Display Style:
Column Style
हल्चोकय् अन्तरक्रिया जुल
नृपेन्द्रलाल श्रेष्ठ | गुंलागा षष्ठी ११३८ (सेप्तेम्वर १ २०१८ )
श्री हल्चोक आकाश भैरव गुथीया ग्वसालय् व श्री हल्चोक आकाश भैरव समन्वय समुहया ग्वाहालि थौं छगु अन्तरक्रिया ज्याझ्वः जुगु दु ।
थौं जुगु उगु ज्याझ्वलय् आः वयेत्यःगु इन्द्रजात्राय् श्री हल्चोक आकाश भैरव द्यःया बिषयया खँया त कया सहलह जुगु खः ।
गुथीया नायः सागर पुतुवारया सभाधक्ष्यय् जुगु उगु ज्याझ्वलय् समन्वय समुहया सल्लाहकार शरदकुमार डंगोल, सचिव सुरेन्द्रभक्त श्रेष्ठ, गुथी पाखें म्ये गुरु कपिल पुतुवार व जिवन पुतुवार खँ तयादीगु खः । ज्याझ्वः बिश्व शाक्यं न्ह्याकादीगु खः ।
पद्मरत्न तुलाधर कम्युनिष्ट क्रान्तिया प्रतीक खः
लहनान्युज | गुंलागा पंचमी ११३८ (अगष्ट ३१ २०१८ )
आदिवासी जनजाति आन्दोलनया अगुवा नाप मानव अधिकारवादी आन्दोलनया वरिष्ठ ‘अभियन्ता पद्मरत्न तुलाधरया ज्या जंक्कोया लसताय् जुगु शान्ति प्रक्रियाय् पद्मरत्न तुलाधरया भूमिका’ विषयक छगु गोष्ठीइ जुगु दु ।
उगु ज्याझ्वलय् थःगु नुँगः तयेगु झ्वलय् नेपाल कम्युनिष्ट पार्टीया नायः नाप पुलांम्ह प्रधानमन्त्री पुष्पकमल दाहाल ‘प्रचण्ड’ वामपन्थी नेता पद्मरत्न तुलाधर धइम्ह कम्युनिष्ट क्रान्तिया हे प्रतीक खः धइगु थःगु धारणा तयादीगु दु । यदि उगु इलय् पद्मरत्न तुलाधर व दमननाथ ढुङ्गानां नेकपा माओवादी यात शान्ति प्रक्रिया हयेत महत्वपूर्ण भूमिका मम्हितुगु खःसा थौंया थुगु ह्युपाः हयेत सम्भव जुइ फइ मखु धयादीगु दु ।
उगु ज्याझ्वलय् नेकपाया नेता नापं पूर्व उपप्रधानमन्त्री वामदेव गौतमं पद्मरत्न तुलाधरया नेपाःया शान्ति प्रक्रियाय् हयेगु निति महत्वपूर्ण भूमिका दुगु धका धयादीगु दु ।
अथेहे पूर्वसभामुख दमननाथ ढुङ्गानां पद्मरत्न तुलाधरं पंचायत निरंकुश शासनया विरुद्ध ल्वायेगु लिसें जनतायात उकिया विरुद्ध थनेगु ज्या यानादिगु धका बिचाः प्वंकादिगु खः ।
पद्मरत्न तुलाधर नागरिक अभिनन्दन समारोह समितिया नायः लक्ष्मीदास मानन्धरया सभाधक्ष्यय् जुगु उगु ज्याझ्वलय् पूर्व महान्यायधीवक्ता मुक्ति प्रधान व मल्ल के सुन्दरपिन्स नं थःथःगु नुँगः खँ तयादीगु खःसा उमेश स्थापितं न्हयाकादिगु खः ।
किपा लक्ष्मी श्रेष्ठ
कासामी मेलिसा खड्गीयात सम्मान
नृपेन्द्रलाल श्रेष्ठ | गुंलागा पारु ११३८ ( अप्रिल २७ २०१८ )
नाट्यश्वर फिल्म्सया ग्वसालय् हङकङय् जुगु तेक्वान्दो च्याम्पियनसीप कासाय् स्वर्ण पदक त्याकेत ताःलाम्ह कासामी मेलिसा खड्गीया छगु ज्याझ्वःयासे सम्मान याःगु दु ।
उगु ज्याझ्वलय् मेलिशायात मूपाहाँ वरिष्ठ सिनेपत्रकार विजयरत्न असंबरें हनापौ लःल्हानादीगु खः । थःगु नुगः खँ तयेगु झ्वलय् मूपाहाँ असंबरें नेपाःया नच्चाम्ह मिसा मचां थुकथं अन्तर्रा्ष्ट्रिय कासाय् न्हाय् धस्वाकेत ताःलागु धइगु छगू गर्व यायेबहःगु खँ खः धकाः धयादिगु खः ।
उगु ज्याझ्वलय् लायन्स क्लब अफ ईन्टरनशेनल डिष्ट्रिक्ट ३२५ बी वनया रामराजा थापा, लायन्स क्लब अफ काठमाण्डौया प्रदीप खड्का, महेश नेवाः, नाप कासामी मेलिसा खड्गीं नंं थःथःगु नुगः खँ तयादीगु खः ।
