Display Style:
Column Style
‘नेपालभाषा व बुद्धधर्म च्वन्ह्याकेत नेवाः तय्सं छ्यूगु पलाः’ पितब्वज्या
लहनान्युज | दिल्लागा पारु ११३८ ( जुलाई २८ २०१८ )
डा. फ्रेडरिक मोरोन्भालं च्वयादीगु द मिशन अफ द नेवार्स अपहो ल्डिंग नेपालभाषा एण्ड बुद्ध धर्म सफू यात विष्णु चित्रकार व सिचु चित्रकारपिसं भाय् हिलाः ‘नेपालभाषा व बुद्धधर्म च्वन्ह्याकेत नेवाः तय्सं छ्यूगु पलाः’ तःजिक ज्याझ्वः दथुइ पितब्वज्या जूगु दु ।
उगु ज्याझ्वलय् मूपाहाँ शताब्दी पुरूष सत्यमोहन जोशी व जनकवि दुर्गालाल श्रेष्ठं मंकाः कथं सफू पितब्वज्या यानादीगु खःसा विशेषपाहाँ कथं फ्रान्सया काउन्सिलर आर्नो सम्पि झायादीगु खः ।
ज्याझ्वलय् मूज्या नायः दुर्गालाल श्रेष्ठं उगु सफुतिइ दुथ्यागु चिनाखँ ब्वनाः न्यंकादीगु खः । उपकुलपति डा. नरेशमान बज्राचार्यं न्हापा न्हापा गुर्जुपिसं कनेमत्यः धकाः थथे अध्ययन अनुसन्धान याःवइपिन्त पूवंक ध्वाथुइक स्यनेकने यानाच्वंगु खने मदु ।
यदि नेवाः तय्गु भाषा, धर्म, संस्कृति हलिं न्यंक च्वंपिं मनूतय्सं सिइके बिइगु खःसा ताकंताकं मखु थम्हं बांलाक्क स्यूगुखँ ध्वाथुइक पूवंक स्यनेकने यानाविइमागु खँ कनादिल । ‘जि नेवाः भाय् मसः । अय्सांं जिगु भाय् नेवाः भाय् खः ।’ धइगु छम्ह नेवाः भाय्या आन्दोलनय् ब्वति कयाच्वंम्ह ल्याय्म्हया धापुतिं प्रभावित जुयाः नेवाःतय्गु भाय् धर्म व संस्कृतिया स्थिति दुग्यंक अध्ययन यायेत प्यदँ तक स्वनिगलय् च्वनाः थःगु हे मिखां स्वयाः सिइकाः एजम यानादिल ।
उगु हे सोधपत्रया लिधंसाय् च्वःगु थुगु सफूतिइ थौंया नेवाःतय्गु स्थितिया न्हाय्कं जुयाच्वंगु दु धयागु खँ सफूया भाय् ह्यूम्ह विष्णु चित्रकारं धयादिल नापं थौंया नेवातय्गु भविष्य नेवाःतय्गु थःगु हे ल्हाःतिइ लानाच्वंगु दु धइगु खँ नं कनादिल ।
ज्याझ्वः डा. फ्रेडरिकया ब्वनाय् बिद्या चित्रकारं न्ह्याकादीगु ज्याझ्वलय् नुगः खँ तयेगु झ्वलय् नेवाः न्ह्यलुवा मल्ल के सुन्दरं नेपाल भाषा आन्दोलनया खँ उगु सफुतिइ दुमथ्याःगु खँ कनादिल ।
बुखँ नेवाः सूचना केन्द्र
किपा राजेन्द्र रञ्जित
अन्तर्राष्ट्रिय ध्यान केन्द्र दय्केज्या न्ह्यानाच्वन
नृपेन्द्रलाल श्रेष्ठ | दिल्लाथ्व एकादशी ११३८ (जुलाई २३ २०१८ )
यलया नख्खुइ च्वंगु मंगलमार्ग अन्तर्राष्ट्रिय बौद्ध ध्यान केन्द्रय् न्यागू फिट तःजाःगु फाइबरया बुद्ध मूर्ति प्रतिस्थापन यात ।
अखिल नेपाल भिक्षु महासंघया नायः भिक्षु मैत्री महास्थविरं बुद्ध बचन पाठ याना बिज्यासें उगु मूर्तिया छगू ज्याझ्वःया दथुइ अनावरण याना बिज्यात । नापं भिक्षु मैत्रीं ध्यान केन्द्र दय्केज्यां शान्ति, करुणा व आध्यामिक ज्ञानया विकासय् महत्वपूर्ण तिबः बीगु नं विश्वास प्वंका बिज्यात ।
