Display Style:
Column Style
पुलांम्ह वडाध्यक्ष मिठ्ठाबहादुर मानन्धर मन्त
लहनान्युज | तछलाथ्व चर्तुदशी ( जुन २७ २०१८ )
येँ महानगरपालिका २८ वडा (साबिक २५ वडा)या पुलांम्ह वडाध्यक्ष मिठ्ठाबहादुर मानन्धर बुधवाः ८० दँय् मन्त ।
मदुम्ह मानन्धर नेपालभाषाया कार्यकर्ता्लिसें जन चिकित्सालयया नायः नं खः । मदुम्ह मानन्धरयात चीधिकःम्ह म्ह्याय् कमला मानन्धरं मिँ तःगु खः ।
मय्जु मानन्धर नेपालभाषा क्लबया अध्यक्ष व कन्या मन्दिर माविया नेपालभाषा शिक्षिका खः ।
मदुम्ह मानन्धर नेपालभाषा कार्यकर्ता , जनचिकित्सालयया अध्यक्ष, नेपाल लिपि गुथिया मू दुजः विमला मानन्धरया अबुजु खः ।
भिक्षु अश्वघोष महास्थविरया ९२ क्वःगु बुदिं हन
लहनान्युज | तछलाथ्व चर्तुदशी ( जुन २७ २०१८ )
नेपाःया संघनायक (जेष्ठ) भिक्षु अश्वघोष महास्थविरया ९२ क्वःगु बुदिं छगु ज्याझ्वः दथुइ हंगु दु । बुदिं हनेगु झ्वलय् वयकःया शिष्य भिक्षु कोण्डन्यं थः गुरु भिक्षु अश्वघोषया च्वसु मुना ‘भिक्षु अश्वघोषका छानिएका रचनाहरु’ सफु उपहार देछानादीगु खः ।
उगु भिक्षु कौण्डन्यं सम्पादनयाना दीगु सफू छगु छगु ज्याझ्वः दथुइ उपसंघनायक भिक्षु ज्ञाणपूर्णिक महास्थविरं बिमोचन यानादीगु खः ।
भिक्षु अश्वघोषं सच्छि स्वया अप्व सफूति पिहा वयाच्वंगु च्वसु मुना भिक्षु कौण्डन्यं सम्पादन याना उगु सफू प्रकाशन याःगस खः। थःगु न्ह्यगु दशक न्ह्यः याःगु च्वसू महत्वपूर्ण व विचारोत्तजेक च्वसु छथाय् मुना सफूया रुपय् थःगु बुदिंया झ्वलय् थ थे उपहार देछाइगु धइगु भिक्षु अश्वघोषं कल्पना तक मयानगु धयादीगु खः ।
‘थुगु सफुतिं भिक्षु अश्वघोष बुद्ध धर्मप्रति गज्यागु दृष्टिकोण दु धयागु स्पष्ट थुइके फइ । थुगु सफूति भिक्षु अश्वघोषया बुद्ध धर्मप्रतिया झुकाव गज्यागु धका सिइकेत ग्वहालि जुइ धकाः भिक्षु कौण्डन्यं कनादीगु खः । सफुति बुद्ध धमया थीथी पक्षया विश्लेषण व आलोचनात्मक कथया च्वसु नाप बुद्धया महत्वपूर्ण व आधारभुत विचारधाराया ४१ गु च्वसु दु ।
वासः यायेगु झ्वलय् निर्दँ चीनय् च्वनादीगु झ्वलय् चिनिया कम्युनिष्ट नेता माओत्सेतुङ नाप लाना दी वलय् वयकःया पाखें तसकं प्रभावित जुया भिक्षु २०४७ निसे २०४९ तक तत्कालीन नेकपा (एमाले) पार्टीपाखे राष्ट्रिय सभाया सदस्य जुयादीगु खः ।
उगु इलय् मनमोहन अधिकारी प्रधानमन्त्री जुयादीगु इलय् वयकःयात लुम्बिनी विकास कोषय् उपाध्यक्ष न नियुक्ति याःगु खः । ‘प्रगतिशील व क्रान्तिकारी भिक्षुया रुपय् म्हसिका दिम्ह भिक्षुया छवि उगु सफुतिं क्यनादिगु दु ।्
‘अझ न म्वायेगु जाँगर चल जुल’ भिक्षु अश्वघोष
‘बुदिंया झ्वलय् थी थी मनू पाखे भिक्षु अश्वघोषयात उपहार न लःल्हाना दीगु खः ।
थुगु सद्भाव, मैत्री व पुलापि पासापिनिगु नाप लाये दगुनि थःतसक आनन्दया अनुभूत जुगु धयादील । थुगु ज्याझ्वः न थःगु मनोबल यक्को थःहा वःगुु धका न धयादील । थुकिइ याना अझ म्वायेत आश न भिक्षु अश्वघोषं यानादील ।
