Display Style:
Column Style
खुल्लामञ्चय् दुने चायेकातःगु पसः थुन
नृपेन्द्रलाल श्रेष्ठ | चौलागा अष्टमी ११३९ (अप्रिल २७ २०१९)
येँया खुल्लामञ्चय् अनाधिकारिक रुपं दयेकुगु पसःक्वः थौं शनिवाः येँ महानगरपालिकां चिइकुगु दु ।
थौं हिनय् निसें प्रहरी पाः तया डोजर हयाः खुल्लामञ्चय् दुने चायेकातःगु दक्को पसःया सटर चिइकुगु खः ।
उगु संरचना हटे यायेत येँ महानगरया मेयर बिद्यासुन्दर शाक्य नाप येँ जिल्ला अधिकारी प्रमुख रामप्रसाद आचार्य न न्हयने दुगु खः ।
आः उगु थासय् सार्वजनिक चःबि, टिकट काउन्टर व छगु खाजा घर जक बाँकी दनि ।
छु दिं न्ह्यः जक उगु संरचना हटे यायेगु लागिु धर्ना ज्याझ्वः याःगु खः ।
शंखधर उपन्यास उलेज्या
लहनान्युज | चौलागा सप्तमी ११३९ (अप्रिल २६ २०१९)
राष्ट्रिय विभूत शंखधर साख्वाः प्रतिस्थानया ग्वसालय् मल्ल के सुन्दरं च्वया अगिब बनेपाली अनुवाद याःगु खस भाषाया शंखघर नांया ऐतिहासिक आख्यानात्मक परिकल्पना याना तयार यानातःगु उपन्यास थौं छगु ज्याझ्वः दथुइ प्रज्ञा प्रतिस्थानय् उलेज्या जूगु दु ।
उगु ज्याझ्वःया मूपाँहा शताव्दी पुरुष सत्यमोहन जोशी, नेपाल प्रज्ञा प्रतिस्थानया कुलपति गंगाप्रसाद उप्रेति, नेपालभाषा एकेडेमीया चान्सलर चित्तरञ्जन नेपालीं मंकाः कथं सफू पितब्बज्या यानादीगु दु ।
जनकवि दुर्गालाल श्रेष्ठ, मध्यपुर थिमि नगरपालिकाया मेयर मदन सुन्दर श्रेष्ठ, माननीय सांसद भीमसेन दास प्रधान, नेपालभाषा एकेडेमीया चान्सलर चित्तरञ्जन नेपाली, नेपाल प्रज्ञा प्रतिस्थानया कुलपति गंगा प्रसाद उप्रेति, मूपाहाँ शताब्दी पुरुष सत्यमोहन जोशी अगिव बनेपाली, प्रा. डा. अभि सुवेदीं सफूयात कयाः थःगु खँ तयादीगु खः ।
प्रतिस्थानया नायः चन्दन कृष्ण श्रेष्ठया सभाधक्ष्यताय् जुगु थुगु ज्याझ्वलय् च्वमि मल्ल के सुन्दर सुभाय् देछानादीगु खः ।
मनमोहन अस्पतालया ब्लड बैंक उलेज्या
नृपेन्द्रलाल श्रेष्ठ | चौलागा सप्तमी ११३९ (अप्रिल २६ २०१९)
मनमोहन मेमोरियल शिक्षण अस्पतालय् थौं पुलाम्ह मनमोहन अधिकारीया २० क्वःगु स्मृति दिवसया झ्वलय् ब्लड बैंक उलेज्या नाप हिदान ज्याझ्वः जुगु दु ।
थौं छगु ज्याझ्वःया दथुइ स्वास्थ्य राज्यमन्त्री डा.सुरेन्द्रकुमार यादवं ब्लड बैंक उलेज्या यानादीगु दु ।
उगु ज्याझ्वःया शिक्षण अस्पतालया नायः राजेन्द्र पाण्डेया सभाधक्ष्यताय् जुगु उगु ज्याझ्वलय् स्वास्थ्य राज्यमन्त्री डा यादव, डा.बंशिधर मिश्रं नुँगः खँ तयादीगु खः ।
