ललितपुर महानगरपालिका, समाज कल्याण महाशाखा, सामुदायिक विकास शाखाया ग्वसालय् ललितपुर महानगरपालिका वडा २८ व २९ हरिसिद्धि (जल) या महिला समूहया नितिं जूगु छवाःया उद्घाेषण व वक्तृत्व विकास तालिम क्वचाल ।

३० ति महिला समूहया प्रतिनिधिपिनिगु नितिं ग्वसाः ग्वःगु उगु तालिमया समापन समाराेहय् मूपाहाँ वडा नं. २९ या अध्यक्ष गणेशकुमार महर्जनं सामुदायिक विकाश शाखां हरिसिद्धिया नितिं मेमेगु ज्याझ्वःया नितिं ध्यान बियादीत इनाप यानादिसें वडां नं मिसापिनिगु ब्वति व सक्रियता अप्वयेकेत पहल यायेगु कनादिल ।

ललितपुर महानगरपालिका कार्यपालिका सदस्य मीना महर्जनया सभापतित्वय् जूगु उगु समापन ज्याझ्वलय् ललितपुर महानगरपालिका, समाज कल्याण महाशाखा, सामुदायिक विकास शाखाका वरिष्ठ अधिकृत प्रेमबहादुर थापां हरिसिद्धिया लागि मेमेगु नं ज्याझ्वःया नितिं प्राथमिकताया नितिं स्थानीयपाखें नं माःगु पहल यानादीत इनाप यानादिल ।

ज्याझ्वलय् सामुदायिक विकास शाखा अधिकृत सरीता महर्जन, वडा २९ या वडा सदस्य र्इन्द्रदेवी महर्जन व स्यानामि गुरू सुरजवीर बज्राचार्य नं पाहांकथं च्वनादीगु खः ।

तालिम काःपि मय्जुपिनिगु पुचलं स्यनामि बज्राचार्ययात सुभाय् देछासें थःपिन्सं उत्पादन यानागु थीथी सामग्रीनापं हरिसिद्धिबारे विषेश चर्चा दुगु स्मारिका दबू व कलात्मक झ्याः दाेहलपा लःल्हाःगु खः । तालिम काःपिन्सं थःगु नुगःखँ तयेगु झ्वलय् २८ व २९ निगूलि वडाय् नं तालिम व छुं नं कथंया ज्याझ्वः यायेत थाय् मदुगु न्ह्यथंसें थज्याःगु मेमेगु अापालं तालिमय् थुगु थाययात प्राथमिकताय् तयाः विकासया नितिं ग्वाहालिया अाशा प्वंकूगु खः ।

तालिम काःपिं दथुं रेसु महर्जनं न्ह्याकादीगु थुगु ज्याझ्वलय् लसकुस न्वचु रीता महर्जनं, सुभाय् न्वचु कल्पना महर्जनं बियादीगु खःसा तालिमया अनुभव सुभद्रा बज्राचार्य व विद्या महर्जनं थःगु अनुभव कनादीगु खः । ज्याझ्वलय् मञ्जुश्री महर्जन, दुर्गा महर्जन, मनमाया महर्जन व अञ्जना महर्जनं लसकुसु म्ये नं न्ह्यब्वयादीगु खः ।

यैँ जुया च्वंगु नेपाल आदिवासी जनजाति महासंघ (फोनिज) या खुक्वःगु तःमुँज्याय् न्याम्ह नेवाः पत्रकार निर्वाचित जुगु दु ।

थौ जुगु उगु खुक्वःगु तःमुँज्याय्  नृपेन्द्रलाल श्रेष्ठ संस्थागत दुजः, अन्जना शिल्पकार ल्यु दाभरी, समिर बलामी ३ न. प्रदेशया इन्चार्ज व रुबि श्रेष्ठ लेखा समितिया दुजलय् र्निबिरोध निर्वाचित जुगु दु ।

अथेहे धादिङ्गया सरिता श्रेष्ठ निर्वाचन प्रकिया पाखें  निर्वाचित  जुगु खः ।

खुक्वःगु तःमुँज्याय् पदाधिकारी धाःसा दक्वो पदय् सर्वसहमति जुगु खः ।