Display Style:
Column Style
हल्चोकया जात्राय् ग्वाहालिया पिन्त सम्मान
लहनान्युज | तछलागा दुतिया ११३८ ( जुन ३० २०१८ )
श्री हल्चोक आकाश भैरवनाथ समन्वय समितिया ग्वसालय् थौं माईला पुतुवारयात हने ज्या याःगु दु । पुतुवार हल्चोक आकाश भैरव गुथिइ स्वःगु दशक तक मदिक्क नायः जुया जात्रा सुथां लाक्क न्ह्याकुलि छगु ज्याझ्वः दथुइ हना पौ नाप झीद्धः तका गुथिया नायः सागर पुतुवारं लःल्हानादील ।
अथेहे हल्चोक आकाश भैरव द्योया थाय् छगु दशक निसे पुजारी जुया च्वपिं थकुवा पुतुवार, नरबहादुर पुतुवार नाप समन्वय समुहया सल्लाहकारपिं शरदकुमार डंगोल व रबिकृष्ण श्रेष्ठया न समन्वय समुहया नायः सागर पुतुवारं दोसल्ला न्ययेका हनादीगु खः ।
समन्वय समुहया नायः सागर पुतुुवारया सभाधक्ष्य जुगु उगु ज्याझ्वलय् दुजः बिश्व शाक्यं लसकुस यानादीगु खःसा न्वकु सुरज पुतुवार, माईला पुतुवार, शरदकुमार डंगोल, रबिकृष्ण श्रेष्ठ व पुरुषोत्तम महर्जन पिन्सं थःथःगु नुगः खँ तयादीगु खः ।
उगु ज्याझ्वलय् दांभरी नृपेन्द्रलाल श्रेष्ठं थुगु हना ज्याझ्वः छगु एतिहासिक ज्या जुगु धयादीसें गुथिं जात्रा न्ह्याकेगु ज्याय् ग्वाहालि याना वयाच्वपिन्त आः थुकथ सम्मान याना वनिगु जुइ धकाः न धयादीगु दु ।
सचिव सुरेन्द्रभत्त श्रेष्ठ न्ह्याकादीगु उगु ज्याझ्वलय् समन्वय समुहया नायः सागर पुतुवारं जात्रा न्ह्याकेत थौ या ई तसक थाकुया च्वंगु दु धयादीसें आः थुगु समन्वय समुहया छु भचसां ग्वाहालि
जुइ धयादीगु खः ।
प्रहरी महानिरीक्षक सर्वेन्द्र खनालं पत्रकार सम्मेलनयात
लहनान्युज | तछलाथ्व पुन्हि ११३८ ( जुन २८ २०१८ )
प्रहरी महानिरीक्षक सर्वेन्द्र खनालं ३८ क्वीन्टल लुँ तस्करीया विषयय् अनुसन्धान जुयाच्वंगुलि थःम्ह छु हे न्ववाये मखु धयादीगु दु ।
महानिरीक्षक नियुक्त जुइ धुका न्हापागु पत्रकार सम्मेलन यासेें लुँ काण्डय् अनुसन्धान यायेत गृह मन्त्रालयं हे समिति गठन याना तःगुनि थ्व बारे थःम्ह छु हे टिप्पणी मयाःगु धकाः धयादीगु दु ।
आईजीपी खनालं शान्ति, सुरक्षा व अपराध अनुसन्धान स्वःगु हे थःगु न्हापागु प्राथमिकताय् तया ज्यायायेगु धकाः न धयादीगु खः ।
अथेहे प्रहरी संगठनय् नं संघीयता कथं ह्युपाः हया कानुन दयेका नाप विशेष प्रहरी ज्याय् प्राथमिकता बिया ज्यायेगु न जानकारी बियादील ।
विशेष प्रहरी ज्याझ्वलय् लागू वासः नियन्त्रण मानव बेचबिखन विरुद्ध अभियान न न्ह्याःवनि धकाः न धयादली ।
पुलांम्ह वडाध्यक्ष मिठ्ठाबहादुर मानन्धर मन्त
