Display Style:
Column Style
येँया खुसिबुँइ हिदान ज्याझ्वः
नृपेन्द्रलाल श्रेष्ठ | चिल्लागा एकादशी ११३९ (अप्रिल १ २०१९)
मंकाः समाज खुसिबुँ, टाउन प्लानिग १७ वडाया ग्वसालय् समाजया संस्थापक नायः महेन्द्रबिलास जोशीया लुमन्ती हिदान ज्याझ्वः जुल ।
उगु ज्याझ्वलय् ४२म्ह स्वयां अप्वस्यां हिदान यानादीगु खः ।
ज्याझ्वलय् समाजया नायः भाइराजा महर्जनं थौंकन्हय् हिया अभाव जुयाच्वंगु दु धयादिसे समाजं दँय् छक्वः जक थुगु ज्या जुयाच्वंगुली आः दँय् स्वक्वःतक याय्गु ग्वसाः जुयाच्वंगु जानकारी बियादिल ।
ज्याझ्वलय् हिदान यानादीपिन्त १७ वडाया दुजः बाबुराजा महर्जन दसिपौ लःल्हानादीगु खः ।
स्कूलय् ब्बमिपिनिगु ग्राय्जुएशन
लहनान्युज | चिल्लागा एकादशी ११३९ (अप्रिल १ २०१९)
टाइम्स इन्टरनेशनल स्कूलय् ब्बमिपिनिगु ग्राय्जुएशन क्वचाःगु दु ।
उगु ज्याझ्वलय् नुगःखँ तयेगु झ्वलय् विशेष पाहाँ कथं हलिं नेवाः दबूया वरिष्ठ न्वकू दयारत्न शाक्यं थुगु ब्वने कुथिइ चहःपहः, संरचनात स्वयेबलय् अन्तर्राष्ट्रिय स्तरया हे ब्वनेकुथि खनेदु धयादिगु खः ।
अथेहे ज्याझ्वलय् डा. चुन्दा बज्राचार्यं मस्त तय्त आखः ब्वंकेबलय् डाक्टर हे दयेकेगु, बैज्ञानिक दयेकेगु वा इन्जिनियर दयेकेगु धकाः जवर्जस्तीं ब्वंकां मज्यू अज्यागु सफल न जुइ मखु धका धयादीसे मस्त तयेगु स्वभाव स्वयाः इच्छा कथंया शिक्षा बिइफःसा जक उच्च शिक्षा हासिल याके फइ धयादीसें शिपमुलक शिक्षाय् ध्यान वंकेफत धाःसा मस्तयेगु भविष्य बांलाइगु खँय् बः बियादीगु खः ।
ब्वनेकुथिया प्रिन्सिपल पल्पसा महर्जनं लसकुस यानादीगु उगु डा बज्राचार्यं मस्त ब्बमिपिन्त दसीपौ लःल्हानादीगु खःस डिर्नेटर उषा गुरूङं ब्बमिपिनिगु थपूया योजनाबारे नं कनादिगु खः ।
बुखँ–नेवाः सूचना केन्द्र किपा–राजेन्द्र रञ्जित
क्वचाल वृहत् कला तथा साँस्कृतिक महोत्सव
नृपेन्द्रलाल श्रेष्ठ | चिल्लागा एकादशी ११३९ (अप्रिल १ २०१९)
यल महानरगपालिका १६ वडाया ग्वसालय् जूगु वृहत् कला तथा साँस्कृतिक महोत्वस क्वचाल ।
वल्र्ड क्राफ्ट काउन्सिलंयलयात हस्तकला नगरी घोषणा याःगु लसताय् यल महानगरपालिका वडा नम्बर–१६ य् वृहत् कला व सांस्कृतिक महोत्सवया ग्वसाः ग्वःगु खःसा उगु महोत्सवया उलेज्या उपराष्ट्रपति नन्दबहादुर पुनं यानादीग खः ।
महोत्सवय् जीवित देवी कुमारी दर्शन नापं धातुकला, काष्ठकला, चित्रकला, मूर्तिकला, सिजःया थल बल, थीथी संस्कारय् बज्राचार्य पूजाविधि, परम्परागत भेषभूषा नाप बुगःद्यया रथ दयेकेगु विधिया हलंज्वलं ब्बय्गु ज्या जूगु खः।
