Display Style:
Column Style
प्यंगुलिं महानगरपालिकाया मेयरय् एमाले न्ह्यःने
लहनान्यूज | बछलागा षष्ठि ११३७ (मे १७ २०१७)
स्थानीय तह निर्वाचन २०७४या झ्वलय् यल महानगरपालिकाय् मेयर पदया नितिं नेकपा एमाले व नेपाली कांग्रेस दथुइ तच्वःगु धेंधें बल्लाः खनेदयाच्वंगु दु ।
थौं सनिलया ५ः४५ताः ईतक्कया मतगणनाया लिच्वः कथं यल महानगरपालिकाया मेयर पदया नितिं नेकपा एमालेया हरिकृष्ण व्यन्जनकारं ८९७० मत हयादीधुंकूगु दु ।
व हे कथं नेपाली कांग्रेसया उम्मेदवार चिरिबाबु महर्जन धाःसा छगू मतं जक ल्यूने लानाच्वंगु दु । महर्जनया ८९६९ मत जूगु दु ।
स्वंगूगु थासय् साझा पार्टिया उम्मेदवार रमेश महर्जनया ३८४७ मत जूगु दु । अथे हे नेकपा माओवादि (केन्द्र) या दिनेश महर्जन (दिपेश)या १३५२ मत जूगु दु ।
येँ महानगरपालिकाय् नं नेकपा एमालेया हे उम्मेदवार विद्यासुन्दर शाक्य १७२८ मत लिसें न्ह्यःने दु । नेपाली कांग्रेसया राजुराज जोशीया धाःसा ११०३ मत जूगु दु ।
भरतपुर महानगरपालिकाय् नं नेकपा एमालेया देवी ज्ञवाली ४०६६ मतलिसें न्ह्यःने दुसा नेकपा माओवादि (केन्द्र) या रेणु दाहालया २५१४ मत जूगु दु ।
पोखरा लेखनाथ महानगरपालिकाय् नं नेकपा एमालें हे अग्रता दयेकातःगु दु । नेकपा एमालेया मानबहादुर जिसिया ५२३० मत थ्यंगु दुसा नेपाली कांग्रेसया रामजी कुँवरया ५०६३ मत जूगु दु ।
मतगणना लिबाःगु खँय् निर्वाचन आयोगं न्वःवात
लहनान्यूज | बछलागा पंचमी ११३७ (मे १६ २०१७)
मतगणना लिबाःगु खँय् निर्वाचन आयोगं प्रेस वक्तव्य मार्फत लिबाःगुया कारण न्ह्यब्वःगु दु ।
आयोगं थौं प्रेस विज्ञप्ति जारी यासें मतदाता न्हयथाय् स्वस्तिक छाप तयाः अभिमत प्वंकूगु मतपत्र ल्याःखायेगु ज्याय् ई काइगु स्वाभाविक जूगु धाःगु दु ।
मतगणनाया ज्याय् खटेजूपिं निर्वाचन अधिकृत व मतगणना टोलि कर्मचारीं सहमतिया आधारय् मतगणना टोलित गठन यानाः कार्यसम्पादन यानाच्वंगु विज्ञप्तिइ धयातःगु दु ।
लिसें गुलिखे अवस्थाय् राजनैतीक दल व उम्मेदवारपाखें चिचीधंगु वा आधारहीन विषयस समस्या ब्वलंकाः मतगणनाया ज्या ताःहाकयेकाच्वंगु नं विज्ञप्तिइ धयातःगु दु ।
दल व उम्मेदवार नं संवेदनशील जुयाः मतगणनाया ज्या याकनं क्वचायेकेत ग्वाहालि यायेत विज्ञप्ति मार्फत हे इनाप नं याःगु दु ।
संकिपाकःमि गुरुङ आः मादि गांपालिका अध्यक्ष नं
लहनान्यूज | बछलागा पंचमी ११३७ (मे १६ २०१७)
आदिवासी जनजाति संकिपा ख्यलय् सक्रियम्ह संकिपाकःमि बेदबहादुर गुरुङ कास्की जिल्लाया मादि गांपालिका अध्यक्ष पदय् त्याःगु दु ।
नेकपा एमालेपाखें उम्मेदवारी ब्यूम्ह गुरुङ ४६३७ मत हयाः त्याःगु खः । निकटतम प्रतिद्वन्दि नेपाली कांग्रेसया देवीजंग गुरुङयात ९८४ मतं ल्यूने लाकाः बेदबहादुर मादि गांपालिका अध्यक्षय् निर्वाचित जूगु खः ।
मादि गांपालिकाया उपाध्यक्षय् नं ४५२३ मतलिसें एमालेया हे विष्णु पौडेल त्याःगु दु ।
