Display Style:
Column Style
भ्रष्टाचार, कुशासन अन्त्य मजूतले विकास जुइमखु
नृपेन्द्रलाल श्रेष्ठ | अनलागा चर्तुदशी ११३८ ( जुन १३ २०१८ )
नेपाल राष्ट्रिय पार्टी प्यालेस व क्याटरिङ व्यवसायी महासंघया निक्वःगु साधारणसभा व न्हापांगु महाधिवेशनया थौं बुधवाः छगु ज्याझ्वः दथुइ गृहमन्त्री रामबहादुर थापा बादल उलेज्या यानादीगु दु ।
उगु ज्याझ्वलय् थःगु नुगः खँ तयेगु झ्वलय् गृहमन्त्री बादलं देशय् जव तक भ्रष्टाचार, कुशासन व गुण्डागर्दीया अन्त्य मजूतले देशय् विकास जुइत थाकुइ खँय् बः बियादील । पार्टी प्यालेस व क्याटरिङं उद्योग ख्यलय् खः बेरोजगार जुया च्वपि ल्यासे ल्याम्ह तयेत आकर्षण याना रोजगार बिइग् खँय् बिश्वास प्वकादील ।
उगु ज्याझ्वलय् पुलाम्ह उपप्रधान मन्त्री तोप बहादुर रायमाझी, पुलाम्ह उद्योग मन्त्री नबिन्द्रराज जोशी, राजनिती बिश्लेषक डा. सुरेन्द्र के.सी, ललितपुर उद्योग वाणिज्य संघया नायः किसनलाल महर्जन व ललितपुर उद्योग वाणिज्य संघया पुर्व नायः अजरमान जोशीपिन्स न नेपाल राष्ट्रिय पार्टी प्यालेस व क्याटरिङ व्यवसायी महासंघया निक्वःगु साधारणसभा व न्हापांगु महाधिवेशनया सफलताया कामना यानादीगु खः ।
उगु ज्याझ्वः महासंघया नायः अरुणशंकर वैद्यया सभाधक्ष्य जुगु खः ।
बरिष्ठ कलाकार भीम बहादुर थापा मन्त
लहनान्युज | अनलागा चर्तुदशी ११३८ ( जुन १३ २०१८ )
बरिष्ठ कलाकार भीम बहादुर थापा ९२ दँय् मन्त । थौंं बुधवाः सुथय् २ ताः ईलय् मदुगु खः ।
थापां झण्डै सच्छि मल्याक संकिपा व टेलीचलचित्रय् अभिनय याना तःगुदु ।
वि.सं. १९८३ असार १३ गतेय् खोटाङय् बुम्ह थापां ब्रिटिश आर्मीइ जुया निक्वःगु विश्वयुद्धय् ब्बति काःगु खः ।
काष्ठमण्डप पुननिर्माण समितियात ५० लाख लःल्हात
लहनान्युज | अनलागा त्रयोदशी ११३८ ( जुन १२ २०१८ )
येँं महानगरपालिकां थौं मंगलवाः छगु ज्याझ्वः यासें काष्ठमण्डप पुननिर्माण समितियात ५० लाख तका अनुदान विगुु दु । महानगरया रणनीतिक नेतृत्वय् सरकारी व
नागरिक संघसंस्थाया ग्वाहालि काष्ठमण्डपयात याकान हे मौलिक स्वरुप बिया पुनःनिर्माण यायेत प्रदेश सभाया सदस्य राजेश शाक्यया नेतृत्वय् समिति गठन जुगु खः ।
येँ महानगरपालिका नाप सहमति पत्रय् हस्ताक्षर यासें महानगरया प्रमुख विद्यासुन्दर शाक्यं समितिया अध्यक्ष शाक्ययात लःल्हागु खः । उगु सहमति पत्रय् महानगरपालिका पाखें सहसचिव राजेश्वर ज्ञवालीं व समितिपाखें अध्यक्ष शाक्यं ल्हाचिं तयादीगु खः ।
उगु ज्याझ्वलय् महानगरपालिकाया प्रमुख शाक्यं काष्ठमण्डपया पुननिर्माणया आ लिबाय के मज्यु धकाः न धयादीगु खः । नियमित ज्यायाना निदँया दुने ज्या क्वचायेके माः धकाः बिचाः तया दीगु खः । प्रक्रियाया परिपक्वता व क्षेत्रगत सहभागिताय् थ्व स्वया न्ह्यः यक्को ई वने धुकुगु दु धयादीगु दु ।
उगु ज्याझ्वलय् थःगु नुगः खँ तयादीसे पुननिर्माण समितिया अध्यक्ष नाप येँ क्षेत्र नं. ८ क पाखे प्रदेश सभाया सदस्य राजेश शाक्यं स्थानीय भावना नाप प्राचीन सम्पदाया मर्म बमोजिम ईलय् हे पुननिर्माणया ज्या क्वचायेकिगु धकाः प्रतिवद्धता प्वकादील ।
उगु ज्याझ्वलय् वाङ्गमय शताब्दी पुरुष सत्यमोहन जोशी, जनकवि दुर्गालाल श्रेष्ठ, प्रतिनिधि सभाया सदस्य जीवन राम श्रेष्ठ, प्रदेश सभाया सदस्य बसन्त मानन्धर, येँ महानगरपालिकाया उप मेयर हरिप्रभा खड्गी श्रेष्ठ, प्रमुख प्रशासकीय अधिकृत यादवप्रसाद कोइराला, पुरातत्व बिभागया महानिर्देशक भेष नारायण दाहाल, वडाअध्यक्ष नाप वडा सदस्यपिनिगु न ब्बति दुगु खः ।
