Display Style:
Column Style
पत्रकारतयसं मातृभाषा पत्रकारीता दिसव हन
लहनान्यूज | बछलाथ्व चतुर्दशी ११३७ (मे ९ २०१७)
नेवाः पत्रकार राष्ट्रिय दबुलिं थौं यलय् मातृभाषा पत्रकारीता दिवस हंगु दु ।
मातृभासं पत्रकारीताया शुरुवात यानादीम्ह न्हापांम्ह मातृभाषा पत्रकार धर्मादित्य धर्माचार्यया बुदिंया दिं लाकाः दबुलिं थौं मातृभाषा पत्रकारीता दिवस हंगु खः ।
मातृभाषा पत्रकारिता दिवसया दिनस पत्रकारत मुनाः यल पूच्वय् दुगु धर्मादित्य धर्माचार्यया झ्वाताय् स्वांमाः कोखायेकूगु खः ।
ज्याझ्वलय् नवाःपिन्सं मातृभाषा पत्रकारीताय् धर्मादित्यया योगदानयात लुमंकूगु खः । लिसें वक्तापिन्सं धर्मादित्यया मातृभाषाया पत्रकारीताय् योगदानया कदर यासें राज्यं हे मातृभाषा पत्रकारिता दिवस हनेमाःगु धाःगु खः ।
राणाशासनया इलय् धर्मादित्य धर्माचार्यं कलकत्तां नेवाः भासं ‘बुद्ध धर्म व नेपालभाषा पत्रिका’ पिथनाः मातृभासं पत्रकारिताया शुरुवात यानादीगु खः ।
यलय् बृहत् बौद्ध सभा क्वचाल
लहनान्यूज | बछलाथ्व चतुर्दशि ११३७ (मे ९ २०१७)
२५६१औ बुद्ध जयन्ती हनेगु झ्वलय् बुद्धजयन्ती समारोह समिति, रत्नाकर महाविहार, हःखबहाःया ग्वसालय् थौं बृहत बौद्ध सभा क्वचाःगु दु ।
थौं त्रियान अन्तर्गत स्वम्ह ब्यक्तित्वपाखें हःखबहालय् सभाया औपचारीक उलेज्या जूगु खः । श्रावकयानया डा. ज्ञानपूर्णिक महास्थविर, महायानया रिम्पोछे लामा गुरु व बज्रयानपाखें ज्ञानबहादुर बज्राचार्यं सभाया मंकाः रुपं उलेज्या यानादीगु खः ।
उगु हे ज्याझ्वलय् स्वंगू हे यानया व्यक्तित्वपाखें मंकाः रुपं स्मारिकाया नं विमोचन जूगु खः ।
न्हापा न्हापा यलया बुद्ध जयन्ती समारोह समिति बौद्ध सभाया उलेज्या राष्ट्रप्रमूखपाखें जुइगु जुयाच्वंगु खः । तर थुगुसी चीधंगु विहारय् ज्याझ्वः यायेमाःबलय् थायया अभावं थुगु परम्परायात त्वाःथलेमाःगु ग्वसाः खलकं न्ह्यथंगु दु ।
सभा जुइ स्वयां न्ह्यः रत्नाकर महाविहारया हे आयोजनाय् जूपिं अल्पकालीन श्रामणेरपिनिगु भिक्षाटन ज्याझ्वः नं जूगु खः । भिक्षाटन ज्याझ्वः सुथय् ७ः३० ता इलंनिसें १०ताः ई तक जूगु खः ।
कन्हय् स्वांया पुन्हिया लसताय् बुद्ध प्रतिमा जात्रा जुइत्यंगु दु ।
रत्नाकर महाविहार, हःखबहाः यलं थुगुसी थम्हं बुद्ध जयन्तीया पाः काःगु ५०दँ थ्यंगु लसताय् स्वर्ण जयन्ती हनाच्वंगु दु ।
बुंगद्यःया जात्राय् थौं नैंक्यालं लुल
लहनान्यूज | बछलाथ्व त्रयोदशी ११३७ (मे ८ २०१७)
बुंगद्यःया जात्राया झ्वलय् थौं नैंक्यालं लुइगु जात्रा क्वचाःगु दु ।
बुंगद्यःया रथ थतित्वालय् हयेधुंकाः थौं नैंक्यालं लुइगु जात्रा याःगु खः । जात्राया झ्वलय् बुंगद्यःया रथया गजुलिं नं मरिचरि व्हलेगु लिसें नैंक्या कुर्केगु याइ ।
बुंगद्यःया रथया च्वकाः कुर्काहःगु नैंक्याः लानाकायेफुसा सन्तान मदुपिनि सन्तान दइगु जनविश्वास दु । अथेजुयाः उगु नैंक्याः लानाकायेत म्वःम्वः हे मुनेगु याइ ।
थौं नैंक्यालं लुइगु जात्रा क्वचाःगुलिसें कन्हय् याकः मिसा भुज्याः याइ । याकः मिसा भुज्याःलय् कन्हय् सुथ न्हापां मिसातयसं जक रथयात सालाः थतित्वालं इति थ्यंकाः याः न्यायेकी ।
