लहनान्युज | बछलाथ्व त्रयोदशी ११३९ (मे १७ २०१९)

धादिङया कुम्पुरया केन्द्रविन्दु जुया ५ रेक्टर स्केलया भुखाय् ब्बःगु दु  ।

 

थौं शुक्रवाः २ बजे जुया ८ मिनेटय् उगु भुखाय् ब्बःगु खः । 

 

ने.सं. ११३९ बछलाथ्व १३ (१६ मे, २०१९), विहिवाः

मिडिया काउन्सिल विधेयकयात कयाः देय्न्यंकया पत्रकारत आन्दोलित जुयाच्वंगु इलय् प्रदेश २या सरकारं नं पत्रकारयात छगू करोड तकातक बं पुइकेगुकथंया विधेयक हःगु दु ।

 

आन्तरिक मामिला तथा कानूनमन्त्री ज्ञानेन्द्र यादवं थौं विहिवाः सञ्चार सम्बन्धय् व्यवस्था यायेत दयेकूगु विधेयक प्रदेशसभाय् दर्ता यानादीगु खः । विधेयकय् पत्रकारतय्त आपालं बं पुइकेगु व्यवस्था प्रस्ताव यानातःगु दु ।

 

विधेयकय् प्रदेशया सार्वभौमसत्ता, भौगोलिक अखण्डता वा राष्ट्रियताय् लिच्वः लाइकथंया विषययात कयाः बुखँ च्वगुलिं कसूरया मात्रा स्वयाः ५०गू लखतका निसें १गू करोड तकातक बं पुइकेफइगु प्रावधान तयातःगु दु ।

 

प्रदेशया सार्वभौमसत्ता, भौगोलिक अखण्डता धकाः छु धायेत स्वःगु खः धइगु न्ह्यसलय् प्रदेश २या आन्तरिक मामिला मन्त्री ज्ञानेन्द्रकुमार यादवं चाःचाःहीकाः लिसः बिल । प्रदेशय् लाःगु छुं नं जिल्ला वा क्षेत्र थुगु देशया मखु धकाः प्रचार जुइफइगु जूगुलिं प्रदेशया सार्वभौमसत्ता, भौगोलिक अखण्डताय् लिच्वः वइगु ज्याखँ याइपिन्त कडा दण्ड, बं पुइकेगु प्रस्ताव यानातःगु मामिला मन्त्री यादवं धयादिल ।

 

अथे हे संघीय इकाइ दथुइ दयाच्वंगु स्वापुतिइ लिच्वः लाइगु, थीथी जातजाति, धर्म वा सम्प्रदायया स्वापू स्यंकीगु विषय प्रसारण वा प्रकाशन याःसा छगू लखनिसें न्यागू लखतका बं पुइकेफइगु प्रावधान तयातःगु दु । गाली बेइज्जती याःसा स्वंगूनिसें झिगू लखतका बं पुइकेगु व थुगु कसूरपाखें सुंयात नं क्षति जूसा मनासिव क्षतिपूर्ति याकेगु विधेयकय् न्ह्यथनातःगु दु ।

 

अथे हे सार्वजनिक शिष्टाचार व नैतिकया प्रतिकूल जुइगु विषय, श्रमयात कयाः अवहेलना याइगु व जातीय छुवाछुट नापं लैङ्गिक व सामुदायिक भेदभावयात दुरुत्साहन जुइकथंया बुखँ च्वःसा कसूर याःगु स्वयाः छगू लखनिसें न्यागू लखतका तक बं पुइकेगु व्यवस्था यानातःगु दु ।

 

विधेयकय् प्रदेशया आम सञ्चार माध्यम प्राधिकरण नीस्वनेगु नं व्यवस्था यानातःगु दु । ऐनकथं ज्या जूगु वा मजूगु स्वइगु व कसूर स्वयाः ५०द्वःनिसें न्यागू लखतका तक बं पुइकेफइ ।

 

विधेयक दयेकेगु झ्वलय् मन्त्रालयं सम्बद्ध पक्षलिसे नं सहलह याःगु खः । उगु इलय् दण्ड सजाँय सम्बन्धि थुगु व्यवस्था मदुगु खः ।

 

“थ्व लिपांगु चरणय् वल । जिं नं संवैधानिक समितिइ सहलह यानाः म्हो यायेमाः कि धयागु खः ।” मन्त्री यादवं धयादिल, “थ्व रामायण, गीता मखु । थप सहलह यानाः परिमार्जन यायेफइ ।”

ने.सं. ११३९ बछलाथ्व १३ (१६ मे, २०१९), विहिवाः

संसदय् दर्ता जूगु मिडिया काउन्सिल सम्बन्धि विधेयकया विरोधय् कुहांवःगु नेपाल पत्रकार महासंघं कन्हय् संसद् भवन पिने व जिल्ला सदरमुकामय् ब्वज्या याइगु जूगु दु ।

 

 

