Display Style:
Column Style
काष्ठमण्डप येँ महानगरपालिकां हे धयेकिगु
नृपेन्द्रलाल श्रेष्ठ | कौलाथ्व चौथी ११३८ ( अक्टुवर १३ २०१८ )
काष्ठमण्डपया पूर्नरनिर्माण येँ महानगपालिका हे याइ धकाः येँमनपाया मेयरं थौ जुगु हनुमानढोका दरबार संरक्षण कार्यक्रमया ग्वसालय् पत्रकार सम्मेलन पाखें जानकारी विगु दु ।
थौं जुगु उगु ज्याझ्वलय् मेयर शाक्यं काष्ठमण्डप पूर्नरनिर्माण समितिया नायः ३ नंबर प्रदेशया प्रदेश सभासद राजेश शाक्ययात न्यागु करोडया चेक लःल्हागु दु ।
हनुमानढोका दरबार संरक्षण कार्यक्रमया येँ महानगरपालिका अन्तरगत १९, २०, २३ व २४ प्यंगु वडा ७३ गु योजनाया बिषयया जानकारी न बिगु खः ।
उगु योजना अन्तरगत १८ गु योजना क्वःचागु , खगु योजना ज्या जुया च्वंगु , न्यागु प्रक्रिया न्ह्याना च्वंगु व न्ह्यगु पुरातत्व नाप समन्वय जुया च्वंगु नाप १६ गु अनुमान व नक्सा जुयाच्वंगु थौं जुगु पत्रकार सम्मेलन पाखे जानकारी बियादीगु खः ।
नेपालभाषा एकेडेमीं निगु सफू पिकाल
लहनान्युज | कौलाथ्व तुतिया ११३८ ( अक्टुवर १२ २०१८ )
नेपालभाषा एकेडेमीपाखें छुगु ज्याझ्वःयासें निगु सफू पिकाःगु दु ।
एकेडेमीया थःगु हे भवनय् जूगु उगु ज्याझ्वलय् प्रा.नर्मदेश्वर प्रधानं च्वयादीगु “पाश्चात्य समालोचनाया सिद्धान्त” सफू व एकेडेमीया ख्वाःपौ “नेवाः प्रज्ञा”या निगूगु ल्याःया नं मूपाहाँ किपू नगरपालिकाया मेयर रमेश महर्जनं पितब्वज्या यानादीगु खः ।
नेपालभाषा एकेडेमीया संरक्षक वाङमय शताब्दी पुरुष संस्कृतिविद् डा. सत्यमोहन जोशीं त्वाःदेवाय् मत च्याकाः उलेज्या यानादीगु खः ।
एकेडेमीया चान्सलर चित्तरन्जन नेपालीया सभाधक्ष्याताय् जुगु उगु ज्याझ्वलय् एकेडेमीया सदस्य सचिव मल्ल के सुन्दरं लसकुस न्वचू बियादीगु खःसा एकेडेमीयाभाइस चान्सलर यज्ञरत्न धाख्वाःभाजुं सफू पितब्वज्याबारे नुगः खँ तयादीगु खः ।
अथेहेतुं ज्याझ्वलय् एकेडेमीया दुजः प्रा. प्रेमशान्ति तुलाधरं सफूया म्हसीका व प्रा.डा. चन्द्रमान बज्राचार्यं सफूया समीक्षा यानादिगु खः।
ट्राफिक प्रहरी सातदोवातोया भवन उलेज्या
लहनान्युज | कौलाथ्व पारु ११३८ ( अक्टुवर १० २०१८ )
यलया ट्राफिक प्रहरी परिसर सातदोवातोया भवन छगु ज्याझ्वःया दथुइ नेपाल प्रहरीया महानिरीक्षक सर्वेन्द्र खनालं उलेज्या यानादीगु दु ।
उगु ज्याझ्वलय् थःगु खँ तयादीसे प्रहरी महानिरीक्षक खनालं मखुगु ज्याः याइपिंन्त प्रहरी संगठन दुने थाय् मद धयादिगु दु ।
ज्याझ्वलय् महानगरीय ट्राफिक भवन दयेकेत ग्वाहालि यापिं दातापिंन्त न हने ज्या याःगु खः ।
