Display Style:
Column Style
येँ महानगरय् एमालेया विद्यासुन्दर न्ह्यःने
लहनान्यूज | बछलागा चतुर्थी ११३७ (मे १५ २०१७)
स्थानीय तहया निर्वाचन २०७४या मतगणनाया झ्वलय् येँ महानगरपालिकाया मेयरय् नेकपा एमालेया उम्मेदवार विद्यासुन्दर शाक्य न्ह्यःने लानाच्वंगु दु ।
आःतक्क जुयाच्वंगु वडा नम्बर १ या मतगणनाय् विद्यासुन्दर शाक्यया ९५ मत दुसा वयकःया सतीम्ह प्रतिद्वन्दि साझा पार्टियाम्ह किशोर थापाया ७५ मत दु ।
वयां लिपा नेपाली कांग्रेसया उम्मेदवार राजुराज जोशीया ५४ मत थ्यंगु दु । २१दँया उम्मेदवार विवेकशील नेपालीया रन्जु दर्शनाया ४९ मत जूगु दु ।
यलय् धाःसा १३९३ मत लिसें नेकपा एमालेया हे हरिकृष्ण व्यन्जनकार न्ह्यःने लानाच्वंगु दु ।
प्रदेश ३, ४ व ६स २८३ स्थानीय तहया नितिं जूगु चुनावया आःतक्क सार्वजनिक जूगु मत परिणामय् नं एमाले हे अग्रता कयाच्वंगु दु । एमालें आःतक्क न्याथाय् त्याकेधुंकूगु दुसा कांग्रेस व माओवादिं प्यथाय् प्यथाय् त्याकेधुंकूगु दु ।
दक्कले न्हापांगु मत परिणामय् एमाले त्यात
लहनान्यूज | बछलागा चतुर्थी ११३७ (मे १५ २०१७)
म्हिगः क्वचाःगु स्थानीय तहया न्हापांगु चरणया निर्वाचनया दक्कले न्हापांगु मत परिणामय् नेकपा एमाले त्याःगु दु ।
दक्कले न्हापां सार्वजनिक जूगु मत परिणामय् मनाङया चामे गांपालिकाय् एमालें विजयी शुरुवात याःगु खः ।
मनाङया चामे गांपालिका अध्यक्षय् नेकपा एमालेया लोकेन्द्र घले २१४ मत हसें त्याःगु खः । वयकःया सतीम्ह प्रतिद्वन्दि नेपाली काग्रेसया अनिता लामां धाःसा १७३ मत हःगु खः ।
प्यंगू महानगरमध्ये यल महानगरपालिकाया मतगणना न्ह्यानाच्वंगु दु । यल महानगरपालिकाय् नेपाली कांग्रेसया चिरिबाबु महर्जन न्ह्यःने लानाच्वंगु दु ।
येँ महानगरपालिकाया मतगणना धाःसा सर्वदलीय वैठक धुंकाः न्ह्याइगु धाःगु दु । आः मुख्य निर्वाचन अधिकृतया आव्हानय् सर्वदलीय वैठक च्वनाच्वंगु दु ।
लेखनाथ पोखरा महानगरपालिकाय् नं मतगणना न्ह्याकेत सर्वदलीय वैठक न्ह्यानाच्वंगु दु ।
स्थानीय तह निर्वाचन : मतगणना थौं हे
लहनान्यूज | बछलागा तृतीया ११३७ (मे १४ २०१७)
स्थानीय तह निर्वाचनया मतदान क्वचायाकथं मतगणना नं थौंनिसें हे न्ह्याइगु जूगु दु ।
निर्वाचन आयोगं मतदान क्वचायाकथं मुचुल्का यानाः मतपेटिका स्थानीय तहया केन्द्रय् यंकीगु धाःगु दु । लिसें मतगणना नं थौं हे न्ह्याइगु निर्वाचन आयोगं न्ह्यथंगु दु ।
सम्भव दुगु गांपालिका व नगरपालिकाया मतगणना थौं बहनीनिसें हे न्ह्याइगु आयोगया धापू खः ।
येँ महानगरपालिकाय् नं थौं बहनीनिसें हे मतगणना जुइगु धाःगु दु ।
निर्वाचन आयोगं मतगणनाया लागिं ११ बुँदे निर्देशन जारी याःगु दु ।
निर्देशन कथं छगू वडाया मतगणना क्वचायेधुंकाः वडाध्यक्ष, मिसा दुजः, दलित दुजः व खुला दुजःया परिणाम सार्वजनिक यायेधुंकाः मेगु वडाया मतगणना न्ह्याइ ।
निर्देशनय् गुकथंया मत बदर यायेगु वा मयायेगु खँ नं स्पष्ट याःगु दु ।
६२ सञ्चारमाध्यमया ११५ सामग्रीइ आचारसंहिता उल्लङ्घन
