Display Style:
Column Style
त्रिपिटक अन्तर्गतया निगू सफू नेपालभासं
लहनान्यूज | तछलाथ्व नवमि ११३७ (मे ३ २०१७)
त्रिपिटक अन्तर्गतया निगू महत्वपूर्ण सफू पटिसम्भिदामग्ग अले धम्मसङ्गणीका नेपालभासं पिदंगु दु ।
वीरपूर्ण सफूधुकूया ग्वसालय् यलया रत्नाकर महाविहारय् जूगु ज्याझ्वलय् उपसंघनायक अले अनुवादक डा. ज्ञानपूर्णिक महास्थवीरं निगुलिं सफूया विमोचन यानादिल ।
नुगः खँ तयेगु झ्वलय् पटिसम्भिदामग्गया अनुवाद डा.ज्ञानपूर्णिक महास्थविरं बुद्ध नेपालय् बूगु धकाः लयताइपिं झी दथुइ म्ह्वः हे मनुखं जक बुद्ध दर्शनया अध्ययन यायेगु याःगु धयादिल ।
धम्मसङ्गणीया अनुवादक अनागारिका अग्गञाणीं थुगु ग्रन्थ अभिधर्मया मूल आधार अले सार जूगुलिं अर्थकथाया वर्णन स्वयाः अनुवाद यानागु धयादिल ।
अखिल नेपाल भिक्षु महासंघया महासचीव कौण्डण्य महास्थविर थुगु सफू पिकायेत यक्वं हे ई बियाः जानादीम्ह धकाः डुण्डबहादुर वज्राचार्ययात च्वछानादिल ।
निगू सफूया मू १२५० तका तयातःगु दुसा सफू विमोचन ज्याझ्वलय् द्वःछि तकां उपलब्ध याकूगु खः । लिसें विमोचन ज्याझ्वलय् सफू न्याःपिन्त त्रिपिटक परिचय सफू छगू नं तँसा कथं ब्यूगु खः ।
त्रिपिटक अन्तर्गतया थुगु निगू महत्वपूर्ण सफू नेपालय् न्हापांगु खुसी पिदंगु लिसें आःतक भारतय् तक नं पिमदनीगु पिकाकः वीर पूर्ण पुस्तकालयं न्ह्यथ.गु दु ।
मुदिताया नुगः सम्बन्धि शिविर क्वचाल
लहनान्यूज | तछलाथ्व नवमि ११३७ (मे ३ २०१७)
मुदिता सेवागृहया ग्वसालय् यलय् सितिकं नुगः सम्बन्धि स्वास्थ्य शिविर क्वचाःगु दु ।
मुदिताया ग्वसालय् नेपाल सरकार महिला बालबालिका तथा समाज कल्याण मन्त्रालय अन्तर्गत महिला तथा बालबालिका कार्यालय यलयया सहकार्यय् जूगु शिविरय् २सःम्हेसिनं थःगु नुगः जाँच याकल ।
शिविरय् महिला तथा बालबालिका ज्याकू यलया प्रमुख अधिकृत शारदा बिजुक्छेँया लिसें महालक्ष्मी नगरपालिकाया नवनिर्वाचित मेयर रामेश्वर श्रेष्ठं तकं ब्वति कयाद्यूगु खः ।
महालक्ष्मी नगरपालिकाया नवनिर्वाचित मेयर श्रेष्ठं ज्याथःपिं नागरिकपिनगिु स्वास्थ्यय् पहुँत अःपुकेगु ल्याखं नगरपालिकां चौमासिक रुपं थप बृद्धभत्ता इनेगु क्वःछीधुनागु धयादिल ।
मुदिता सेवागृहया नायः राज्यलक्ष्मी बज्राचार्यं संस्था दुने जक मखसें त्वाः, समुदाय दुने नं नुगः ल्वय् सम्बन्धि स्वास्थ्यबारे जनचेतना न्यंकेत शिविरया ग्वसाः ग्वयागु धयादिल ।
पाटन हार्ट क्लिनिकया प्राविधिक ग्वाहालिइ जूगु शिविरय् ईसिजीया लिसें मधुमेहया जाँच नं सितिकं याःगु खः ।
शिविरय् स्थानीय आवश्यकता कथं म्ह्वः शुल्कय् अल्ट्रासाउण्ड, दाः, स्येँ, जँलास्येँ सम्बन्धित ऐच्छिक हि परीक्षण व इकोकार्डियोग्राफी जाँचया तकं व्यवस्था याःगु खः ।
विश्व स्वास्थ्य संघं सन २०१४य् याःगु छगू अध्ययन कथं नेपालय् वासः यायेगु झ्वलय् सीपिं मध्ये उच्च रक्तचापया हुनिं २.२६ प्रतिशत व नुगलय् हि संचार याइगु हिनुलिइ अवरोध (कोरोनरी हार्ट डिजिज)या हुनिं १०.७९ प्रतिशत सीगु खः ।
अप्वया वनाच्वंगु शहरीकरणया तनाव व अस्वस्थ्य जीवनशैलीया हुनिं नुगः ल्वय् समस्या झन तःधनावनाच्वंगु खनेदु ।
