ने.सं. ११३९ बछलागा पञ्चमि (२३ मे, २०१९), विहिवाः

देशया थीथी सञ्चार माध्यमय् आबद्ध सम्पादकतसें संसद सचिवालयस न्ह्यब्वःगु प्रेस सम्बन्धि विधेयक लोकतान्त्रिक मूल्य मान्यता व संविधानया मर्म–भावना अःखः जूगु धासें लित काय्त सरकारयात इनाप याःगु दु ।

 

सम्पादक पुचलं थौं विहिवाः विज्ञप्ति पिथसें विधेयकं संविधानं सुनिश्चित याःगु ‘पूर्ण प्रेस स्वतन्त्रता’यात संकुचित याइगु ठहर याःगु दु । २१म्ह सम्पादकपिनिगुपाखें पिथंगु विज्ञप्तिइ न्ह्यथनातःगु दु, ‘सरोकारवालालिसें छुं हे सहलह मयासे, प्रेसयात कयाः सरकार सर्वेसर्वा जुइकथं हःगु प्रेस स्वतन्त्रता विरोधी मिडिया काउन्सिल विधेयक लित कायेत व सरोकारवालालिसेया परामर्शपाखें थुगु विषय सम्बोधन यायेत जिपिं सम्पादकपिं सरकारलिसे माग यानाच्वना ।’

 

नेपाल पत्रकार महासंघलिसें पत्रकारिता सम्बद्ध मेमेगु संस्थां विधेयकया विरोधय् न्ह्याकूगु आन्दोलनय् सम्पादक पुचःया नं ऐक्यबद्धता दुगु विज्ञप्तिइ न्ह्यथनातःगु दु ।

 

पत्रकारिता ख्यलय् गुलिखय् विकृत व असंयमित अभ्यासयात कयाः थःपिं सचेत दुगु व अजाःगु विकृति सम्बोधन यायेगु विधि विकासया आवश्यकता जूगु नं प्रष्ट जूगु विज्ञप्तिइ न्ह्यथनातःगु दु ।

लहनान्युज | ने.सं. ११३९ बछलागा चतुर्थि (२२ मे, २०१९), बुधवाः

प्रतिनिधिसभापाखें थौं बुधवाः ६गू विधेयक स्वीकृत जूगु दु । राष्ट्रियभभापाखें वःगु निगूलिसें ६गू विधेयक सैद्धान्तिक सहलहलिपा सर्वसम्मतिं स्वीकृत जूगु खः ।

 

 

प्रतिनिधिसभाय् ‘उत्पत्ति जूगु राजश्व चुहावट, अनुसन्धान नापं नियन्त्रण न्हापांगु संशोधन विधेयक’, ‘प्रहरी समायोजन विधेयक’, ‘औद्योगिक ब्यवसाय, विकास प्रतिष्ठान न्हापांगु संशोधन विधेयक व औद्योगिक व्यवसाय विधेयकयात कयाः सैद्धान्तिक सहलह थौं क्वचाःगु दु ।

 

 

अथे हे राष्ट्रियसभापाखें सन्देशलिसें वःगु ज्येष्ठ नागरिक न्हापांगु संशोधन विधेयक व विज्ञापन नियमन यायेगु विधेयक नं सैद्धान्तिक सहलह लिपा सर्वसम्मतिं स्वीकृत जूगु दु ।

 

 

थुगु विधेयक स्वीकृत जुइवं विधेयकय् दुगु कमि कमजोरी भिंकेत संशोधनया लँपु चाःगु दु ।

 

 

प्रतिनिधिसभाया मेगु मुँज्या वइगु सोमवाः १३ गते सुथसिया ११ताः इलय् च्वनेकथं सःतूगु दु ।

नृपेन्द्रलाल श्रेष्ठ | बछलागा चौथी ११३९ (मे २२ २०१९)

भूटानया फुन्चुलिङ नगरपालिकाया मेयर उत्तरकुमार राई नाप प्रतिनिधि मण्डल यल महानगरपालिकाय् अवलोकन भ्रमण वःगु दु । मंगलवाः मेयर उत्तरकुमार राई नाप वयकःया पुचःयात कार्यवाहक मेयर गीता सत्यालं यल महानगरपालिकाय् लसकुस यानादिगु खः  । 

 

 

उगु अवलोकन भ्रमणय् वःपि फुन्चुलिङ नगरपालिकाका मेयर उत्तरकुमार राई न विपद् व्यवस्थापनय् यल महानगगरपालिकां आतक याःगु ज्या नाप नीति व योजनाया वारय् जानकारी कयादीगु खः ।  

 

 

कार्यवाहक मेयर गीता सत्यालं थुगु अवलोकन भ्रमणं निगु देय् दथुइ सम्बन्ध क्वातुइ बिश्वास यानादीगु खः । यल महानगरापलिकां विपद व्यवस्थापनया लागि आतक ५० लाखया कोष खडा यानागु नाप प्रत्येक वडाय् १÷१ लाखया व्यवस्था यानागु दु धकाः न जानकरी बियादीगु खः 

