Display Style:
Column Style
येँ महानगरं लुम्बिनी वज्रयान विहारयात ४ करोड ग्वाहालि यात
सुरेन्द्रभक्त श्रेष्ठ | सिल्लाथ्व चतुर्दशी ११४० (फ्रेवअरी ८ २०२०)
येँ महानगरपालिकां लुम्बिनीइ दयेका च्वंगु नेपाल बज्रयान विहारयात ४करोड २९ लख १८ द्धः तकाया चेक लःल्हाःगुु दु ।
थौं शनिवाः येँया नेपाः बैंक्वटय् छगु ज्याझ्वःया दथुइ येँ महानगरपालिकाया मेयर विद्यासुन्दर शाक्यं बज्रयान विहारया प्रमुख प्रो.डा. नरेश मान बज्राचार्ययात उगु चेक लःल्हाःगु दु ।
थौं जुगु उगु ज्याझ्वलय् लुम्बिनी नगरपालिकया मेयर मनमोहन चौधरी , संंघीय सांसदपिं जीवनराम श्रेष्ठ, बिना श्रेष्ठ , बागमती प्रदेशया सांसद डा. अजयक्रान्ति शाक्य पूर्वमन्त्री बुद्धिराज बज्राचार्य पिनिगु न ब्बति दुगु खः ।
उगु ज्याझ्वलय् महाविहारया प्रमुख प्रा. डा.नरेशमान बज्राचार्यं झीगु पूर्खा तयेस सम्पदा दयेकेगु लागि यक्को मेहेनत याउगु दु । झीस न थुकिया संरक्षण यायेमा । लुम्बिनीइ विहार दयकेगु लागि बिदेशीपिन्त ग्वाहालि मकाइसे नेपाः थीथी मनू तयके ग्वाहलि दयेका च्वनागु धका धयादिगु खः । थौं येँ महानगरपालिकां थुगु बिहारयात आर्थिक अनुदान बिहार दयेकेगु ज्याय् ल्हाः न्ह्यने हःगुलि सुभाय् देछानादिगु खः ।
थौंया उगु ज्याझ्वलय् येँ महानगरया मेयर विद्या सुन्दर शाक्यं लुम्बिनी हलिमय् च्वपि बौद्ध ख्यलय् या निति तधःगु तीर्थ स्थल खः धका धयादिसे लुम्बिनिइ नेपाःया मौलिक पहः दुगु बिहार दयेकेगु ज्याया ग्वाहालि यायेगु येँ महानगरया न दायित्व खः धकाः न धयादिगु खः ।
येँ महानगरपालिकाया उपमेयर हरिप्रभा खड्गी लसकुस यानादिगुु उगु ज्याझ्वलय् लुम्बिनी नगरपालिकया मेयर मनमोहन चौधरी, लुम्बिनी विकास कोषया उपाध्यक्ष मेत्तेय भन्ते न थःथःगु नुगः खँ तयादिगु खः ।
मल्लकालीन शैलीइ पुनःनिर्माण
नृपेन्द्रलाल श्रेष्ठ | सिल्लाथ्व चतुर्दशी ११४० (फ्रेवअरी ८ २०२०)
यल महानगरपालिका– १६ वडाय् काय्गुननिइ मंकाः छेँ मल्लकालीन शैलीइ पुनःनिर्माण जुगु दु ।दाँची अप्पां मल्लकालीन वास्तुशैलीइ झींच्यालाया दुने थुगुु मंकाः छेँय् या पुनःनिर्माण जुगु खः ।
थुगु छेँ पुनःनिर्माणया लागि यल महानगरपालिकापाखे २८ लख ५० द्धः, १६ वडापाखे २५ लख, यलया क्षेत्र नं २ या संघीय सांसद् कृष्णलाल महर्जनपाखे निर्वाचन क्षेत्र पूर्वाधार विकास ज्याझ्वः पाखे १० लख बिउगु खः । मगागु थीथी दाता, संघ संस्थाया ग्वाहालिं दयकगु खः धका खलःया कोषाध्यक्ष हरिगोविन्द महर्जन जानकारी बियादिगु खः । थुगु छेँ दयकेगु लागि करिब ७० लख खर्च जुगु धका न जानकारी बिगु खः ।
यलय् नेवाः समुदाय दुने ज्यापू तयेगु बाहुल्यता दुगु ४० परम्परागत त्वाः मध्ये काय्गुननि न छगु खः । मंका खलः न धिमे, बाँसुरी लगायत परम्परागत बाजं प्रशिक्षण, नामसंगीति पाठ, दाफा भजन यायेग्, थीथी जात्रापर्व न्ह्याकेगु लागि मंकाः छेँय् याना वयाच्वंगु धका खलया अध्यक्ष समतलाल महर्जनं धयादिगु खः । थुगु मंका छेँ १९२ दँ न्ह्यः (नेपाल संवत् ९४८) दयकुगु खः ।
