Display Style:
Column Style
महानगरय् निगू पार्टिया धेंधें बल्लाः
लहनान्यूज | बछलागा नवमि ११३७ (मे २० २०१७)
देयया प्यंगू महानगरपालिका मध्ये येँय् नेकपा एमालेया उम्मेदवार विद्यासुन्दर शाक्य न्ह्यःने लानाच्वंगु दु ।
न्हिनसिया १२ताः ईतक्क सार्वजनिक जूगु मत परिणाम कथं एमाले उम्मेदवार शाक्यया १६५२१ मत थ्यंगु दुसा नेपाली कांग्रेसया उम्मेदवार राजुराज जोशीया ११२९५ मत जूगु दु ।
उपमेयरय् धाःसा नेपाली कांग्रेसया उम्मेदवार हरिप्रभा खड्गी (श्रेष्ठ) १०९६१ मतलिसें न्ह्यःने लानाच्वंगु दु ।
यल महानगरपालिकाय् नेपाली कांग्रेसया उम्मेदवार चिरिबाबु महर्जन १६३८६ मतलिसें न्ह्यःने दुसा नेकपा एमालेया हरिकृष्ण व्यन्जनकारया १४५४० मतलिसें निगूगु थासय् दु ।
उपमेयरय् नं नेपाली कांग्रेस हे न्ह्यःने लानाच्वंगु दु । नेपाली कांग्रेसपाखें उपमेयरया उम्मेदवार गीता सत्यालया ९२४१ मत थ्यंगु दु ।
पोखरा महानगरपालिकाय् एमालेया मानबहादुर जिसिया १७३७२ मत दुसा वयकःया निकटतम प्रतिद्वन्दि नेपाली कांग्रेसया रामजी कुँवर धाःसा १३३८ मतं ल्यूने लानाच्वंगु दु । कुँवरया १६०३४ मत दु ।
उपमेयरय् एमालेया मंजुदेवी गुरुङ १६३६९ मतलिसें न्ह्यःने दु ।
भरतपुर महानगरपालिकाय् धाःसा नेकपा एमालेया उम्मेदवार देवी ज्ञवाली व नेपाली कांग्रेस व माओवादि केन्द्रया मंकाः उम्मेदवार रेणु दाहाल दथुइ तच्वःगु धेंधें बल्लाः जुयाच्वंगु दु ।
एमालेया ज्ञवालीया १५१५५ मत दुसा दाहाल वयकःया स्वयां ३५४ मतं जक ल्यूने दु । दाहालया १४८०१ मत थ्यंगु दु ।
देयन्यंकया लिच्वलय् नेकपा एमालें १०४ थाय् त्याकाः दक्कले न्ह्यःने दुसा नेपाली कांग्रेस ९९थाय् त्यानाः निगूगु थासय् लानाच्वंगु दु । नेकपा माओवादि केन्द्र ४६ थाय् त्यानाः स्वंगूगु थासय् लानाच्वंगु दु ।
भरतपुरय् मतगणना हाकनं न्ह्यात
लहनान्यूज | बछलागा नवमि ११३७ (मे २० २०१७)
वंगु चान्हयनिसें दिनाच्वंगु भरतपुर महानगरपालिकाया मतगणना थौं सुथंनिसें हाकनं न्ह्याःगु दु ।
९ नम्बर वडाया मत ल्याःखाःबलय् द्वंगु धासें माओवादी केन्द्र व कांग्रेसं हाकनं मतगणना यायेत माग यायेधुंकाः मतगणना स्थगित जूगु खः ।
निर्वाचन अधिकृततयसं सर्वदलीय बैठक सःताः सहमतिया कुतः याःसां म्हिगः धाःसा सहमति जुइ मफूगु खः । थौं सुथय् च्वंगु बैठकय् धाःसा १० बुँदे सहमति जुयाःलि मतगणना हाकनं न्ह्याकूगु खः ।
सर्वदलीय मुँज्याय् प्रमुख निर्वाचन अधिकृतं छम्ह सूचना अधिकृत तयाः उम्ह अधिकृतं एकद्वार प्रणाली अन्तर्गत जक सूचना सम्प्रेषणया व्यवस्था यायेगु, मतगणना स्थलय् राजनितीक दलया प्रमुख वा प्रतिनिधि दुगु बिस्कं डेस्क तयेगु सहमति जूगु खः ।
लिसें प्रत्येक पुचलं वइगु मतगणनाया लिच्वः राजनितीक दलया प्रतिनिधि दुगु डेस्कय् क्यनाः न्यंकाः जक सार्वजनिक यायेगु अले कम्प्युटरय् इन्ट्रि यायेगु व्यवस्था यायेगु नं सहमति जूगु दु ।
आः मतगणना न्ह्यायेधुंकाः लिपांगु परिणाम कथं नेकपा एमालेया उम्मेदवार देवी ज्ञवाली माओवादी व कांग्रेसया मंकाः उम्मेदवार रेणु दाहाल स्वयां ३५४ मतं न्ह्यःने दु ।
एमालेया उम्मेदवार १५१५५ मत थ्यंगु दुसा रेणुया १४८०१ मत जूगु दु ।
