Display Style:
Column Style
चीन भ्रमणया अनुभव आदानप्रदान
लहनान्युज | गुंलाथ्व औंसी ११३८ ( सेप्तेम्वर ९ २०१८ ) ने
अरनिको समाजया ग्वसालय् ‘चीन भ्रमण अनुभव आदान प्रदान’ ज्याझ्वः कुपण्डोलया प्रतिभा समाज, साटोआकी भवनय् क्वचाःगु दु ।
चीनया कम्युनिष्ट पार्टीया थीथी संस्थाया ग्वसालय् थीथी ईलय् नेवाः मिडिया, पत्रकार व साहित्यकारपिं चीन भ्रमण यानादीगु खः । थथे चीन भ्रमण यानादीपिनिगु अनुभव न्यनेगु ताःतुना छगु ज्याझ्वः जूगु खः ।
चिनिया राजदूत यु होङया मूपाहाँसुइ क्वचाःगु उगु ज्याझ्वलय् चीन भ्रमणय् झायादीपिंमध्ये प्रा . नर्मदेश्वर प्रधान, संकिपा निर्देशक व संकिपा पत्रकार बिजय रत्न असंबरे, साहित्य अन्वेषक व साहित्यकार भूषण प्रसाद श्रेष्ठ,पत्रकार व साहित्यकार नरेशवीर शाक्य, साहित्यकारपिं बंशीधर बज्राचार्य, केदार सितु व साहित्यकार राजित बहादुर श्रेष्ठपिन्सं थःथःगु अनुभव कनादीगु खः ।
ज्याझ्वलय् वक्तापिन्सं कनादीगु अनुभवयात समाजया नायः डा.सर्बोत्तम श्रेष्ठं महामहिम राजदूतयात ध्वाथुइकादीगु खः । अथेहे महामहिमं जनता थःगु तुती थम्ह दने मफयेकं देशया विकास मजुइगु खँ कनादीगु दु । ज्याझ्वःया फुक्कं खँल्हाबल्यायात डा. श्रेष्ठं भाय्हिलादीगु खः ।
बुखँ नेवाः सुचना केन्द्र
बादेगामय् बुरुवाः द्यःया जात्रा जुल
गुंलागा त्रयोदशी ११३८ ( सेप्तेम्वर ८ २०१८ )
यलया नेवाः वस्ती बादेगामय् पंजरां कुन्हु तःजिक बुरुवाः द्यःया जात्रा जुगु दु ।
थुगु जात्राय् विशेष याना अमिताभ तथागतया मूर्तियात खतय् तयाः कुबिया सांस्कृतिक बाजं थाना जात्रा जुइगु खः । थ्व जात्रायात हे बुरुवाः द्यः जुगः जात्रा धायेगु न यानाहःगु खः ।
थुगु जात्रा झिंन्यासःदँ स्वया न्हापां न्ह्यानाच्वंगु जात्रा खः धकाः स्थानीय मनूतय्सं धायेगु याना वयाच्वंगु खः ।
थन बादेगामय् बुधवाः पतिकं बुरुवाः द्यःयाथाय् विशेष पुजा नाप गुंला लच्छि बिशेष कथंया मेला न जुइ ।
थुगु जात्राया झ्वलय् स्थानीय लाखे नं पिकायेगु चलन दु । थन प्यंगू त्वाःया प्यम्ह लाखे पिकाइगु ।
नेपाल सम्वत नाप पद्मरत्नयात कया विचाः गोष्ठी
नृपेन्द्रलाल श्रेष्ठ | गुंलागा एकादशी ११३८ ( सैप्तेम्वर ६ २०१८ )
नेपाल सम्वत् व नेपालभाषा आन्दोलनया न्ह्यलुवा , प्रजातान्त्रिक आन्दोलनया नेता, वरिष्ठ मानव अधिकारवादी नेता नाप साहित्यकार पद्मरत्न तुलाधरया नागरिक अभिनन्दन ज्याझ्वलय् अन्तरगत थौं पर्यटन बोर्डय् “नेपाल सम्वत् र पद्मरत्न” विषय विचाः गोष्ठी जुगु दु ।