न्हापांगु चरणया आन्दोलनया लिपांगु दिं कन्हय् न्हिनय् १२ताः इलय् येँया संसद भवन पिने व जिल्ला जिल्लाया सदरमुकामय् सञ्चारया ज्वलंलिसें ब्वज्या याइगु महासंघया मूछ्याञ्जे रमेश विष्टं ल्हाःचिं तयाः पिथंगु विज्ञप्तीइ न्ह्यथनातःगु दु । विधेयकलिसेंया कानूनय् दुगु छुं छुं प्रावधानं स्वतन्त्र प्रेसया अभ्यासयात नियन्त्रण याइगु ठहर महासंघया दु ।

 

 

न्हापांगु चरणया आन्दोलन न्ह्याःगु छवाःतक नं सम्बन्धित पक्षं मागया मन्यंगुलिं महासंघं थप आन्दोलन यायेमाःगु परिस्थिति ब्वलंगु नं विज्ञप्तिइ न्ह्यथनातःगु दु ।

 

 

महासंघं प्रेसलिसें स्वतन्त्रता विरोधी कानून संशोधन वा लित कयाः वइगु दिनस सरोकारवाला पक्षलिसे सहलह व सहमति यानाः जक कानून दयेकेत माग याःगु दु ।

ने.सं. ११३९ बछलाथ्व १३ (१६ मे, २०१९), विहिवाः

अर्थमन्त्री डा. युवराज खतिवडां नेपालय् निर्धक्क जुयाः लगानी यायेत भारतीय उद्योगीलिसें व्यवसायीतय्त इनाप यानादीगु दु । नेपाल–इण्डिया फ्रेन्चाइज इन्भेष्टमेण्ट एक्स्पो एण्ड कन्क्लेभया थौं बिहिवाः उलेज्या यानादिसें अर्थमन्त्री डा. खतिवडां उकथं इनाप यानादीगु खः ।

 

 

वय्कलं सरकारं लगानीया लकस दयेकूगु, नीतिगतकथं सुधार याःगु नपं उच्च प्रतिफल व सुरक्षाया तकं प्रबन्ध याःगुलिं नेपाः बांलाःगु गन्तब्य जूगु तकं दावी यानादिल । नेपाल थ्व इलय् विदेशी प्रविधि व लगानीयात दुतिनाः  आर्थिक समृद्धिया लँपुइ न्ह्याः वनाच्वंगु नं अर्थमन्त्री डा. खतिवडां धयादीगु दु । हलिंन्यंक हे लगानीया नितिं लोकंह्वानाच्वंगु फ्रेन्चाइज लगानीया नितिं तकं नेपाः पाय्छिगु गन्तब्य जुइफइगु अर्थमन्त्रीया धापू खः ।

 

 

सरकारं सन् २०२०यात नेपाल भ्रमण दँकथं हनीगु व २०गू लख पर्यटक दुकायेगु आज्जु तःगु सन्दर्भय् सेवामूलक उद्योगय् तकं लगानी विस्तार याय्गु बांलाःगु ह्वःताः दुगु नं डा. खतिवडां धयादिल । थ्व हे झ्वलय् नेपाःया पर्यटन उद्योगय् निजी क्षेत्रया तःधंगु ल्याखय् लगानी दुगु जानकारी बियादिसें अर्थमन्त्री डा. खतिवडां दँय्दसं पर्यटकपिनिगु ल्याः अप्वयाच्वंगुलिं अझ लगानी विस्तार यायेत नं निजी ख्यःयात इनाप यानादिल ।

लहनान्युज | ने.सं. ११३९ बछलाथ्व ११ (१५ मे, २०१९)

नेपाल कम्यूनिष्ट पार्टी (नेकपा)या प्रबक्ता नारायणकाजी श्रेष्ठं संसदय् दर्ता जूगु मिडिया काउन्सिल सम्बन्धि विधेयक परिमार्जन जुइफइगु धयादीगु दु ।

 

 

थौं बुधवाः नेकपा जिल्ला कमिटीया पदाधिकारीपिनिगु सपथ ग्रहणया नितिं गोरखा थ्यंकादीम्ह प्रबक्ता श्रेष्ठं पत्रकारलिसे खँल्हानादिसें उगु खँ धयादीगु खः । वय्कलं प्रेस स्वतन्त्रतायात अंकुश तयेगु पक्षय् सरकार मदुगु नं धयादिल ।

 

 

“संसदय् विधेयक न्ह्यब्वयेवं उकिं पूर्णता प्राप्त याइमखु ।” प्रबक्ता श्रेष्ठं धयादिल, “प्रेस स्वतन्त्रताय् छुं नं कथंया कुठराघात यायेगु व अंकुश तयेगु पक्षये सरकार मदु ।” वय्कलं थुगु लँपुइ सरकारं पलाः मन्ह्याकीगु नं दावी यानादिल । तर थुकियात कयाः सरकारयात हे अप्वः प्रहार जुयाच्वंगु धयादिसें श्रेष्ठं संसदय् दर्ता जूगु विधेयक पारित मजूतलय् म्वाःमदुकथं टिकाटिप्पणी यायेगु पाय्छि मजुइगु नं धयादिल ।

Pages