Display Style:
Column Style
थौंनिसे न्ह्यात वृहत् कला तथा सांस्कृतिक महोत्वस
नृपेन्द्रलाल श्रेष्ठ | चिल्लागा सप्तमी ११३९ (मार्च २७ २०१९)
यल महानरगपालिका १६ वडाया ग्वसालय् थौं निसे वृहत् कला तथा सांस्कृतिक महोत्वस न्ह्याःगु दु ।
थौं यलया मंगलबजारय छगु ज्याझ्वः दथुइ उपराष्ट्रपति नन्दबहादुर पुनं औपचारिक उलेज्या यानादीगु खः ।
उगु ज्याझ्वलय् नुगः खँ तयादीसे उपराष्ट्रपति पुनं नेपाः धइगु हे कला व संस्कृति देय्या शान खः धयादीसे थुकिइगु संरक्षन व सम्वर्द्धन याये माःगु आवश्यक दु धकाः बिचाः तयादीगु खः।
वर्ल्ड क्राफ्ट काउन्सिलं यलयात हस्तकला नगरी घोषणा याःगु लसताय् यल महानगरपालिका वडा नम्बर–१६ य् वृहत् कला व सांस्कृतिक महोत्वसया ग्वसाः ग्वःगु खः ।
थुगु १६ वडाय् ६० प्रतिशत स्वया अप्व जनसंख्या हस्तकला उत्पादन व व्यवसायलय् केन्द्रित जुगुनि थुगु सांस्कृतिक एवं हस्तकलाया वडाया रुपय् विकास यायेगु लक्ष्य ज्वना महोत्सवया आयोजना याःगु खः ।
महोत्सवय् जीवित देवी कुमारी दर्शन नाप धातुकला, काष्ठकला, चित्रकला, मूर्तिकला, सीजःया भाँडाकुडा, थीथप् संस्कारय् बज्राचार्य पूजाविधि, परम्परागत भेषभूषा नाप बुगःद्यया रथ दयेकेगु विधिया हलः ज्वलः ब्बयेगु ब्यवस्था याना तःगु खः।
ज्याझ्वः या कजि नाप १६ वडाया अधक्ष्य निर्मलरत्न शाक्यया सभाधक्ष्यताय् जुगु उगु ज्याझ्वलय् यल महानगरपालिकाया मेयर चिरिबाबु महर्जन, उपमेयर गीता सत्याल , वर्ल्ड क्राफ्ट काउन्सिलंया न्वकु धर्मराज शाक्य, ३ प्रदेशया सांसद शोभा शाक्य नाप हस्तकला महासंघया नायः सुरेन्द्र शाक्य पाँहा कथं झायादीगु खःसा ज्याझ्वः संचाःकमि सुरजवीर बज्राचार्यं न्हयाकादीगु खः ।
आः येँय् ब्रुमरं लँ सफा याइगु
नृपेन्द्रलाल श्रेष्ठ | चिल्लागा षष्ठी ११३९ (मार्च २६ २०१९)
‘‘सांस्कृतिक शहर, काठमाडौँ नगर’’ धइगु मुल नारा ज्वना थौं येँया राष्ट्रिय सभा गृहलय् छगु ज्याझ्वः याना न्यागः ब्रुमरया उलेज्या येँ महानरपालिकाया प्रमूख विद्यासुन्दर शाक्यं उलेज्या यानादीगु दु ।
येँ महानरपालिकाया प्रमूख शाक्यं उगुु ज्याझ्वलय् थःगु खँ तयादीसे आः येँया लँ सफा यायेत न्यागः ब्रुमर बहनि ८ ताः निसे सुथय् ४ ताः इलय् सफा याइगु धका धयादीगु दु । मेगु निगः ब्रुमर न छु ई लिपा वइगु जानकारी बियादीगु दु ।
स्वदँया लागि ब्रुमरया सञ्चालन यायेत अनुमानित खर्च ८१ लाख तक तुइगु धका न धाःगु दु । युरो ४ एमिसन स्टाण्डर्डया डुभेलो ६००० मोडलया ब्रुमरया इन्जिन क्षमता १०७ किलोवाठ दु ।
डिजेलं चले जुइगु थुगु ब्रुमर न्ह्यने छगु , सिथय् निगु व दथुइ निगु याना जम्मा प्यंगु ब्रुस दु । न्यासः लिटर लः व ४.६८ घनमिटर धुँ भण्डार यायेगु क्षमता दु धका न धागु दु ।
न्यागः ब्रुमर सफा याइगु लँ थथे दु
टेकुं सोल्टीमोड जुया कलंकी तक । लिहा वया सोल्टीमोड, टेकु, त्रिपुरेश्वर, सुन्धारा, न्हुगु सतक, जुद्ध शालिक, महांकाल, जमः, लाजिम्पाट, शितल निवास, शिक्षण अस्पताल, नारायणगोपाल चुक तकया सतक सफा याइ । अन लिपा जमः, विश्वज्योति, घण्टाघर, भद्रकाली, शहीदगेट जुया सुन्धारा तकया लँ सफा याइ ।