ज्याझ्वलय् मेलिशा खडगीया अबुजु मनोजरत्न खड्गीया बुदिं नं हंगु खः । बुदिंया लसताय् “मां” संकिपाया निर्देशक सुरेश खड्गीं मनोजरत्न खड्गीयात नासःद्यःया मूर्ति देछाःगु खःसा हना ज्याझ्वः धुंका जूगु सांस्कृतिक ज्याझ्वलय् किशोर खडगी, सुमन कपाली, अनुप शाक्यलिसेलिसें आपालं कलाकारपिन्सं थःथःगु सांगितिक ब्वज्या नं न्ह्यब्वःगु खः ।
नाट्यश्वर फिल्म्सया नायः किशोर खड्गीया सभानायःसुइ न्ह्याःगु उगु ज्याझ्वलय् सुरेश खड्गी लसकुसयाना दीगु खः ।
ज्याझ्वलय् नेपालभाषाया न्हापांम्ह मिसा उपन्याकार व नाट्यश्वर फिल्म्सया “मां” फिल्मय् मां जुया म्हितादीम्ह शशीकला मानन्धर नाप कलाकार व पत्रकारपिनिगु न ब्बति कयादीगु खः ।
परम्परागत धाः बाजा प्रशिक्षण क्वचाल
नृपेन्द्रलाल श्रेष्ठ | गुंलाथ्व चर्तुदशी ११३८ ( अगष्ट २५ २०१८ )
ताम्रकार समाज युवा तथा खेलकुद उपसमितिया ग्वसालय् जुगु नी ला यकं परम्परागत धाः बाजा प्रशिक्षण ज्याझ्वः क्वचाःगु दु । यल महानगरपालिका संस्कृति, सम्पदा, पुरातत्व संरक्षण केन्द्रया ग्वहालि जुगु खः ।
उगु प्रशिक्षण समापन ज्याझ्वःया मूपाँहा यल २४ नं. वडा अध्यक्ष नाप महानगरपालिकाया सामाजिक बिकास समितिया संयोजक दिनेश कार्की, वडा नं. ४ या अध्यक्ष नारायण के.सी., वडा नं. १९ अध्यक्ष विनोद ताम्रकार, केन्द्रया अधिकृत सबिना महर्जन पिन्स ब्बति कयादीगु खः ।
ज्याझ्वःया मूपाँहा कार्कीें सम्पदा, संस्कृति, संरक्षण यायेत आ ल्याम्हपि न्ह्यने वयेमाःगु खँय् बःबिया दीगु खः । ज्याझ्वःया सभानायः नाप समाजया अध्यक्ष रविन्द्रराज ताम्रकारं थुगु प्रशिक्षण ज्याझ्वलं आत्म संतुष्टी बिगु दु धयादीसे तना वनेत्यःगु परम्परागत धाः बाजा ल्याय्म्ह तयेत आकर्षण यायेत थुगु ज्याझ्वः जुगु खँ कनादीगु खः
स्यनामिपिं राम ताम्रकार, सन ताम्रकार व बिजु राजकर्णिकारयात मूपाँहा पाखें मतिनाया चिं लःल्हानादीगु खःसा ब्बति कयादीपिन्त दसीपौ लःल्हानादगिु खः ।
थुगु ज्याझ्वलय् च्यादँ निसे पीदँ तकया मनू तयेगु ब्बति दुगु खः ।
पत्रकार आचार संहिता बारे छलफल
नृपेन्द्रलाल श्रेष्ठ | गुंलाथ्व द्धादशी ११३८ ( अगष्ट २३ २०१८ )
प्रेस काउन्सिल नेपालया ग्वसालय् व नेवाः पत्रकार राष्ट्रिय दबूया संयोजनय् थौं बिहिवाः प्रेस काउन्सिलया मूज्याकुथिया सभाहलय् प्रेस काउन्सिल र पत्रकारवीचको सम्वन्ध र आचारसंहिता बारे छगु ज्याझ्वः जुगु दु ।
काउन्सिलया मुख्य अधिकृत झविन्द्र भुषालं पत्रकार आचर संहिताया बारेय् काउन्सिलनाप पत्रकार, पत्रकार आचरसंहिता अभिमुखिकरण विषय खँय् कार्यपत्र न्ह्यब्बयादीगु खः ।
नेवाः पत्रकार राष्ट्रिय दबूया अध्यक्ष श्रीकृष्ण महर्जनं प्रेस काउन्सिल व पत्रकार दथुइ सम्वन्ध व आचार संहिता बारे थःगु नुँगः खँ तयादीसे पत्रकार दबंू जुइ धका धयादीसे प्रेस काउन्सिल नाप थ थे मेमेगु ज्याझ्वः याना वनीगु जुइ धयादीगु खः ।
प्रेस काउन्सिलया कार्यबहाक अध्यक्ष किशोर श्रेष्ठया अध्यक्षताय् जुगु खःसा लसकुस काउन्सिलया दुजःसुभेक्षा विन्दु यानादीगु खः ।
पत्रकार दबूया महासचिव सुनिल महर्जनं न्ह्याकादीगु उगु ज्याझ्वलय् दबूका केन्द्रीय उपाध्यक्ष नृपेन्द्रलाल श्रेष्ठ, कोषाध्यक्ष सुरेन्द्रभक्त श्रेष्ठ, सचिव केके मानन्धर, केन्द्रीय सदस्य रचना श्रेष्ठ उत्तम श्रेष्ठ लगायत यें, यल व भ्वँत जिल्लाया प्रतिनिधि पिन्सं ब्बति कयादीगु खः ।