थौं मनमोहन मेमोरियल शिक्षण अस्पतालय् जुगु हिदान ज्याझ्वलय् स्वास्थ्य राज्यमन्त्री डा.सुरेन्द्रकुमार यादव न हिदान यानादीगु खः ।
मन्त्री यादव लगायत १८० म्ह मल्याक स्वास्थ्यकःमि पिन्स न हिदान यानादीगु खः ।
अदालतया आदेश विपरीत पत्रकार महर्जन हिरासतय्
लहनान्युज | चौलागा षष्ठी ११३९ (अप्रिल २५ २०१९)
सर्वोच्च अदालतया आदेश अवज्ञा यासे हिरासतय् तया तःम्ह पत्रकार जितेन्द्र महर्जनयात रिहाईया माग यासे नेवाः पत्रकार राष्ट्रिय दबू नं थौं विहीवाः येँया माईतीघर मण्डलाय् धर्ना ज्याझ्वः याःगु दु ।
वैचारिक आस्थाया आधारय् उचित व पर्याप्त प्रमाण बिना हिरासतय् तया तःगु धाःसे पत्रकार दबूलि माईती मण्डलाय् डेढ घण्टा धर्ना बिगु खः ।
किपूपाखें प्रकाशित जुइगु नेपालभाषा ज्वजलपा वाःपौया प्रकाशक व सम्पादक महर्जन पत्रकार दबूया येँ शाखाया दुजः खः । पत्रकार महर्जनयात न्हापां चैत्र २६ गते व निक्वःगु पटक बैशाख ८ गते सर्वोच्च अदालतया हे गेटय् ज्वःगु खः ।
पत्रकार दबूया केन्द्रीय पदाधिकारी, सदस्यपिन्स ‘विचार तथा अभिव्यक्ति स्वतन्त्रताको ग्यारेण्टी गर, प्रेस स्वतन्त्रताको ग्यारेण्टी गर, गैर न्यायिक हिरासतमा राखिएका पत्रकार रिहाई गर’ च्वया तःगु पर्चा रञ्जना लिपि, प्रचलित नेपाल लिपि, देवनागरी व रोमन लिपि ज्वःना उगु धर्ना च्वंगु खः ।
धर्नाप्रति एक्यबद्धताय् नेपाल पत्रकार महासंघ, नेपाल आदिवासी जनजाति पत्रकार महासंघ, क्रान्तिकारी पत्रकार महासंघ, क्रान्तिकारी पत्रकार संगठन, प्रेस सेन्टर, नेवाः देय् दबू व ज्यापू महागुथि नेपाः पाखे ब्बति काःगु खः ।
महानगरीय प्रहरी वृत्त कमलपोखरीं राज्य विरुद्धया कसुरया अनुसन्धानया सिलसिलाय् धका पत्रकार महर्जन पटक पटक म्याद थप यासे हिरासतय् तया तःगु खः ।
वृतया प्रहरी नायब उपरीक्षक रवीन्द्र पौडेलया अनुसार पत्रकार महर्जनयात थप न्यान्हुया लागि हाकन हिरासतय् तयेत जिल्ला अदालत काठमाडौं थौं विहीवाः आदेश बिगु दु ।
नेपाल पत्रकार महासंघ पाखे केन्द्रीय सदस्य जन्मदेव जैसीं गृह मन्त्रालययात विपक्षी दयेका अदालतय् तःगुे बन्दी प्रत्यक्षीकरण रिटं उगु आदेश बिःगु खः ।
‘सरकारया कार्यशैली प्रेस स्वतन्त्रता विरोधी’