 

 

२०७२ सालया तःभुखाचं क्षतविक्षत जुगु ८० प्रतिशत सम्पदा पुनर्निमाण जुइ धकुगु दु धयादिसे बाँकी २० प्रतिशत ज्या आ वइगु स्वदँ दुने सम्पन्न जुइ धका कार्यवाहक मेयर सत्यालं धयादिगु खः ।

 

 

 

 

 

लहनान्युज | ने.सं. ११३९ बछलागा तृतिया (२१ मे, २०१९), मंगलवाः

लुम्बिनी प्रेस क्लब सिद्धार्थनगर, रुपन्देहीं मिडिया काउन्सिल विधेयक लित कायेत माग यासें प्रतिनिधिसभाया सभामुख व राष्ट्रियसभाया नायःयात ज्ञापनपौ लःल्हाःगु दु । क्लबं जिल्ला प्रशासन ज्याकू, रुपन्देहीया सहायक प्रमुख जिल्ला अधिकारी कल्पना घिमिरे नेपालपाखें ज्ञापन पौ लःल्हाःगु खः ।

 

 

ज्ञापनपौ लःल्हानादिसें क्लबया नायः दीपेश पछाईं सरकारं नकतिनि जक संघीय संसदय् दर्ता याःगु ‘नेपाल मिडिया काउन्सिल सम्बन्धि कानूनयात संशोधन व एकीकरण यायेत दयेकूगु विधेयक’ दर्ता याःगुयात कयाः आपत्ति प्वंकादिल । वय्कलं समग्र प्रेस जगतयात नियन्त्रण यायेगु व स्वतन्त्रकथं आलोचना यायेगु अधिकारपाखें बञ्चित यायेगु तातुनां हःगु उगु विधेयक प्रेस स्वतन्त्रता विरोधी जूगु धयादिल । विधेयकं संविधानं बियातःगु प्रदत्त अधिकारयात कुण्ठित याःगु व स्वतन्त्र पत्रकारितायात अंकुश तयेगु ज्या याःगु नं पछाईं धयादीगु दु ।

 

 

क्लबया निवर्तमान नायः माधव ढुंगानां श्रमजीवि पत्रकार ऐन व प्रेस काउन्सिल ऐन खारेज यायेगुकथं दर्ता याःगु विधेयकय् आः दुगु प्रेस काउन्सिलयात थप प्रभावकारी दयेकेगु धासें नियन्त्रणकारी प्रावधान तःगु लोकतान्त्रिक गणतन्त्रात्मक शासन व्यवस्थाया विरुद्धय् जूगु धयादिल ।

 

 

क्लबया न्ह्यलुवाय् पत्रकारतसें थौं मंगलवाः छघौतक जिल्ला प्रशासन ज्याकू परिसरय् धर्ना ब्यूगु खः।

लहनान्युज | ने.सं. ११३९ बछलागा तृतिया (२१ मे, २०१९), मंगलवाः

प्रतिनिधिसभापाखें थौं स्वंगू विधेयक स्वीकृत जूगु दु । प्रतिनिधिसभाया थौं च्वंगु मुँज्यां बन विधेयक, वातावरण संरक्षण विधेयक व भूमि सम्बन्धि च्याक्वःगु संशोधन विधेयक स्वीकृत जूगु खः । सरकारं म्हिगः सोमवाःया मुँज्याय् टेबल याःगु उगु विधेयकयात कयाः सैद्धान्तिक सहलह जूगु खः ।

 

 

वनयात व्यवस्थित यायेगु नितिं उगु विधेयक हःगु सरकारं न्ह्यथंगु दु । सहलहया झ्वलय् बनयात व्यवस्थित दयेकेमाःगु नापं बनपाखें देय् व जनतां फाइदा कायेफइकथं ऐन दयेकेमाःगु सांसदपिन्सं धाःगु दु । निजी वन दर्ता प्रकृया झन्झटं जाःगु धासें उमिसं उकियात सहज दयेकेत सुझाव बियादीगु दु ।

 

 

देशया ४४गू प्रतिशत भूभाग वनं जायाच्वंगु जूसां नं सोचय् ह्यूपाः मवःगुलिं व्यवस्थित दयेकेमफूगु सांसदपिनिगु धापू दु ।

 

 

विधेयकयात कयाः जूगु सैद्धान्तिक सहलहस सांसदपिन्सं न्यंगु न्ह्यसःया लिसः बियादिसें वन तथा वातावरण मन्त्री शक्ति बस्नेतं वनयात व्यवस्थित दयेकेत हे सरकारं विधेयक न्ह्यःने हयागु धयादिल । न्हूगु पुस्तां नं फाइदा काये फयेमा धकाः उपयोगितायात नं ध्यान बियागु मन्त्री बस्नेताया धापू खः ।

 

 

अथे हे ध्वनि, जल व वायु प्रदुषण म्हो यानाः वातावरण स्वच्छ दयेकेत वातावरण सम्बन्धि विधेयक हयागु नं मन्त्री बस्नेतं धयादिल ।

Pages