Display Style:
Column Style
तारकेश्वरय् क्षमता अभिवृद्धि ज्याझ्वः
लहनान्युज | यंलागा चौथी ११३९ (सेप्तेवर १८ २०१९)
नेवाः ग्वहालि पुचः नेपाः फुसिंख्यःया ग्वसालय् तारकेश्वर नगरपालिका मनमैजुइ स्थानिय रैथानेयात लक्षित याना छगु क्षमता अभिवृद्धि तालिम याःगु दु ।
उगु तालिम समापन ज्याझ्वलय् थःगु खँ तयेगु झ्वलय् नागरिक अगुवा डा. महेशमान श्रेष्ठं हरेक नेपाःमिपिन्सं राजनीतिक चेतनाय् विकास याये माःगु खँय् बःबियादिगु दु । सरकारं सम्मृद्ध नेपाल, सुखी नेपालीया नारा साकार यायेत नागरिकया चेतनास्तरं ग्वाहालि याइगु धका धयादिगु खः ।
अथेहे, नेवाः राजनीतिक अभियानया संयोजक श्रीकृष्ण मानन्धरं ल्याम्ह तयेगु राजनीतिक चेतनास्तर विकास जुसा जक नेतृत्वयात सचेत व खबरदारी याये फइ धका न धयादिगु खः ।
भदौया स्वगुगु वाःनिसे मनमैजु माध्यमिक विद्यालयया ग्वसालय् सञ्चारकःमि केके मानन्धरं प्रशिक्षण बिउगु खःसा ज्याभ्वः धर्म महर्जनं संयोजन यानादिगु खः ।
सिन्धुपाल्चोकय् सामुदायिक अध्ययन केन्द्रया उलेज्या
बाबुकाजी श्रेष्ठ | ने.सं. ११३९ ञलाथ्व चौथि (१८ सेप्टेम्बर, २०१९), बुधवाः
सिन्धुपाल्चोक शिखरापुरय् च्वंगु माझी गामय् न्हू दयेकूगु त्वनेगु लःया हिति व बागमारा सामुदायिक अध्ययन केन्द्रया उलेज्या यात ।
नेपाल रेडक्रस सोसाइटी सिन्धुपाल्चोक कचाया सभापतिलिसें समाजसेवी राजेन्द्रमान ताल्चाभडेया सभाध्यक्षताय् जूगु उगु ज्याझ्वलय् मूपाहाँ लिसें रोटरी इन्टरनेशनल जिल्ला २६६० ओसाका जापानया नायः मिनोरु खासाईं न्हू दयेकूगु हितिया उलेज्या यानादीगु खःसा वागमारा सामुदायिक अध्ययन केन्द्रया उलेज्या हामाओका सिन्जुरों यानादिल ।
नेपाल रेडक्रस सोसाइटी सिन्धुपाल्चोकया अग्रसरताय् जापानया मासाताके साकामोतोतया पहल नापं बासुदेव प्रसाद स्मृति प्रतिस्थानया नायः लक्ष्मण जोशीया समन्वयस रोटरी इन्टरनेशनल व याओया ग्वाहालीइ हिति व सामुदायिक भवन दयेकेगु ज्या जूगु खः ।
ज्याझ्वलय् सामुदायिक अध्ययन केन्द्रया नितिं ब्वनेगु ज्वलं व स्टेशनरी थेम्मृङ मासिक पत्रिकाया सम्पादक/प्रकाशक बाबुकाजी श्रेष्ठं अध्ययन केन्द्रया नायः लक्ष्मीकुमारी माझीयात लःल्हानादिल ।
कमलचरण कक्षपतिं लसकुस यानादीगु उगु ज्याझ्वलय् मेलम्ची नगरपालिका–१० या वडाध्यक्ष भक्तबहादुर खड्का, मासाताके साकामोतो व मिनोरु खासाईं थःथःगु नुगःखँ तयादीगु खः ।