धर्ना ज्याझ्वःया समापन यासे नेवाः पत्रकार राष्ट्रिय दबूया केन्द्रीय अध्यक्ष श्रीकृष्ण महर्जनं अदालतया आदेश विपरीत हिरासतय् तया सरकारं कानून शासनया बर्खिलाप ज्या याःगु धकाः आरोप बिगुदु ।
नेपाल आदिवासी जनजाति पत्रकार महासंघया अध्यक्ष दण्ड गुरुङ्गं वैचारिक आस्थाया आधारय् पत्रकारयात ज्वना सरकारं प्रेस स्वतन्त्रतायात गःपः तिगु दु धका थःगु बिचाः तयादीगु खः ।
अथेहे नेपाल पत्रकार महासंघया केन्द्रीय सदस्य जन्मदेव जैसीं सरकारं छगु लिपा मेगु प्रेस स्वतन्त्रताया कुण्ठित याःगु आरोप लगे यानादीगु खः ।
ज्याझ्वलय् क्रान्तिकारी पत्रकार महासंघया प्रदेश नं ३ या संयोजक रमेश महतारा, क्रान्तिकारी पत्रकार संगठनकाया महासचिव बाबुराम भुसाल, पत्रकार दबया केन्द्रीय महासचिव सुनील महर्जन व सचिव के. के मानन्धरं सरकारं पत्रकार ज्वना लोकतन्त्रया आवरणय् निरंकुशता व राज्य आतंक मचे याःगु आरोप बिगु खः ।
मिखादान जनचेतना मुलक ज्याझ्वः
लहनान्युज | चौलागा षष्ठी ११३९ (अप्रिल २५ २०१९)
दृष्टि विहिन उन्मुलनया तातुना न्ह्याका च्वंगु सामाजिक क्रिया संजाल नेपाल, येँया ग्वसालय् मिखादान जनचेतना मुलक ज्याझ्वः जुगु दु ।
उगु ज्याझ्वलय् मूपाहाँ कथं का.म.पा. वडा नं.२० या नायः राजेन्द्र मानन्धर झायादीगु खःसा पाहाँ कथं शान्ति निकुञ्ज मा.वि.या प्रध्यानाध्यापक ज्ञानकाजी महर्जन, वडा सदस्यपिं शोभा मानन्धर व मञ्जु मगैयां झायादीगु खः ।
मनू सी धुंकाः खरानी जुया वनीगु मानव शरीरया अंग मेपिनिगु नितिं जीवनदान जुइ फइगु खँयात नालाकासे छम्ह सीधुंकूम्ह मनूया मिखापाखें प्यम्ह मिखा मखंपिन्त खंकेफैगु, मनू सीगु ८ घौ तक्क मिखा सीमखु, मिखा बैंकं मदुम्ह मनुया मिखाया नानी जाँच याना जक मिखाँ मखं म्हेसित नानी प्रत्यारोपण याइगु, मिखादान यातकि मेगु जन्मय् मिखा मदुम्ह जुयाः जन्म जुइगु अन्धबिश्वासयाबारे साधुराम महर्जनं ध्वाथुइक कनादिल ।
मिखादान धइगु नं हिदान थें हे मानव जीवनय् तसक हे महत्वपूर्णगु ज्या जूगुलिं थुकियात न्यंकायंकेत सकलसिनं थःथःपिनिगु गुथि, भ्वय्, मुँज्या जुइथाय् प्रचार प्रसार याना वने माःगु खँय् प्रध्यानाध्यापक महर्जन बःबियादिगु खः ।
संस्थाया नायः मैया बज्राचार्यया सभाधक्ष्यताय् जुगु उगु ज्याझ्वः आनन्द बज्राचार्यं न्ह्याकादीगु खः।
ज्याझ्वलय् मिखादान इच्छापत्र दुतिनेगु पौ वडाया प्रतिनिधि व ब्वनेकुथिइ इनेगु ज्या नं जूगु खः ।
बुखँ व किपाः अमिरमैंया रंजित