यलय् सफू ब्वज्या न्ह्यात
लहनान्यूज | तछलाथ्व अष्टमि ११३७ (जुन २ २०१७)
नेपालभाषा एकेदमिया ग्वसालय् निन्हुयंकया नेवाः सफू ब्वज्या यलया जाउलाख्यः, तमकःद्यः, ताम्रकार कम्प्लेक्सय् न्ह्याःगु दु ।
यल महानगरपालिकाया नवनिर्वाचित मेयर चिरिबाबु महर्जनं थौं रिबन चानाः सफू ब्वज्याया उलेज्या यानादिल ।
ब्वज्या उलेज्याया औपचारिक ज्याझ्वलय् नेपालभाषा एकेदमिया चान्सलर चित्तरन्जन नेपाली, शताब्दि पुरुष संस्कृतिविद् डा. सत्यमोहन जोशी, यल महानगरपालिकाया मेयर चिरिबाबु महर्जन व सफू ब्वज्या कजि बिजयरत्न असंबरें थःथःगु नुगः खँ तयादिल ।
ज्याझ्वःया वक्तापिन्सं नेवाः सफू पाठकपिनिगु दथुइ यंकेत थुकिया बजार विकास यायेमाःगु खँय् बः ब्यूगु खः ।
उलेज्या धुंकाः मेयर महर्जनं ब्वज्याया अवलोकन नं यानाद्यूगु खः । ब्वज्याय् दुगु सफू स्वयेत लिसें न्यायेत म्वःम्वः हे मनूत ब्वज्याय् थ्यंगु दु ।
लहनान्यूजलिसे खँ ल्हासें ब्वज्याया कजि बिजयरत्न असंबरें सितिकं अवलोकन यायेफइगु ब्वज्याय् ब्वति कायेत सकलसित इनाप यानादिल । पाठक संस्कृतिया विकास लिसें च्वमिपिन्त प्रोत्साहन बीत नं ब्वज्याय् ब्वति कायेत सकसितं कजि असंबरें इनाप यानादिल ।
यलया तमकःद्यः जाउलाख्यलय् न्ह्याःगु सफू ब्वज्याय् नेवाः तजिलजि, बौद्ध धर्म लिसें थीथी कथंया नेपालभाषा लिसें मेमेगु भाषं नं च्वयातःगु सफूत ब्वज्याय् तयातःगु दु ।
ब्वज्या कन्हय् शन्चरबाः सनिलय् तक्क नं न्ह्याइतिनि ।
निगूगु चरणया निर्वाचन हाकनं लिज्यात
लहनान्यूज | तछलाथ्व षष्ठी ११३७ (मे ३१ २०१७)
स्थानीय तहया निगूगु चरणया निर्वाचन असार १४ गते जुइगु क्वःज्यूगु दु ।
थौं सुथय् च्वंगु मन्त्रीपरिषदया वैठकं स्थानीय तहया निगूगु चरणया निर्वाचन असार १४ गते यायेगु क्वःछ्यूगु खः ।
थ्वयां न्ह्यः ज्येष्ठ ३१ गते यायेगु क्वःछिनातःगु निगूगु चरणया निर्वाचन असार ९ गतेया नितिं लिछ्याःगु खः ।
मुस्लिम समुदायया रमजान नखः लाःगु हुनिं निर्वाचनया मिति लिछ्यायेमाःगु न्ह्यथंगु दु ।
निगूगु चरणया निर्वाचन अन्तर्गत प्रदेश १, २, ५ व ७य् निर्वाचन जुइत्यंगु दु ।
येँया मेयरं नेवाः भासं सपथ काल
लहनान्यूज | तछलाथ्व षष्ठी ११३७ (मे ३१ २०१७)
येँ महानगरपालिकाया नवनिर्वाचित मेयर, उपमेयरलिसें सकल जनप्रतिनिधिपिनिगु शपथ ग्रहण ज्याझ्वः येँया राष्ट्रिय सभागृहस जूगु दु ।
येँ महानगरपालिकाया मेयर विद्यासुन्दर शाक्य व उपमेयर हरिप्रभा खड्गीयात मुख्य निर्वाचन अधिकृत दिपेन्द्र अधिकारीं शपथ ग्रहण याकादिल ।
अथे हे येँ महानगरपालिकाया ३२गुलिं वडाय् निर्वाचित वडाध्यक्ष लिसें सदस्यपिन्त मेयर विद्यासुन्दर शाक्यं शपथ ग्रहण याकादिल ।
शपथ ग्रहणया झ्वलय् मेयर विद्यासुन्दर शाक्य व उप मेयर हरिप्रभा खड्गीं नेवाः भासं शपथ ग्रहण यानाद्यूगु खः ।
शपथ ग्रहणलिसें सकल जनप्रतिनिधिपिन्सं थौंनिसें हे थःथःगु पदभार ग्रहण याइगु जूगु दु । लिसें महानगरपालिका दुनेया ज्याझ्वः व योजनायात कयाः थौं हे मुँज्या नं च्वनीगु जूगु दु ।