ज्याझ्वलय् नेपाल रेडक्रस सोसाइटी, सिन्धुपाल्चोक जिल्ला कचापाखें ग्वाहालि यानादीपिं जापानी नागरिक मिनोरु खासाइ, मासाताके साकामोतो, हिदेकाजु खोबायासी व हामाओका सिन्जुरो अथे हे, पीन नेपालया अनीता मानन्धर व हेलम्बु गाउँपालिकाया कार्यपालिका दुजः लक्ष्मी बिकयात जीवंकाछि दुजःया दसिपौ लःल्हाःगु खः ।
सिन्धुपाल्चोक शिखरपुर माझी गामय् २०७२ सालया विनाशकारी भुखाचं गां हे भज्यंक स्यंगुलिं अनया माझी परिवारपिन्त राहत बीकथं समाजसेवी राजेन्द्रमान ताल्चाभडेलं ५०पी जग्गा लःल्हाःगु खःसा उगु जग्गाय् एसवाई फाउण्डेशन कोरियाया ग्वाहालिइ भुखाचं पीडित माझीपिनिगु नितिं २४खा छेँ दयेकाब्यूगु खः । अथे हे, नेरेसो सिन्धुपाल्चोक जिल्ला कचा व बासुदेव स्मृति प्रतिस्थानया समन्वयस त्वनेगु लःया नितिं पीन जापान, रोटरी क्लब अफ जापानया ग्वाहालीइ गुपु हिति दयेकूगु खःसा माझी बस्तीइ शिक्षा बीगु नितिं सामुदायिक अध्ययन केन्द्रया पलिस्था याःगु खः ।
श्रीशान्तिइ सत्यमोहनया जन्म शताब्दी
लहनान्युज | यंलागा चौथी ११३९ (सेप्तेवर १८ २०१९)
वाङमय शताब्दी पुरुष एवं वरिष्ठ संस्कृतिविद् सत्यमोहन जोशीया जन्म शताब्दी लसताय् श्री शान्ति माविइ जिल्ला व्यापी सत्यमोहन जोशी रनिङशील न्ह्यसः लिसः कासा जुगु दु । संस्कृतिविद् जोशी उगु ब्बनेकुथिया संस्थापक मध्ये छम्ह खः ।
यल महानगरपालिका– ८ लोहलय् जुगु ज्याझ्वलय् पदमप्रकाश मावि न्हाप, रुद्रायणी मा. वि ल्यु, प्रभात मा. वि ल्युयाल्यु व आदर्श कन्या मा. वियात छःगु ज्याझ्वः दथुइ संस्कृतिविद् जोशीं सिरपा व दसीपौ लल्हाःगु खः । उगु कासाय् यलया १७ गु सार्वजनिक विद्यालय न ब्बति काःगु खः ।
ज्याझ्वलय् वरिष्ठ संस्कृतिविद् सत्यमोहन जोशीं २००७ साललिपाया राजनीतिक क्रान्ति लिपा शिक्षाया विस्तार यायेत ब्बनेकुथि स्थापना यानाःगु धका धयादिसे थथे ब्बनेकुगिइ ब्बना यक्को मनूत शिक्षित जुगुलि गौरवया महसुश जुगु धका धयादिगु खः ।
विद्यालय व्यवस्थापन समितिया अध्यक्ष अजरमान जोशीया सभाध्यक्षताय् जुगु उगु ज्याझ्वलय् महानगरीय प्रहरी परिसर ललितपुरया प्रमुख एवं प्रहरी वरिष्ठ उपरीक्षक टेकप्रसाद राई, नगर शिक्षा अधिकारी महेन्द्र क्षेत्री व प्रधानाध्यापक हरिदेव यादवपिन्स न सार्वजनिक विद्यालयया गुणस्तरीयता थकाये माःगु खँय् बःबियादिगु खः ।
देवास राईपाखे स्थापना दिवस हन
लहनान्युज | यंलागा चौथी ११३९ (सेप्तेवर १८ २०१९)
किराँत देवास राई उत्थान समाजं १५ क्वःगु स्थापना दिवस विविध ज्याझ्वः याना हःगु दु । देवास राईया मुख्य बसोबास दुगु मकवानपुरय् बागमती साँस्कृतिक ज्याझ्वः याना स्थापना दिवस हःगु खः ।