उगु ज्याझ्वलय् मूपाँहा कथं पूर्व प्रधानमन्त्री बाबुराम भट्टराई न आतक नेपाःया जनतां थी थी आन्दोलनय् सक्रिय जुया नकसा न्ह्यचिला च्वनादीम्ह पद्मरत्न तुलाधरयात झी सकसिया अभिभावक कथं कायेमाःगु धइगु बिचाः तयादील ।
विशेष पाँहा कथं सामान्य प्रशासन मन्त्री लालबाबु पण्डितं पद्मरत्नयात राज्यं हे सम्मान याये बहम्ह खः धयादीसे नेपाःया राजनैतिक ह्युपा हयेगु आन्दोलनय् न्ह्यागु ईल सक्रिय रुपय् नेतृत्व यानाच्वनादी खः धइगु बिचाः तयादील ।
प्रतिष्ठानया अध्यक्ष श्यामकृष्ण मानन्धरया सभाध्यक्षताय् जुगु उगु ज्याझ्वलय् नेवाः न्ह्यलुवापिं मल्ल के. सुन्दर, डा. पुष्पराज राजकर्णिकार, तिर्थराम डंगोल पिन्सं नेपाल सम्वत् व पद्मरत्नया विषयलय् थःपिनिगु बिचाः तयादीगु खः ।
सुनागुथी भिं द्यो जात्रा
लहनान्युज | गुंलागा एकादशी ११३८ ( सेम्तेम्वर ६ २०१८ )
भिं द्यो पुजाया लसताय् मंगलबाः नेवा बस्ति सुनागुथी भिं द्यो जात्रा यागु दु ।
सुनाकोठी क्षेत्रया विकास व ललिपुरयाहे सांस्कृतिक नापं धार्मिक व पर्यटकीय स्थलया रुपय् म्हसिकेत दँच्छि न्ह्वः थुगु थासे छगः ल्होतय् कियातगु भिं द्योया पूर्ति पलिस्था यागु खः ।
उम्ह भिं द्यो हलिमय् हे दक्ले तःधिक्व म्ह भिंद्योया रुपय् नं काई । जात्राया झोलय् सुथ निसे विधिवत पूजा लिसे होम तक यागु खःसा सनिलय् नेवाः वस पूना बाज थाना सुथागु दँ चिहुला द्यःया जात्रा यागु खः ।
उगु जात्राय् द्यःया दर्शन याय्त संसद पम्फा भुसाल, यलमाहानगरपालिकया मयेर चिरिबाबु महर्जन, ख्याली जुजु मदन कृष्ण श्रेष्ठ लगायत थिथि ब्यतिmपिं उपस्थित जुयादिगु खः ।
पेट्रोल, डिजेल, मचिकं व ग्यासया भाः थिके जुल
लहनान्युज | गुंलागा नवमी ११३८ ( सेप्तेम्वर ४ २०१८ )
नेपाल आयल निगमं पेट्रोल, डिजेल, मचिकं व ग्यासया भाः थःकागु दु । आयल निगम सञ्चालक समितिया मुँज्यां पेट्रोलय् प्रतिलिटर छतका नाप डिजल व मचिकंलय् प्रतिलिटर स्वतका थःकागु दु ।
जा थुइगु ग्यासय् प्रतिसिलिण्डर २५ तका थःकागु दु । थु गु भाः थौं चन्ह्यः निसें लागु जुइ धकाः नेपाल आयल निगमया प्रवक्ता वीरेन्द्र गोइत धागु दु ।
थ्व न्हुगु भाः कथं छगु लिटर पेट्रोलया भाः ११२ तका थ्यगु दु । अथेहे छगु लिटर डिजेल व मचिकं खय् ९८ तका थ्यंग् दु ।