गांपालिका अध्यक्षय् निर्वाचित गुरुङ गुरुङ फिल्म एशोसिएसन नेपालया केन्द्रिय नायः नं खः ।
येँ महानगरय् कांग्रेस न्ह्यःने वन
नृपेन्द्रलाल श्रेष्ठ | बछलागा पंचमी ११३७ (मे १६ २०१७)
स्थानीय तह निर्वाचन २०७४ या आःतक्क सार्वजनिक जूगु मतगणना कथं येँ महानगरपालिकाय् आः धाःसा नेपाली कांग्रेस न्ह्यःने वंगु दु ।
लिपांगु मत परिणाम कथं मेयर पदय् नेपाली कांग्रेसया उम्मेदवार राजुराज जोशीया ३५६ भोट जूगु दु । अथे हे एमालेया उम्मेदवार विद्यासुन्दर शाक्यया २९८ मत जूगु दु ।
स्वंगूगु थासय् दुम्ह साझा पार्टिया किशोर थापाया १९८ मत थ्यंगु दुसा विवेकशील नेपाली पार्टिया रन्जु दर्शनाया १४८ मत थ्यंगु दु । माओवादि केन्द्रया उम्मेदवार सर्वोत्तम डंगोलया १९ मत जूगु दु ।
उप मेयर पदय् धाःसा नेपाली कांग्रेसया हरिप्रभा खड्गी (श्रेष्ठ)या ४२९ मत जूबलय् राप्रपाया उम्मेदवार राजाराम श्रेष्ठया २१४ मत थ्यंगु दु । येँय् नेकपा एमाले व राप्रपाया तालमेल जूगु खः ।
वडा ल्याः १ या अध्यक्ष पदया नितिं धाःसा एमाले न्ह्यःने लानाच्वंगु दु । एमालेया ४९७ मत जूगु दुसा नेपाली कांग्रेसया ४४५ मत जूगु दु ।
येँ महानगरपालिकाया मत गणनाय् आः वडा ल्याः १या मतगणना जुयाच्वंगु दु । मतगणना यायेत यक्व हे ई काःगु कुंखिना अप्वयेधुंकाः आः स्वथासं मतगणना न्ह्याकूगु दु ।
(सनिलया ५ः४५ताः ईया मतल्याः)
येँय् महानगरपालिकाय् एमालेया अग्रता कायम हे
लहनान्यूज | बछलागा पंचमी ११३७ (मे १६ २०१७)
स्थानीय तह निर्वाचन २०७४ या मतगणनाया झ्वलय् येँ महानगरपालिकाय् नेकपा एमालेया विद्यासुन्दर शाक्य हे न्ह्यःने लानाच्वंगु दु ।
आःतक्क क्वचाःगु मतगणना कथं एमालेया उम्मेदवार शाक्यया २१७ भोट जूगु दुसा निकतटम प्रतिद्वन्दि साझा पार्टिया किशोर थापाया १४२ मत जूगु दु ।
नेपाली कांग्रेसया राजुराज जोशीया धाःसा १३५ मत जूगु दु । दक्कले क्वकालिम्ह मेयरया उम्मेदवार २१दँयाम्ह विवेकशील नेपालीया उम्मेदवार रन्जु दर्शनाया ११० मत जूगु दु ।
प्रदेश नम्बर २, ४ व ६ या २८३ स्थानीय तहया नितिं जूगु निर्वाचनया आःतक्क पिदंगु लिच्वः कथं नेपाली कांग्रेसं च्याथाय् त्याकेधुंकूगु दु ।
अथे हे नेकपा एमालें ६ थासय् त्याकूगु दु । अथे हे माओवादि केन्द्रं ५ थाय् त्याकेधुंकूगु दु ।
मेगु स्वंगुलिं महानगरपालिकाय् नं एमालेया अग्रता
यल महानगरपालिकाय् नं नेकपा एमालेया हरिकृष्ण व्यन्जनकार २६२५ मतलिसें न्ह्यःने लानाच्वंगु दु ।
नेपाली कांग्रेसया चिरिबाबु महर्जनया २१७७ मत जूगु दुसा दिनेश महर्जनया ८७४ मत थ्यंगु दु ।
मेगु महानगरपालिका भरतपुरय् ६८५ मतलिसें न्ह्यःने च्वनाच्वंबलय् वयकःया निकटतम प्रतिद्वन्दि माओवादि केन्द्रया रेणु दाहालया ५२८ मत जुयाच्वंगु दु ।
अथे हे लेखनाथ पोखरा महानगरपालिकाय् नं नेकपा एमालेया मानबहादुर जिसि ९७६ मतलिसें न्ह्यःने लानाच्वंगु दु । निकटतम प्रतिद्वन्दि नेपाली कांग्रेसया रामजी कुँवरया ७६७ मत जूगु दु ।
