Display Style:
Column Style
प्रोजेक्ट बाजा नेपालं वसन्त उत्सव हन
सुरज, लहनान्युज | चाैलाथ्व पारू ११३९ (अप्रिल ६ २०१९)
नेवाः परम्परागत बाजं व परम्परा म्वाकातयेगु तातुनां प्रोजेक्ट बाजा नेपालं वसन्त उत्सव ग्वसाः हंगु दु । वसन्त फेस्टिभल इन दरवार नांगु उगु ज्याझ्वलय् लुभु महालक्ष्मी धाः दाफा खलःया ल्यायम्हतयसं लोप जुइधुंकूगु लुभु देय्या महालक्ष्मी ग्वारा, देश वर्ण दाफा म्ये न्ह्यब्वःगु खःसा स्वकुमिपिनिगु इनापय् वसन्तया म्ये नं न्ह्यब्वल ।
च्वयातःगु लुयावःगु व लयात्मक स्वरुप मदुगु थुगु महालक्ष्मी ग्वारा, देश वर्ण दाफा म्ये विपु श्रेष्ठं न्हूगु लसय् चिनादीगु खःसा उजेश श्रेष्ठ, मनिष श्रेष्ठ, रितेष श्रेष्ठ, प्रशन्न श्रेष्ठ, अभिषेक श्रेष्ठ, रुविन श्रेष्ठ, रञ्जन श्रेष्ठ, निरञ्जन श्रेष्ठ, प्रशुम श्रेष्ठं हालादीगु खः । थुगु दाफा म्येय् खिं रोजेश श्रेष्ठ, अमित श्रेष्ठ व सनिस श्रेष्ठं थानादीगु खः ।
मेगु प्रस्तुतिकथ वसन्तया लकस व वसन्त क्वचायेधुंकाः घातु हालेगु चलनया अनुभव नासः चुकय् लुल । शास्त्रीय संगीतया पह नं तनाः न्ह्यब्वःगु थुगु नेवाः सांस्कृतिक परम्पराया लोक धूनय् सरोद थानादीपिं वरिष्ठ सराेदवादक सुरेशराज बज्राचार्य, फिरोज बज्राचार्य, खिं, धिमे थानादीम्ह लक्ष्मीप्रसाद डंगोल खःसा विपु श्रेष्ठं खिं, कान्ता डबडब, ढल्को, मादल, मिलन तण्डुकारं भ्वाइलिन, रमन महर्जनं बाँसुरी पुयादीगु खः ।
ज्याझ्वःया लिपांगु ब्वय् थुगु हे राजिप बज्राचार्यं पञ्चकपाल चचा प्याखं न्ह्यब्वयादिल । थुगु प्याखनय् विपु श्रेष्ठ व युजेश श्रेष्ठं चचा म्ये हालादीगु खःसा सुरेशराज बज्राचार्य व फिरोज बज्राचार्यं सरोद थानादिल । लक्ष्मीप्रसाद डंगोलं खिं थानादीगु थुगु म्येय् मिलन तण्डुकारं भ्वाइलिन थानादीगु खः ।
यल लायकूया नासः चुकय् जूगु ज्याझ्वलय् ललितपुर महानगरपालिकाया प्रमुख भाजु चिरिबाबु महर्जनया मूपाहाँकथं झायादीगु खः । प्राेजेक्ट बाजा नेपालया ज्याझ्वः स्वयाःलि थुगु ज्याझ्वः निरन्तरताया नितिं महानगरपालिकापाखें ग्वाहाली यायेगु बचं वयकलं उगु सभाय् बियादिलसा ललितपुर महानगरपालिका वडा १६ या अध्यक्ष निर्मलरत्न शाक्य, संगीत प्रवीण माेहनप्रसाद जाेशी, कार्तिकनाच संरक्षण समितिया नायः किरण चित्रकार, राजेश महर्जन पाहाँकथं झायादीगु खः ।
सुरजवीर बज्राचार्यं न्ह्याकादीगु थुगु ज्याझ्वलय् लसकुस प्राेजेक्ट बाजा नेपालया अध्यक्ष फिराेज बज्राचार्यं बियादीगु खःसा सुभाय् उपाध्यक्ष लक्ष्मीप्रसाद डंगाेलं बियादीगु खः ।
नेवाः परम्परागत बाजं व बाजं परम्परा निरन्तर जूगुयात संरक्षण यायेगु, लोप जूगु मालाः हाकनं जनजीवनय् लित हयेगु नापं न्हूगु पुस्तायात नं लःल्हानाः वनेगु तातुनां प्रोजेक्ट बाजा नेपाल पलिस्था जूगु खःसा थुकी सचिव विश्वास बज्राचार्य, कोषाध्यक्ष विपु श्रेष्ठ अले दुजःपिं सुजित नापित, राजिप बज्राचार्य, अनुप पौडेल खः ।
हेमराजया झ्वता उलेज्या
लहनान्युज | चौलाथ्व पारु ११३९ (अप्रिल ६ २०१९)
यल मां भाय् पुचःया ग्वसालय् शुक्रवाः लिपिविशेषज्ञ नाप पुरातत्वविद्, पं. हेमराज शाक्यया झ्वाता छगु ज्याझ्वः दथुइ मूपाँहा यल महानगरपालिकाया मेयर चिरिबाबु महर्जन उलेज्या यानादीगु दु ।
