कामिरिता शेर्पां २३क्वः खुसी विश्वया दकलय् तःजाःगु च्वापुगुँ सगरमाथा गयेत ताःलाःगु दु । थ्वया नापनापं कामिरिता न्हूगु कीर्तिमान नं दयेकादीगु दु ।

 

 

थौं बुधवाः सुथसिया ७ ताः जुयाः ५०गू मिनेटय् सगरमाथाया च्वकाय् थ्यंकाः वय्कलं दकलय् अप्वः सगरमाथा आरोहण यानादीम्हकथं विश्व कीर्तिमान तयादीगु खः । २३क्वः खुसी सगरमाथाया सफल आरोहण यानाः ४९दँ दुम्ह शेर्पां थःम्हेस्या दयेकातःगु कीर्तिमान त्वाःथलादीगु खः । शेर्पां थ्व स्वयां न्ह्यः २२क्वः तक सगरमाथा आरोहण यानाः विश्व कीर्तिमान तयादीगु खः ।

 

 

पर्यटन विभागया सम्पर्क अधिकृत मीरा आचार्यं कामिरितां सगरमाथाया सफल आरोहण याःगु पुष्टि यानादीगु खः । वय्कलं सेभेन समीट ट्रेक्स कम्पनीपाखें आरोहण यानादीगु खः । सोलुबुम्बुया कामिरितालिसें वाङ्दी शेर्पा व सुं सुं विदेशीतसें नं सगरमाथाया सफल आरोहण याःगु खः । 

 

 

कामिरिता थुगुसी विदेशी आरोहीया नितिं हाइ अल्टिच्यूड गाइड व लिडरया जिम्मेवारी कयाः सगरमाथा गयादीगु खः ।

राष्ट्रिय मानव अधिकार आयोगं संसदय् दर्ता जूगु मिडिया काउन्सिल सम्बन्धि कानूनयात संशोधन व एकीकरण यायेत दयेकूगु विधेयकयात लोकतन्त्र व मानवाधिकारया मूल्य मान्यताकथं दयेकेत सरकारया ध्यानाकर्षया याकूगु दु ।

 

आयोगं थौं बुधवाः विज्ञप्ति पिथंसें विधेयकया थौकन्हय् दयाच्वंगु प्रावधानयात कयाः आपत्ति प्वंकूसें नियमनया नामय् नियन्त्रण यायेगु मानवाधिकारया मूल्य मान्यता अःखः जुइगु न्ह्यथनातःगु दु । सरोकारवालालिसे परामर्श व सहलहपाखें परिमार्जन यानाः नागरिकया बिचाः व अभिब्यक्ति स्वतन्त्रतायात कुण्ठित यायेगु लकस ब्वलंके मबीकेत आयोगं इनाप तकं याःगु दु । आयोगपाखें पिथंगु विज्ञप्ति न्ह्यथनातःगु दु, ‘थौंकन्हय् दयाच्वंगु प्रेस काउन्सिल ऐन, २०४८या प्रभावकारी व्यवस्थाय् कारण हे मदयेकं हिलाः थुकिया स्वायत्तताय् अंकुश तयेत स्वयेगु मानवाधिकारया आधारभूत मान्यता व अभिव्यक्ति स्वतन्त्रता प्रतिकूल जूवनीगु आयोगया निष्कर्ष दु ।’