निगु ब्रुमरं टेकुं त्रिपुरेश्वर, थापाथली, माइतीघर मण्डला, बबरमहल, वानेश्वर, तीनकुन, कोटेश्वर पेप्सीकोला तक याइ । अन पेप्सीकोलां कोटेश्वर न्हुगु वानेश्वर, बबरमहल, माइतीघर मण्डला, थापाथली, त्रिपुरेश्वर, टेकु, कालिमाटी जुया बल्खु तकया सतक सफा याइ ।
स्वगः ब्रुमरं टेकुपाखें त्रिपुरेश्वर सुन्धारा भोटाहिटी, विश्वज्योति, घण्टाघर, भद्रकाली , सिंहदरबार, पुतली सतक तक सफा याइसा अन लिपा कमलादी, हात्तीसार, जयनेपाल हल दरबारमार्ग कमलादी प्रज्ञा भवन जुया काठमाडौं प्लाजाया सतक सफा याइ ।
प्यंगु ब्रुमर टेकुपाखें पुतलीसतक, कमलपूखु, ज्ञानेश्वर, मैतीदेवी, पुलागु वानेश्वर, सिनामंगल, एपायरपोर्ट, गौशाला, चावहिल, होटल हायात चुच्चेपाटी तक सफा याइसा चावहि, गौशाला, बत्तीसपुतली, पुलागु वानेश्वर, मैतीदेवी, डिल्लीबजाः, पुतलीसतक, प्रदर्शनीमार्ग, सिंहदरबार, माइतीघर मण्डला, थापाथली, त्रिपुरेश्वर तक याइ ।
न्यागु ब्रुमरं टेकु, त्रिपुरेश्वर पोस्ट अफिस, न्युरोडगेट, बसन्तपुर, इन्द्रचोक, न्युरोड, महांकाल, जमल, केशरमहल, त्रिदेवीमार्ग जुया दरबारमार्ग, घण्टाघर, भद्रकाली, सिंहदरबार, माइतीघर मण्डला, सिंहदरबारया दक्षिण ढोकातक सतक सफा याइ ।
उगु ब्रुमर हनुमानस्थान, थापागाउँ, अन्तर्रा्ष्ट्रिय सम्मेलन केन्द्र, पुरानो वानेश्वर, रत्नराज्य स्कुल, मध्य वानेश्वर, बत्तीसपुतली चोक, मैतीदेवी, डिल्लीबजार, बागबजार, प्रदर्शनीमार्ग, भद्रकाली त्रिपुरेश्वर जुया टेकु बल्खु, कलंकी सीतापाइला बालाजु, गोंगबु, नारायणगोपाल चोक, चावहिल, ज्ञानेश्वर, डिल्लीबजाः, बागबजाः पुलागु बसपार्क जुया टेकु लिहा वइ ।
कला व सांस्कृतिक महोत्सव चैत्र १३ निसें
नृपेन्द्रलाल श्रेष्ठ | चिल्लागा षष्ठी ११३९ (मार्च २६ २०१९)
बिश्व क्राफ्ट काउन्सिलं यलयात ३५ औं हस्तकला नगरी घोषणा याःगु लसताय् यल महानगरपालिका– १६ वडां बृहत कला व सांस्कृतिक महोत्सव चैत्र १३ निसे १७ तक याये त्यःगु दु ।
पाटन दरबार क्षेत्रय् छगु ज्याझ्वः दथुइ महोत्सवया उलेज्या उपपराष्ट्रपति नन्दबहादुर पुनं कन्ह्य याइगु ज्याझ्वः दु । हस्तकला नगरीया उत्सव, कला संस्कृतिया महोत्सव धइगु मूल नाराया साथ थुगु महोत्सव न्यान्हु तक न्ह्याइ । महोत्सवया प्रर्वद्धकय् नेपाल हस्तकला महासंघ, ललितपुर हस्तकला संघ, ललितपुर उद्योग वाणिज्य दु ।
महोत्सवया तयारीया लागि वडां हस्तकला व्यवसायी, निजी क्षेत्र, सहकारीकर्मी, महिला समूह, पर्यटक व्यवसायी, जातीय समाजया प्रनिनिधि, टोल सुधार समिति,थी थी वडाया जनप्रतिनिधिपिं नाप छलफल जुइगु धुकुगु वडां जानकारी बिगु दु ।
‘महोत्सवय् दक्कोसिगु सहभागिता व अपनत्व प्रदान याइगु सरोकारवालानाप छलफल जुइगु धुकुगु नाप आ प्रचारात्मक ज्या न्ह्या वना च्वंगु दु धकाः ।’ महोत्सवका मूल समारोह समितिया संयोजक नाप वडाअध्यक्ष निर्मलरत्न शाक्यं छगु पत्रकार सम्मेलन याना धयादीगु दु ।
नागबहाल टोल सुधार समितिया सहआयोजना व वसुवर्ण बचत तथा ऋण सहकारी संस्थाया व्यवस्थापनय् नागबहालया धातुकला, मूर्तिकलाया करिब २५ गु स्टल नाप नेवाः नँसाः त्वँसाया ब्यवस्था दुुगु जानकारी न बियादीगु खः ।