अनावरणलिपा महासंघया मूछ्याञ्जे भिक्षु कौण्डन्य, भिक्षु पञ्ञारतन, भिक्षु पञ्ञासार, भिक्षु धर्मानन्द व भिक्षु तिस्सं शान्ति, मैत्रीया कामना याना बिज्यासें परित्राण पाठ याना बिज्याःगु खः ।
प्रदेश नं. ३या प्रदेशसभा दुजः शोभा शाक्य, बौद्ध विहार संघया नायः पुष्परत्न शाक्यं न्ववानादीगु उगु ज्याझ्वलय् केन्द्रया न्वकू रामकाजी अवालें भवन दय्केज्या झ्वलय् जूगु प्रगति विवरण न्ह्यब्वयादीगु खः । थ्व हे झ्वलय् कलाकार प्रचण्ड शाक्यं दय्कादीगु कलात्मक मूर्तिं दाता तीर्थ शाक्यं उगु ध्यान केन्द्रयात लःल्हानादीगु खः ।
स्थानीय पूर्णचण्डी, गाःबहालय् च्वंपिं दाता दशलाल डंगोल व वय्कःया जहान राममाया महर्जनं काय्पिं राम, रामकृष्ण, रत्न महर्जनलिसेंया छेँजःपिनिगु सहमतिइ ध्यान केन्द्र दय्केत छपी व छगू आना जग्गा दच्छि न्ह्यः दान बियादीगु खः ।
जनजाति पत्रकार पाखें मुख्यमन्त्रीयात ज्ञापन पौ
नृपेन्द्रलाल श्रेष्ठ | एकादशी थ्व नवमी ११३८ ( जुलाई २२ २०१८ )
नेपाल आदिवासी जनजाति पत्रकार महासंघ(फोनिज) प्रदेश ३ पाखें प्रदेशया मुख्यमन्त्री डोरमणि पौडेलयात थी थी माग तया ज्ञापन पत्र लःल्हागु दु ।
फोनिज प्रदेश समितिया ग्वसालय् सञ्चारनाप प्रदेश सरकार सम्बन्धित ऐन कानून व समावेशी बिषयक प्रदेशस्तरीय कार्यशाला गोष्ठी वःगु शुक्रवाः प्रदेश ३ प्रदेश ईन्चार्ज समीर बलामीं १७ बुँदे माग नाप मुख्यमन्त्री पौडेललाई ज्ञापन पत्र लःल्हागु खः ।
उगु ज्ञापनपत्रय् तामाङ व नेवाः जातिया बाहुल्यता दुगु ३ नं प्रदेशय् पहिचान सहितया प्रदेश नामाकरण याना ताम्सालिङ नेपामण्डल तयेत इनाप याःगु खः ।
‘सरकारी विज्ञापनयात समावेशी निती हया दक्को सित समान याना आदिवासी जनजाति मूलया भाषागत संचार माध्यमयात विशेष प्रथामिकता बिया आदिवासी जनजाति मूलया भाषागत संचार माध्यमयात म्वाका तयेत ग्वाहालि यायेत न इनाप याःगु खः ।
‘छगु वडा छम्ह पत्रकारया रुपय् प्रदेश ३ यात म्हसिकेत स्थानीय तह नाप मिलेजुया आधारभुत पत्रकारिता तालिमया व्यवस्था यायेत व वडागत रुपय् सत्य तथ्य सुचः प्रशारण यायेत, याकेत व्यबस्था मिले यायेत ज्ञापनपत्रय् धाःगु खः ।
प्रदेश ३ आदिवासी जनजाति तयेगु बहुल्यता दुगु कारणं प्रदेश दुने रेडियो ् म्हति १÷१ ल्याखं तामाङ व नेपालभाषाया समाचार प्रशारण यायेत प्रेरित याये माःगु खँय् बःबिया सरकारी तहय् वा मेमेगु छ् नं सरकारी ज्या खँय् पत्रकार नाप प्रेस सल्लाहकारपि नियुक्ती याये वलय् आदिवासी जनजाति मूलया पत्रकारपिन्त न्हापांगु प्राथमिकता बिइ माःगु खँय् न बः बिगु खः ।
फोनिज मकवानपुरं समन्वय याःगु उगु ज्याझ्वलय् भुमी व्यबस्था, कृषि तथा सहकारी मन्त्री दावा दोर्जे लामा, प्रदेश सांसदपिं कुमारी मोक्तान, जीवन डंगोल, नेपाल आदिवासी जनजाति पत्रकार महासंघया केन्द्रिय अध्यक्ष डण्ड गुरुङ्ग, नेपाल पत्रकार महासंघया प्रदेश अध्यक्ष प्रताप विष्टपिस उगु ज्याझ्वलय् ब्बति कागु खः ।
