन्द्र दय्केज्यां शान्ति, करुणा व आध्यामिक ज्ञानया विकासय् महत्वपूर्ण तिबः बीगु नं विश्वास प्वंका बिज्यात ।
अनावरणलिपा महासंघया मूछ्याञ्जे भिक्षु कौण्डन्य, भिक्षु पञ्ञारतन, भिक्षु पञ्ञासार, भिक्षु धर्मानन्द व भिक्षु तिस्सं शान्ति, मैत्रीया कामना याना बिज्यासें परित्राण पाठ याना बिज्याःगु खः ।
प्रदेश नं. ३या प्रदेशसभा दुजः शोभा शाक्य, बौद्ध विहार संघया नायः पुष्परत्न शाक्यं न्ववानादीगु उगु ज्याझ्वलय् केन्द्रया न्वकू रामकाजी अवालें भवन दय्केज्या झ्वलय् जूगु प्रगति विवरण न्ह्यब्वयादीगु खः । थ्व हे झ्वलय् कलाकार प्रचण्ड शाक्यं दय्कादीगु कलात्मक मूर्तिं दाता तीर्थ शाक्यं उगु ध्यान केन्द्रयात लःल्हानादीगु खः ।
स्थानीय पूर्णचण्डी, गाःबहालय् च्वंपिं दाता दशलाल डंगोल व वय्कःया जहान राममाया महर्जनं काय्पिं राम, रामकृष्ण, रत्न महर्जनलिसेंया छेँजःपिनिगु सहमतिइ ध्यान केन्द्र दय्केत छपी व छगू आना जग्गा दच्छि न्ह्यः दान बियादीगु खः ।