महोत्सव जुइगु थाय्
नागबहाः टोल सुधार समितिया सहआयोजना व वसुवर्ण बचत तथा ऋण सहकारी संस्थाया व्यवस्थापनय् नागबहालय् धातुकला, मूर्तिकलाया। । इलाननीइ कलाकार पिनि धातुया मूर्तिइ बुट्टां कियाच्वंगु लुया जीवन्त ब्वज्या । नकबहीइ लोकाकिर्ति महाविहारय् चीनया लिपाया निक्वःगु लिपिया रुपय् दूगु रञ्जना लिपि लेखनय् ब्वज्या ।
अथेहे भाष्करदेव संस्कारित लोकाकिर्ति महाविहार न्याखाचुकय् गुरुजुपिनि पुजाविधिया गुहाली जन्मनिसें सीगुया दथुइ जुइगु कर्मकाण्डया सकतां सरजाम व हलंज्वलंया ब्वज्या,स्वथ टोल सुधार समितिया संयोकत्वय् नेवाःतय्गु मौलिक व परम्परागत भेषभुषा ब्वज्या , सांस्कृतिक नृत्य नाप सांगितिक ज्याझ्वः, व धातुया मूर्तिकला, मूर्ति जीवन्त ब्वज्या नाप टंगलय्, तिच्छुगल्लीइ ली व सिजःया बसजाया ब्वज्या जुइ जुइ ।
थौंनिसे ब्रुमर लँ सफा याइगु
नृपेन्द्रलाल श्रेष्ठ | चिल्लागा षष्ठी ११३९ (मार्च २६ २०१९)
येँ महानगरपालिकां थौं सोमवाः न्हुगु ब्रुमर (यान्त्रिक टुफि) पाखें लँ सफा याइगु जुगु दु । छु दिं न्ह्यः जक इटालीपाखें हःगु खः ।
थौं छगु ज्याझ्वः दथुइ राष्ट्रिय सभागृह लय् १ ३० ताः इलय् येँ महानगरपालिकाया मेयर विद्यासुन्दर शाक्यं उगु न्याःगु रुट चले जुइगु न्हुगु ब्रुमर (यान्त्रिक टुफि) उलेज्या याइगु ज्याझ्वः दु ।
उगु न्यागः न्हुगु ब्रुमर (यान्त्रिक टुफि) मध्ये प्यगः १६ टन क्षमता बराबर दुसा छगः ६ टन क्षमता दु
थुगु न्हुगु ब्रुमरं न्हि १० किलोमिटर तक धुँ संकलन यायेगु क्षमता दु ।
मलिना व दिनायात ‘लक्ष्मीनारायण पुनमाया सिरपाः’
नृपेन्द्रलाल श्रेष्ठ | चिल्लागा पंचमी ११३९ (मार्च २५ २०१९)
भाषासेवीलिसें नेवाः न्ह्यलुवा लक्ष्मीदास मानन्धरं थः मांअबुया नामं नीस्वनादीगु ‘लक्ष्मीनारायण–पुनमाया सिरपाः’ येँया जगतसुन्दर ब्वनेकुथिया हलय् लःल्हात ।
ने.सं. ११३८या एसइइ परीक्षाय् नेपालभाषा विषयस दकलय् अप्वः ल्याः ३.६ हय्त ताःलानाः न्हाप जुयादीपिं कन्या मन्दीर माध्यामिक विद्यालयया मलिना स्थापित व आदर्श माध्यमिक विद्यालय थिमिया दिना कपालीपिन्त दाता लक्ष्मीदास मानन्धरं म्हतिं १२,५०० तकाया दां लःल्हानादीगु खःसा मूपाहाँ वाङमय शताब्दी पुरुषलिसें वरिष्ठ संस्कृतिविद् डा. सत्यमोहन जोशीं न्हाप लानादीपिं विद्यार्थीपिन्त तक्मा व दसिपौं लःल्हानादीगु खः ।
अथे हे नेपालभाषा विषय कयाः एसइइ पास यानादीपिं आदर्श मा.वि. थिमिया ब्वँमिपिं किसन मानन्धर, करुणा श्रेष्ठ, दीपा मानन्धर, दिक्षा श्रेष्ठ, रश्मि मानन्धर, सलिन श्रेष्ठ, प्रशंसा शाक्य, अशोक प्रजापति, समीर श्रेष्ठ, आशिया श्रेष्ठ, जगतसुन्दर ब्वनेकुथिया सनिल खड्गी, सुदीप श्रेष्ठ, रमण महर्जन, जेनिश शाही, बासु शिख्राकार यानाः झिंखुम्हेसितम्हतिं द्वःछि द्वःछि तका दां लःल्हाःगु खः ।
जगत सुन्दर ब्वनेकुथिया प्रिन्सिपल सुनीता मानन्धरं न्ह्याकादीगु उगु ज्याझ्वलय् उपस्थित जुयादीपिंलिसें सकलसित देवदास मानन्धरं लसकुस यानादीगु खः ।
ज्याझ्वः सिरपाः गुथिया नायः प्रा. डा. चुन्दा बज्राचार्यया सभाध्यक्षताय् जूगु खः ।