उगु भवन करिव २ करोड १६ लाख लागतय् स्थानीयया ग्वाहालि दयेकेत तालागु खः ।
मध्यपुर स्काउटयात ग्वाहालि
लहनान्युज | ञंलागा चर्तुदशी ११३८ ( अक्टुवर ८ २०१८ )
नेपाल स्काउट, स्थानीय परिषद, मध्यपुर थिमिया छेँ दय्केगु नितिं ई.जी. पाईनियर स्कुलया प्रिन्सिपल विजेन्द्रलाल ध्वँजुं १गू लख ११ द्वः सच्छि झिंछतका दां ग्वाहालि याःगु दु ।
नेपाल स्काउट स्थानीय परिषद मध्यपुरया स्थानीय आयुक्त हरिबहादुर श्रेष्ठयात चेक लःल्हानादिसें प्रिन्सिपल ध्वँजुं नेपाल स्काउट, मध्यपुर थिमि स्थानीय परिषद् नेपालय् हे थःगु छेँ दय्केत ताःलाःगु न्हापांगु परिषद् जूगुलिं स्काउटया विकासय् योगदान बीत थःम्हेस्यां फूकथं ग्वाहालि याय्गु धयादिल ।
ई.जी. पाइनियर स्कुलया स्वर्ण जयन्तिया झ्वलय् याःगु उगु ज्याझ्वलय् स्काउट प्रकाशराज पाण्डेयात नं हंगु खः ।
स्कूलया व्यवस्थापन समितिया नायः सुचित्र सैंजुया सभाध्यक्षताय् जूगु उगु ज्याझ्वलय् ख्वपया पुलांम्ह जिल्ला शिक्षा अधिकारी नैनसिंह धामी मूपाहांकथं झायादीगु खः ।
यलय् गोल्डेन डायमण्ड मेला शुरु
नृपेन्द्रलाल श्रेष्ठ | ञंलागा चर्तुदशी ११३८ ( अक्टुवर ८ २०१८ )
गोल्डेन डायमण्ड एण्ड ज्वेलरींया ग्वसालय् स्वक्वःगु “गोल्डेन डायमण्ड दशैं तिहार मेला” वंगु विहिवाःनिसें न्ह्यःगु दु । उ
गु ज्याझ्वःया उलेज्या यासें नेपाल सुनचाँदी व्यवसायस महत्वपूर्ण योगदान बियादीपिं स्वम्ह ब्यक्तित्वपिं नेपाल सुनचाँदी व्यवसायी महासंघया पुलांम्ह नायः तेजरत्न शाक्य, वंगु ७०दँ निसें सुनचाँदी व्यवसायी संलग्न जुयाच्वनादीम्ह भाइ बज्राचार्य व पृथ्वीमान शाक्ययात हनेगु ज्या जूगु खः ।
वय्कःपिन्त प्रदेश नं ३या सांसद शोभा शाक्यं हनापौ व ज्वेलरीया नायः ज्ञानुराज शाक्यं दोसल्लां न्यय्काः हनादीगु खः ।
न्हू न्हूगु डिजाइनया तिसाज्वलं छगू हे थासं सुपथ भावय् उपलब्ध याकेगु तातुनां उगु मेला यानागु ग्वसाः खलःया नायः ज्ञानुराजा शाक्यं जानकारी बियादीगु खः ।
नेपाल सुनचाँदी व्यवसायी महासंघया न्वकूतकं जुयादीम्ह शाक्यं उगु मेलाय् न्हूगु नापं यइपुस्सेच्वंगु लुँ व हिराया तिसाज्वलं प्रदर्शनीइ तयातःगु खःसा तिसाज्वलं न्याइपिं ग्राहकपिनिगु नितिं निःशुल्क स्वास्थ्य विमाया प्याकेज नं उपलब्ध याकूगु खः ।
यलया मंगलबजाःया हःखाय् न्यान्हुतक न्ह्याःगु उगु मेलाय् नेपाल सरकारया पुलांम्ह मुख्य सचिव तीर्थमान शाक्य, यल महानगरपालिकया उपप्रमुख गीता सत्याल, यल महानगरपालिका वडा नं. १६या नायः निर्मलरत्न शाक्य, ललितपुर सुनचाँदी व्यवसायी संघया नायः किरणभाइ बज्राचार्यपिन्सं थःथःगु नुगःखँ तयादीगु खः ।