स्वजन रघुवंशींया ‘एकल नृत्य साँझ’ जुइगु
नृपेन्द्रलाल श्रेष्ठ | अनलागा सप्तमी ११३८ ( जुन ८ २०१८ )
नृत्य निर्देशक संघ नेपाल, यल कचा व सांस्कृतिक संस्थान, राष्ट्रिय नाचघरया मंकाः ग्वसालय् कार्तिक प्याखनय् थःगु विस्कं पहिचान दयेके धुंकूम्ह २७ दँया ल्याय्म्ह प्याखंहुलामि स्वजन रघुवंशींया ‘एकल नृत्य साँझ २०७५’ जइत्यंगु दु ।
यल कचाया सचिव अनुप शाक्य थौ जुगु उजु ज्याझ्वःया जानकारी बियादीगु खः । अथेहे नृत्य निर्देशक संघ नेपालया नायः भुवनदास श्रेष्ठं नेपाःया हे थ्व न्हापांगु एकल नृत्य साँझ खः धया न दावी यानादील ।
नृत्य निर्देशक संघ नेपाल, यल कचां थौं छगु पत्रकार सम्मेलन याना प्याखंहुलामि स्वजन रघुवंशीं कार्तिक नाचया छुं अंश नापनापं नृत्यया नमस्कार व आराधना, परम्परागत चर्या नृत्य, लोकनृत्य, भरतनाट्यम, कत्थक, साल्सा, आमा (समापन नृत्य) यानाः च्यागु विधाया न्हपांगु एकल नृत्य प्रस्तुत यायेत्यंगु जानकारी बिइगु ज्या जुगु खः ।
थुगु ज्याझ्वः थ्व हे वइगु असारया ३ गते राष्ट्रिय नाचघरय् याये त्यंगु खः ।
उगु ज्याझवलय् नृत्य निर्देशक संघ नेपाल, यल कचाया संरक्षक नाप संस्थाया केन्द्रीय उपाध्यक्ष संजय शर्मा राजोपाध्यायं ‘कार्तिक प्याखं कतिं पुन्हि इलय् जकः क्यना च्वंगु खःसा आः व्यावसायिकरण यानाः थुकियात ल्यंका तयेगु नितिं खः धयादीसें थुकियात प्रचार प्रसार याना प्याखं हुलामियात छुं आर्थिक ग्वाहालि नं जुइ धकाः भलसा न कयादीगु खः ।
थ्व स्वया न्ह्यः नृत्य निर्देशक संघ नेपाल, यल कचां चर्या नृत्य प्रतियोगिता २०७४, उद्घोषण तालिम, चर्या नृत्य कार्याशाला गोष्ठी, अन्तर्रा्ष्ट्रिय नृत्य दिवश २०७५ नापं चर्या नृत्य गुरु पद्मराज बज्राचार्य (माईला गुरुजु) सम्मान ज्याझ्वःतक नं याये धुंकूगु खः धया जानकारी न बियादीगु खः ।
नेपालभाषा केन्द्रीय विभागया प्रमुखयात लसकुस
लहनान्युज | अनलागा सप्तमी ११३८ ( जुन ८ २०१८ )
विश्व वातावरण दिवसया लसताय् नेपालभाषा केन्द्रीय विभाग पाटन क्याम्पस दुने विभागया ल्यूने सिमा पीगु व न्हूम्ह विभागया प्रमुख सह–प्राध्यापक डा. ओमकारेश्वर श्रेष्ठयात लसकुस यायेगु ज्याझ्वः जुगु दु ।
मूपाहाँ यल महानगरपालिकाया प्रमुख चिरिबाबु महर्जन, यल १० नं वडा नायः नर्सिंङ व्यञ्जनकार, विभागया पूर्व प्रमुखपिं प्रा. प्रेमशान्ति तुलाधर, सह–प्रा. तुलसी लाल सिंह, सिर्जना प्रधान, शिक्षक शिक्षिकापिं, लुमन्ति दबूया नायः किरण केन रञ्जित, दबूया पुलांपिं नायःपिं व ब्वंमिपिसं थी थी जातया सिमा प्यूगु ज्या जुगु खः ।
मूपाहाँ यल महानगरपालिकाया प्रमुख चिरिबाबु महर्जनं सिमा पीगु जक मखु उकियात थः मस्त भाःपिना इलय् बलय् लः व साः बिया सुसाकुसाः यानाः मा थकाये फत धाःसा जक सिमा पिनागुया औचित्य दइ धकाः थःगु नुगः खँ तयादीगु खः ।
न्हूम्ह प्रमुख श्रेष्ठं थःगु प्यदँया कार्यकालय् नेपालभाषा केन्द्रीय विभागयात स्तरीय यायेगु नापं अध्ययन अनुसन्धान केन्द्रया रुपय् विकास यायेत यल महानगर पालिकानाप समन्वय व सहकार्य याना वनेगु बचं न बियादिल ।
उगु ज्याझ्वलय् नायः डा. गौतमं क्याम्पस दुने वाङ्मय शताब्दी पुरुष सत्यमोहन जोशीया म्यूजियम दयेकेया नितिं यल महानगर प्रमुख महर्जननाप माःगु कथंया ग्वाहालिया आसा नं यानादिल ।
पाटन क्याम्पस प्रमुख डा. माधव गौतमया नायःसुइ जुगु उग ज्याझवः विभागया शिक्षक राजित बहादुर श्रेष्ठं न्ह्याकादीगु खः ।
बुखँ अमिर मैया रञ्जित
किपा नेवाः सूचना केन्द्र