उगु ज्याझ्वलय् मूपाहाँ महर्जनं पं. हेमराज शाक्यया कृतिया नापं मेमेगु अध्ययन मूलक महत्व जाःगु ज्वलंत मुंकेगु नितिं यलय् सफू धुकू नीस्वनेगु व थुगु शैक्षिक सत्रय् नेपालभाषाया माध्यमं ब्वंकीगु निगू ब्वनेकुथि चायेकेगु नगरसभां क्वःछ्यूगु खँ कनादिगु दु ।
पं. शाक्यं भाषिक, लिपि, पुरातात्विक, बौद्धिक, अन्वेषण क्षेत्रय् बियादीगु योगदानबारे प्रा. प्रेमशान्ति तुलाधरं चर्चा यानादिगु खः ।
विशेष पाहाँ शताब्दिपुरुष सत्यमोहन जोशी लगायत ज्याझ्लय् ३ नं. प्रदेशया सभासद शोभा शाक्य, नेवाः देय् दबूया नायः नरेश ताम्राकार, नेपालभाषा मंकाः खलः यलया नायः ऋषि प्रसाद श्रेष्ठ, हलि नेवाः दबुया नायः शाक्य सुरेनपिनिगु उपस्थिति दुगु खः ।
हेरारत्न शाक्यया सभाधक्ष्यताय् जुगु खःसा रामहरि कपालीं न्ह्याकादी खः । झ्वाता दयेकादीम्ह मूतिकार प्रकाश शाक्ययात मूपाहाँ महर्जनं हनापौ लःल्हानादीगु खः ।
बुखँ : अमिर मैया रञ्जित किपा : नेवाः सूचना केन्द्र
नेपाल बारया न्हुगु नेतृत्वय् चण्डेश्वर श्रेष्ठ
लहनान्युज | चिल्लागा औशी ११३९ (अप्रिल ५ २०१९)
नेपाल बार एसोसिएसनया न्हुगु नेतृत्वय् प्रगतिशील पेशागत व समावेशी पुचः पाखे चण्डेश्वर श्रेष्ठं अधक्ष्यय् निर्वाचित जुयादीगु दु ।
श्रेष्ठं प्यद्धः व २२ मत हया त्याकादीगु खःसा वयकःया प्रत्यासी लोकतान्त्रिक पुचःया सुनिल पोखरेल स्वद्धः व ८७३ मत हःगु खः ।
अथेहे महासचिवय् लोकतान्त्रिक पुचःया लीलामणी पौडेलं प्यद्धः व १७८ हया त्याकादीगु खःसा प्रगतिशील पुचःया सुरेन्द्रबहादुर थापां स्वद्धः व ७०१ मत कयादीगु खः ।
हलिं नेवाः दबूया पदाधिकारीपिन्त भिंतुना देछाल
लहनान्युज | चिल्लागा औशी ११३९ (अप्रिल ५ २०१९)
नेवाः जागरण मञ्चपाखे स्वक्वःगु तःमुँज्याय् निर्वाचित जूपिं हलिं नेवाः दबूया न्हूपिं पदाधिकारीपिन्त छगू ज्याझ्वःया दथुइ भिंतुना देछाःगु ज्याझ्वः जुगु दु ।
येँया क्षेत्रपार्टी जूगु उगु ज्याझ्वलय् दबूया न्हूम्ह नायः सिजन श्रेष्ठ दुजःपिं दया शाक्य, शाक्य सुरेन व सुरेन्द्र भत्त श्रेष्ठयात थथे भिंतुना देछाःगु खः ।
उगु ज्याझ्वलय् येँ महानगरपालिकाया उपमेयर हरिप्रभा खड्गी, नेवाः न्ह्यलुवाः मल्ल के सुन्दर, दबूया नायः सिजन श्रेष्ठ थःथःगु बिचाः तयादीगु खः ।
जागरण मञ्चया नायः सुजीव बज्राचार्यया सभाधक्ष्यताय् जुगु उगु ज्याझ्वलय् न्वकू अमृत ताम्राकारं न्ह्याकादीगु खः ।
थौं न निसे न्ह्यात कीर्तिपुर महिला महोत्सव
नृपेन्द्रलाल श्रेष्ठ | चिल्लागा चतुर्दशी ११३९ (अप्रिल ४ २०१९)
किपू नगरपालिका पलिस्था जूगु २३ दँ क्यंगु लसताय् थौं न निसें ‘कीर्तिपुर महिला महोत्सव ११३९’ न्ह्याःगु दु ।थुगु महोत्सव थौं न निसे २३ गते शनिवाःतक न्ह्याइगु खः ।
थौं बिहिवाः छगु ज्याझ्वः दथुइ येँ १० प्रतिनिधि सभाया सांसद राजन केसी उलेज्या यानादीगु खः ।
किपूया मेयर रमेश महर्जनया सभाधक्ष्यताय् जुुगु थुगु ज्याझ्वलय् प्रदेश न ३ या सांसद पुकार महर्जन,उप मेयर सरस्वती खड्का नाप किपू नगरपालिकाया १ निसे १० तकया वडा अधक्ष्यपिनिगु उपस्थिति दुगु खः ।
किपूया पुलांगु बस्ती दुने लाःगु वडा १, २, ३ व १० य् न्ह्याइगु खः। उगु लागाया महिला समूह व आमा समूह सक्रिय रुपं न्ह्यच्यूगु दुसा किपू लागाया मिसापिन्सं उत्पादन याःगु थीथी हलंज्वलंया स्टललिसें थीथी त्वालय् थीथी नसाज्वलंया स्टल तयातःगु खः ।