लहनान्युज | तछलाथ्व चर्तुदशी ( जुन २७ २०१८ )
येँ महानगरपालिका २८ वडा (साबिक २५ वडा)या पुलांम्ह वडाध्यक्ष मिठ्ठाबहादुर मानन्धर बुधवाः ८० दँय् मन्त ।
मदुम्ह मानन्धर नेपालभाषाया कार्यकर्ता्लिसें जन चिकित्सालयया नायः नं खः । मदुम्ह मानन्धरयात चीधिकःम्ह म्ह्याय् कमला मानन्धरं मिँ तःगु खः ।
मय्जु मानन्धर नेपालभाषा क्लबया अध्यक्ष व कन्या मन्दिर माविया नेपालभाषा शिक्षिका खः ।
मदुम्ह मानन्धर नेपालभाषा कार्यकर्ता , जनचिकित्सालयया अध्यक्ष, नेपाल लिपि गुथिया मू दुजः विमला मानन्धरया अबुजु खः ।
भिक्षु अश्वघोष महास्थविरया ९२ क्वःगु बुदिं हन
लहनान्युज | तछलाथ्व चर्तुदशी ( जुन २७ २०१८ )
नेपाःया संघनायक (जेष्ठ) भिक्षु अश्वघोष महास्थविरया ९२ क्वःगु बुदिं छगु ज्याझ्वः दथुइ हंगु दु । बुदिं हनेगु झ्वलय् वयकःया शिष्य भिक्षु कोण्डन्यं थः गुरु भिक्षु अश्वघोषया च्वसु मुना ‘भिक्षु अश्वघोषका छानिएका रचनाहरु’ सफु उपहार देछानादीगु खः ।
उगु भिक्षु कौण्डन्यं सम्पादनयाना दीगु सफू छगु छगु ज्याझ्वः दथुइ उपसंघनायक भिक्षु ज्ञाणपूर्णिक महास्थविरं बिमोचन यानादीगु खः ।
भिक्षु अश्वघोषं सच्छि स्वया अप्व सफूति पिहा वयाच्वंगु च्वसु मुना भिक्षु कौण्डन्यं सम्पादन याना उगु सफू प्रकाशन याःगस खः। थःगु न्ह्यगु दशक न्ह्यः याःगु च्वसू महत्वपूर्ण व विचारोत्तजेक च्वसु छथाय् मुना सफूया रुपय् थःगु बुदिंया झ्वलय् थ थे उपहार देछाइगु धइगु भिक्षु अश्वघोषं कल्पना तक मयानगु धयादीगु खः ।
‘थुगु सफुतिं भिक्षु अश्वघोष बुद्ध धर्मप्रति गज्यागु दृष्टिकोण दु धयागु स्पष्ट थुइके फइ । थुगु सफूति भिक्षु अश्वघोषया बुद्ध धर्मप्रतिया झुकाव गज्यागु धका सिइकेत ग्वहालि जुइ धकाः भिक्षु कौण्डन्यं कनादीगु खः । सफुति बुद्ध धमया थीथी पक्षया विश्लेषण व आलोचनात्मक कथया च्वसु नाप बुद्धया महत्वपूर्ण व आधारभुत विचारधाराया ४१ गु च्वसु दु ।
वासः यायेगु झ्वलय् निर्दँ चीनय् च्वनादीगु झ्वलय् चिनिया कम्युनिष्ट नेता माओत्सेतुङ नाप लाना दी वलय् वयकःया पाखें तसकं प्रभावित जुया भिक्षु २०४७ निसे २०४९ तक तत्कालीन नेकपा (एमाले) पार्टीपाखे राष्ट्रिय सभाया सदस्य जुयादीगु खः ।
उगु इलय् मनमोहन अधिकारी प्रधानमन्त्री जुयादीगु इलय् वयकःयात लुम्बिनी विकास कोषय् उपाध्यक्ष न नियुक्ति याःगु खः । ‘प्रगतिशील व क्रान्तिकारी भिक्षुया रुपय् म्हसिका दिम्ह भिक्षुया छवि उगु सफुतिं क्यनादिगु दु ।्
‘अझ न म्वायेगु जाँगर चल जुल’ भिक्षु अश्वघोष