मंकाः छेँया उलेज्या
काय्गुननि त्वालय् मंकाः छेँया छगु ज्याझ्वः दथुइ यल महानगरपालिकाया मेयर चिरिबाबु महर्जनं उलेज्या यानादिगु दु । मेयर महर्जनं मंका छेँया पुनःनिर्माणं काय्गुननि त्वाः हे तसक आकर्षण बढे याउगु धका धयादिगु खः ।
उगु ज्याझ्वलय् यल मनपा १६ वडाया वडाअध्यक्ष निर्मलरत्न शाक्यं मंका छेँया पुनःनिर्माणं भाषा, संस्कृति व कलाया संरक्षण यायेगु तधःगु टेवा जुइ धका विश्वास प्वका दिगु खः । उगु ज्याझ्वलय् १६ वडाया सदस्य एवं खलःया सदस्य विजय महर्जनं अमूर्त संस्कृति संरक्षण यायेत संघ, प्रदेश व स्थानीय तहपाखे क्षतिग्रस्त सम्पदा, विहार व मंकाः छेँय् पुनःनिर्माण यायेत प्राथमिकता तया ज्या न्ह्याके माःगु खँय् बःबियादिगु खः ।
नेपालभाषा विषयया च्यागु तगि तकया ब्वनेज्वलं पितब्वज्या
लहनान्युज | सिल्लाथ्व चतृर्दशी ११४० (फ्रेअवरी ८ २०२०)
येँ महानगरपालिका नेपालभाषा पाठयक्रम निर्माण समिति शिक्षा बिभागया ग्वसालय्ल छगू तगिं निसें च्यागू तगिंतक्कया नेपालभाषा विषयया ब्वनेज्वलं पितब्वज्या जुगु दु ।
निर्माण समिति शिक्षा विभागया ग्वसालय् लखुतिर्थया जगत सुन्दर ब्वनेकुथिइ उगु ज्याझ्वः जुगु खः ।
उगु पितब्बज्या ज्याझ्वलय् नेपालभाषा केन्द्रीय विभाग प्रमुख प्रा.डा. ओमकारेश्वर श्रेष्ठ, डा. चुन्दा बज्राचार्य, नेवाः स्यनामि दबूया न्वकू कृष्ण भक्त मानन्धरपिसं नुगः खँ तयादीगु खः । उगु ज्याझ्वः बरुण प्रसाद वैद्यं न्ह्याकादीगु ।
किपाः राजेन्द्र रञ्जित
बुखँ नेवाः सुचना केन्द्र
कल्पना महर्जनं बाल विवाह विरुद्धया अभियान न्ह्याकल
लहनान्युज | सिल्लाथ्व चतृर्दशी ११४० (फ्रेअवरी ८ २०२०)
तजाःगु च्वापु गुँ सगरमाथा गयेत तालाम्ह न्हापा मिसाम्ह पत्रकार कल्पना महर्जनं बाल विवाह विरुद्धया अभियान न्ह्याकुगु दु । यल दरवारय् छगु ज्याझ्वः यासे यलया महालक्ष्मी नगरपालिका ६ सिद्धिपुरपाखे भानोदय प्राविपाखे थुुगु अभियान न्ह्याकुगु खः ।
उगु ज्याझ्वः एक्सपिरेन्स आउटडोर्स नेपालया ग्वसाः ग्वगु छगु ज्याझ्वलय् पत्रकार महर्जनं शान्ति शिक्षा अभियानया ग्वाहालिं न्यागु जिल्लाय् थीथी स्कुलय् शिक्षाया माध्यामं थुगु अभियान न्ह्याकगु धका जानकारी बियादिगु खः । वयकलं शिक्षाया माध्यमं बाल विवाह रोके याये फइगु खँय विश्वासं हे थः थुगु अभियान न्ह्याकगु खँया न्ह्यथनादिगु खः ।
ज्याझ्वः मूपाहाँ पूर्व उपप्रधानमन्त्री एवं नेपाली कांग्रेसया पूर्व महामन्त्री प्रकाशमान सिंह व बिशिष्ट पाहाँ शताब्दीपुरुष सत्यमोहन जोशीं पत्रकार कल्पना महर्जनयात सगरमाथा गयेगुलि ग्वाहालि याःपि थीथी संघ संस्था नाप लहनान्युजया सम्पादक नृपेन्द्रलाल श्रेष्ठ, नेपालसमाचारया सहसम्पादक सुनिल महर्जन व श्रीकृष्ण महर्जनयात सम्मान यानादिगु खः । उगु ज्याझ्वलय् पूर्व उपप्रधानमन्त्री सिंह नं भिजिट नेपाल यूट्यूव च्यानलया न उलेज्या यानादिगु खः ।