थ्व हे झ्वलय् महोत्सवया समापन ज्याझ्वलय् मूपाहाँ यल महानगरपालिकाया प्रमुख चिरिबाबु महर्जन ज्याझ्वलय् ग्वाहालि यानादीपिन्त सुभाय् पौ लःल्हानादीगु खः ।
हलिं नेवाः दबूया पदाधिकारी दथुइ म्हसीका कालबिल
लहनान्युज | चिल्लागा एकादशी ११३९ (अप्रिल १ २०१९)
नेपाल लिपि गुथिं हलिं नेवाः दबूया स्वक्वःगु तःमुँज्यां निर्वाचित जुयादीपिं न्हूपिं पदाधिकारीपिंलिसें छगू ज्याझ्वःया दथुइ म्हसीका कालबिल ज्याझ्वः यात ।
दबूया न्हूम्ह नायः सिजन श्रेष्ठं हलिं नेवाः दबूपाखें नेपाल लिपि गुथिं न्ह्याकाच्वंगु अभियानयात अमेरिकाय् च्वंपिं नेवाःतय्संं फूकथं ग्वाहालि याय्गु नितिं सहलह ब्याकेगु कनादिल ।
ज्याझ्वलय् दबूया बरिष्ठ दुजः दयारत्न शाक्यं दबूया न्हापांगु तःमुँज्याय् लिपि दुगु टि–सर्ट पिथनाः हलिंन्यंकं लिपिया प्रचार यानागु जानकारी बियादिसें उगु टि–सर्ट लिपि गुथियात सुरक्षित यानातय्त लःल्हानादीगु खः ।
थ्व हे झ्वलय् लिपि गुथिया नायः निरञ्जन ताम्राकारं नेपाल लिपि गुथिं यानाच्वंगु थीथी ज्याया जानकारी बियादीगु खः ।
हलिं नेवाः दबूलय् सिजन श्रेष्ठ न्हुम्ह नायः
नृपेन्द्रलाल श्रेष्ठ | चिल्लागा एकादशी ११३९ (मार्च ३१ २०१९)
हलिं नेवाः दबूया स्वक्वःगु तःमुँज्यां वर्तमान नायः सिजन श्रेष्ठयात हे हानं नायः कथं ल्यःगु दु । नायः पदया लागिं प्रत्याशी जुयादीम्ह मेम्ह उम्मेदवार दयारत्न शाक्यं थःगु उम्मेदवारी लित कयाः समझदारी यानादीगुलिं भाजु श्रेष्ठयात तःमुँज्यां निर्विरोध नायः ल्यःगु खः ।
उगु तःमुँज्यां दयारत्न शाक्य (अमेरिका), राजेश श्रेष्ठ (अमेरिका), शशी माःजु (युके), नेपाः पाखें रश्मीला प्रजापती, शाक्य सुरेन व सुरेन्द्रभक्त श्रेष्ठयात ल्यःगु दु ।
हलिं नेवाः दबू तःमुंज्या–११३९ या घोषणा पौ थुकथ दु
तःजिगु नेवाः संस्कृतिया प्रतिनिधित्व यासेँ हलिमय् न्यंक बसोबास याना वयाच्वंपिं नेवाःतय्गु मदंकाः तःमँु्ज्याकथं नेपाःया येँय् हलिं नेवाः दबूया मू ग्वसाः व हलिं नेवाः दबू नेपाः देय् मू कवःया ग्वसालय् हलिंया थी थी देसं झाःपिं अथेहे प्यसः प्रतिनिधितय्गु सक्रिय सहभागिताय् ने.सं. ११३९ चिल्लागाः ८ निसेँ १० तक (विसं २०७५ च१४ निसेँ १६ तक÷सन् २०१९ मार्च २८ निसेँ ३० तक) तःजिक जूगु हलिं नेवाः दबूया स्वक्वःगु तःमूँज्या नेवाः म्हसिका आन्दोलनय् बिस्कं महत्व दूगु ऐतिहासिक ज्याझ्वः जूगु दु । सम्मेलनय् जूगु तःजिगु सहलहया लिधंसाय्
क्वय्च्वयाकथंया घोषणापत्र तःमूँज्याया निष्कर्षकथं जारी यायेगु सहमति जूगु खः ।
१. नेपालं पिने व नेपालय् दुने च्वनाच्वंपिं नेवाःतय्सं थःगु म्हसिका व सभ्यता हलिमय् ल्यंकातयेत छधीछप्पं जुइगु