नेपाःया हे दक्कले ताःहाकःगु जात्रा कथं काइगु बुंगद्यःया रथजात्राय् रथ इतिइ थ्यनेधुंकाः जाउलाख्यलय् सालेगु नितिं साइत पिकाइ । जाउलाख्यलय् जाउला जात्रा लिसें जात्रा नं क्वचाइ ।
हःखबहालय् बुद्ध जयन्तीया नियमित ज्याझ्वः न्ह्यात
लहनान्यूज | बछलाथ्व एकादशी ११३७ (मे ६ २०१७)
२५६१औं स्वांया पुन्हि हनेगु झ्वलय् बुद्ध जयन्ती समारोह समिति, रत्नाकर महाविहारया ज्याझ्वःत थौंनिसें नियमित रुपं न्ह्याःगु दु ।
बुद्ध जयन्ती समारोह समिति रत्नाकर महाविहार, हःखबहाः यलया स्वर्ण जयन्ती हनेगु झ्वलय् थौं हःखबहालय् रक्तदान ज्याझ्वः याःगु खः ।
रत्नाकर महाविहारया आजु ज्ञानबहादुर बज्राचार्यया अध्यक्षताय् जूगु औपचारीक ज्याझ्वलय् यल महानगरया प्रमुख हरिप्रसाद दाहालं त्वाःदेवाय् मत च्याकाः हिदानया उलेज्या यानादिल ।
हिदान ज्याझ्वलय् ९५म्हेसिनं थःगु हिदान याःगु खः । हिदान यायेत मुक्कं ११५म्हेसिनं नां च्वकूगु खःसां ब्लड प्रेसरया समस्या कारणं २०म्हेसिनं धाःसा रक्तदान यायेमखंगु खः ।
व स्वयां न्ह्यः ज्ञानमाला भजन नं याःगु खः । ज्याझ्वलय् बेखारत्न शाक्य, बुद्धिराज बज्राचार्यया नं उपस्थिती दुगु खः ।
थौंनिसें न्ह्याःगु बुद्ध जयन्ती समारोहया नियमित ज्याझ्वःया झ्वलय् वइगु २६ गते बृहत बौद्ध सभा जुइत्यंगु दु ।
स्वांया पुन्हि २७ गतेया दिनय् बुद्ध प्रतिमा जात्रा नं यायेत्यंगु दु । उकुन्हु हे पाःब्व लःल्हानाः समापन ज्याझ्वः नं जुइ । २८ गते धाःसा प्रवज्या समापन ज्याझ्वः जुइ ।
रत्नाकर महाविहार, हःखबहाः यलं बुद्ध जयन्ती समारोह हनेगु पाः काःगु ५०दँ थ्यंगु लसताय् वंगु ९ गते मिखा शिविरनिसें हे थीथी ज्याझ्वः न्ह्याःगु खःसा थौं रक्तदान ज्याझ्वःनिसें न्हियान्हिथंया ज्याझ्वः न्ह्याःगु खः ।
प्रेमबाःया सच्छिदँ बुदिं हन
राजेन्द्र रञ्जित | बछलाथ्व एकादशी ११३७ (मे ६ २०१७)
थौं येँय् छगू ज्याझ्वः यासें भाषा थुवाः प्रेम बहादुर कसाःया सच्छिदँ बुदिं हंगु दु ।
शताब्दी पुरुष, संस्कृतिविद् डा.सत्यमोहन जोशीया मूपाहाँसुइ जूगु ज्याझ्वलय् च्वसापासा व आशा सफूकुथिया नायः पद्मरत्न तुलाधर, नेपालभाषा एकेडेमीया चान्सलर चित्तरञ्जन नेपाली, जनकवि दुर्गालाल श्रेष्ठ, प्रो.माणिकलाल श्रेष्ठ, नेपालभाषा साहित्य मन्दिर ख्वपया नायः तिलक प्रसाद कायस्थ, नेपालभाषा परिषदया पुलांम्ह नायः फणिन्द रत्न बज्राचार्यं प्रेम बहादुर कसालं नेवाः भाषा व साहित्य ख्यलय् बियादीगु योगदानया चर्चा यानादीगु खः ।
कसाःया सच्छि दँ बुदि हनेगु झ्वलय् दच्छियंकं थीथी ज्याझ्वः यायेगु च्वसापासाया छ्यान्जे भुषणप्रसाद श्रेष्ठं जानकारी बियादिल । नेपालभाषा साहित्यया क्षेत्रयात च्वन्ह्याकायंकाः भाषाथुवाः कसाःया म्हगस पूवंकेत जायेमाःगु छ्यान्जे श्रेष्ठया धापू खः ।
नेपालभाषाया राष्ट्रिय अभिलेखालय आशा सफूकुथिया संस्थापक कसाःनं राणा शासनया इलय् नं च्वसापासा (पेनफ्रेण्ड) धकाः साहित्य सृजना याकाः कलकत्तां साहित्य विकासया पलाः न्ह्याकादीगु खः । नेपालय् नेपालभाषा साहित्य सृजना यातकी जेल नेल भोगे यायेमालीगु इलय् वयकलं कलकत्तां धर्मोदय पत्रिका पिकयादीगु खः ।