फोनिज प्रदेश ३ या उगु भेला शुक्रवाः व शनिवाः निन्हु यकं जुगु खः । उगु भेलां ७ बुँदे हेटौंडा घोषणापत्र नं जारी यागु खः ।
अथेहे बाग्लुङ्गय् जीप दुर्घटनाय् तसकं घाःपाः जुम्ह फोनिजया पूर्व अध्यक्ष नाप नेपाल पत्रकार महासंघया पूर्व महासचिव उजिर मगरयात ग्वाहालि यायेत मकवानपुर, धादिङ, रामेछाप, सिन्धुली, काठमाडौं, चितवन लगायत जिल्लाया प्रतिनिधि पिन्सं २३ हजार ५ सय नगद फोनिजया प्रदेश ईन्चार्ज समीर बलामीं लःहागु खः ।
धर्मादित्य धर्माचार्य सिरपा लःल्हात
लहनान्युुज | दिल्लाथ्व नवमी ११३८ ( जुलाई २१ २०१८ )
मां भाय् पुचः यलया ग्वसालय् थौं छगु ज्याझ्वः दथुइ झिंन्हय् क्वःगु धर्मादित्य धर्माचार्य सिरपा व धर्मादित्य धर्माचार्य हना ज्याझ्वः जुगु दु ।
मूपाहाँ छत्रबहादुर कायस्थं देविचन्द्र श्रेष्ठयात धर्मादित्य धर्माचार्य सिरपा नाप झीद्धः तका व धर्मादित्य धर्माचार्य हना साहित्यकार तिलक प्रकाश कायस्थयात थौं छगु ज्याझ्वः दथुइ हना दिगु खः ।
मूपाहाँ कायष्ठं उगु ज्याझ्वलय् प्रकाश शाक्यया बाखं सफू इमिगु छेँ स्यंकेमतेया बिमोचन न यानादीगु खः ।
उगु ज्याझ्वलय् मूपाहाँ कायष्ठं धर्मादित्य धर्माचार्यया थौं तक न ज्याया कदर याना च्वंगुनि मां भाय् पुचःया प्रशंसा न यानादील ।
पुचःया नायः हेरारत्न शाक्य सभाध्यक्षताय् जुगु उगु ज्याझ्लय् ल्यज्या कवःया नायः डा. पुष्पराज राजकर्णिकार, नेपालभाषा केन्द्रिय विभागया नायः डा. ओमकारेश्वर श्रेष्ठ, नेपालभाषा मंकाः खलः यलया नायः ऋषिप्रसाद श्रेष्ठ, देविचन्द्र श्रेष्ठ व साहित्यकार तिलक प्रकाश कायस्थ न थःथःगु नुगः खँ तयादीगु खः ।
‘ए बेबीज् मदर’ व ‘पामिला’ नं पिदन
लहनान्युज | दिल्लाथ्व चौथी ११३८ ( जुलाई १६ २०१८ )
वरिष्ठ उपन्यासकार भाषाथुवाः मथुरा साय्मिया पुलांगु उपन्यास “मचायामां” या अंग्रेजी अनुवाद “ए बेबीज् मदर” व उपन्यासकार राज साय्मिया सामाजिक उपन्यास “पामिला”या पितब्वज्या जूगु दु ।
येँय् जूगु छगू ज्याझ्वःया दथुइ वरिष्ठ भाषाविद् डा. तेजरत्न कंसाकारं उगु सपूmया पितब्वज्या यानादीगु खः । कविकेशरी चित्तधर हृदयया “सुगत सौरभ”अनुवाद यानादीम्ह डा. कंसाकारं नेवाः सभ्यता, संस्कृति, कला, साहित्ययात तब्याका यंकेगु नितिं नेवाः साहित्य, कृतिया अनुवाद जुइ माःगु खँय् बः बियादिल ।
ज्याझ्वलय् पितब्वज्या जूगु उपन्यासकार साय्मिया उपन्यासयात पत्रकार राजेन मानन्धरं अंग्रेजीभासं अनुवाद याना दीगु खःसा “पामिला” जासुसी उपन्यास च्वया वयाच्वना दीम्ह उपन्यासकार राज साय्मिया न्हापांगु सामाजिक उपन्यास खः ।
ज्याझ्वः कुतः पिकाकया ग्वसालय् जूगु खः ।