उपमेयरय् धाःसा कांग्रेसया उम्मेदवारया १७०५१ मत लिसें न्ह्यःने दु निकटतम प्रतिद्वन्दि एमालेया उम्मेदवारया १३१३४ मत थ्यंगु दु ।
सरकारं मधेसया मुद्दात लित काइगु
लहनान्यूज | बछलागा सप्तमी ११३७ (मे १८ २०१७)
सरकारं मधेसय् जूगु आन्दोलनय् दुथ्याःपिन्त तयातःगु दक्वं मुद्दा लित कायेगु क्वःछ्यूगु दु ।
सिंहदरबारस्थित प्रधानमन्त्री तथा मन्त्रिपरिषदया ज्याकुथिइ थौं च्वंगु मन्त्रिपरिषदया मुँज्यां मधेस आन्दोलनयात राजनीतिक आन्दोलनया रूपं स्वीकार यासें व सम्बन्धि दक्वं मुद्दा लित कायेगु क्वःछ्यूगु खः ।
आन्दोलनय् दुथ्याःपिन्त तयातःगु मुद्दा लित कायेत गृह मन्त्रालयया परामर्शय् कानुन, न्याय तथा संसदीय मामिला मन्त्रालयं वइगु मन्त्रिपरिषदया मुँज्याय् न्ह्यब्वयेगु क्वःछ्यूगु खः ।
व हे कथथं मन्त्रिपरिषदं वंगु वैशाख ३१ गते क्वचाःगु स्थानीय तहया निर्वाचनया झ्वलय् सीपिं निम्हेसित सहिद घोषणा यासें मदुपिनि परीवारयात राहत रकम उपलब्ध याकेगु नं क्वःछ्यूगु दु ।
स्थानीय तह निर्वाचयनय् गोलि लानाः काभ्रे नमोबुद्ध नगरपालिकाया नवराज पाठक व निर्वाचनया झ्वलय् झडपय् लानाः दोलखाया कुलबहादुर तामाङ मदुगु खः ।
सरकारं पाठक व तामाङया परीवारयात क्षतिपूर्ति कथं म्हतिं १० लख तका उपलब्ध याकेगु क्वःछ्यूगु खः । लिसें सरकारं निम्हं मदुपिनि मस्तयत सितिकं ब्वनेगु व्यवस्था यायेगु नं क्वःछ्यूगु दु ।
सरकारं प्रेस काउन्सिल नेपालया अध्यक्षय् धरानयाम्ह भवानीप्रसाद बरालयात नियुक्त याःगु दु ।
‘मतगणना आः याकनं जुइ’
बछलागा षष्ठी ११३७ (मे १७ २०१७) | बछलागा षष्ठी ११३७ (मे १७ २०१७) लहनान्यूज
प्रमुख निर्वाचन आयुक्त अयोधि प्रसाद यादवं मतगणना आः याकनं जुयावनीगु धयादीगु दु ।
थौं येँय् जूगु छगू ज्याझ्वलय् प्रमुख निर्वाचन आयुक्त यादवं येँ लिसेंया महानगरपालिकाय् मतगणना डेस्क तनेधुनागुलिं मतगणना आः भचा याकनं जुइगु धयादिल ।
प्यंगू महानगरपालिकाय् आःतकया हे तपाःगु मतपत्र जूगुलिं नं मतगणना लिबाःगु यादवया धापू खः ।
नेपाः पार्टिया मूछ्यान्जे सैंजुयात मातृशोक
लहनान्यूज | बछलागा षष्ठी ११३७ (मे १७ २०१७)
नेपाः राष्ट्रिय पार्टिया मू छ्यान्जे लिसें कन्सर्न नेपालया नायः डा. विजय सैंजुयात मातृशोकं कःगु दु ।
मू छ्यान्जे सैंजुया मां सप्तकेशरी सैंजु थौं सुथसिया च्याताः इलय् मदुगु खः ।
श्वासप्रश्वास सम्बन्धि ल्वचं कयाच्वंम्ह वयकलं थौं सुथय् सासः मल्हाः थें च्वनेवं नर्भिक अस्पताल यंकूगु खः । डाक्टरं चेकजाँच यानाः भेन्टिलेटरय् तकं तयाः स्वयेधुंकाः वयकः मदयेधुंकूगु धाःगु खः ।
मदुम्ह सैंजु ताः ई न्ह्यःनिसें श्वासप्रश्वास सम्बन्धि ल्वयया लिसें मेरुदण्डया समस्या जुयाच्वंगु खः । वयकःयात स्वला न्ह्यः नं अस्पतालय् तयाः वासः यानाहःगु दुगु खः ।
७६दँ फुनाः ७७दँय् च्वंम्ह वयकःया जंकोया नितिं छेँय् सहलह नं न्ह्यायेधुंकूगु डा. विजय सैंजु धयादिल ।
मदुम्हेसिया अन्त्येष्टि कन्हय् वयकःया चीधिकःम्ह काय् डेनमार्कं लिहां वयेधुंकाः पशुपतिइ याइगु जूगु दु । कन्हय् न्हिनसिया २ताः ईपाखे अन्त्येष्टि जुइगु डा. सैंजुं धयादिल ।
मदुम्हेसिया च्याम्ह काय् लिसें छम्ह म्ह्याय् दु ।