लहनान्यूज | बछलागा द्वितीया ११३७ (मे १३ २०१७)
स्थानीय तह निर्वाचन, २०७४ या निर्वाचनया मौन ई न्ह्याये न्ह्यःतक्कया इलय् ६२ सञ्चारमाध्यमया ११५ सामग्रीइ पत्रकार आचारसंहिता तथा निर्वाचन आचारसंहिता उल्लङ्घन जूगु खनेदुगु दु ।
सामाजिक सञ्जाल फेसबुकया झिगू पोष्टय् आचार संहिता उल्लङ्घन जूगुलिइ लाःगु दु ।
२०७४ बैशाख १५ निसें २०७४ बैशाख २८ गतेतक्कया ई दुने छापापाखे ३४ माध्यमय् ६६ सामग्री, बिद्युतीयपाखे १८, अनलाइनय् प्रकाशित÷प्रसारित २५ सामग्री, ५ टेलिभिजनया १२ सामग्री व ५ रेडियोया १२ सामग्रीइ आचारसंहिता उल्लङ्घन जूगु खनेदुगु दु ।
‘पत्रकार आचारसंहिता तथा निर्वाचन आचारसंहिताया उल्लघंन याःगु छापा ३, रेडियो ५, टेलिभिजन ५ यात तुरुन्त हे एलर्ट याकेगु ज्या जूगु दु’ काउन्सिलया मुख्य अधिकृत झविन्द्र भुसालं धयादिल ।
आचारसंहिता आकर्षित जूगु विषयवस्तुइ एकपक्षीय जूगु लिसें सत्य, तथ्य व निष्पक्ष मजूगु, निर्वाचन आचारसंहितां क्वःछ्यूगु ईसीमा कथं विज्ञापन प्रकाशन÷प्रसारण मजूगु, निर्वाचनलिसे सम्वन्धित सभा, सम्मेलनया प्रत्यक्ष प्रसारण यानाः उल्लङ्घन याःगु खनेदुगु दु ।
निर्वाचन आचारसंहिता अनुगमनया भाला काःगु प्रेस काउन्सिल नेपालं गुणात्मक अनुगमन प्रणालीयागु दैनिक रुपं व संख्यात्मक अनुगमनया साप्ताहिक रुपं निर्वाचन आयोगयात रिपोर्टिङ् याना वयाच्वंगु दु ।
थौं स्वांया पुन्हि, झःझः धायेक हन
लहनान्यूज | बछलाथ्व पुन्हि ११३७ (मे १० २०१७)
थौं बैसाख शुक्ल पुन्हि, अर्थात स्वांया पुन्हि, देयन्यंक थीथी ज्याझ्वः यानाः २५६१क्वःगु बुद्ध जयन्ती हंगु दु ।
शान्तिया दुत लिसें एशियाया तारा भगवान गौतम बुद्धया जीवनया स्वंगू महत्वपूर्ण घटना थौं हे चूलाःगु खः । सिद्धार्थया जन्म, बुद्धत्व प्राप्ति व महापरिनिर्वाण तकं बैसाख पुन्हिया दिनय् हे जुयाबिज्याःगु खः । जुजु शुद्धोधन व रानी मायादेवीया कोखं बूम्ह सिद्धार्थ २९दँ दुबलय परीवार व दरवार त्वःताः ज्ञान मालेत बिज्याःगु खः ।
खुदँ लिपा ३५दँ दुबलय् बैसाख पुन्हिया हे दिनय् भारतया बोधगयाय् वसपोलयात बुद्धत्व प्राप्ति जुल ।
बुद्ध जयन्ती हनेगु झ्वलय् गौतम बुद्धया जन्म जूगु थाय् लुम्बिनिइ नं उपराष्ट्रपति नन्दबहादुर पुनया उपस्थितीइ छगू ज्याझ्वः जुल ।
अथे हे येँया झीगु मंकाः खलःया ग्वसालय् येँया लाजिम्पाट लागाय् बुद्ध प्रतिमा जात्रा नं याःगु दु ।
व हे कथं बुद्ध जयन्तीया पाः काःगु स्वर्ण जयन्ती तकं हनाच्वंगु रत्नाकर महाविहार, हःखबहाः यलं नं थौं यलय् बुद्ध प्रतिमा जात्रा याःगु दु । हःखबहालं न्ह्याःगु र्यालीं यलया सायाः रुट चाःहिलाः हःखबहालय् थ्यंकाः क्वचाःगु खः ।
बुद्धं आर्य अष्टाङ्गिक मार्ग व पञ्चशीलया उपदेश बियाबिज्याःगु दु ।
आर्य अष्टाङ्गिक मार्गय् सम्यक दृष्टि, सम्यक संकल्प, सम्यक वचन, सम्यक कर्म, सम्यक जीविका, सम्यक व्यायाम, सम्यक स्मृति व सम्यक समाधि लाः ।
पञ्चशीलय् खुयामकाये, मखूगु खँ मल्हाये, यौन व्यभिचार मयाये, मद्यपान मयाये व हिंसा मयाये धइगु उपदेश दु ।