‘बुदिंया झ्वलय् थी थी मनू पाखे भिक्षु अश्वघोषयात उपहार न लःल्हाना दीगु खः ।
थुगु सद्भाव, मैत्री व पुलापि पासापिनिगु नाप लाये दगुनि थःतसक आनन्दया अनुभूत जुगु धयादील । थुगु ज्याझ्वः न थःगु मनोबल यक्को थःहा वःगुु धका न धयादील । थुकिइ याना अझ म्वायेत आश न भिक्षु अश्वघोषं यानादील ।
किपूलि सम्पदा व पर्यटन बिषया अन्तरक्रिया
नृपेन्द्रलाल श्रेष्ठ | तछलाथ्व नवमी ११३८ ( जुन २२ २०१८ )
किपू नगरय संस्कृति सम्पदा व पर्यटन प्रबर्द्धन यायेगु लागि संचारमाध्यमया भूमिका विषय छगु अन्तरक्रिया ज्याझ्वःजुगु दु । ज्याझ्वलय् मूपाहाँ किपू नगरपालिकाया मेयर रमेश महर्जनं उलेज्या यानादीगु खः ।
मेयर भाजु महर्जनं चन्द्रागिरी डाडाँ स्वया चम्पादेवी–धिनाचो डाडाँ स्वनिगः नाप सगरमाथा तकं बालक्क खनेदूगु डाँडा जूगुलिं पर्यटक तयेन आकषर्णयाना न्ह्याइपुक्क स्वनिगः व हिमाल अवलोकन यायेफइगु अवस्था दू धकाः धयादीसें किपू नगरपालिकां धिनाचो–चम्पादेवी डाडाँय् केबुलकार निर्माण यायेगु योजना दु खँ न न्ह्यथनादील खः ।
उगु केबुलकार निर्माण यायेगु लागि किपू नगरपालिका ५१ प्रतिशत व मेमेगु संघसंस्थापाखें ४९ प्रतिशत लगानी यानाः केबुलकार निर्माण यायेगु जुइ धकाः न धयादील । वय्कलं विकास निर्माणया ज्याया बालाक्क प्रचारप्रसार मजूगुलिं असुन्तोष न प्वकादील ।
नेवाः पत्रकार राष्ट्रिय दबूया ग्वसालय् जुगु किपू नगरया संस्कृति सम्पदा व पर्यटन प्रबर्द्धनय् संचारमाध्यमया भूमिका विषयस अन्तरक्रिया ज्याझ्वः थौ जुगु खः ।
उगु ज्याझ्वलय् सगरमाथा गयेत ताःलाःपिं पत्रकारपिं कल्पना महर्जन व पूर्णिमा श्रेष्ठयात थौं हे उगु ज्याझ्वलय पत्रकार दबूपाखें हनेगु ज्या नं जूगु खः ।
ज्याझ्वलय् दबूया नायः श्रीकृष्ण महर्जनं सभापतिय् जुगु उगु ज्याझ्वः मूपाहाँ कथं किपू नगरपालिकाया मेयर रमेश महर्जन, किपू नगरपालिकाया पर्यटन विभागया प्रमुख लिसें किपू नपा २ वडाया वडाध्यक्ष रमेशमान डंगोल, दबूया सल्लाहकारपिं बरिष्ठ संचारकःमि पुष्करभक्त माथेमा व नेपालभाषा टाइम्सया सम्पादक सुरेशकिरण मानन्धर, पर्यटनविद् दिलेन्द्र श्रेष्ठदबू, न्वकुपिं सुरजवीर बज्राचार्य व नृपेन्द्रलाल श्रेष्ठ व दांभरी सुरेन्द्रभत्त श्रेष्ठ न झायादीगु खः ।
नजरराम महर्जनं न्ह्याकादीगु उगु ज्याझ्वलय् दबूया मू छ्याञ्जे सुनील महर्जनं ज्याझ्वःया बारे जानकारी बियादीगु उगु ज्याझ्वलय् दबूया येँ जि ल्लाया नायः नातिकाजि महर्जन सुभाय् बियादीगु खः ।
