Display Style:
Column Style
सफू पितब्वज्या, हना ज्याझ्वः
लहनान्युज | बछलागा सप्तमी (९मे ७ २०१८)
नेपाल साहित्य मन्दिरया ६५ क्वःगु बुदिंया लसताय् मन्दिरया ग्वसालय् शनिवाः ख्वपय् थीथी सिरपाः, हना व चिनाखँ मुना पितब्वज्या ज्याझ्वः क्वचाःगु दु ।
उगु ज्याझ्वलय् नेपालभाषा एकेडेमीया चान्सलर चित्तरञ्जन नेपालीं भवानी जोशीया नेपालभाषा व खस भाय्या चिनाखँ मुना ‘आव्हान÷इनाप’ पितब्वज्या नापं आर. बी. जोशी फाउण्डेशन प्राज्ञ सम्मान ११३८ वाङ्मय शताब्दी पुरुष सत्यमोहन जोशीयात, भिंmनिक्वःगु जरि मैयाँ साखः लुमन्ति सिरपाः ११३८ साहित्यकार कृष्णदेवी बज्राचार्ययात व न्हापांगु कुमार साखः लुमन्ति हःपाः सिरपाः ११३८ साहित्यकार अगिब बनेपालीयात लःल्हाःगु दु ।
तिलक प्रकाश कायस्थया नायःसुइ हरिशरण राजोपाध्यायनं न्ह्याकूगु ज्याझ्वलय् रामेश्वर श्रेष्ठं लसकुस न्वचू तयादीगु खःसा वरिष्ठ साहित्यकार तेजेश्वर बाबु ग्वंगः, रमापति राज शर्मा, सम्मान्नित व्यक्ति वाङ्मय शताब्दी पुरुष सत्यमोहन जोशी, सिरपाः कयादीपिं अगिब बनेपाली, कृष्ण देवी बज्राचार्य, च्वमि भवानी जोशीपिन्सं नुगः खँ तयेगु नापनापं साहित्यकार पशुपतिमान प्रधानं सुभाय् देछानादीगु खः ।
बुखँ नेवाः सूचना केन्द्र
किपा राजेन्द्र रञ्जित
परियत्ति वक्तृत्वकला प्रतियोगिता जुल
नृपेन्द्रलाल श्रेष्ठ | बछलागा सप्तमी (मे ७ २०१८)
परियत्ति शिक्षा ब्वंकीगु स्वनिगःया च्यागू केन्द्रया ब्वँमित दथुइ स्वीक्वःगु परियत्ति बक्तृत्वकला कासा जुल ।
येँया युवा बौद्ध समूहया ग्वसालय् जूगु उगु कासाय् ‘मांअबुया महत्व’ विषययात कयाः जूगु उगु कासाय् जगतसुन्दर परियत्ति केन्द्रया रिजा महर्जन न्हाप जूगु खः । अथे हे शाक्यसिंह परियत्ति तथा प्रौढ शिक्षालय, यलया तिरिशा शाक्य ल्यू व नकबहिल बौद्ध परियत्ति केन्द्रया पूर्णिमा शाक्य लियांल्यू लाःगु खः । वय्कःपिन्सं छसिकथं अनात्म लक्षण सूत्र व मांअबुया महत्वयात कयाः न्ववानादीगु खः ।
कासाय् सिरपाः त्याकादीपिन्त भिक्षु बोधिज्ञान व परियत्ति बक्तृत्वकला कासाया सञ्चालक समितिया मू संरक्षक मोतिलाल शिल्पकारं दसिपौ व दां सिरपाःकथं लःल्हानादीगु खः ।
कासाय् जयमंगल विहार यलया निर्मला ताम्रकार, वाइएमबिए परियत्ति केन्द्र, यलया सुनीता शिल्पकार, श्रीबच्छ परियत्ति केन्द्र, यलया हेरादेवी शाक्य, दीपंकर परियत्ति शिक्षालय, यलया निश्चलराज शाक्य व करुणा बौद्ध परियत्ति केन्द्र, मातातीर्थया सरला डंगोलं ब्वति कयादीगु खः ।
सञ्चालक समितिया नायः नापं समाजसेवी शिल्पकारं स्वीछक्वःगु कासा ग्वसाः ग्वय्गु पाः काःगु दीपावती बौद्ध परियत्ति केन्द्र, गुइत यलया केन्द्राध्यक्ष ईन्द्रकुमारी शाक्ययात दसिपौ बियाः पाः लःल्हानादिल ।
पूर्ण वैद्यया कविताय् कयाः सहलह
लहनान्युज | बछलागा सप्तमी (९मे ७ २०१८)
लिजः नेपालभाषा कविता दबूया ग्वसालय् कवि पूर्ण वैद्यया लःलः खः चिनाखँ ९भाय् हिलातःगु० सफूतिइ दुथ्याकातःगु विम्वयात कयाः पुलांगु बानेश्वय् सहलह मुँज्या जूगु दु ।
उगु ज्याझ्वलय् कवि वैद्यं लःलः खः चिनाखँय् छ्यलादीगु विम्वयात कयाः प्रोफेसर श्रीधर लोहनीं कुलेगु नापनापं उगु चिनाखँ मुना सफूया बारे ध्वाथुइकादिल ।