किपूलि सम्पदा व पर्यटन बिषया अन्तरक्रिया
नृपेन्द्रलाल श्रेष्ठ | तछलाथ्व नवमी ११३८ ( जुन २२ २०१८ )
किपू नगरय संस्कृति सम्पदा व पर्यटन प्रबर्द्धन यायेगु लागि संचारमाध्यमया भूमिका विषय छगु अन्तरक्रिया ज्याझ्वःजुगु दु । ज्याझ्वलय् मूपाहाँ किपू नगरपालिकाया मेयर रमेश महर्जनं उलेज्या यानादीगु खः ।
मेयर भाजु महर्जनं चन्द्रागिरी डाडाँ स्वया चम्पादेवी–धिनाचो डाडाँ स्वनिगः नाप सगरमाथा तकं बालक्क खनेदूगु डाँडा जूगुलिं पर्यटक तयेन आकषर्णयाना न्ह्याइपुक्क स्वनिगः व हिमाल अवलोकन यायेफइगु अवस्था दू धकाः धयादीसें किपू नगरपालिकां धिनाचो–चम्पादेवी डाडाँय् केबुलकार निर्माण यायेगु योजना दु खँ न न्ह्यथनादील खः ।
उगु केबुलकार निर्माण यायेगु लागि किपू नगरपालिका ५१ प्रतिशत व मेमेगु संघसंस्थापाखें ४९ प्रतिशत लगानी यानाः केबुलकार निर्माण यायेगु जुइ धकाः न धयादील । वय्कलं विकास निर्माणया ज्याया बालाक्क प्रचारप्रसार मजूगुलिं असुन्तोष न प्वकादील ।
नेवाः पत्रकार राष्ट्रिय दबूया ग्वसालय् जुगु किपू नगरया संस्कृति सम्पदा व पर्यटन प्रबर्द्धनय् संचारमाध्यमया भूमिका विषयस अन्तरक्रिया ज्याझ्वः थौ जुगु खः ।
उगु ज्याझ्वलय् सगरमाथा गयेत ताःलाःपिं पत्रकारपिं कल्पना महर्जन व पूर्णिमा श्रेष्ठयात थौं हे उगु ज्याझ्वलय पत्रकार दबूपाखें हनेगु ज्या नं जूगु खः ।
ज्याझ्वलय् दबूया नायः श्रीकृष्ण महर्जनं सभापतिय् जुगु उगु ज्याझ्वः मूपाहाँ कथं किपू नगरपालिकाया मेयर रमेश महर्जन, किपू नगरपालिकाया पर्यटन विभागया प्रमुख लिसें किपू नपा २ वडाया वडाध्यक्ष रमेशमान डंगोल, दबूया सल्लाहकारपिं बरिष्ठ संचारकःमि पुष्करभक्त माथेमा व नेपालभाषा टाइम्सया सम्पादक सुरेशकिरण मानन्धर, पर्यटनविद् दिलेन्द्र श्रेष्ठदबू, न्वकुपिं सुरजवीर बज्राचार्य व नृपेन्द्रलाल श्रेष्ठ व दांभरी सुरेन्द्रभत्त श्रेष्ठ न झायादीगु खः ।
नजरराम महर्जनं न्ह्याकादीगु उगु ज्याझ्वलय् दबूया मू छ्याञ्जे सुनील महर्जनं ज्याझ्वःया बारे जानकारी बियादीगु उगु ज्याझ्वलय् दबूया येँ जि ल्लाया नायः नातिकाजि महर्जन सुभाय् बियादीगु खः ।
उत्कृष्ट महिला समूहयात सिरपा
लहनान्युज | अनलागाः त्रयाेदशी ११३८ (जुन १२ २०१८)
यल महानगरपालिका, समाज कल्याण महाशाखा, सामुदायिक विकास शाखां उत्कृष्ट ११ महिला समूह घाेषणा यासें सिरपा लःल्हाःगु दु ।
२६५ महिला समूह दथुइ स्वकःगु खुसी उत्कृष्ट जुयाः कदर पत्र लिसें साउण्ड सिष्टम व बुद्ध मूर्ति सिरपा वैशवर्ण मां पुचः गुजिबहाल, च्यासल महिला समूह च्यासः, मिखाबहाल महिला समूह मिखाबहाल व रजक महिला समूह धोविघाटं त्याकूगु खः ।
निक्वःगु खुसी उत्कृष्ट जुयाः बुद्ध मूर्ति व कदर पत्र काःगु पुचः छसीकथं मणीमण्डप मिसा पुचः पट्को, इकुहिटी महिला समूह धोविघाट त्याकूगु खः ।