थी थी जिल्लापाखे थःगु जातीय पहिचान व भेषभुषासहित उपस्थित देवास राई समुदायया भेषभुषा व कला संस्कृतिया प्रदर्शनयाना आकर्षक नृत्य तक न्ह्यब्बःगु खः ।
बागमती गाउँपालिकाया अध्यक्ष सर्केश घलान मूपाँहा जुया झाःगु उगु ज्याझ्वलय् किराँत राई यायोक्खाया केन्द्रीय सदस्य नाप नेपाल प्रहरीया पूर्व बरिष्ठ प्रहरी उपरीक्षक किवाङ हाङ राई, किराँत देवास राई उत्थान समाजया केन्द्रीय सदस्य प्रमोद राई व पहरी विकास संघया केन्द्रीय अध्यक्ष जनक पहरीया विशेष आतिथ्य जुगु खः ।
ज्याझ्वलय् किराँत देवास राई उत्थान समाज केन्द्रीय समिति अध्यक्ष आस्मान राईया सभाध्यक्षताय् उगु ज्याझ्वः जुगु खः ।
उगु ज्याझ्वलय् राई समुदायया १० म्ह जेथा जेथीपिन्त सम्मान न याःगु खः विशिष्ठ योगदान यापिं सरकारी कर्मचारी शुक्रमान राई व किशोरकुमार राई, समाजसेवी बीरबहादुर राई, शिक्षक सूर्यबहादुर राई, प्रहरी राजकुमार राईयात सम्मान याःगु खः ।
कन्हय् असोज १ गते सुथसिया ५ताः ई जुयाः ३५गू मिनेटय् यःसिं क्वथलीगु
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
यँयाः अर्थात ईन्द्रजात्राया यःसिं क्वःथलाः जात्रा क्वचाय्केगु साइत मंगलवाः २९ताः जुयाः ३५गू मिनेटय् खः । अथे धइगु कन्हय् बुधवाः सुथसिया ५ताः ई जुयाः ३५गू मिनेटय् खः ।
ज्योतिषशास्त्रकथं माने याइगु दिं धाःसा थौंया सूर्योदयनिसें कन्हय् सूर्योदयतक जुइगु पञ्चांग समितिया सदस्य सचिव सूर्यप्रसाद ढुंगेलं धयादीगु दु ।
‘गुगु ई च्वयातःगु खः, व धइगु कन्हय् सूर्योदय जुइगु न्ह्यः स्वयां न्हापाया ई खः । उगु दिं क्वःछ्यूगु साइत स्वयां लिबाक्क सूद्र्यः लुइगु जुइगुलिं उकथंया समय तालिका वःगु खः ।’ सदस्य सचिव ढुंगेलं धयादिल ।
दँय्दसं यँयाःया नानिचाःया बहनिइ यःसिं क्वथइगु खः । थ्व धइगु येँया दुनेया वस्तिइ याः न्यायेकेगु दिं खःसा रथयात्राया लिपांगु दिं नं खः । च्यादँ न्ह्यःनिसें थुगु दिनस मिस्तसें रथ सालेगु चलन न्ह्याकूगु खः ।
नानीचा याःया इलय् यतखा, न्यत, किलाघः, भ्याचाद्यः, वंघः, मखं जूसें हनुमानध्वाखातक रथ सालेधुंकाः साइतकथं बहनी यःसिं क्वथइगु खः । क्वथःगु यःसिं हनुमानध्वाखानिसें साला हयाः येँया टेकू दोभानय् हइगुखः । बागमतिइ विसर्जन यायेवं विधिवतकथं यँयाः क्वचाइगु खः । गुकियात ‘ईन्द्रध्वजपतन’ नं धाइ ।
वंगु भाद्र २४ गते हनुमानध्वाखाय् साइतकथं ९ताः ई जुयाः १७गू मिनेटय् यःसिं थनेधुंकाः यँयाः शुरु जूगु खः ।