उगु ज्याझ्वलय् शताव्दी पुरुष सत्यमोहन जोशीं छकः असफल व निकः सफल सगरमाथा गयेत तालाम्ह पत्रकार महर्जनं आः वइगु दिनय् बाल विवाह विरुद्धया न सुथां लाक्क न्ह्याके फयेमा धका भिंतुना बियादिल । ज्याझ्वलय् पर्यटन नाप स्वापू दुपि नाप पत्रकार सुनिल महर्जनपिन्स थःथःगु नुगः खँ तयादिगु खः ।
निक्वःगु पटक सगरमाथा गयेत ग्वाहालि याउगु संस्था एक्सपिरेन्स आउटडोर्स नेपालया निर्देशक रबिन्द्र महर्जनं सगरमाथा नेपाल व चिन निगु हे थासं गयेत तालाम्ह न्हापाम्ह मिसा पत्रकारया दाबी यानादिगु खःसा निक्वःगु पटक ग्वाहालि यापि सकसित सुभाय् बियादिगु खः ।
यलया महालक्ष्मी नगरपालिका सिद्धिपुरय् २०४२ सालय् जन्मे जुयादिम्ह कल्पना महर्जन न्हापा सन् २०१४ य् सगरमाथा गयेग्् झ्वलय् दुर्घटना जुुगु खःसा निक्वःगु पटक सन् २०१८ य् न्हापां सगरमाथा गयेत तालाःगु खः । अथेतु, सन् २०१९ य् निक्वःगु पटक सगरमाथा गयेत तालाःगु खः ।
कल्पना महर्जनं बाल विवाह विरुद्धया अभियान न्ह्याकल
निःशुल्क चिकित्सालयया ६३ दँमुँज्या हन
नृपेन्द्रलाल श्रेष्ठ | सिल्लाथ्व त्रयोदशी ११४० (फ्रेअवरी ७ २०२०)
क्षत्रपाटी निःशुल्क चिकित्सालयया ६३ दँ मुँज्या येँ महानगरपालिकाया मेयर बिद्यासुन्दर शाक्यया मूपाहाँसुइ तःजिक क्वचाःगु दु ।
उगु ज्याझ्वलय् चिकित्सालयय् यात कुमारदेव मानन्धर स्वंगु लख, सुर्यमान सिंह बानियाँ व प्राणदेवि बानियाँ न्यागु लख व अमृतराज शाक्यं छगु लख आर्थिक ग्वाहालि यानादिगुलि मूपाहाँ मेयर शाक्यं दोसल्ला न्ययेका हनादिगु खः ।
अथेहे, उगु हे ज्याझ्वलय् श्यामबहादुर गुरुङ्गं छगु लख, ठमेल पर्यटन बोर्डया न्वकु गिता गुरुङ्ग न्यय् द्धः, मोनिका स्थापितपाखे झीन्याद्धः व रमेश श्रेष्ठं न्याद्धः तका ग्वाहालि यानादिगु खः ।
अथेतु, उगु ज्यााझ्वलय् निःशुल्क चिकित्सालय् नीदँ तक्क मदिक्क सेवा यानादिपि मिखाँ ल्वयु बिशेषज्ञ डा.केशवराज भट्टराई, बालरोगया बिशेषज्ञ डा. सरिता श्रेष्ठ (ताम्राकार), अनमी बिमला राजभण्डारी, हेल्पर चमेली गुरुङ्ग व हेल्पर कृष्ण महर्जनयात नगद नाप हनापौ येँ महानगरपालिकाया मेयर बिद्यासुन्दर शाक्य व उपमेयर हरिप्रभा श्रेष्ठ खड्गीं लल्हानादिगु खः ।
उगु ज्याझ्वलय् मेयर बिद्यासुन्दर शाक्य निःशुल्क चिकित्सालय् न ज्यायात प्रशांसा यानादिसे ये महानरगपालिका न सहकार्य याना वने तयार दु धयादिसे निःशुल्क चिकित्सालया न्हुगु भवण दयेकेगु लागि ग्वाहालि यायेगु बचं न बियादिगु खः ।
चिकित्सालयया नायः डा. मनोजमान श्रेष्ठया सभाधक्ष्यताय् जुगु खः । मेयर शाक्यं क्षत्रपाटी निःशुल्क चिकित्सालयया निरिक्षण न यानादिगु खः ।