व न्हापांगु खुसी उत्कृष्ट जूगु पुचः श्रृष्टि महिला समूह सानेपा, शान्ति महिला समूह भिद्यःलाछि, न्हाय्कंबहिल मिसा पुचः न्हाय्कंबहिल, महापाल, स्वंगः चिभाः मिसा पुचः ख्वाय्बहिल, नकबहिल मां पुचः नकबहिल खः । थुगु पुचःयात नं बुद्ध मूर्ति व कदर पत्र लःल्हाःगु खः ।
उत्कृष्ट जूगु पुचःयात महानगरपालिका प्रमुख चिरिबाबु महर्जन र उपप्रमुख गीता सत्यालं सिरपा लःल्हानादीगु खः ।
महिला समूहपाखें याःगु ज्याझ्वःया प्रतिवेदनया आधारय् क्षमतामूलक, आयमूलक, जनचेतनामूलक कार्यक्रम व वचत अले ऋण परिचालनया आधारय् मूल्याङ्कन याःगु खः ।
लागू औषध विरुद्ध अभियानय् सडक नाटक
नृपेन्द्रलाल श्रेष्ठ | तछलाथ्व चौथी ११३८ ( जुन १७ २०१८ )
लागूऔषध दुव्यर्सनी विरुद्ध सडक नाटक ज्याझ्वः यलया थेच्वय् क्यने ज्या जुु दु ।
औषध दुव्र्यसनी ल्याः अप्वो जुगु यात न्यूनीकरण यायेत थेच्वया श्री सरस्वती माविइ ‘मेरो पाईला’ नां या नाटक क्यंगु खः । उगु ज्याझ्वःयात गोदावरी नगरपालिका ग्वाहलि नेपाल प्रहरी लागू औषध दुव्र्यसन व्युराें समन्वय याःगु खःसा राष्ट्रिय युवा महासंघं उगु नाटक क्यंगु खः ।
थी थी वडा व त्वाः त्वालय् छगु अभियान न वंगु दँय् न्ह्याकुगु खः । लागू औषध विरुद्ध छेँ परिवार हे सक्रिय जुइ माःगु , माःगु इलय् प्रहरीयाके ग्वाहालि काये फइगु , ल्याय्म्हपि कुलत मछ्वयेत परिवारया हे सक्रियता, रचनात्मक क्रियाकलापय् ल्याय्म्हपि परिचालन याना वनेत नाटकया सन्देश खः । नाटक स्वयेत विद्यार्थी, शिक्षक शिक्षिका व स्थानीयपि स्वयेत वःगु खः ।
महासंघया सडक नाटक संयोजक प्रणीता शाक्यं थुगु नाटक यल महानगरपालिका वडा नं १६ या मंगलबजार, पट्को, प्रभाग परिसर, चक्रबहील त्वालय् , वडा नं ११
या बंगलामुखी, नयाँ बानेश्वर, शंखमुल दःथुइ क्यना आः थेच्वय् लहनान्युजयात कनादीगु खः ।
उगु ज्याझ्वलय् व्युरो प्रमुख नाप प्रहरी नायब महानिरीक्षक राइ नं लागू औषध दुव्यर्सनी व्युराें लागू औषध दुव्यर्सनीया असरबारे अभिमुखीकरण ज्याझ्वः न्ह्याकगु दु धकाः जानकारी बियादीगु खः ।
लागू औषध दुव्र्यसनी विरुद्ध समस्या अप्वो जुया वनाच्वंगु थुकियात न्यूनीकरण याना ल्याय् म्हपिन्त बचे यायेत नाटकं प्रभावकारी भुमिका म्हिते फइगु बिश्वास प्वका दील ।
उगु ज्याझ्वलय् गोदावरी नगरपालिकाया प्रमुख गजेन्द्र महर्जनं लागू औषध दुव्र्यसनीं ल्याय् म्हपिनिगु उर्जा विनाश पाखें वनाच्वंगु खँय् चिन्ता न प्वकादील नाप थज्यागु ज्याझ्वःया आवश्यक जुगु धयालीगु खः ।
राष्ट्रिय युवा महासंघ यलया अध्यक्ष राजेश बज्रचायं लागू औषध प्रयोगकतायात ओसार पसारय् संलग्न याना यंकिगु अप्व जुया वनाच्वंगु खँय् प्रहरी चनाखो जुइ माःगु खँय् बः बियादील ।
श्री सरस्वती माविया प्रधानाध्यापक विष्णुनारायण श्रेष्ठं मस्त व ल्याय् म्हपिं लागू औषध दुव्यर्सन विरुद्ध ज्ञान बिइ माःगु धकाः धयादीगु खः ।