ज्याझ्वलय् भाषा ह्यःमि, कवि, साहित्यकारपिसं ब्वतिकयादीगु खः । ज्याझ्वलय् ब्वतिकयादीपिनिगु न्ह्यसःया लिसः ब्युसे नुगः खँ तयेगु झ्वलय् थुगु सफू लःया बारे जक च्वये धकाः च्वयागु मखु । चिनाखँ च्वयेगु झ्वलय् लःयात कया च्वयातयागु चिनाखँ तःपु खनेदये धुंकाः पासापिसं लःया बारे च्वयातःगु चिनाखँ जक मुना छगू अलग हे सफू पिथनेगु साहुति कथं पिथनागु खँ कनादिल ।
कवि बैद्यं थःगु जीवनय् जूगु घटना, मेपिनिगु जीवनय् जूगु घटना गथेकि मनूतय्सं वा वइबलय् थीथी आकारयागु थलबलय् वाति फइगु, वा वइबलय् न्ह्यःकंझ्यालय् लाःगु लः न्हाय्कने थायेमफयाः ख्वविथें सुलुलुलु बाः वंगु लू स्वयाः च्वयागु खँ न्ह्यथनादिल ।
विश्वय् न्हापां विम्ब छ्यलाः चिनाखँ च्वयादीम्ह इज्रा पाउन खः । कवि बैद्ययात विम्बवादी कवि नं धायेगु याः । लः लः खः चिनाखँ मुनाय् विम्ब जक छ्यलातःगु मखु प्रतिक नं छ्यलातःगु खनेदु ।
बुखँ नेवाः सुचना केन्द्र
किपा राजेन्द्र रंजित
थिमि मेयरयात पत्रकार दबुया पदाधिकारी नाप ला
नृपेन्द्रलाल श्रेष्ट बछलागा चौथी ११३८ (मे ४ २०१८)
नेवाः पत्रकार राष्ट्रिय दबूया केन्द्रीय पदाधिकारी नापं थिमिया पत्रकार दबूया दुजःपिन्सं शुक्रवाः मध्यपुर थिमि नगरपालिकाया मेयर मदनसुन्दर श्रेष्ठयात स्वास्थ्य अवस्थाया जाकारीकासें भिं उसाय्या कामना यानादीगु दु ।
थिमिइ जूगु पत्रकार दबूया केन्द्रीय सचिवालय मुँज्या लिपा वंगु बैशाख ८ गते अज्ञात मनूतय्गु सांघातिक आक्रमणं घाःपाः जूम्ह मध्यपुर थिमि नगरपालिकाया मेयर मदनसुन्दर श्रेष्ठया स्वास्थ्य स्थितिया बारे थुइकेगु नितिं अनया कोरिया मैत्री अस्पतालय् वना नापलानादीगु खः ।
वय्कः खतरामुक्त अवस्थाय् दु । प्रहरीं मेयर श्रेष्ठयात आक्रमण याःपिं न्याम्ह मनूत ज्वने धुंकूगु दुसा मेपिं मालेगु ज्या जुयाच्वंगु दु । प्रहरीं अनुसन्धान जारी दु धकाः जानकारी बिउगु दु ।
थ्व हे दथुइ आक्रमणकारीयात ज्वना कारवाही यायेमाःगु मागयासें स्थानीयवासीतगु भेला शनिवाः थिमिइ जुइत्यंगु दु
अग्नि फिटनेस क्लबया उलेज्या
नृपेन्द्रलाल श्रेष्ठ | बछलागा तृतिया ११३८ (मे ३ २०१८)
यल महानगरपालिकाया मेयर चिरिबाबु महर्जनं छगु ज्याझ्वः दथुइ यलया कुमारीपाटीइ न्हुगु अग्नि फिटनेस क्लबया उलेज्या यानादिगु दु ।
उगु ज्याझ्वलय् थःगु नुगः खँ तयादिसे यल मनपाया मेयर महर्जनं स्मार्ट सिटीइ सच्छि व झीन्हयगु बुँदाय् स्वास्थ्य न छगु खः धयादिसें स्वस्थ्य जुइत थःज्यागु फिटनेस क्लबय् ब्यायाम यायेत ई पिकाये माः धका धयादिगु खः ।
क्लबया संस्थापक नाप प्रशिक्षक राजेन्द्र महर्जनया सभाध्यक्षय् जुगु उगु ज्याझ्वलय् यल मनपा वडा न. १९ वडा अध्यक्ष बिनोद ताम्रकार, ललितपुर उद्योग बाणिज्य संघका बरिष्ठ उपाध्यक्ष भरतलाल जोशी, रुपकुमार शाक्य अग्निशाला मंकाः खलःया अध्यक्ष बुलाल महर्जन नाप विशेष अतिथी कथं ज्यापू समाजया अध्यक्ष प्रेम महर्जन न झयादिगु खःसा क्लबया संस्थापक दुजः बाबुुराजा ज्यापू ज्याझ्वः न्ह्याकादिगु खः ।
उगु क्लवय् प्रशिक्षक कथं जिम व कार्डियो प्रशिक्षकय् राजेन्द्र महर्जन, संजय डंगोल नाप जुम्बाया लागि रोमा श्रेष्ठ बरुण व पूजा बज्राचार्य च्वनादिगु दु ।