कुतः यायेगु जुई ।
२. छुंनं अवस्थाय् नेवाःतय्त ल्यूने लाकीगु असमान व्यवहारया विरोधय् हलिं नेवाः दबुलिं न्ह्याबलेँ सशक्त सः थ्वयेका च्वनी ।
३. नेवाः सभ्यता व सम्पदा न्हंकीगु छुं नं ज्याझ्वः पनेत हलिं नेवाः दबू न्ह्याबलेँ सक्रिय व सजग जुयाच्वनी ।
४. नेपालभासाया संरक्षण व थपूया निंतिं हलिं नेवाः दबूलिं देसं दुने वा पिने सक्रिय जुयाच्वंपिं संस्था वा पुचःनाप सहकार्य याई ।
५. विकास व आधुनिकताया नामय् नेवाः वस्ती व वासिन्दातय्त विस्थापित यायेगुया नापं नेपाःया मूर्त अमूर्त सम्पदा विनाश यायेगु षडयन्त्र थौँ नं जुयाच्वंगुलिं अजाःगु षडयन्त्रकारी अतिक्रमण व दमनया तच्वकं भत्र्सना यासेँ अजाःगु विभेदपूर्ण, असामाजिक, प्रतिगमनकारी, जनविरोधी ज्यात तुरुन्त दिकेया निंतिं सरकार, जिम्मेवार निकाय व अन्तरराष्ट्रिय समुदायपिनिगु न्ह्यःने हलिं नेवाः दबुलिं दबाबमूलक ज्याझ्वःत सशक्तकथं न्ह्याकाच्वनी;
६. हलिं नेवाः दबूलिं न्हापा घोषणा याःकथं नेपाःया संविधानया धारा ७ स खँय् भाय् छगुयात जक ‘नेपाली’ धयाः ‘सरकारी कामकाजया भाय् जुई’ धकाः धयातःगु विभेदकारी व्यवस्थाय् छुंकथंया ह्यूपाः मवःगुलिं थ्व खँपूयात हीका नेपाःदुने ल्हाइगु नेपाःया फुक्क भाय्यात नेपाली भाय् धायेगुया नापं बिना भेदभाव सरकारी ज्याय् छ्यलेदइगु अधिकार
दयेकेत सशक्त पहल हलिं नेवाः दबुलिं याई ।
७. नेपालं सन् २००७ स अनुमोदन यायेधुंकुगु आईएलओ महासन्धि १६९ कथं नेपालय् ऐन कानुनया व्यवस्था यानाः कार्यान्वयन यायेगुया नापं महासन्धिकथंया दक्वं जिम्मेवारी नेपाल सरकारं यायेमाः;
८. नेवाः कला, संस्कृति, सम्पदा, सभ्यता, भाय्, साहित्य, पत्रकारिताया विकासया निंतिं हलिंन्यंकया मंकाः कुतःकथं नीस्वंगु ‘हलिं नेवाः कोष’ यात हलिं नेवाः दबुलिं विस्तार याना यंकी;
९. नेवाःतय् हकहितसम्बन्धय् नेवाःतसेँ थम्हं हे थःयात शासन यायेदइगु स्वशासनया व्यवस्थाया निंतिं हलिं नेवाः दबुलिं निरन्तर सः ततं वनी ।
१०. तःहाकःगु इतिहास दूगु नेपालभाषाया वाङमययात क्रमशः अन्तरराष्ट्रियकरण यायां यंकेया निंतिं हलिं नेवाः दबुलिं सक्रिय, विशेष व सशक्त पहल यायां वनी ।
११. सम्मेलनय् जूगु सहलहया लिधंसाय् नेवाः समुदायया वहुआयामिक विकासया निंतिं अल्पकालीन, मध्यकालीन व दीर्घकालीन नीति, रणनीति व ज्याझ्वः हलिं नेवाः दबुलिं निर्धारण याई ।
१२. नेवाः पहिचान व सभ्यतायात धिसिलाक्क न्ह्याकेगु अभियानय् नेवाः युवा व मिसा पुचःयात समावेशी व सहभागितामूलक ढङ्गं सशक्तीकरण यायेगुया नापनापं न्ह्याकायंकेगु ज्याय् हलिं नेवाः दबु सक्रिय जुई ।
